মহৈ মশিং অমদি স্কিল দিভেলপমেন্ত অমসুং ওন্ত্রপ্রিদ্যুরসিপকী কেন্দ্র মন্ত্রী, শ্রী ধরমেন্দ্র প্রধান্না ঙসি নেস্নেল বাল ভবন্দা পরিক্ষা পে চর্চা (পি.পি.সি.)গী ৭শুবা ইদিসন্দা শরুক য়াখিবা মীওইশিংগা উনখ্রে‍। মহৈ মশিংগী রাজ্য মন্ত্রী শ্রীমতী অনুপুর্ন দেবী অমদি দোক্তর সুভাস সরকার; মপান থৌরম অমসুং মহৈ মশিংগী রাজ্য মন্ত্রী, দোক্তর রাজকুমার রঞ্জন সিংহ; দিপার্তমেন্ত ওফ স্কুল এজুকেসন এন্দ লিতরেসী সেক্রেতরী, শ্রী সঞ্জয় কুমার; অতৈ মীথুংশিং, ওজা অমদি মহৈরোয়শিংসু থৌরমদুদা শরুক য়াখি‍।

থৌরমদুদা ৱা ঙাংলদুনা, শ্রী প্রধান্না পরিক্ষা পে চর্চাদা শরুক য়াখিবা মহৈরোয়শিং, মরুওইনা ভারত মন্দপমদা পাঙথোকখিবা একজিবিসন্দা মখোয়গী ইনোভেসনশিং উৎখিবশিংগী মফমদা মখোয়না হোৎনরিবশিংবু থাগৎখি‍। সাইন্স খক্তদা নত্তনা আর্তস অমদি সোসিএল সাইন্সতা মহৈরোয়শিংদগী থোরক্লিবা অনৌবা ৱাখল্লোনশিংনা নহা মীরোলশিংগী মরক্তা লৈরিবা ৱাখলনা লামশিনবগী মতিকপু উৎলি হায়না মহাক্না হায়খি‍।

প্রধান মন্ত্রী শ্রী নরেন্দ্র মোদীগা উনবা অমদি মহাক্না তাকপি তম্বিবা ফংবা হায়বসি মহৈরোয়শিংগীদমক্তা কয়া য়াম্না নুংঙাইরমগনি অমদি পুন্সিদা অহোংবা পুরক্কদবা থৌদোক ওইরমগনি হায়না মহাক্না ফোঙদোকখি‍।

শ্রী প্রধান্না মহৈরোয়শিংগী মফমদা মখোয়না পি.পি.সি. য়াওবদা থেংনরকপা ৱাফমশিং, অতৈ উমহৈরোয়শিংনসু প্রধান মন্ত্রী শ্রী নরেন্দ্র মোদীনা ফোঙদোকখিবা পাম্বৈশিংদগী তমশিন্নবগীদমক পুক্নিং থৌগৎনবা মখোয় মখোয়গী মহৈশঙশিংদা তম্নবা হায়খি‍। ৱাখল ৱাবা লাকশিন্নবগী অদুগুম্বা পাউতাকশিং অদু মহৈরোয়, ওজা অমদি মমা মপাশিংগী ওইবা মীওই করোর ৫০ রোমগী মফমদসু খঙহনবা মথৌ তাই হায়বা ৱাফমসু মহাক্না থমখি‍। মসি এন.ই.পি. ২০২০গী রিকমেন্দেসনসু ওইরিবনি হায়না মহাক্না মখা তাখি‍।

কালা উতসবকী অথোয়বশিং, এক্লব্যা মোদেল রেসিদেন্সিএল স্কুলশিংদগী মহৈরোয়শিং, অমদি স্তেত অমসুং য়ু.তি.শিংগী মীহুৎশিং য়াওবা মীওই ৩০০ হেনবনা শ্রী প্রধানগা উনখি অমদি পরিক্ষা পে চর্চা শরুক য়ারুবদা মখোয়না থেংনরকপশিং অমদি মখোয়না তারকপা প্রধান মন্ত্রী শ্রী নরেন্দ্র মোদীগী ৱাফমশিং পাউদমখি‍।

লৈবাক পুম্বগী স্তেতশিংদগী য়াম্লবা মহৈরোয়শিংনা মখোয়না থেংনরকপশিং পাউদমখি অমদি প্রধান মন্ত্রীগী ৱাহৈশিংনা করম্না মখোয়দা চাউনা পুক্নিং থৌগৎনিংঙাই ওইখি হায়বনচিংবশিং ফোঙদোক্নখি‍। হরিয়ানাগী সির্সাদগী তনিসা; ত্রিপুরাগী অগর্তলাদগী ইনসা অকতর; মধ্য প্রদেশকী ভোপালদগী তীর্থ সোনি; অমদি অতহ কয়ানা মখোয়না দিল্লীদা নুংঙাইনা লৈবা, অনৌবা মরূপশিং থেংনবা অমদি এক ভারত শ্রেস্থ ভারতকী তশেং তশেংবা মশক্কী মমি তারিবা অতৈ স্তেতশিংগী নাৎ চৎনবীশিংগী মরমদা তমশিনহৌবশিংগী মতাঙদসু মখোয়না ফোঙদোক্নখি‍।

পরিক্ষা পে চর্চা অসি ‘একজাম ৱারিয়র্স’কী হেন্না চাউবা ইহৌগা চুননা চাংয়েংগা মরী লৈনবা ৱাখল ৱাবশিং কোকহন্নবা অমদি পুন্সিবু হরাও তয়াম্না হিংবগী মওং মতৌ য়োকখৎনবগী প্রধান মন্ত্রী শ্রী নরেন্দ্র মোদীনা লুচিংবা তোপ তোপ্পা থৌরাং অমনি‍। হন্দক্কী ৭শুবা ইদিসন অসিগীদমক মাইগোভ পোর্তেলদা রেজিস্ত্রেসন করোর ২.২৬ লাক্তুনা লৈবাক পুম্বগী মহৈরোয়শিংগী মরক্তা পাক শন্না পুক্নিংদা মথুম মরাং হৌবগী মতৌ উৎলি‍।

***