ইকায়খুম্নরবা লিগেলগী মরমদা খঙ-হৈরবশিং, মালেমগী তোঙান তোঙানবা লৈবাকশিংদগী লেঙবিরক্লিবা মীথুংশিং, অমদি থৌরমসিদা শরুক য়াবিরিবা ইকায়খুম্নজরবা মীওইশিং, ময়াম পুম্নমক্কী মফমদা ঐনা য়াইফ-পাউজেল পীজরি‍।

মরূপশিং,

কন্ফরেন্স অসি হৌদোকপা ফংজবা ঐগীদমক্তদি নুংঙাইবা অমনি‍। মালেম পুম্বদগী মকোক থোংবা লিগেলগী মীওইশিং মফমসিদা তিল্লরবসিদা ঐ নুংঙাইবা পোকই‍। ভারত মচা বিলিয়ন ১.৪গী মহুৎ শিঞ্জরগা, ঐনা ঐখোয়গী মালেমগী মীথুংশিংবু তরাম্না ওকচরি‍। ঐনা ময়াম পুম্নমক্কীম ফমদা অঙকপনা থল্লবা ভারতপু মপুং ফানা মহাউ লৌবিনবা ৱাফম থমজরি‍।

মরূপশিং,

মফমসিদা অফ্রিকাদগী মরূপ কয়া অমা য়াওরি হায়না ঐঙোন্দা তাকপিরকই‍। ভারতকা অফ্রিকান য়ুনিয়নগা অখন্নবা মরী অমা লৈ‍। অফ্রিকা য়ুনিয়ন্না ভারতকী প্রেসিদেন্সী মনুংদা জি২০গী শরুক অমা ওইখিবদা ঐহাক্না চাউথোকচৈ‍। মসিনা অফ্রিকাগী মীয়ামগী অনিংবা অপাম্বা ফংহনবদা চাউনা মতেঙ ওইরগনি‍।

মরূপশিং,

হৌখিবা থা খরসিদা, ঐনা তাঙ্কক কয়াদা লিগেলগী লমদা লৈবা মীওইশিংগা ৱারী শানজখ্রে‍। নুমিৎ খরনিগী মমাঙদা, ঐ ভারতকী সুপ্রিম কোর্তকী ৭৫শুবা কুমওন থৌরম পাঙথোকপা য়াওখি‍। মমাঙগী সেপ্তেম্বরদা, মফমসিমক্তদা, ঐহাক ইন্তরনেস্নেল লোয়র্স কন্ফরেন্সতা লাকচরম্মি‍। অসুম্না ৱারী ৱাতায় শানবনা ঐখোয় পুম্নমকপু ঐখোয়গী ৱায়েল পথাপকী থবক থৌরমশিংগী তৌবিমল খঙবা উৎপদা মতেঙ পাংই‍। মসিদা হেন্না ফবা অমদি খোঙজেল হেন্না য়াঙবা ৱায়েল ফংহন্নবগী ফিরেপশিং লৌনবগী তাঞ্জাশিংসু ফংলি‍।

মরূপশিং,

ভারতকী ৱাখল্লোন্দা অচুমবা ৱায়েলদা য়াম্না চাউনা মরুওইবা মীৎয়েঙ থম্লি‍। অরিবা মতমগী ভারতকী ৱাখল খনবা মীওইশিংনা হায়বিরম্মি: न्यायमूलं स्वराज्यं स्यात्‍। হায়বদি অচুম্বা ৱায়েলনা মনিং তম্বা মশানা লৈঙাকচবগী হৌরকফম্নি‍। অচুম্বা ৱায়েল য়াওদনা, লৈবাক অমা লৈবা হায়বসিফাওবা ওইথোক্লোই‍।

মরূপশিং,

কন্ফরেন্স অসিগী থীমদি ‘ৱায়েল ফংহনবদা ঙমখৈ ৱাংমদগী লাক্লিবা শিংনবশিং’ হায়বসিনি‍। নীংথিনা মরী শম্নবা, খোঙলৈ থুনা হোংলক্লিবা মালেমসিদা, মসি য়াম্না মরী লৈনবা হীরম্নি‍। করিগুম্বা মতমদা, লৈবাক অমদা অচুম্বা ৱায়েল ফংহনবা হায়বসি অতৈ লৈবাকশিংগা পুন্না থবক পায়খৎমিন্নবা মথৌ তারকই‍। ঐখোয়না পুনশিন্নরবা মতমদা ঐখোয়না অমনা অমগী সিস্তেম মমুৎ তানা খঙবা ঙমগদৌরিবনি‍। অমগা অমগা হেন্না ৱাখল তামিন্নবনা হেন্না চাউবা মতিক পুরকই‍। মতিক অসিনা হেন্না ফবা অমদি হেন্না খোঙজেল য়াঙবা ৱায়েল ফংহন্বদা ইনোৎ হাপ্পি‍। মরম অদুনা, অসিগুম্বা ফম্পাক অমদি কন্ফরেন্সিশিং মরু ওই‍।

মরূপশিং,

ঐখোয়গী সিস্তেমশিং হীরম কয়াদা অমগা অমগা পুন্না থবক তৌমিন্নরিব‍। খুদম ওইনা, এয়র ত্রাফিক কন্ত্রোল অমদি মেরিতাইম ত্রাফিক পনবা য়াই‍। মতৌ অসুম্না, ঐখোয়না থিজিন হুমজিনবা অমদি ৱায়েল ফংহনবগী থবক্তসু তেংবাংনবগী থৌওং পাকথোক চাউথোকহনবা য়াই‍। তেংবাংনবা অসি অমনা অমগী জুরিস্দিক্সন ইকায় খুম্ননা তৌবা য়াই‍। ঐখোয়না পুন্না থবক তৌমিন্নরবা মতমদা, জুরিস্দিক্সন্না ৱায়েল ফংহন্নবগী খুৎলায় ওইরক্কনি, থিন্থনবা ওইরোই‍।

মরূপশিং,

কুইদ্রিবা মতমসিদা ক্রাইমগী মওং মতৌ অমদি পাক চাউবা শাথিনা হোংলক্লে‍। ক্রিমিনেলশিংগী তোঙান তোঙানবা লৈবাক অমদি রিজনশিং শিনবা থুংনা পাক চাউরবা নেতৱর্ক লৈরে‍। মখোয়না ফন্দিং অমদি ওপরেসন অনিমক্তা খ্বায়দগী নৌবা তেক্নোলোজীশিং শীজিন্নরি‍। রিজন অমদা চত্থবা শেন্মিৎলোনগী ক্রাইম্না অতোপ্পা রিজন অমদা চত্থরিবা থৌওংশিংদা শীজিন্নরি‍। কৃপ্তোকরেন্সী অমদি সাইবর থ্রেৎনা অনৌবা শিংনবশিং পুরক্লি‍। ২১শুবা চহিচাগী শিংনবশিং অসি ২০শুবা চহিচাগী পাম্বৈনা হোংদোকপা ঙম্লোয়‍। অমুক হন্না খন্থবা, ৱাখলনা হন্না লামশিনবা অমদি নৌনা শেমদোকপগী মথৌ তারে‍। মসিদা অচুম্বা ৱায়েল ফংহল্লিবা লিগেল সিস্তেম মতমগা চুনহনবা য়াওরি‍। মসিদা ঐখোয়গী সিস্তেম্বু হেন্না ফ্লেক্সিবল অমদি এদাপ্তেবল ওইহনবা য়াওরি‍।

মরূপশিং,

ঐখোয়না রিফোর্ম হায়বসিদা, ৱায়েল পথাপ্পু মীয়ামদা হেন্না য়ুম্ফম ওইহনবদা মীৎয়েঙ চঙবা মথৌ তাই‍। ৱায়েল লায়না ফংহনবা হায়বসিনা ৱায়েল ফংহনবগী য়ুম্বী অমনি‍। হীরম অসিদা, ভারতনা ময়ামদা পাউদম্বা য়াবা ৱাফম কয়া লৈ‍। ২০১৪দা, ভারতকী মীয়াম্না ঐহাকপু প্রধান মন্ত্রী ওইনবগী থৌদাং শিন্নবিখি‍। মদুগী মমাঙদা ঐনা গুজরাত স্তেতকী মুখ্য মন্ত্রী ওইনা থবক তৌরম্মি‍। মতমদুদা, ঐখোয়না নুমিদাংগী ৱায়েলশঙ লিংখৎলম্মি‍। মদুনা মীয়ামবু মখোয়গী মথৌ পাংথোক্লুরবা মতুংদা ৱায়েলশঙগী হিয়রিং শরুক য়াবা ফংহল্লি‍। মদুনা ৱায়েলসু ফংহল্লি অদুগা মতম অমদি শেলসু ওইজহল্লি‍। মীওই চা লিশিং কয়ানা মসিদগী কান্নবা ফংখি‍।

মরূপশিং,

ভারত্তা লোক অদালত হায়বা তোপ তোপ্পা ৱাখল্লোন অমসু লৈ‍। মসিগী ৱাহন্থোক্তি মীয়ামগী ৱায়েলশঙ হায়বনি‍। হায়রিবা ৱায়েলশঙশিং অসিনা পব্লিক য়ুতিলিতী সর্ভিসশিংগা মরী লৈনবা অপীকপা কেসশিং লোইশিন্নবা থৌওং অমা পী‍। মসি প্রি-লিতিগেসনগী থৌওংনি‍। অসিগুম্বা কোর্তশিং অসিনা কেস লিশিং কয়া লোইশিল্লি অমদি ৱায়েল লায়না ফংহল্লি‍। অসিগুম্বা থৌরাংশিংদা খন্নবনসু মালেম পুম্বগী ওইনা চাউনা কান্নগনি‍।

মরূপশিং,

লিগেল এজুকেসন হায়বসি ৱায়েল ফংহনবা হেনগৎহন্নবা মরুওইবা মচাক অমনি‍। এজুকেসন হায়বসি নহা ওইরিবা মীওইশিংদা পেসন অমদি প্রোফেস্নেল ওইবা মতিং ফংহল্লিবা মচাক্নি‍। মালেম পুম্বগী ওইনা, হীরম খুদিংদা নুপী মশিং হেন্না পুশিল্লকপা য়াগনি হায়না খন্নরি‍। মসি পাঙথোক্নবগী অহানবা খোঙথাংদি হীরম খুদিংমক মহৈ মশিংগী থাক্তা য়াওহনবনা ওইগনি‍। লো স্কুলদা তম্বা নুপী মশিং হেল্লক্লবা মতমদা, লিগেল প্রোফেসন্দা লৈবা নুপী মশিংসু হেনগৎলক্কনি‍। কন্ফরেন্স অসিদা শরুক য়াবিরিবশিংনা মতৌ করম্না নুপী মশিং হেন্না লিগেল এজুকেসন্দা পুশিল্লক্কদগে হায়বসিদা খন্নবিবা য়াই‍।

মরূপশিং,

মালেম অসিনা খেন্নবা ফীভমশিং উরবা নহা ওইরিবা লিগেলগী মীওইশিং মথৌ তাই‍। লিগেল এজুকেসন অসি হোংলক্লিবা মতম অমদি তেক্নোলোজীগী মতুং ইন্না হোংদোকপসু মথৌ তাই‍। ক্রাইম, থিজিন হুমজিনবা অমদি খুদম চাংদমগী খ্বায়দগী নৌনা চৎনরিবা মওং মতৌশিং মমুৎ তানা খঙজিনবদা মীৎয়েঙ থম্বসু কান্নগনি‍।

মরূপশিং,

নহা ওইরিবা লিগেল প্রোফেস্নেলশিংবু হেন্না পাক চাউবা মালেমগী এক্সপোজর ফংহন্দুনা মতেঙ পাংবিবসু মথৌ তাই‍। ঐখোয়গী খ্বায়দগী মমিং লৈরবা লো য়ুনিভর্সিতীশিংনা লৈবাকশিংগী মরক্তা তৌনরিবা এক্সচেঞ্জ প্রোগ্রামশিং হেন্না মপাঙ্গল কনখৎহনবা য়াই‍। খুদম ওইনা, ভারত্তা মালেমগী অমত্তা ঙায়রবা য়ুনিভর্সিতী লৈ‍। তোঙান তোঙানবা লৈবাকশিংদগী মহৈরোয়, লো ফেকল্তী অমদি জজশিং ফাওবা মফমসিদা অতেনবা কোর্সশিং তমহনবদা মতেঙ পাংবিবা য়াই‍। মখা তানা, ৱায়েল ফংহনবগা মরী লৈনবা মালেমগী ইন্সতিত্যুসন কয়া লৈরি‍। চাওখৎলক্লিবা লৈবাকশিংনা মখোয়দা হেন্না চাউবা রিপ্রজেন্তেসন ফংহন্নবা পুন্না থবক তৌমিন্নবা য়াই‍। ঐখোয়গী মহৈরোয়শিংদসু অসিগুম্বা ইন্সতিত্যুসনশিং অসিদা ইন্তর্নসিপ থিবদা মতেঙ পাংবিবা য়াই‍। মসিনা ঐখোয়গী লিগেল সিস্তেমবু মালেমগী খ্বায়দগী ফবা থৌওংশিংদগী তমশিনবসু ঙমহনগনি‍।

মরূপশিং,

ভারতনা লোইলম লৈঙাক মতমগী লিগেল সিস্তেম অমা ফংহৌই‍। অদুবু হৌখিবা চহি খরসিদা, ঐখোয়না রিফোর্ম কয়া অমা পুরকখ্রে‍। খুদম ওইনা, ভারতনা লোইলম লৈঙাক মতমগী মতমগা চুনদ্রবা লো লিশিং কয়া মুত্থৎখ্রে‍। হায়রিবা লোশিংদুগী মনুংদা খরদি মীয়ামবু ওৎপি নৈবিনবা খুৎলায়শিং ওইরকখি‍। মসিনা ইজ ওফ লিভিং অমদি ইজ ওফ দুইং হেনগৎহল্লি‍। ভারতনা মতমসিগী ওইবা ফীভমশিংগী মমি তাহন্নবা লো কয়াবুসু মতমগা চুনহল্লি‍। হৌজিক অনৌবা লেজিসলেসন ৩না চহি ১০০ হেন্না লিরবা লোইলম লৈঙাক মতমগী ক্রিমিনেল লোশিংগী মহুৎ শিনখ্রে‍। মমাঙদা চৈরাক পীবা অমদি ৱাকোংশেল লৌবদা মীৎয়েঙ থম্লম্মি‍। হৌজিক্তি, ৱায়েল ফংহনবরোমদা মায় ওনশিল্লে‍। মরম অদুনা, মীয়াম্না কিবদগী হেন্না থাজবগী ৱাখল্লোন লৈনরক্লে‍।

মরূপশিং,

তেক্নোলোজীনা ৱায়েল পথাপ্তা অফবা শাফু পীবসু য়াই‍। হৌখিবা চহি খরসিদা, ভারতনা দ্রোনবু মফম মেপ্পিং তৌবদা অমদি খুঙ্গংগী মীওইশিংদা তশেং তশেংবা লমগী পতা পীবদা শীজিন্নখি‍। য়েৎনবা হন্থহল্লে‍। লিতিগেসনগী ওইথোকপা য়াবসু হন্থহল্লে‍। অমদি ৱায়েল পথাপকী পোৎলুমসু হন্থহন্দুনা মসিবু হেন্না মতিং লৈহল্লে‍। দিজিতেলাইজেসন্না ভারতকী ৱায়েলশঙ ময়াম অমসু মখোয়গী প্রোসীদিংশিং ওন্লাইন্দা তৌবা য়াহল্লে‍। মসিনা মীয়ামবু অরাপ্পা মফমদগীসু ৱায়েল ফংহনবা ঙমহল্লে‍। ভারতনা হীরম অসিদা মহাক্কী খঙজ-হৈজবশিং অতৈ লৈবাকশিংগা তাথোক তাশিন তৌনবদা নুংঙাইবা পোকই‍। ঐখোয়না অতৈ লৈবাকশিংগী অসিগুম্বা থৌরাংশিংগী মতাঙদসু তমশিনবা পাম্মি‍।

মরূপশিং,

ৱায়েল ফংহনবগী থৌওংদা লৈরিবা শিংনবা খুদিংমক পাম্বৈ পুথোকপা য়াই‍। অদুবু খোঙচৎ অদুদি মান্নবা ৱাখল্লোন অমদগী হৌগদবনি‍। ঐখোয়না ৱায়েল ফংহনবগী অপাম্বা অদু মান্ননা লৈবা তাই‍। কন্ফরেন্স অসিনা হায়রিবা ৱাখল্লোন অদুবু মপাঙ্গল কনখৎহনবা ওইরসনু‍। ঐখোয় মীপুম খুদিংমক মতম চানা ৱায়েল ফংজবা য়াবা অমদি কনামত্তবু চিত্থহৌদবা মালেম অমা শেমগৎমিন্নরসি‍।

ময়ামবু থাগৎচরি‍।

***