শরুক – অ শম্লপ্পা ৱাফম

ঙসি পার্লিয়ামেন্ততা ২০২৪-২৫গী মরক্কী কেন্দ্র বজেত পুথোক্লদুনা, শেলথুম অমদি কোর্পোরেত এফ্যার্স মন্ত্রী শ্রীমতী নির্মলা সিতরমন্না মথঙ চহিগী কেপিতেল এক্সপেন্দিচর চাদা ১১.১১ হেনগৎহন্দুনা লুপা করোর ১১,১১,১১১ ওইবগা লোয়ননা জি.দি.পি.গী চাদা ৩.৪ ওইরে হায়না লাউথোকখি‍।

মসি হৌখিবা চহি ৪সিদা কেপিতেল এক্সপেন্দিচর শরুক অহুম হেনগৎলক্তুনা শেন্মিৎলোন চাওখৎপা অমদি থবক পীবদা মশিং কয়া থোক্না হেনগৎহলক্লিবা ফীভম অসিগী মখা চত্থরকপা থৌরাংনি‍।

শেলথুম মন্ত্রীগী ৱারোলগা লোয়ননা পুথোরকখিবা শেনবা চহি ২০২৩-২৪গী অহানবা এদভান্স এস্তিমেত ওফ নেস্নেল ইনকমগী মতুং ইন্না, ভারতকী রিএল জি.দি.পি. চাদা ৭.৩দা হেনগৎলক্কনি হায়না পারি‍। মসিসু, শেনবা চহি ২০২৩-২৪গী Q2দা মপাঙ্গল লৈনা চাউখৎলকখিবনা মরম ওইরগা আর.বি.আই.না (মাগী দিসেম্বর ২০২৩ মোনিতরী পোলিসী কম্মিতী মীফমদা) শেনবা চহি ২০২৩-২৪গী গ্রোথ প্রোজেক্সন্দা চাদা ৬.৫ দগী চাদা ৭তা মথক্তা কাখৎলক্কনি হায়না ফোঙদোকখিবদুগী পরিংদা চৎলি‍।

ভারতকী শেন্মিৎলোন্না, মালেমগী শেন্মিৎলোনগী শিংনবা কয়া লৈরগসু, খাঙবা কনবা মতৌ উৎখি অমদি ফীভম ফবা মেক্রো-ইকনমিক ফন্দামেন্তেলশিং কায়হন্দনা থমখি‍। ইন্তরনেস্নেল মোনিতরী ফন্দ (IMF)না মাগী ওক্তোবর ২০২৩গী ৱর্ল্দ ইকনমিক আউতলুক (WEO)দা ভারতকী গ্রোথ প্রোজেক্সন জুলাই ২০২৩দা চাদা ৬.১ ওইরম্বদগী শেনবা চহি ২০২৩-২৪গী ওইনা চাদা ৬.৩দা হেনগৎলক্কনি হায়না শেমদোকখি‍। মসিদা, ২০২৩গী ওইনা মালেমগী গ্রোথ প্রোজেক্সন চাদা ৩ দা লেঙদনা লৈবা মতম অমদা ভারতকী শেন্মিৎলোনগী মতিক্তা মালেম্না থম্লিবা থাজবগী মমি তারি‍।

IMFকী মতুং ইন্না, ভারত ২০২৭ ফাওবদা মালেমগী অহুমশুবা খ্বায়দগী চাউবা শেন্মিৎলোন (মার্কেত এক্সচেঞ্জর রেত্তা USD দা) ওইরক্লবা য়াই অমদি চহি ৫ দা মালেমগী চাওখৎ খোঙথাঙদা ভারতনা য়ারিবা থৌদাং বেসিস পোইন্ত ২০০ হেনগৎলক্কনি হায়নসু পারি‍। মসিগী মথক্তা, ৱর্ল্দ বেঙ্ক, দি  IMF, OECD অমদি ADB নচিংবা তোঙান তোঙানবা মালেমগী এজেন্সীশিংনা ভারতপু ২০২৪-২৫দা মথঙ শিৎনা চাদা ৬.৪, চাদা ৬.৩, চাদা ৬.১ অমদি চাদা ৬.৭গী মরক্তা কাখৎলক্কনি হায়না প্রোজেক্ত তৌরি‍।

শেলথুম মন্ত্রীনা শেন্মিৎলোনগী থবক থৌওংশিংদা মপাঙ্গল লৈনা চাউখৎলকপনা রিভিন্যু খোমগৎপদা মরা চেৎপা ঙম্লে হায়খি অমদি দিসেম্বর ২০২৩দা GST খোমগৎপগী চাং লুপা করোর লাখ ১.৬৫ ওইখি হায়বা ৱাফম থমখি‍। মসি গ্রোস GST রিভিন্যু লুপা করোর লাখ ১.৬কী বেঞ্চমার্ক লান্থোকপা তরেৎলকশুবনি‍।

২০২৪-২৫দা লাক্লবদা, অপুনবা অপুবা শেমফম নত্তবা অপুনবা লাকপা শেনফম অমদি অপুনবা চাদিং মথঙশিৎনা লুপা করোর লাখ ৩০.৮০ অমদি ৪৭.৬৬ ওইরবা য়াই‍। খাজনাদগী লুপা করোর ২৬.০২ লাক্কনি হায়না পারি হায়না মহাক্না হায়খি‍।

মরুওইবা ৱাফম অমা লাউথোক্লদুনা, শেলথুম মন্ত্রীনা স্তেতশিংদা কেপেক্সকীদমক পীথবা চহি ৫০গী শেন্দোয় য়াওদবা লোনগী স্কীম চহি অসিদা অপুনবা শেনফম লুপা করোর লাখ ১.৩গা লোয়ননা মখা চত্থখিগনি‍। স্তেত লৈঙাকশিংনা বিক্সিত ভারতকী মাইলস্তোন-লিঙ্ক রিফোর্মশিংদা চৈঙাক পীননবা চহি অসিদা লুপা করোর লিশিং হুমফুতরামঙাগী চহি য়াঙ্খৈগী শেন্দোয় য়াওদবা লোন পীননবা ৱাফম হৌদোকখি‍।

ফিস্কেল কন্সোলিদেসনগী মতাঙদা, ২০২১-২২গী মহাক্কী বজেত ৱারোলদা ২০২৫-২৬ ফাওবদা ফিস্কেল দিফিসিত চাদা ৪.৫গী মখাদা হন্থহন্নবা লাউথোকখিবগুম, শ্রীমতী সিতরমন্না, লম্বী অসিদা চত্তুনা ২০২৪-২৫দা ফিস্কেল দিফিসিত জি.দি.পি.গী চাদা ৫.১ ওইগনি হায়না পারি হায়খি‍।

মতৌ অসুম্না, ২০২৪-২৫ মনুংদা দেতেদ সিক্যুরিতীশিংগী খুত্থাঙদা লৌবা গ্রোস অমদি নেত মার্কেত বোরোইং মথঙশিৎনা লুপা করোর লাখ ১৪.১৩ অমদি ১১.৭৫ ওইগনি হায়না পারি অমদি অনিমক ২০২৩-২৪দা লৈখিবদুদগী হন্থগনি‍।

শেন্মিৎলোনগী তরং তরংবা শরুক খরা পুথোক্লদুনা, শেলথুম মন্ত্রীনা অপুবা শেনফম য়াওদনা অপুনবা লাকপা শেনফমগী রিভাইজ এস্তিমেৎ লুপা করোর লাখ ২৭.৫৬ ওইবগা লোয়ননা, মসিগী মনুংদা খাজনাদগী লাকপা শেনফম্না লুপা করোর লাখ ২৩.২৪নি হায়খি‍। অপুনবা চাদিংগী রিভাইজ এক্সপেন্দিচর লুপা করোর লাখ ৪৪.৯০নি‍। লুপা করোর লাখ ৩০.০৩গী রিভিন্যু কারক্লিবা অসি বজেৎ এস্তিমেত্তগী হেন্না ৱাংগনি হায়না পাবগা লোয়ননা মসিদা মপাঙ্গল কন্না চাউখৎলকপগী খোঙজেল অমদি শেন্মিৎলোনবু ফোর্মেলাইজেসন তৌবগী মমি তারি‍।

শ্রীমতী সিতরমন্না ২০২৪-২৫ মনুংদা দেতেদ সিক্যুরিতীশিংগী খুত্থাঙদা লৌবা গ্রোস অমদি নেত মার্কেত বোরোইং মথঙশিৎনা লুপা করোর লাখ ১৪.১৩ অমদি ১১.৭৫ ওইগনি হায়না পারি অমদি অনিমক ২০২৩-২৪দা লৈখিবদুদগী হন্থগনি হায়খি‍।

২০১৪-২৩ মনুংদা চঙলকখিবা FDI বিলিয়ন USD ৫৯৬ ওইদুনা সনা ফুদোংবা মতম অমা ওইখি অমদি মসি ২০০৫-১৪ মনুংদা লৈখিবা চাংগী শরুক অনিনি হায়না মহাক্না লাউথোকখি‍। ফোরেন ইনভেস্তমেন্ত লেপ্তনা লাক্নবা পুক্নিং থৌগৎনবগীদমক, ঐখোয়না ‘অহানবদা চাওখৎপা ভারত’ হায়বা ৱাখল্লোন্দা ঐখোয়গী মপান লমগী খোঙবুশিংগা লোয়ননা বাইলেতরেল ইনভেস্তমেন্ত ত্রীতীশিং শেম্নবা ৱারী শানরি, হায়না শেলথুম মন্ত্রীনা মখা তাখি‍।

প্রধান মন্ত্রী শ্রী নরেন্দ্র মোদীনা মরুওইবা ফুরুপ মরিদা চেৎনা থাজৈ অমদি মীৎয়েঙ চঙলি‍। মখোয় অদুদি ‘গরিব’ (লায়রবা), ‘মহিলায়ে’(নুপীশিং), ‘য়ুবা’ (নহা) অমদি ‘অন্নদাতা’ (লৌমী)নি‍। মখোয়গী মথৌ তাবা, মখোয়গী অনিংবা অপাম্বা, অমদি মখোয়গী নুংঙাই য়াইফবনা লৈঙাক্কী খ্বায়দগী ৱাংবা প্রাইওরিতীনি, মরমদি, মখোয়না চাওখৎলগা লৈবাকসি চাওখৎকদৌরিবনি, হায়না শ্রীমতি নির্মলা সিতরমন্না হায়খি‍।‍

শ্রীমতি নির্মলা সিতরমন্না লৈঙাক অসিগী চাওখৎ থৌরাংগী মীওইবগী মচৎ চেনবা অমদি পুম্নমক কোনশিনবা থৌওং অসি মমাঙগী ‘খুঙ্গংগী থাক ফাওবদা ফংহনবা’ হায়বা থৌওং অদুদগী মপা চুম্না অমদি থৌওইনা হোংদোরকপনি হায়বা ৱাফম মচা খায়না থমখি‍। হৌখিবা চহি তরাসিদা পায়খৎখিবা চাওখৎ থৌরাংগী থবকশিংনা, ‘হাউজিং ফোর ওল’, ‘হর ঘর জল’, ইলেক্ত্রিসি ফোর ওল, কুকিং গেস ফোর ওল, বেঙ্ক একাউন্ত এন্দ ফাইনেসিএল সর্ভিস ফোর ওলগী খুত্থাঙদা রেকোর্দ ওইবা মতমদা য়ুমথোঙ খুদিং অমদি মীওই খুদিংদা য়ৌহন্নবা পান্দম থমখি, হায়না মহাক্না মখা তাখি‍।

লৈঙাক অসিনা হীরম পুম্বা, পুম্নমক শুপ্পা অমদি পুম্নমক কোনশিনবা চাওখৎ থৌরাংগী লম্বী অমদা থবক পায়খৎলি‍। মসিনা থাক খুদিংদা লৈরিবা ফুরুপ অমদি মীওই পুম্নমক কোনশিল্লি হায়না শেলথুম মন্ত্রীনা হায়খি‍। “ঐখোয়না ভারতপু ২০৪৭ ফাওবদা ‘বিক্সিত ভারত’ ওইহন্নবা থবক তৌরি‍। পান্দম অসি ফংনবগীদমক, ঐখোয়না মীয়ামগী মতিক হেনগৎহনবা অমদি মখোয়বু মপাঙ্গল হাপ্পা মথৌ তাই হায়খি‍,” হায়না মহাক্না হায়খি‍।

“মমাঙদদি, খুন্নাই ৱায়েল হায়বসি রাজনিতীগী খোল্লাউ খক্তমক ওইরম্বনি‍। ঐখোয়গী লৈঙাক্কীদমক্তদি, খুন্নাই ৱায়েল হায়বসি মতিং লৈবা অমদি মথৌ তাবা লৈঙাক্লোনগী মওং মতৌনি”, হায়বা ৱাফমসু মহাক্না থমখি‍।

ফান থিনবা মখোলশিংগী মরক্তা শেল থুম মন্ত্রীনা, ভারতকী শেন্মিৎলোন্না হৌখিবা চহি তরাসিদা চাউনা অফবা মায়কৈদা হোংলকপা উরি অমদি ভারতকী মীয়াম্না তুংলমচত্তা মঙলান অমদি থাজবগা লোয়ননা য়েংলি‍ হায়খি‍। “থবক পীবা অমদি ওন্ত্রপ্রিন্যুরসিপকী অহেনবা খুদোংচাবশিংগী ফীভমশিং শেমগৎখি‍। শেন্মিৎলোন্দা অনৌবা ইনোৎ অমা ফংখি‍। চাওখৎপগী মহৈ মীয়ামদা চাং ৱাংনা য়ৌবা হৌখি‍। লৈবাক অসিনা পান্দম অমদি মঙলানগী অনৌবা ৱাখল্লোন অমা ফংখি,” হায়না মহাক্না মখা তাখি‍।

চহি ১০সিদা ‘সবকা সাথ’ পুরক্নবা হোৎনবদা, লৈঙাক অসিনা মীওই করোর ২৫বু মমায় কয়া লোঙবা লাইর-চৈথেংদগী মনীং তমহনখি অমদি লৈঙাক্কী থৌরাং অসি হৌজিক্তি মপাঙ্গল হাপ্লবা মীওইশিং অসিগী মতিক মথৌনা অমদি ইহুলদগী অনৌবা খোঙজেল ফংলি হায়না শেলথুম মন্ত্রীনা ফোঙদোকখি‍।

পি.এম. মুদ্রা য়োজনানা ওন্ত্রিপ্রিন্যুরশিংগী অনিংবা অপাম্বা ফংহন্নবগীদমক লুপা করোর লাখ ২২.৫গী ওইগদবা লোন করোর ৪৩ পীখি‍। পনবা য়াবদি, মুদ্রা য়োজনা লোন করোর কুন্থ্রাদি নুপী ওন্ত্রপ্রিন্যুরশিংদা পীখিবনি হায়না মহাক্না পাউদমখি‍।

মরক্কী বজেত অসিদা ভারতপু ২০৪৭ ফাওবদা বিক্সিত ভারত ওইহন্নবগী মায়কৈ অমদি চাওখৎ থৌরাংগী লম্বী তাকপা ৱাফম অমদি লাল্লোং কয়া য়াওরি‍।

অনৌবা ৱাফম কয়া লাউথোক্লদুনা, শ্রীমতী নির্মলা সিতরমন্না, নোংপোক লমদম অমদি মফমসিগী মীয়ামবু ভারতকী চাওখৎ খোঙচৎকী মতিক লৈবা শাফু ওইহন্নবা মরুওইবা মীৎয়েঙ লৈঙাক্না চঙগনি, পি.এম. অৱাস য়োজনা (গ্রামীন) য়ুম করোর অহুমগী পান্দম নকশিল্লক্লে অমদি ইমুং মশিং হেনগৎলকপনা মরম ওইরগা মথৌ তারক্লিবশিং ফংহন্নবগীদমক মথঙগী চহি মঙাসিদা য়ুম করোর অনি মখা তানা পায়খৎকনি‍ হায়খি‍। মতৌ অসুম্না, য়ুমথকশিং সোলারাইজ তৌদুনা, য়ুম করোর অমদা থা খুদিংদা মৈ য়ুনিত ৩০০ লেম্না ফংহনবা য়াহনগনি‍।

প্রধান মন্ত্রী কিসান সম্পদ য়োজনানা লৌমী লাখ ৩৮দা কান্নবা পীখি অমদি থবক লাখ ১০ ফংহনখি‍। প্রধান মন্ত্রী ফোর্মেলাইজেসন ওফ মাইক্রো প্রোসেসিং এন্তরপ্রাইজেজ য়োজনানা SHG লাখ ২.৪ অমদি লনাই মীওই লিশিং হুম্ফুদা ক্রেদিত লিঙ্কেজ পীদুনা মতেঙ পাংখ্রে‍।

চহি য়াঙ্খৈগী শেন্দোয় য়াওদবা লোনগা লোয়ননা লুপা করোর লাখ অমগী কোর্পস শেমগৎপগা, ঐখোয়গী তেক্কী মরমদা খঙ হৈরবা নহাশিংগীদমক্তদি মসি সনা ফুদোংবা মতম অমা ওইরগনি হায়না শ্রীমতী নির্মলা সিতরমন্না লাউথোকখি‍। কোর্পস অসিনা মতম শাংবা, শেন্দোয় নেম্বা নৎত্রগা য়াওদবা লোং-তর্ম ফাইনান্সিং নৎত্রগা রিফাইনান্সিং ফংহনগনি‍ হায়না মহাক্না হায়খি‍। মসিনা লনাই সেক্তরবু সনরাইজ দোমেনশিংদা মখোয়গী থিজিন হুমজিনবা অমদি অনৌবা ৱাখল্লোনশিং মশক থোক্না হেনগৎহনবদা পুক্নিং থৌগৎকনি হায়না মহাক্না মখা তাখি‍।

রেলৱেজকী ওইনা, অচৌবা ইকনমিক রেলৱে কোরিদোর প্রোগ্রামশিং – ইনর্জী, মিনরেল এন্দ সিমেন্ত কোরিদোর, পোর্ত কন্নেক্তিবিতী কোরিদোর, অমদি হায় ত্রাফিক দেন্সিতী কোরিদোরশিং পায়খৎকনি‍। মসিগী মথক্তা, নোর্মেল রেল বোগী লিশিং নিফু পেসেঞ্জরশিংগী শাফবা, খুদোংচাবা অমদি নুংঙাইনবগীদমক বন্দে ভারতকী থাক্তা ওন্থোক্লগনি‍।

এভিএসন সেক্তরদা, এয়রপোর্ত মশিং শরুক অনি হেনগত্তুনা ১৪৯ শুরে অমদি ঙসি লম্বী চামঙা তরাতরেত্তা পেসেঞ্জর করোর ১.৩ পুদুনা চৎলি‍। ভারতকী কেরিয়রশিংনা ইচঙ থৌনা অনৌবা এয়রক্রাফ্ত ১০০০ ওর্দর তৌখ্রে‍।

মীশিং থুনা হেনগৎলকপা অমদি দিমোগ্রাফীদা হোংলক্লিবশিংদগী থোরকপা শিংনবশিং মনুং হুৎনা খন্ন-নৈননবা লৈঙাক্না হায়-পৱার্দ কম্মিতী অমা শেমগনি অমদি কম্মিতী অসিনা ‘বিক্সিত ভারত’ কী পান্দমগা মরী লৈননা হায়রিবা শিংনবশিং অসি মপুং ওইনা থেংননবা রিকম্মেন্দেসন পীগনি হায়না শ্রীমতি নির্মলা সিতরমন্না লাউথোকখি‍।

প্রধান মন্ত্রীনা মহাক্কী নীংতম্বা নুমিৎকী লৈবাক্কী মফমদা পীখিবা ৱারোলদা, ঐখোয়গী মীয়ামগী লৈঙাক লৈরকপা চহি ৭৫ শুরকপগী মতমদা, “লৈবাকসিনা পাক চাউরবা ওইথোকপা য়াবা অমদি খুদোংচাবশিং হাংদোকপগা লোয়ননা ঐখোয়না অনৌবা ফীদম, অনৌবা ৱাখল, অনৌবা ফিরেপকা লোয়ননা লৈবাক্কী চাওখৎপা পুরক্নবগীদমক ইশাগী খোঙফম চেৎনা লেপ্লি” হায়খিবা ৱাফমবু শেলথুমগী মন্ত্রীনা পুথোক্তুনা থমখি‍। হৌজিক অসি ঐখোয়গী থৌদাংগী মতমনি‍। “২০১৪ মমাঙগী শিংনবা খুদিংমক ঐখোয়গী শেন্মিৎলোনগী শিন-লাংবা অমদি ঐখোয়গী লৈঙাক্লোন্না লাকশিনখিবনি অমদি হায়রিবশিং অসিনা লৈবাক অসিবু চাওখৎপগী চাং নাইবা লম্বী অমদা পুদুনা চৎলি,” হায়না মহাক্না ফোঙদোকখি‍।

“হায়রিবা অসি ঐখোয়গী অচুম্বা খুজিল থৌরাং, তশেং তশেংবা ইহুল, অমদি চুনবা ফীরেপশিংনা ওইহল্লকনি‍। জুলাইদা পুথোক্কদবা মপুং ফাবা বজেত্তা, ঐখোয়গী লৈঙাক্না ‘বিকইত ভারত’ ফংনবগীদমক ঐখোয়না হোনরিবা অসিগী মচা খশয়বা রোদমেপ অমা পুথোক্কনি,” হায়না শ্রীমতী নির্মলা সিতরমন্না হায়খি‍।

শরুক-বি শমলপ্পা

মরক্কী বজেত অসিদা খাজনাগী মতাঙদা অহোংবা অমত্তা য়াওদে‍। ইম্পোর্ত দ্যুতিজ য়াওনা দাইরেক্ত অমদি ইন্দাইরেক্ত তেক্সকী চাং হান্নগা মান্ননা থম্লি‍। অদুম ওইনমক, খাজনা খোমগৎপা মখা চত্থনবগীদমক, স্তার্ত-অপশিং অমদি সোভেরেন ৱেল্থ নত্রগা পেন্সন ফন্দশিংদগী শেল থাদবদা পীরিবা খাজনাগী কান্নবশিং অমদি IFC য়ুনিত খরগী অকক্নবা ইনকমদা খাজনা কোকপিবগী ৱাফম চহি অমা, হায়বদি মার্চ ৩১, ২০২৫ ফাওবা শাংদোক্লে‍।

আউতস্তেন্দিং দাইরেক্ত তেক্স দিমান্দ হন্দোকপা

শ্রীমতী সিতরমন্না, ইজ ওফ লিভিং অমদি ইজ ওফ দুইং বিজিনেস হেনগৎহন্নবগী লৈঙাক্কী মীৎয়েঙ পরিংদা খাজনা থীরিবশিংগী সর্ভিসশিংগী ফীভম ফগৎহন্নবা ৱাফম অমসু লাউথোকখি‍। করিসু লৈতবা, ভেরিফাইদ তৌদবা, য়াশিন্নবা পুরকত্রবা নৎত্রগা য়েৎনবা দাইরেক্ত তেক্স দিমান্দ ময়াম অমা লৈ, মখোয়গী মনুংদা কয়া অমদি ১৯৬২ ফাওবগী ওইদুনা চে-চাংশিংদা অদুমক লৈতুনা, পুকচেল শেংজবা খাজনা থীরিবা মীওইশিংদা পুক্নিং লাংতক্নহল্লি অমদি মখা তারকপা চহিশিংগী রিফন্দা অপনবা লৈহল্লি‍। মরক্কী বজেত অসিনা অসিগুম্বা পন্দুনা লৈরিবা শেনবা চহি ২০০৯-১০ ফাওবগী ওইনা লুপা ২৫০০০ ফাওবগী অমদি শেনবা চহি ২০১০-১১ দগী ২০১৪-১৫ ফাওবগী ওইনা লুপা ১০,০০০ ফাওবগী দাইরেক্ত তেক্স দিমান্দশিং হন্দোক্নবা ৱাফম থম্লি‍। মসিনা খাজনা থীরিবা মীওই করোর অমরোমদা কান্নবা পীগনি হায়না পানরি‍।

দাইরেক্ত তেক্স কল্লেক্সন শরুক অহম হেনগৎলে

খাজনা থীরিবশিংগী মফমদা মখোয়গী চৈঙাক্কীদমক থাগৎপা ফোঙদোক্লদুনা, শ্রীমতী সিতরমন্না, হৌখিবা চহি ১০সিদা দাইরেক্ত তেক্স খোমগৎপগী চাং শরুক অহুম হেনগৎলে অমদি রিতর্ন ফাইল তৌরকপগী চাংনা শরুক ২.৪ হেনগৎলে হায়খি‍। লৈঙাক্না খাজনাগী চাং হন্থহনবা অমদি রেস্নেলাইজ তৌবনা মরম ওইরগা অনৌবা তেক্স রেজিম অসিদা লুপা লাখ ৭ ফাওবগী শেন্থোক লৈবা খাজনা থীবা মীওইশিংগীদমক্তা তেক্স লাইএবিলিতী অমত্তা লৈত্রে হায়বা ৱাফমসু মহাক্না থমখি‍। রিতেল বিজিনেস অমদি প্রোফেস্নেলশিংগী প্রিজুম্পতিব তেক্সেসনগী চাং ৱাংখৎহনবগী মতাঙদসু মহাক্না পনখি‍। মন্ত্রীনা হান্না লৈরবা লমদমসিগী কম্পেনীশিংগী কোর্পোরেত তেক্স রেত ৩০%দগী ২২% দা হন্থহনখিবা, অমদি অকক্নবা অনৌবা মেনুফেকচরিং কম্পেনীশিংগীনা ১৫%দা হন্থহনখিববুসু পনখি‍। মহাক্কী মরক্কী বজেতকী ৱারোলদা, মন্ত্রীনা, হৌখিবা চহি ৫ সিদা লৈঙাক্না থমখিবা মীৎয়েঙদি খাজনা থীরিবশিংগী সর্ভিসশিংগী ফীভম ফগৎহন্দুনা হান্না চৎনরম্বা জুরিস্দিক্সনগী মখা পোন্না এসেসমেন্ত তৌরম্বা অদু হোংদোক্লে, অমদি তেক্স রিতর্ন ফাইল তৌবসু লায়থোকহল্লে‍ হায়খি‍। রিতর্ন প্রোসেস তৌবগী চাংচত্তা চঙবা মতম ২০১৩-১৪দা নুমিৎ ৯৩ ওইরম্বদগী চহি অসিদা শুপ্নতগী নুমিৎ তরানিদা হন্থরক্তুনা রিফন্দ তৌবদা থুজিনহল্লে, হায়না মহাক্না মখা তাখি‍।

GST না কম্প্লাইএন্সকী পোৎলম হন্থহনখি

ইন্দাইরেক্ত তেক্সকী মতাঙদা, GST না ভারতকী য়াম্না মচেৎ মকায় তারম্বা ইন্দাইরেক্ত তেক্স রেজিমবু পুনশিন্নহন্দুনা ত্রেদ অমদি ইন্দস্ত্রীগী লমদা লৈরম্বা কম্প্লাইএন্সকী পোৎলুম হন্থহল্লে হায়না কেন্দ্রগী শেলথুম অমদি কোর্পোরেত এফ্যার্স মন্ত্রী শ্রীমতী নির্মলা সিতরমন্না হায়খি‍। মাঙজিল থাবা কন্সল্তিং ফর্ম অমনা হন্দক্তা পাঙথোকখিবা সর্ভে অমগী মতাঙদা পল্লদুনা, ইন্দস্ত্রী লুচিংবা ৯৪%না GST দা ওল্লকপা অসি অনম্বনা অফবা মহৈ পুরকই হায়না ৱাখল্লোন ফোঙদোক্নৈ হায়না মহাক্না হায়খি‍। মহাক্কী মরক্কী বজেতকী ৱারোলদা, মন্ত্রীনা GSTগী তেক্স বেজ শরুক অনি হেন্না হেনগৎলে অমদি চাংচত্তা লৈবা থাগী গ্রোস GST খোমগৎপগী চাংসু শরুক অনিগী ময়াদা হেনগত্তুনা চহি অসিদা লুপা করোর লাখ ১.৬৬ ওইখি‍ হায়খি‍। স্তেতশিংসু মসিদগী কান্নবা ফংলি‍। স্তেতশিংদা থাদোকপা কম্পেন্সেসন য়াওরগা স্তেতশিংগী SGST রিভিন্যু, GST চৎনরবা মতুংগী ২০১৭-১৮ দগী ২০২২-২৩ ফাওবগী মতমদা ১.২২গী বোয়েন্সী ফংলে‍। মসিদগী খ্বায়দগী চাউনা কান্নবা ফংলিবশিংদি কঞ্জ্যুমরশিংনি মরমদি লোজিস্তিক্সকী শেঞ্জং অমদি খাজনাগী চাং হন্থরকপনা পোৎ অমদি সর্ভিস অয়াম্বগী মমল হন্থহল্লে হায়না মন্ত্রীনা হায়খি‍। মালেমগী লল্লোন ইতিক মতেঙ পাংনবগীদমক কস্তম্সতা পায়খৎলিবা খোঙথাঙ কয়াগী মতাঙদা পল্লদুনা, শ্রীমতী সিতরমন্না, ২০১৯দগী হৌরগা হৌখিবা চহি মরিসিদা ইম্পোর্ত রিলীজ মতম ইনলেন্দ কন্তেনর দিপোশিংদা চাদা ৪৭ হন্থরক্তুনা পুং ৭১ ওইরে, এয়র কার্কো কম্প্লেক্সশিংদা চাদা ২৮ হন্থরক্তুনা পুং ৪৪ ওইরে অমদি সমুদ্রগী হিথাংফমশিংদনা চাদা ২৭ হন্থরক্তুনা পুং ৮৫ ওইরে হায়খি‍।

ৱাইতপেপর পুথোকপা

ভারতকী শেন্মিৎলোনগী ফীভমগী মতাঙদা, ২০১৪দা শেন্মিৎলোন অসি খোঙথাঙ নাইনা শেমগৎনবগী অমদি লৈঙাক্লোনগী থৌওং মওং মরিল নাইহন্নবগী থৌদাং য়াম্না চাউখি, অমদি মদুবু লৈঙাক অসিনা ‘লৈবাক্না মাঙদা’ হায়বা ৱাখল্লোন্দা অচেৎপা থাজবা থমদুনা মায় পাক্না থৌদাং য়াখি হায়না কেন্দ্র মন্ত্রীনা হায়খি‍। মতমদুগী লাংফমশিং লাকশিনখ্রে অমদি শেন্মিৎলোন অসি খোঙফম চেৎনা মায়কৈ শুনা চাওখৎপা পুরক্কদবা খোঙজেল য়াঙবা তুং কোইগদবা লম্বী অমদা থাঙ্গৎখ্রে হায়না মহাক্না থাজবা পীখি‍। ‘মতমদুগী অশোয়বা থৌশিলশিংদগী পারা তমহৌনবখক্কী ওইনা ঐখোয়না ২০১৪ ফাওবা করম্বা ফীভমদা লৈরম্মি অমদি ঐখোয় হৌজিক কদায়দা লৈরি হায়বা তাকপা’ ৱাতপেপর অমা লৈঙাক অসিনা পুথোক্কনি হায়না মহাক্না লাউথোকখি‍।

***