Ngan leit sha ka United Arab Emirates na ka bynta ka kam ha ka 13-14 tarik u Rymphang bad sha Qatar ha ka 14-15 tarik u Rymphang. Kane kan dei ka sien kaba hynniew ba ngan leit sha UAE bad ka sien kaba ar ba ngan leit sha Qatar naduh u snem 2014.

Ha kine ki khyndai snem ba la dep, ka jingiatreilang jong ngi bad ka UAE ha ki kam bapher bapher kum ka khaii pateng bad ka jingbei tyngka, ka jingiada bad ka jingshngain, ka jingshngain ha ka bam bad ka bording bad ka pule puthi ka la kiew bun bun shah. Ka jingiadei lyngba ka deiriti bad ki jingiadei hapdeng ki briew jong ngi ka kham khlain mynta ban ha ki por mynshuwa.

Nga khmih lynti ban iakynduh ia u Sheikh Mohamed bin Zayed Al Nahyan, u President ka UAE, ha Abu Dabi bad iakren bad u shaphang ki kam bapher bapher ban pyntyllun shakhmat ia ki Jingiatreilang ba Pura jong ngi. Nga la ioh lad ban pdiang ia u dang shen ha Gujarat ha kaba u la long u kongsan ha ka Vibrant Gujarat Global Summit 2024.

Ha ka jingkhot sngewbha jong u Sheikh Mohammed bin Rashid Al Maktoum, Vice President, Myntri Rangbah Duh bad Myntri ka Tnat Kam Iada Ri ka UAE bad Nongsynshar ka Dubai, ngan ai jingkren ha ka jingialang jong ki nongialam jong ka pyrthei ha ka World Government Summit ha Dubai ha ka 14 tarik u Rymphang 2024. Ki jingiakren jong nga bad u Myntri Rangbah Duh, Sheikh Mohammed bin Rashid ha kane ka jaka ba pynlong ia kane ka Summit kin phaikhmat sha ki jingiadei ba bun jong ngi bad ka Dubai.

Ha kane ka jingleit jong nga, ngan plie paidbah ruh ia ka Hindu Mandir ba nyngkong ha Abu Dhabi. Ka BAPS temple kan long ka dak kaba iaineh jong ka jingngeit ha ka jingia-im lang ha ka jingsuk, ka shongsuk shongsain bad ka jingiashah lang, kiba ka India bad ka UAE ki don.

Ngan ai jingkren ia ki briew kiba na India kiba don mynta ha baroh ki Emirate jong ka UAE ha ka jingialang ba kyrpang ha Abu Dhabi.

Ha Qatar, nga khmih lynti ban iakynduh ia u Sheikh Tamim bin Hamad Al Thani, u Amir, uba la ialam lynti ia ka Qatar sha ka jingsakhi ia ka roi ka par bad ka jingkylla kaba khraw. Nga khmih lynti ruh ban iakynduh ia ki kynrem ki lyndan ha Qatar.

Ka India bad Qatar ki don ka jingiadei paralok naduh ki por mynshuwa, Ha ki snem ba la dep, ka jingiadei jong ngi ka la kham khlain shuh shuh ha ki kam bapher bapher kum ka sain pyrthei, ka khaii pateng bad ka jingiabei tyngka hapdeng ki ar tylli ki ri, ka jingpynkhlain ia ka jingiatreilang jong ngi ha ki kam bording, bad ka jingiatreilang ha ka deiriti bad ka pule puthi. Ka jingdon haduh 800,000 ngut ki briew jong ka India ha Doha ka dei ka dak jong ka jingiadei kaba khlain hapdeng ki briew.

***