প্রধানমন্ত্রীগী লোইশঙ
লো সভাদা রাস্ত্রপতিগী ভাশনগী থাগৎপা ফোঙদোকপগী মোসনদা পীখিবা পি.এম.গী পাউখুম
“রাস্ত্রপতিগী ৱারোলনা ভারতকী চাউখৎ খোঙচৎকী খোঙজেল অমসুং পাকচাউবা অদু তাক্লি”
“দাইনাস্তিক পোলিতিক্স অসি ভারতকী দেমোক্রেসী ওইনা নুংনাংনীংঙাই ওইবা মরম অমা ওইরি”
“মোদীগী গরেন্তী অসি অহুমশুবা তর্মদা ভারতনা মালেমগী খ্বাইদগী চাউবা 3শুবা ইকনোমী ওইরক্কনি হায়বা অসিনি”
“অহানবা তর্মদা ঐখোয়না মমাংগী সরকারশিংগী পোৎহোলশিং মেনশিনখি, অনিশুবা তর্মদা ঐখোয়না অনৌবা ভারতকী য়ুম্ফম থোনখি, অহুমশুবা তর্মদা ভিকসিৎ ভারতকী চাউখৎ খোঙজেল য়াংশিনহনগনি”
“অৱাংদগী খা, অমসুং নোংপোক্তগী নোংচুপ ফাওবা মীয়াম্না পন্দুনা লৈরম্বা প্রোজেক্তশিং মতম চানা লোইশিনবা উবা ফংলি”
“অয়োধ্যাদা রাম মন্দিরনা ভারতকী অথোইবা নাৎ অমদি চৎনবীদা শক্তি মখা তানা পীরগনি”
“সরকারগী অহুমশুবা তর্মনা মথংগী চহি 1000গীদমক ভারতকী য়ুম্ফম থোনগনি”
“হৌজিক লৈবাক্কী মমোমশিংগীদমক থোং লোনবা অদুগুম্বা সেক্তর অমত্তা ভারত্তা লৈত্রে ”
“মা ভারতী অমসুং মাগী প্রজা করোর 140 চাউখৎহনবদা ঐহাক্না নখোয়না মতেং পীবীনবা হায়জরি”
Posted On:
05 FEB 2024 8:24PM by PIB Imphal
ঙসি লোক সভাদা রাস্ত্রপতিনা সম্বিধানদা ৱা ঙাংবগী মোসন ওফ থেঙ্কসকী পাউখুম প্রধান মন্ত্রীনা পীখ্রে।
প্রধান মন্ত্রীনা অনৌবা হাউস অসিদা রাস্ত্রপতিজীনা মহাক্কী ৱারোল পীনবা থুংলবা অমসুং পার্লিয়ামেন্তরিয়নশিংনা মহাক্কী তুং ইন্দুনা লাকপদা ইকাই খুম্নবগা লোয়ননা চৎখিবা প্রোসেসনবু সেঙ্গোলনা লমজিংখিবা অদুগী মতাংদা পল্লদুনা মহাক্কী ৱারোল পীবা হৌখি। পি.এম. মোদীনা হায় লেগেসী অসিনা হাউস অসিগী ইকাই খুম্নবা শরুক কয়া হেনগৎহনখি অমসুং 75শুবা রিপব্লিক দে, অনৌবা পার্লিয়ামেন্ত হাউস অমসুং সেঙ্গোলনা থুংলবা অসি য়াম্না মরু ওইবা থৌরমনি হায়খি। মহাক্না হাউসকী মেম্বরশিংনা রাস্ত্রপতিনা ৱা ঙাংখিবা অদুদা মখোয়গী ৱাখল্লোনশিং শরুক তমখিবগীদক থাগৎপা ফোঙদোকখ্রে।
প্রধান মন্ত্রীনা হায়খি রাস্ত্রপতিগী ৱারোল অসি ভারতকী চাউখৎ খোঙচৎকী খোঙজেল অমদি পাক চাউবা তাক্লিবা অচুম্বা ৱাফমশিংদা য়ুম্ফম ওইবা অচৌবা দোক্যুমেন্ত অমনি অমসুং লৈবাক অসি করিগুম্বা নারী শক্তি, য়ুবা শক্তি, লায়রবা অমসুং অন্নদাতাগী য়ুম্বী মরি অসি চাউখৎহল্লবা অমসুং মপাঙ্গল কনখৎহল্লবা মতমদা খক্তা খোঙজেল য়াংনা চাউখৎপা ঙমগনি হায়বা ৱাফমদা মীৎয়েং চীংশিনখি। মহাক্না য়ুম্বী মরি অসি মপাঙ্গল কনখৎহন্দুনা ভিকসিৎ ভারত ওইনবা লৈবাক্কী লম্বেল ঙান্থোকহন্নবা ফোঙদোকখি।
মপাঙ্গল কনবা বিরোধী অমগী মথৌ তাবগী মতাংদা ফোঙদোক্লদুনা প্রধান মন্ত্রীনা হায় দাইনাস্তিক পোলিতিক্স অসিনা ভারতকী দেমোক্রেসীদা নুংনাংবা পোকহন্নীংঙাই ওইবা মরম অমা ওইরি। দাইনাস্তিক পোলিতিক্সকী ৱাহন্থোক্কী মতাংদা ফোঙদোক্লদুনা প্রধান মন্ত্রীনা হায় মদুদি ইমুংগী মীওই কয়ানা মশাগী মপাঙ্গল অমদি মীয়ামগী সপ্পোর্তকা লোয়ননা মখোয়গী মাংদা লৈরিবা লম্বী য়াৎপগী মহুৎ ইমুং অমনা চল্লাইবা, মাগী ইমুংগী মীওইশিংবু মরু ওইনা লৌবা অমসুং ৱারেপ পুম্নমক ইমুংগী মীওইশিংনা লৌববা অদুগুম্বা দল অদু দাইনাস্তিক পোলিতিক্স কৌই। “লৈবাক অসিগী শেবা তৌনবা পোলিতিক্সতা থোরক্লিবা নহা ওইরিবা মীওই পুম্নমকপু তরাম্না ওকচরি”, হায়না ফোঙদোক্লদুনা পি.এম. মোদীনা দাইনাস্তিক পোলিতিক্সনা দেমোক্রেসীদা পীরিবা খুদোংথিবশিংদা পুক্নিং চীংশিনখি। মহাক্না পোলিতিক্সতা থোরক্লিবা কলচর অসিদা পেন্দবা ফোঙদোক্লদুনা হায়খি লৈবাক অসিগী চাউখৎ থৌরাং অসি শুপ্নগী মীওই অমা খক্তগী নত্তে প্রজা খুদিংমক্কীনি।
ঙসি মালেমনা থাগৎনরিবা ভারতকী মপাঙ্গল কনবা ইকনোমী অসিগী মতাংদা ফোঙদোক্লদুনা প্রধান মন্ত্রীনা হায়খি, “মোদীগী গরেন্তী অসি হৌজিক পাল্লিবা সরকারগী অহুমশুবা তর্মদা ভারতনা খ্বাইদগী চাউবা 3শুবা ইকনোমী ওইহনবনি”। মহাক্না হায় G20 সম্মিৎকী মাইপকপা অসিনা ভারত্তা মালেম্না খল্লিবা ৱাখল্লোন অদু তাক্লি।
জাতিবু চাউখৎ মাইকৈদা পুরিবা সরকারগী থৌদাং পল্লদুনা প্রধান মন্ত্রী মোদীনা মমাংগী সরকারনা 2014দা হাউস্তা পুথোকখিবা ইন্তেরিম বজেৎ অমসুং মতম অদুগী শেল-থুম মন্ত্রীনা থমখিবা ৱারোলদা পুক্নিং চীংশিনখি। মহাক্না হায়খি মতম অদুদা শেল-থুম মন্ত্রীনা ৱারোল পীবদা ভারত অসি মাগী GDPগী সাইজতা য়েংবদা ইকনোমীগী 11শুবা ইকনোমী ওইরি হায়খি অমরিমদা ঙসি লৈবাক অসিনা 5শুবদা লৈরি। মতম অদুগী শেল-থুম মন্ত্রীগী ৱারোল অদু পল্লদুনা প্রধান মন্ত্রীনা হায়খি লৈবাক অসিনা মথংগী দিকেদ 3দা USA অমসুং চিনাগী মতুংদা মালেমগী খ্বাইদগী চাউবা 3শুবা ইকনোমী ওইরকনি। “ঙসি ঐহাক্না জাতিদা থাজবা পীরি মদুদি পাল্লিবা সরকার অসিগী অহুমশুবা তর্মদা ভারতনা মালেমগী খ্বাইদগী চাউবা 3শুবা ইকনোমী ওইরগনি”।
ধান মন্ত্রী মোদীনা হায়খি মালেম পুম্বনা সরকারনা তৌরিবা থবক্কী খোঙজেল লোয়ননা মাগী অচৌবা পান্দমশিং অমসুং থৌনা অসিদা মীৎয়েং থম্মি। মহাক্না হাউস্তা হায়খি হৌজিক পাল্লিবা সরকার অসিনা খুঙ্গংগী লায়রবগীদমক য়ুম করোর 4 শাখি অমসুং সহরগী লায়রবগীদমক পক্কগী য়ুম লাখ 80 শাখি। হৌখিবা চহি 10 অসিদা রেলৱে লাইন 40,000 kms ইলেক্ত্রিফিকেসন তৌখি, এক্সত্রা গ্যাস কন্নেক্সন করোর 17 পীখি অমসুং সেনিতেসন কবরেজ অসি চাদা 40দগী চাদা 100দা হেনগৎহনখি।
মমাংগী সরকারশিংনা য়াইফনবগীদমক থমোয় শেংনা হোৎনরমদবা এপ্রোচ অমসুং ভারতকী মীয়ামদা থাজবা থমদবা অদুবু পেন্দবা ফোঙদোক্লদুনা প্রধান মন্ত্রীনা নৌনা ফোঙদোকখি মদুদি হৌজিক পাল্লিবা সরকারনা ভারতকী প্রজাশিংগী মপাঙ্গল অমসুং তৌবা ঙম্বশিংদা থাজবা থম্মি। মহাক্না হায়খি, “অহানবা তর্মদা ঐখোয়না মমাংগী সরকারশিংগী পোৎহোলশিং মেনশিনখি, অনিশুবা তর্মদা ঐখোয়না ন্যু ইন্দিয়াগী য়ুম্ফম থোনখি অমসুং অহুমশুবা তর্মদা ভিকসিৎ ভারত ওইনবা চাউখৎ থৌরাং খোঙজেল য়াংশিনহনগনি”। প্রধান মন্ত্রীনা অহানবা তর্মদা হৌদোকখিবা স্কিমশিংগী মতাংদা হায়খি অমসুং স্বচ্ছ ভারত, উজ্জ্বলা, আয়ুশ্মান ভারত, বেতি বচাও বেতি পরাও, সুগম্যা ভারত, দিজিতেল ইন্দিয়া অমসুং GST পনখি। মতৌ অসুম্না জাতি অসিনদা আর্তিকল 370 মুত্থৎপা, নারী শক্তি বন্দন অধিনিয়ম পাস তৌখিবা, ভারতীয় ন্যায় সমহিতা এদোপ্ত তৌখিবা, কান্নদ্রবা লো 40,000 হেন্না রিপীল তৌখিবা অমসুং ভন্দে ভারত অমদি নমো ভারত ত্রেনশিং অনিশুবা তর্মদা লোঞ্চ তৌবা উবা ফংখি। “অৱাংদগী মখা, নোংপোক্তগী নোংচুপ ফাওবা মীয়াম্না পন্দুনা লৈরম্বা প্রোজেক্তশিং মতম চানা লোইশিনবা উবা ফংখ্রে” হায়না মহাক্না ফোঙদোকখি। মহাক্না হায়খি মদুদি ভিকসিৎ ভারত সঙ্কল্প য়াত্রানা সরকারনা মীপুম খুদিংমক্তা তঙাই ফদবা খুদোংচাবশিং ফংহন্নবা মাইকৈদা কত্থোক্লিবা অমসুং খোঙফম চেৎনা লেপ্পীবা অসি উৎখি। রাম মন্দিরগী প্রান প্রতিস্থা তৌখিবগী মতাংদা ফোঙদোক্লদুনা পি.এম. মোদীনা হায়খি, “অয়োধ্যাদা রাম মন্দিরনা ভারতকী কলচর অমসুং ত্রেদিসন্দা শক্তি মখা তানা পীরগনি”।
প্রধান মন্ত্রী মোদীনা হৌজিক পাল্লিবা সরকারগী অহুমশুবা তর্মদা মরু ওইবা ৱারেপশিংদা মীৎয়েং চংগনি হায়খি। “সরকারগী অহুমশুবা তর্মদা মথংগী চহি 100গীদমক লৈবাক্কী য়ুম্ফমশিং থোনগনি” হায়না প্রধান মন্ত্রীনা ফোঙদোকখি। লৈবাক্কী প্রজা করোর 140গী তৌবা ঙম্বশিংদা থাজবা থম্লদুনা পি.এম. মোদীনা হায়খি হৌখিবা চহি 10দা লায়রবা মীওই করোর 25না লায়রবদগী থোরকপা ঙমখি। মহাক্না নৌহৌনা ফোঙদোকখি মদুদি লায়রবদা মতিক চাবা রিসোর্সশিং অমসুং মশানা মশাবু ইকাই খুম্নবা অসি ফংহল্লবা মতমদা লায়রবা মাইথীবা পীবা ঙমগনি। শ্রী মোদীনা হায়খি লায়রবা করোর 50না মশাগী বেঙ্ক একাউন্তশিং লৈরে, করোর 4না মশাগী য়ুমশিং লৈরের, করোর 11না তোতি ঈশিংগী কন্নেক্সন ফংলি, করোর 55না আয়ুশ্মন কার্দ পাইরে অমসুং মীওই করোর 80 না লেম্না রাসন ফংলি। “মোদীনা কনাগুম্বা অমত্তনা মীৎয়েং চংবীরমদবশিংগীদমক খল্লি”, হায়না শ্রী মোদীনা ফোঙদোক্লদুনা স্ত্রীৎ ভেন্দরশিংনা হৌজিক পি.এম. স্বনিধিগী মখাদা ইন্তরেস্ত য়াওদবা লোনশিং ফংহনখ্রে, আর্তিসান অমসুং খুৎহৈবশিংগীদমক বিশ্বকর্মা য়োজনা, পার্তিক্যুলর্লী ভলনরেবল ত্রাইবেল গ্রুপশিংগীদমক পি.এম. জনমান য়োজনা, ঙমখৈগী মফমশিং চাউখৎহন্নবা ভাইব্রেন্ত ভিলেজ প্রোগ্রাম, মিল্লেৎতা পুথোকপদা মীৎয়েং চংবা, ভোকেল ফোর লোকেল, অমসুং খাদী সেক্তর মপাঙ্গল কনখৎহনখিব অসিগী মতাংদা ফোঙদোকখি।
পি.এম. মোদীনা শ্রী করপুরি থাকুরদা ভারত রত্ন পীখিবা অমসুং অথোইবা মীশক অসি মমাংগী সরকারশিংনা করম্না ইকাই খুম্নরমদবগে হায়বসু ফোঙদোকখি। মহাক্না 1970গী মতমদা শ্রী থাকুরনা বিহারগী মুখ্য মন্ত্রী ওইরম্বা মতমদা মহাক্কী সরকার লৌথোক্নবা হোৎনখিবশিং অদু নীংশিংখি।
প্রধান মন্ত্রীনা সরকারনা ভারতকী নারী শক্তি মপাঙ্গল কনখৎহনবদা শরুক তমখি হায়খি। “হৌজিক লৈবাক অসিদা ইচানুপীশিংগীদমক থোংলোনবা অদুগুম্বা সেক্তর অমত্তা লৈত্রে। মখোয়না ফাইতর জেৎশিং পাইরি অমসুং ঙমখৈশিং শাফনা থম্মি” হায়না চাউথোকচবনা থল্লবা প্রধান মন্ত্রীনা ফোঙদোকখি। মহাক্না মেম্বর করোর তরা হেন্না লৈবা নুপী সেল্ফ-হেল্প গ্রুপশিংগী তৌবা ঙম্বদা থাজবা থমখি অমসুং মসিনা ভারতকী রুরেল ইকনোমীদা শাহৌ পীরি হায়খি। পি.এম. মোদীনা লাক্কদৌরিবা চহি খরা আসিদা লৈবাক অসিদা লাখপতি দিদি করোর অহুম লৈরগনি ফোঙদোকখি। মহাক্না নুপীমচা পোকপদা নুংঙাইবা ফোঙদোকপগী হোংলক্লিবা অহোংবা অসিদা নুংঙাইবা পোকখি অমসুং নুপীশিংগী পুন্সি লায়থোকহনবদা সরকরনা লৌখৎপা খোঙথাংশিংগী মতাংদা পাউদমখি।
লৌমীশিংগী য়াইফনবগীদমক ৱা ঙাংলদুনা প্রধান মন্ত্রীনা হায় লৌউ-শিংউগী বজেৎ অসি মমাং সরকারশিংন লুপা করোর 25,000 ওইরম্বদগী হৌজিক লুপা করোর লাখ 1.25দা হেনগৎহনখি। মহাক্না হায় পি.এম. কিসান সম্মান নিধিগী মখাদা লৌমীশিংদা করোর 2,80,000 পীখি, লুপা 30,000গী প্রিমিয়মদা পি.এম. ফসল বিমা য়োজনাগী মখাদা লুপা করোর 1,50,000 পীখি, ফিশরিজ অমসুং এনিমেল হসবেন্দ্রী মন্ত্রালয় শেমখি অমসুং ঙামী অমদি শা-শন লোইবশিংগীদমক পি.এম. কিসান ক্রেদিৎ কার্দশিং শাখি। মহাক্না শা-শনগী পুন্সি কন্নবগীদমক ফুত এন্দ মাউথ দিজিজকীদমক ভেক্সিনেসন করোর 50সু কাপখি।
ভারতকী নহারোলগীদমক শেমখিবা খুদোংচাবশিংগী মতাংদা প্রধান মন্ত্রীনা স্তার্তঅপ এজ, য়ুনিকোর্দনশিং থোরকপা, দিজিতেল ক্রিএতর অমসুং গিফ ইকনোমী থোরকপা অসি হায়খি। পি.এম. মোদীনা হায় ঙসি ভারতনা মালেমগী দিজিতেল ইকনোমীদা মাংজিল থারি অমসুং মসিনা ভারতকী নহারোলগীদমক অনৌবা খুদোংচাবা কয়ামরুম পীরগনি। মহাক্না ভারত্তা মোবাইল মেন্যুফেকচর তৌবা অমসুং অহোংবা দেধা ফংহনবগী মতাংদা ফোঙদোকখি। পি.এম. মোদীনা সরকারনা ভারতকী নহারোলশিংদা থবক্কী খুদোংচাবশিং অমসুং সোসিএল সেক্যুরিতী পীনবা সরকারগী এপ্রোচকী মতাংদা ফোঙদোকখি।
প্রধান মন্ত্রীনা হাউস্তা লৈবাক্কী ইনফ্রাস্ত্রকচর বজেৎ অসি 2014গী মমাং লুপা করোর লাখ 12 ওইরম্বা অদু হৌখিবা চহি 10দা লুপা করোর লাখ 44দা হেনগৎহনখি। মহাক্না অফবা সিস্তেমশিং অমসুং ইকনোমিক পোলিসীশিং দিবেলপ তৌদুনা লৈবাক অসিবু রিসর্চ অমদি ইন্নোভেসনগী হব অমা ওইহন্নবা মাইকৈদা ভারতকী নহারোলশিংগী পুক্নিং থৌগৎলি হায়খি। ইনর্জী সেক্তরদা লৈবাক অসিবু আত্মনির্ভর ওইহন্নবা সরকারগী খোঙথাংশিংগী মতাংদা পল্লদুনা প্রধান মন্রীনা ভারতনা গ্রীন হাইদ্রোজেন অমসুং সেমিকন্দক্তর সেক্তরশিংদা ইনভেস্তমেন্তশিং তৌবা মাংজিল থারি হায়খি।
প্রধান মন্ত্রীনা পোৎ মমল হেনগৎলকপগী মতাংদসু ফোঙদোকখি অমসুং 1974দা ইনফ্লেসনগী চাং 30% ওইরমখিবা অদু নীংশিংখি। মহাক্না ঙসিগী সরকারনা লান অনি অমসুং কোরোনা ভাইরস লাইচৎ মরক্তা লৈবাক অসিগী পোৎকী মমল চেক তৌদুনা থমখিবগীদমক থাগৎখি। পি.এম. মোদীনা হাউস্তা লৈবাক্কী স্কেমশিংগী মতাংদা খন্নখিবা মতম অদু নীংশিং। মহাক্না PMLAগী মখাদা কেসশিং শরুক অনি হেনগৎলকখি অমসুং এনফোর্সমেন্ত দিরেক্তোরেৎনা ফাগৎপা অসি লুপা করোর 5,000 দগী লুপা করোর 1দা হেনগৎহনখি। “ফাগৎখিবা ফন্দ পুম্নমক লায়রবশিংগী য়াইফনবগীদমক শীজিন্নখি” হায়না মহাক্না মখা তারদুনা হায়, দাইরেক্ত বেনিফিৎ ত্রান্সফরগী খুত্থাংদা লুপা করোর লাখ 30 কাইথখি।
প্রধান মন্ত্রীনা অরোইবা ফাওবা শেঞ্জা থুমজা থেংনগনি ৱাশকখি। মহাক্না হায় “লৈবাক অসিদগী লুৎ তৌখিবশিংনা শোইদনা শীংগদবনি”। সরকারনা লৈবাক অসিদা শান্তি অমদি তংদু লৈতাবা ফীভম পুরক্নবা লৌখৎলিবা খোঙথাংশিং থাগৎলদুনা প্রধান মন্ত্রীনা নৌহৌনা হায় মালেমনা ভারতকী জিরো তোলরেন্স ফোর তেরোরিজমগী পোলিসী অসি ঙাক্না চৎলি। মহাক্না সেপরেতিজমগী ৱাখল্লোনবু থাগৎলদুনা ভারতকী দিফেন্স ফোর্সকী মতিক ময়াইদা চাউথোকপা পোকখি অমসুং থাজবা থমখি। মহাক্না জম্মু অমসুং কাশ্মিরদা পাইখৎলিবা চাউখৎ-থৌরাংশিংবু থাগৎখি।
প্রধান মন্ত্রী মোদীনা হাউসকী মেম্বরশিংদা লৈবাক অসি চাউখৎহন্নবা পুন্না হোৎননবা হায়খি। “মা ভারতী অমসুং মাগী প্রজা করোর 140 চাউখৎহনবদা ঐহাক্না নখোয়না মতেং পীবীনবা হায়জরি”, হায়না ফোঙদোক্লদুনা মহাক্না লোইশিনখি।
***
(Release ID: 2003030)
Visitor Counter : 39
Read this release in:
English
,
Urdu
,
Marathi
,
Hindi
,
Bengali
,
Bengali-TR
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam