খুরুমজরি!

চহি অমগী মমাঙদা বিপাসানা মেদিসনগী ওজা অচার্য়া শ্রী এস.এন গোয়েনকাগী ১০০শুবা মপোক কুমওন থৌরম হৌদোকখি। চহি অমগী মতম মনুংদা লৈবাক অসিনা অমৃত মহোৎসব পাংথোক্লি অমসুং মতম অসিদা কলয়ান মিত্রা গোয়েনকাগী অচুম্বা ৱাখল্লোনশিংশু নিংশিংলি। থৌরমশিং অসি ঙসি লোইশিনবগা লোয়ননা, চাউখৎলবা ভারত অমগী ৱাশকশিং থবক ওইনা পাংথোক্নবা মাইকৈদা লৈবাক অসি য়াংনা মাঙলোমদা চঙশিল্লি। গুরুজিনা য়াম্না তোইনা হায়বা ভাগবান বুদ্ধগী লাইৱা সামাগ্গা-নাম তাপোসুখো, হায়বদি পুন্না ধ্যান তৌমিন্নবনা কান্নবা ফংহল্লি। মসিগী অপুনবা অমসুং অমতা ওইবগী ৱাখল্লোন অসি চাউখৎলবা ভারতকী মরুওইবা য়ুম্ফম অমনি। হায়রিবা লাইৱা অসি চহি চুপ্পা মীয়ামদা অদোম্না শন্দোক্লে। ঐনা ময়ামগী মফমদা য়াইফ-পাউজেল পীজরি।

মরুপশিং,

ঐগা গুরু গোয়েনকাগা খঙনরকপা য়াম্না কুইরে। ঐনা মহাক্কা য়ুনাইতেস নেসন্সতা ৱার্ল্দ রিলিজন কনফরেন্সতা অহানবা ওইনা উনখি। মতুংদা ঐখোয় গুজরাত্তা কয়ারক উনখি। মহাক্কী অরোইবা তাঙ্ককশিংদা মহাক উনখিবা অসি ঐগী লাইবক ফবনি অমসুং অচার্য়া য়াম্না নক্না মশক খঙনবগী খুদোংচাবা ফংখি। মহাক্কী ইং-তপ্পা গুনশিংগা লোয়ননা শ্রী গোয়েনকানা বিপাসানা মপুংফানা লৌশিনখি। “পুন্সি অমা, পান্দম অমগী মপুংফারবা খুদম অমনি, অচার্য়া গোয়েনকাগী পান্দম অমা খক লৈখি-বিপাসানা! মহাক্না মীওই খুদিংমক্তা বিপাসানাগী লৌশিং য়েন্থোকখি। মহাক্না মীওইবা খুন্নাই অমসুং মালেমগীদমক অচৌবা থবক কয়া পাংথোক্লমখি।

মরুপশিং,

বিপাসানা অসি ভারতকী অরিবা পুন্সি মহিংনা মালেম শীনবা থুংবদা পীবা অঙকপা খুদোল অমা ওইরবশু, মসিগী হেরিতেচ অসি লৈবাক অসিদা তাঙ্কক অমা মাঙখি অমসুং বিপাসানা তাকপীবা অমসুং তম্বগী কলা অসি লোইখিবগী ফিবমদা লৈখি। ম্যান্মারদা চহি ১৪ লাইনিংদুনা লৈরুরবা মতুংদা শ্রী গোয়েনকা লৌশিং ফংখি অমসুং ভারতকী অরিবা বিপাসানাগা লোয়ননা মমা লৈবাক্তা হল্লকখি। বিপাসানা অসি ইশা ইরোমদোম কুপ্না য়েংজদুনা ইশা ইরোমদোম অওনবা পুরক্নবা লম্বীনি। মসি চহি লিশিং কয়াগী মমাঙদা চৎনবা হৌবদা য়াম্না চুনবা অমা ওইখি অমসুং মসি হৌজিক মালেম্না মায়োক্নরিবা অৱাবশিং কোকহন্নবা শক্তি লৈদুনা মসি ঙসিগী পুন্সি অসিদনা হেন্না চুনরে। গুরুজিনা হোৎনবদগী মালেমগী লৈবাক ৮০ হেনবনা ধ্যান তৌবগী মরুওইবা খঙলে অমসুং মসি থবক ওইনা পাংথোক্লে। অচার্য়া শ্রী গোয়েনকানা অমুক হন্না বিপাসানাগী মালেমগী মশক অমা তাকখি। ঙসি ভারতনা মপুংফাবা থৌনাগা লোয়ননা নৌনা পাকথোক-চাউথোকহল্লে। য়ু.এনদা মালেমগী য়োগ নুমিৎ পাংথোক্নবা ভারতনা পুখৎলকপা ৱাফম লৈবাক ১৯০ হেনবনা শৌগৎখি অমসুং য়োগ মালেমগী ওইনা পুন্সিগী শরুক অমা ওইহনখি।

মরুপশিং,

ভারতকী অহল-লমনশিংনা বিপাসানা য়োগগী থৌওংশিং থিজিল্লবশু, তুংগী মীরোলশিংনা মসিগী মরুওইবা অদু কাউথোক্লে। বিপাসানা, ধ্যান তৌবা, ধরনা অসি য়াম্না তোইনা অপাম্বশিং থাদোকপগী ৱাফমশিং ওইনা খন্নৈ অদুবু মীয়াম্না মসিগী থৌদাং কাউথোক্লে। হকচাং ফবা পুন্সি অমা লৈহনবদা ঐখোয় ইশাদা ঐখোয় খুদিংমক্কী অচৌবা থৌদাং অমা লৈ। থবক, পুন্সি মহিং অমসুং অতোপ্পা অৱাবশিংনা মরম ওইদুনা ঙসিগী অৱাবা মতম অসিদা নহারোলশিং লাংতক্নবগী চৈথেং ফংলকপা মতমদা বিপাসানা অসি হেন্না মরুওইরে। মসি মখোয় খক্তগী পাম্বৈ অমা ওইবতা নত্তনা অৱাবা কয়াগা লোয়ননা হিংলিবা অহল ওইরবা মমা-মপাশিংগী অপীকপা অমসুং নিউক্লিয়ার ইমুংশিংগী মীওইশিংগীশু পাম্বৈনি। মীওই খুদিংমক্না অহলশিং অসিগুম্বা থবকশিং শরুক য়াহনগদবনি।

মরুপশিং,

মহাক্কী থবকশিংনা মীওই খুদিংমক্কী পুন্সিদা শান্তি, হরাওবা অমসুং নুংশিননা হিংমিন্নবা পুরক্নবা হোৎনবা হায়বসি অচার্য়া গোয়েনকাগী থবকশিংগী অপাম্বনি। তুংগী মীরোলশিংনা হায়রিবা কেম্পেনশিংগী কান্নবশিং লৌবা মহাক্না পামখি অমসুং মরম অদুনা মহাক্না মহাক্কী লৌশিং শন্দোকখি। মহাক্না হৈথোই-শিংথোইবা ওজাশিং শেমগৎখি। মসি থৱায়দা চঙশিনবা খোঙচৎ অমনি অমসুং নশামক্তা নুং য়ৌনা চঙশিনবা লম্বী অমনি। অদুবু, মসি মখল অমা নত্তে অদুবু সাইন্স অমনি। ঐখোয়না সাইন্স অসিগী ফলশিং খঙবগা লোয়ননা, অনৌবা যুগকী সাইন্সকী থাকশিং মতুংইন্না ঐখোয়না মসিগী খুদম মালেমদা পীবা দরকার ওইরে। হিরম অসিদা মালেমদা মাঙজৌননা থবক কয়া পায়খৎখ্রে। মালেমগী হেন্না য়াইফনবা অনৌবা থিজিনবা কয়াগা লোয়ননা মসি হেন্না পাম্নহন্নবা ভারতনা মাঙজিল থাদুনা হোৎনবা দরকার ওইরে।

মরুপশিং,

​অচার্য়া শ্রী এস.এন গোয়েনকাগী ১০০শুবা মপোক কুমওন থৌরম অসিনা মতম পুম্নমক্তা ঐখোয়দা ইথিল অমা পীরে।  মীওইবা খুন্নাইগী য়াইফনবা মহাক্কী থবকশিং ঐখোয়না মখা তানা পাংথোক্কনি।  ময়াম পুম্নমক অমুক হন্না য়াইফ-পাউজেল পীজরি। অদোম ঙমখৈ লৈতনা থাগৎচরি।

****