ଦେଶର ପ୍ରତିରକ୍ଷା ମନ୍ତ୍ରୀ ଶ୍ରୀ ରାଜନାଥ ସିଂ ଜୀ, କ୍ୟାବିନେଟ୍ ମୋର ଅନ୍ୟ ସହଯୋଗୀ, ଡିଜି ଏନସିସି, ଉପସ୍ଥିତ ଅଧିକାରୀମାନେ , ସମ୍ମାନିତ ଅତିଥି, ଶିକ୍ଷକ, ଏନସିସି ଏବଂ ଏନଏସଏସର ମୋର ଯୁବ ସହଯୋଗୀ ।

ସାଥିମାନେ,

ଆପଣମାନେ ବର୍ତ୍ତମାନ ଏଠାରେ ଯେଉଁ ସାଂସ୍କୃତିକ ପରିବେଷଣ ଦେଇଛନ୍ତି ତାହାକୁ ଦେଖି ଗର୍ବ ଅନୁଭବ ହେଉଛି । ରାଣୀ ଲକ୍ଷ୍ମୀବାଈଙ୍କ ଐତିହାସିକ ବ୍ୟକ୍ତିତ୍ୱ ଏବଂ ଇତିହାସର ଘଟଣାଗୁଡ଼ିକୁ ଆପଣ କିଛି ମୁହୂର୍ତ୍ତରେ ଏଠାରେ ଜୀବନ୍ତ କରିଥିଲେ । ଆମେ ସମସ୍ତେ ଏହି ଘଟଣାଗୁଡ଼ିକ ସହିତ ପରିଚିତ, କିନ୍ତୁ ଆପଣ ଏହାକୁ ଯେପରି ଉପସ୍ଥାପନ କରିଥିଲେ ତାହା ପ୍ରକୃତରେ ଆଶ୍ଚର୍ଯ୍ୟଜନକ ଥିଲା । ଆପଣ ଗଣତନ୍ତ୍ର ଦିବସ ପରେଡରେ ଅଂଶଗ୍ରହଣ କରିବାକୁ ଯାଉଛନ୍ତି । ଆଉ ଏଥର ଦୁଇଟି କାରଣରୁ ଏହା ଅଧିକ ସ୍ପେଶାଲ ହୋଇଛି । ଏହା ହେଉଛି ୭୫ତମ ସାଧାରଣତନ୍ତ୍ର ଦିବସ । ଆଉ ଦ୍ୱିତୀୟତଃ ପ୍ରଥମ ଥର ପାଇଁ ସାଧାରଣତନ୍ତ୍ର ଦିବସ ପରେଡ୍ ଦେଶର ନାରୀ ଶକ୍ତିକୁ ସମର୍ପିତ କରାଯାଇଛି । ମୁଁ ଆଜି ଏତେ ସଂଖ୍ୟକ ଝିଅଙ୍କୁ ଦେଖୁଛି ଯେଉଁମାନେ ଦେଶର ବିଭିନ୍ନ ପ୍ରାନ୍ତରୁ ଏଠାକୁ ଆସିଛନ୍ତି । ଆପଣ ଏକୁଟିଆ ଏଠାକୁ ଆସିନାହାଁନ୍ତି, ଆପଣମାନେ ସମସ୍ତେ ଆପଣ ରାଜ୍ୟର ମହକ, ବିଭିନ୍ନ ରୀତିନୀତିର ଅନୁଭୂତି ଏବଂ ଆପଣଙ୍କ ସମାଜର ସମୃଦ୍ଧ ଚିନ୍ତାଧାରା ନେଇ ଆସିଛ । ଆଜି ଆପଣ ସମସ୍ତଙ୍କୁ ଭେଟିବା ମଧ୍ୟ ଏକ ବିଶେଷ ଅବସର ପାଲଟିଯାଏ । ଆଜି ଜାତୀୟ କନ୍ୟା ସନ୍ତାନ ଦିବସ । ଝିଅଙ୍କ ସାହସ, ଉତ୍ସାହ ଓ ଉପଲବ୍ଧିକୁ ପାଳନ କରିବାର ଆଜିର ଦିନ । ଝିଅମାନେ ସମାଜ ଓ ଦେଶକୁ ଉନ୍ନତ କରିବାର ସାମର୍ଥ୍ୟ ରଖନ୍ତି । ଇତିହାସର ବିଭିନ୍ନ ଯୁଗରେ ଭାରତର ଝିଅମାନେ ନିଜର ଦୃଢ଼ ଇଚ୍ଛାଶକ୍ତି ଓ ସମର୍ପଣ ଭାବନା ବଳରେ ଅନେକ ବଡ଼ ପରିବର୍ତ୍ତନର ମୂଳଦୁଆ ପକାଇଛନ୍ତି । କିଛି ସମୟ ପୂର୍ବରୁ ଆପଣ ଦେଇଥିବା ଉପସ୍ଥାପନା ମଧ୍ୟ ଏହି ଭାବନାକୁ ପ୍ରତିଫଳିତ କରୁଥିଲା ।

ମୋର ପ୍ରିୟ ସାଥୀମାନେ,

ଆପଣମାନେ ସମସ୍ତେ ଦେଖିଥିବେ ଯେ ଗତକାଲି ଦେଶ ଏକ ବଡ ନିଷ୍ପତ୍ତି ନେଇଛି । ଜନନାୟକ କର୍ପୁରୀ ଠାକୁରଙ୍କୁ ଭାରତ ରତ୍ନ ଦେବା ପାଇଁ ଏହି ନିଷ୍ପତ୍ତି ନିଆଯାଇଛି । ଆଜିର ଯୁବପିଢ଼ି କର୍ପୂରୀ ଠାକୁରଜୀଙ୍କ ବିଷୟରେ ଜାଣିବା, ତାଙ୍କ ଜୀବନରୁ ଶିଖିବା ଅତ୍ୟନ୍ତ ଜରୁରୀ । ଏହା ଆମ ବିଜେପି ସରକାରଙ୍କ ସୌଭାଗ୍ୟ ଯେ ଜନନାୟକ କର୍ପୂରୀ ଠାକୁରଙ୍କୁ ଭାରତ ରତ୍ନରେ ସମ୍ମାନିତ କରିବାର ସୁଯୋଗ ପାଇଛି । ଅତ୍ୟଧିକ ଦାରିଦ୍ର‌୍ୟ ଓ ସାମାଜିକ ଅସମାନତା ଭଳି ଆହ୍ୱାନର ମୁକାବିଲା କରି ସେ ଜାତୀୟ ଜୀବନରେ ଏକ ଉଚ୍ଚ ସ୍ଥାନରେ ପହଞ୍ଚିଥିଲେ । ସେ ଦୁଇଥର ବିହାରର ମୁଖ୍ୟମନ୍ତ୍ରୀ ମଧ୍ୟ ଥିଲେ । ଏହା ସତ୍ତ୍ୱେ ସେ ସମାଜର ସବୁ ବର୍ଗଙ୍କ ପାଇଁ କାମ କରିବା ବନ୍ଦ କରିନଥିଲେ । ଜନନାୟକ କର୍ପୂରୀ ଠାକୁର ତାଙ୍କ ସରଳତା ପାଇଁ ସର୍ବଦା ଜଣାଶୁଣା ଥିଲେ । ତାଙ୍କର ସମଗ୍ର ଜୀବନ ସାମାଜିକ ନ୍ୟାୟ ଏବଂ ପଛୁଆଲୋକଙ୍କ ଉନ୍ନତି ପାଇଁ ଉତ୍ସର୍ଗୀକୃତ ଥିଲା । ଆଜି ବି ତାଙ୍କ ସଚ୍ଚୋଟତାର ଉଦାହରଣ ନିଆଯାଇପାରେ । ଗରିବଙ୍କ ଦୁଃଖ ବୁଝିବା, ଗରିବଙ୍କ ଚିନ୍ତା କମାଇବା ପାଇଁ ପ୍ରୟାସ କରିବା, ଗରିବଙ୍କ କଲ୍ୟାଣକୁ ପ୍ରାଥମିକତା ଦେବା, ଗରିବ ଙ୍କ ପାଖରେ ପହଞ୍ଚାଇବା ପାଇଁ ବିକାଶ ଭାରତ ସଂକଳ୍ପ ଯାତ୍ରା ଭଳି ଅଭିଯାନ ଚଳାଇବା, ସମାଜର ପଛୁଆ ଓ ଅବହେଳିତ ବର୍ଗଙ୍କ ପାଇଁ କ୍ରମାଗତ ଭାବେ ନୂଆ ନୂଆ ଯୋଜନା କରିବା, ଆମ ସରକାରଙ୍କ ଏହି ସବୁ କାର୍ଯ୍ୟରେ କର୍ପୂରୀ ବାବୁଙ୍କ ଚିନ୍ତାଧାରାରୁ ମିଳିଥିବା ପ୍ରେରଣା ଆପଣମାନେ ସମସ୍ତେ ଦେଖିପାରୁଥିବେ । ଆପଣମାନେ ସମସ୍ତେ ତାଙ୍କ ବିଷୟରେ ପଢନ୍ତୁ, ତାଙ୍କ ଆଦର୍ଶକୁ ଆପଣଙ୍କ ଜୀବନର ଏକ ଅଂଶ କରନ୍ତୁ । ଏହା ଆପଣଙ୍କ ବ୍ୟକ୍ତିତ୍ୱକୁ ଏକ ନୂତନ ଶିଖରକୁ ନେଇଯିବ ।

ମୋର ପ୍ରିୟ ଯୁବ ବନ୍ଧୁମାନେ,

ଆପଣମାନଙ୍କ ମଧ୍ୟରୁ ଅନେକ ଥିବେ ଯେଉଁମାନେ ପ୍ରଥମ ଥର ପାଇଁ ଦିଲ୍ଲୀ ଆସିଛନ୍ତି । ଗଣତନ୍ତ୍ର ଦିବସକୁ ନେଇ ଆପଣ ଉତ୍ସାହିତ ଅଛନ୍ତି, କିନ୍ତୁ ମୁଁ ଜାଣେ ଯେ ଅନେକ ଲୋକ ପ୍ରଥମ ଥର ପାଇଁ ଏଭଳି ଥଣ୍ଡା ଅନୁଭବ କରିଥିବେ । ଆମ ଦେଶ ପାଣିପାଗ ଦୃଷ୍ଟିରୁ ମଧ୍ୟ ଭିନ୍ନତାରେ ପରିପୂର୍ଣ୍ଣ । ଏଭଳି ଥଣ୍ଡା ଓ ଘନ କୁହୁଡ଼ି ଭିତରେ ଆପଣ ଦିନରାତି ଅଭ୍ୟାସ କରିବା ସହ ଏଠାରେ ମଧ୍ୟ ଚମତ୍କାର ପ୍ରଦର୍ଶନ କରିଛନ୍ତି । ମୁଁ ନିଶ୍ଚିତ ଯେ ଯେତେବେଳେ ଆପଣ ଏଠାରୁ ଘରକୁ ଯିବେ, ସେତେବେଳେ ଆପଣଙ୍କୁ ଗଣତନ୍ତ୍ର ଦିବସର ଅଭିଜ୍ଞତା ବିଷୟରେ ବହୁତ କିଛି କହିବାର ଅଛି ଏବଂ ଏହା ହେଉଛି ଏହି ଦେଶର ବିଶେଷତ୍ୱ । ବିବିଧତାରେ ପରିପୂର୍ଣ୍ଣ ଆମ ଦେଶରେ କେବଳ ଗୋଟିଏ ରାଜ୍ୟରୁ ଅନ୍ୟ ରାଜ୍ୟକୁ ଯିବା ଦ୍ୱାରା ଜୀବନରେ ନୂଆ ଅନୁଭୂତି ଯୋଡି ହେବାରେ ଲାଗିଥାଏ ।

ମୋର ପ୍ରିୟ ବନ୍ଧୁମାନେ,

ଆପଣଙ୍କ ପିଢ଼ିକୁ ଆପଣଙ୍କ ନିଜ ଶବ୍ଦରେ 'ଜେନ୍ ଜେଡ୍‌' କୁହାଯାଏ । କିନ୍ତୁ ମୁଁ ଆପଣମାନଙ୍କୁ ଅମୃତ ପିଢ଼ି ବୋଲି ବିବେଚନା କରୁଛି । ଆପଣମାନେ ହିଁ ଅମୃତକାଳରେ ଦେଶକୁ ଗତି ଦେବେ । ଆପଣମାନେ ସମସ୍ତେ ଜାଣନ୍ତି ଯେ ଭାରତ ୨୦୪୭ ସୁଦ୍ଧା ଏକ ବିକଶିତ ରାଷ୍ଟ୍ର ରେ ପରିଣତ ହେବାର ସଂକଳ୍ପ ନେଇଛି । ଆଗାମୀ ୨୫ ବର୍ଷ ଦେଶ ପାଇଁ, ଆପଣଙ୍କ ଭବିଷ୍ୟତ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଆମର ସଂକଳ୍ପ ଯେ ଆପଣମାନଙ୍କର ଏହି ଅମୃତ ପିଢ଼ିର ପ୍ରତ୍ୟେକ ସ୍ୱପ୍ନ ପୂରଣ ହେବ । ଆମର ସଂକଳ୍ପ ହେଉଛି ଆପଣଙ୍କ ଅମୃତ ପିଢ଼ି ସୁଯୋଗରେ ପରିପୂର୍ଣ୍ଣ ହେବା ଉଚିତ୍ । ଆମର ସଂକଳ୍ପ ହେଉଛି ଅମୃତ ପିଢ଼ିର ପଥରେ ଥିବା ପ୍ରତ୍ୟେକ ପ୍ରତିବନ୍ଧକକୁ ଦୂର କରିବା । ତୁମ ପ୍ରଦର୍ଶନରେ ବର୍ତ୍ତମାନ ମୁଁ ଯେଉଁ ଶୃଙ୍ଖଳା, କେନ୍ଦ୍ରୀଭୂତ ମାନସିକତା ଏବଂ ସମନ୍ୱୟ ଦେଖୁଛି ତାହା ଅମୃତକାଳର ସଂକଳ୍ପପୂରଣର ଆଧାର ।

ସାଥୀମାନେ

ଅମୃତକାଳର ଏହି ଯାତ୍ରାରେ ଆପଣ ସବୁବେଳେ ମୋର ଗୋଟିଏ କଥା ମନେ ରଖିବେ ଯେ ଆପଣଙ୍କୁ ଯାହା କରିବାକୁ ପଡିବ, ଦେଶ ପାଇଁ କରିବାକୁ ପଡିବ । ଦେଶ ପ୍ରଥମେ-ଏହା ଆପଣଙ୍କର ମାର୍ଗଦର୍ଶକ ନୀତି ହେବା ଉଚିତ୍ । ଆପଣ ଯାହା ବି କରିବେ, ପ୍ରଥମ ଚିନ୍ତା କରନ୍ତୁ ଯେ ଏହା କିପରି ଦେଶପାଇଁ ଲାଭଦାୟକ ହେବ । ଦ୍ୱିତୀୟଟି ହେଉଛି ଆପଣଙ୍କ ଜୀବନରେ କେବେ ବି ବିଫଳତାକୁ ନେଇ ଚିନ୍ତିତ ହୁଅନ୍ତୁ ନାହିଁ । ଏବେ ଦେଖନ୍ତୁ, ଆମ ଚନ୍ଦ୍ରଯାନ ପୂର୍ବରୁ ଚନ୍ଦ୍ରରେ ଅବତରଣ କରିପାରିନଥିଲା । କିନ୍ତୁ ତା'ପରେ ଆମେ ଏଭଳି ରେକର୍ଡ କରି ଯାହା ବି ହେଉ ଚନ୍ଦ୍ରର ଦକ୍ଷିଣ ମୁଣ୍ଡରେ ପହଞ୍ଚିବାରେ ଆମେ ଏକ ନମ୍ବର ହୋଇଗଲୁ । ତେଣୁ ଜିତିବା କିମ୍ବା ହାରିବା, ନିରନ୍ତର ରହିବା ଉଚିତ । ଆମ ଦେଶ ବହୁତ ବଡ଼, କିନ୍ତୁ ଛୋଟ ଛୋଟ ପ୍ରୟାସ ଦ୍ୱାରା ହିଁ ଏହା ସଫଳ ହୋଇଥାଏ । ପ୍ରତ୍ୟେକ ଛୋଟ ଛୋଟ ପ୍ରୟାସ ଗୁରୁତ୍ୱପୂର୍ଣ୍ଣ, ପ୍ରତ୍ୟେକ ପ୍ରକାରର ଅବଦାନ ଗୁରୁତ୍ୱପୂର୍ଣ୍ଣ ।

ମୋର ଯୁବ ବନ୍ଧୁମାନେ,

ଆପଣ ମୋର ସବୁଠାରୁ ବଡ ପ୍ରାଥମିକତା । ଆପଣମାନଙ୍କ ପାଖରେ ଦୁନିଆର ନେତୃତ୍ୱ ନେବାର ସାମର୍ଥ୍ୟ ଅଛି। ମୁଁ ଲାଲକିଲ୍ଲାରୁ କହିଥିଲି, ଏହା ହେଉଛି ଉପଯୁକ୍ତ ସମୟ । ଏହା ଆପଣଙ୍କ ର ସମୟ । ଏହି ସମୟ ହିଁ ଆପଣଙ୍କ ଓ ଦେଶର ଭବିଷ୍ୟତ ନିର୍ଦ୍ଧାରଣ କରିବ । ଆପଣଙ୍କୁ ନିଜର ସଂକଳ୍ପକୁ ସୁଦୃଢ଼ କରିବାକୁ ପଡିବ ଯାହାଦ୍ୱାରା ବିକଶିତ ଭାରତର ଲକ୍ଷ୍ୟ ହାସଲ ହୋଇପାରିବ । ଭାରତର ବୁଦ୍ଧି ଯେପରି ବିଶ୍ୱକୁ ଏକ ନୂଆ ଦିଗ ଦେଇପାରିବ ସେଥିପାଇଁ ଆପଣଙ୍କୁ ନିଜର ଜ୍ଞାନକୁ ବିସ୍ତାର କରିବାକୁ ପଡିବ । ଆପଣଙ୍କୁ ନିଜର ଦକ୍ଷତା ବୃଦ୍ଧି କରିବାକୁ ପଡିବ ଯାହାଦ୍ୱାରା ଭାରତ ବିଶ୍ୱସ୍ତରୀୟ ଆହ୍ୱାନର ସମାଧାନ ରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ । ସରକାର ନିଜ ଯୁବ ବନ୍ଧୁମାନଙ୍କ ସହ ପର୍ଯ୍ୟାୟକ୍ରମେ ଚାଲି ଚାଲି ଯାଉଛନ୍ତି । ଆଜି ଆପଣଙ୍କ ପାଇଁ ସୁଯୋଗର ନୂଆ ବାଟ ଖୋଲାଯାଉଛି । ନୂଆ ନୂଆ କ୍ଷେତ୍ରରେ ଆଜି ଆପଣଙ୍କ ପାଇଁ ସୁଯୋଗ ସୃଷ୍ଟି ହେଉଛି । ମହାକାଶ କ୍ଷେତ୍ରରେ ଆଗକୁ ବଢ଼ିବା ପାଇଁ ଆପଣଙ୍କ ପାଇଁ ନୂଆ ମାର୍ଗ ସୃଷ୍ଟି କରାଯାଉଛି । ବ୍ୟବସାୟ କରିବାର ସହଜତା ଉପରେ ଆପଣଙ୍କ ପାଇଁ ଗୁରୁତ୍ୱ ଦିଆଯାଉଛି । ପ୍ରତିରକ୍ଷା କ୍ଷେତ୍ରରେ ଆପଣଙ୍କ ପାଇଁ ଘରୋଇ କ୍ଷେତ୍ର ପାଇଁ ଏକ ସ୍ଥାନ ସୃଷ୍ଟି କରାଯାଇଛି । ଆପଣଙ୍କ ପାଇଁ ନ୍ୟାସନାଲ ରିସର୍ଚ୍ଚ ଫାଉଣ୍ଡେସନ ଗଠନ କରାଯାଇଛି । ଏକବିଂଶ ଶତାବ୍ଦୀରେ ଆପଣଙ୍କୁ କେଉଁ ପ୍ରକାର ର ଆଧୁନିକ ଶିକ୍ଷା ର ଆବଶ୍ୟକତା ପଡିବ ତାହା ଉପରେ ଆମେ କାମ କରୁଛୁ । ଆମେ ଦେଶର ଶିକ୍ଷା ବ୍ୟବସ୍ଥାରେ ସଂସ୍କାର ଆଣିଛୁ । ଆଜି ଆପଣଙ୍କୁ ନିଜ ମାତୃଭାଷାରେ ଉଚ୍ଚ ଶିକ୍ଷା ଲାଭ କରିବାର ସୁଯୋଗ ମିଳିଛି । ଆଜି ଆପଣଙ୍କର କୌଣସି ଧାରା କିମ୍ବା ବିଷୟ ସହିତ ବନ୍ଧା ହେବାର ବାଧ୍ୟତା ନାହିଁ । ଆପଣ ସର୍ବଦା ନିଜ ପସନ୍ଦର ବିଷୟ ଚୟନ କରି ଅଧ୍ୟୟନ କରିପାରିବେ । ଆପଣ ସମସ୍ତେ ଗବେଷଣା ଏବଂ ଉଦ୍ଭାବନ ସହିତ ଅଧିକରୁ ଅଧିକ ସଂଯୁକ୍ତ ହେବା ଉଚିତ୍ । ସୃଜନଶୀଳତା ଏବଂ ଉଦ୍ଭାବନକୁ ପ୍ରୋତ୍ସାହିତ କରିବାରେ ଅଟଳ ଟିଙ୍କରିଂ ଲ୍ୟାବ୍ ବହୁତ ସହାୟକ ହେବ । ସେନାରେ ଯୋଗ ଦେଇ କ୍ୟାରିୟର ଗଢ଼ିବାକୁ ଚାହୁଁଥିବା ଛାତ୍ରୀଙ୍କ ପାଇଁ ମଧ୍ୟ ସରକାର ନୂଆ ସୁଯୋଗ ସୃଷ୍ଟି କରିଛନ୍ତି । ଏଣିକି ଛାତ୍ରୀମାନେ ମଧ୍ୟ ବିଭିନ୍ନ ସୈନିକ ବିଦ୍ୟାଳୟରେ ନାମ ଲେଖାଇପାରିବେ । ପୂରା ଆତ୍ମବିଶ୍ୱାସ ସହ ଆଗକୁ ବଢ଼ିବାକୁ ପଡ଼ିବ । ଆପଣଙ୍କ ପ୍ରୟାସ, ଦୂରଦୃଷ୍ଟି, ସାମର୍ଥ୍ୟ ଭାରତକୁ ନୂତନ ଶିଖରରେ ପହଞ୍ଚାଇବ ।

ସାଥୀମାନେ

ଆପଣମାନେ ସମସ୍ତେ ସ୍ୱେଚ୍ଛାସେବୀ, ମୁଁ ଖୁସି ଯେ ଆପଣମାନେ ଆପଣଙ୍କ ଶକ୍ତିକୁ ସଠିକ୍ ଦିଗରେ ବ୍ୟବହାର କରୁଛନ୍ତି । ଆପଣ ଏହାକୁ ଅଣଦେଖା କରିବା ଉଚିତ୍ ନୁହେଁ । ଏହା କାହାର ପୂରା ଜୀବନର ସବୁଠାରୁ ଗୁରୁତ୍ୱପୂର୍ଣ୍ଣ ଅଂଶ ଅଟେ । ଯିଏ ଶୃଙ୍ଖଳାର ଭାବନା ରଖିଛି, ଯିଏ ଦେଶ ବହୁତ ଭ୍ରମଣ କରିଛି, ଯାହାର ବନ୍ଧୁ ଅଛନ୍ତି ଯିଏ ବିଭିନ୍ନ ପ୍ରଦେଶର ଭାଷା ଜାଣନ୍ତି, ତାଙ୍କ ବ୍ୟକ୍ତିତ୍ୱରେ ଉନ୍ନତି ହେବା ସ୍ୱାଭାବିକ । ଆଉ ଏକ କଥା ଆପଣଙ୍କୁ ସବୁବେଳେ ମନେ ରଖିବାକୁ ପଡିବ ତାହା ହେଉଛି ଫିଟନେସ । ଠିକ୍ ଅଛି ମୁଁ ଦେଖୁଛି, ତୁମେ ସମସ୍ତେ ଫିଟ୍ ଅଛ । ଫିଟନେସ୍ ଆପଣଙ୍କର ପ୍ରଥମ ପ୍ରାଥମିକତା ହେବା ଉଚିତ୍ । ଏବଂ ଫିଟନେସ୍ ବଜାୟ ରଖିବା ପାଇଁ ଆପଣଙ୍କ ଶୃଙ୍ଖଳା ବହୁତ କାମରେ ଆସିଥାଏ । କୌଣସି ସମୟରେ ପ୍ରେରଣା କମିପାରେ, କିନ୍ତୁ ଶୃଙ୍ଖଳା ହିଁ ଆପଣଙ୍କୁ ସଠିକ୍ ମାର୍ଗରେ ରଖିଥାଏ । ଏବଂ ଯଦି ଆପଣଙ୍କ ଶୃଙ୍ଖଳା କାହାକୁ ପ୍ରେରଣା ଦେଇଥାଏ, ତେବେ ବୁଝନ୍ତୁ ଯେ ପ୍ରତ୍ୟେକ କ୍ଷେତ୍ରରେ ବିଜୟ ସୁନିଶ୍ଚିତ ।

ସାଥୀମାନେ,

ମୁଁ ମଧ୍ୟ ଆପଣଙ୍କ ଭଳି ଏନସିସିରେ ଅଛି । ମୁଁ ଏନସିସିରୁ ବାହାରକୁ ଆସିଛି । ମୁଁ ସେହି ରାସ୍ତା ଦେଇ ଆପଣମାନଙ୍କ ମଧ୍ୟକୁ ଆସିଥିଲି । ମୁଁ ଜାଣେ ଯେ ଏନସିସି, ଏନଏସଏସ କିମ୍ବା ସାଂସ୍କୃତିକ ଶିବିର ଭଳି ଅନୁଷ୍ଠାନ ଯୁବକମାନଙ୍କୁ ସମାଜ ଏବଂ ନାଗରିକର କର୍ତ୍ତବ୍ୟ ବିଷୟରେ ସଚେତନ କରିଥାଏ । ଏହି କ୍ରମରେ ଦେଶରେ ଆଉ ଏକ ସଂଗଠନ ଗଠନ କରାଯାଇଛି । ଏହି ସଂଗଠନର ନାମ 'ମୋ ଯୁବ ଭାରତ' । ମୁଁ ଆପଣମାନଙ୍କୁ ଅନୁରୋଧ କରିବି ଯେ 'ମୋ ଭାରତ' ସ୍ୱେଚ୍ଛାସେବୀ ଭାବରେ ପଞ୍ଜୀକରଣ କରନ୍ତୁ । ଅନଲାଇନରେ 'ମୋ ଭାରତ' ୱେବସାଇଟକୁ ଯାଆନ୍ତୁ ।

ସାଥୀମାନେ

ସାଧାରଣତନ୍ତ୍ର ଦିବସର ଏହି ପାଳନ ସମୟରେ ଆପଣଙ୍କୁ କ୍ରମାଗତ ଭାବରେ ଏଭଳି କାର୍ଯ୍ୟକ୍ରମକୁ ଯିବାର ସୁଯୋଗ ମିଳିବ । ପରେଡ୍ ରେ ଅଂଶଗ୍ରହଣ କରିବା ବ୍ୟତୀତ ଆପଣମାନେ ସମସ୍ତେ ଅନେକ ଐତିହାସିକ ସ୍ଥାନ ପରିଦର୍ଶନ କରିବା ସହ ଅନେକ ବିଶେଷଜ୍ଞଙ୍କୁ ଭେଟିବେ । ଏହା ଏକ ଅନୁଭୂତି ହେବ ଯାହାକୁ ଆପଣ ସାରା ଜୀବନ ମନେ ରଖିବେ । ପ୍ରତିବର୍ଷ ଯେତେବେଳେ ବି ଆପଣ ଗଣତନ୍ତ୍ର ଦିବସ ପରେଡ୍ ଦେଖିବେ, ଆପଣଏହି ଦିନଗୁଡ଼ିକୁ ମନେ ରଖିବେ, ଆପଣଙ୍କୁ ମଧ୍ୟ ମନେ ଥିବ ଯେ ମୁଁ ଆପଣଙ୍କୁ କିଛି କଥା କହିଥିଲି । ତେଣୁ ମୋ ପାଇଁ ଗୋଟିଏ କାମ କରନ୍ତୁ । କେବଳ ହାତ ଉପରକୁ ରଖନ୍ତୁ, ମୋତେ କୁହନ୍ତୁ? କନ୍ୟାମାନଙ୍କର ସ୍ୱର ଶୁଭୁଛି, ପୁଅମାନଙ୍କ ସ୍ୱର ଶୁଭୁନାହିଁ । କହିବେ କି? ଏବେ ଏହା ସମାନ ହୋଇଛି । ଆପଣଙ୍କ ଅନୁଭୂତିକୁ କେଉଁଠି ଡାଏରୀରେ ଲେଖନ୍ତୁ । ଦ୍ୱିତୀୟତଃ, ଆପଣ ଗଣତନ୍ତ୍ର ଦିବସରୁ ଯାହା ଶିଖିଛନ୍ତି, ତାହା ନମୋ ଆପରେ ଲେଖି କିମ୍ବା ଭିଡିଓ ରେକର୍ଡିଂ କରି ମଧ୍ୟ ମୋତେ ପଠାଇବେ । ପଠାନ୍ତୁ? କେମିତି ଆପଣଙ୍କ କଣ୍ଠସ୍ୱର ଶୁଭିଲା । ନମୋ ଆପ୍ ଜରିଆରେ ଆଜିର ଯୁବପିଢ଼ି ମୋ ସହ ନିରନ୍ତର ଯୋଡ଼ି ହୋଇପାରିବେ । ଆଉ ଯେତେବେଳେ ଆପଣ ମଧ୍ୟ ଆପଣଙ୍କ ପକେଟରେ ମୋବାଇଲ ରଖିବେ, ତେବେ ଆପଣ ଦୁନିଆକୁ କହିପାରିବେ ଯେ ମୁଁ ନରେନ୍ଦ୍ର ମୋଦିଙ୍କୁ ମୋ ପକେଟରେ ରଖିଛି ।

ମୋର ଯୁବ ବନ୍ଧୁ ସାଥିମାନେ,

ମୁଁ ଆପଣଙ୍କ ଉପରେ ବିଶ୍ୱାସ କରେ, ମୁଁ ଆପଣଙ୍କ ଉପରେ ବିଶ୍ୱାସ କରେ । କଠିନ ଅଧ୍ୟୟନ କରନ୍ତୁ, ସଚେତନ ନାଗରିକ ହୁଅନ୍ତୁ, ପରିବେଶର ସୁରକ୍ଷା କରନ୍ତୁ, ଖରାପ ଅଭ୍ୟାସରୁ ଦୂରେଇ ରୁହନ୍ତୁ ଏବଂ ନିଜ ଐତିହ୍ୟ ଓ ସଂସ୍କୃତି କୁ ନେଇ ଗର୍ବିତ ହୁଅନ୍ତୁ । ଆପଣମାନଙ୍କ ସହିତ ଦେଶର ଆଶୀର୍ବାଦ ଅଛି, ମୋର ଶୁଭେଚ୍ଛା । ମୁଁ ଚାହୁଁଛି ଯେ ଆପଣ ପ୍ୟାରେଡ୍ ସମୟରେ ପ୍ରଭାବଶାଳୀ ରୁହନ୍ତୁ ଏବଂ ସମସ୍ତଙ୍କ ହୃଦୟ ଜିତନ୍ତି । ସମସ୍ତଙ୍କୁ ବହୁତ ବହୁତ ଧନ୍ୟବାଦ । ଆପଣମାନେ ପୂରା ସାମର୍ଥ୍ୟ ସହିତ ମୋ ସହିତ କଥା ହୁଅ –

ଭାରତ ମାତା କି ଜୟ ।

ଭାରତ ମାତା କି ଜୟ ।

ଭାରତ ମାତା କି ଜୟ ।

ବନ୍ଦେ ମାତରମ୍ ।

ବନ୍ଦେ ମାତରମ୍ ।

ବନ୍ଦେ ମାତରମ୍ ।

ବନ୍ଦେ ମାତରମ୍ ।

ବନ୍ଦେ ମାତରମ୍ ।

ବନ୍ଦେ ମାତରମ୍ ।

ବନ୍ଦେ ମାତରମ୍ ।

ବନ୍ଦେ ମାତରମ୍ ।

ବନ୍ଦେ ମାତରମ୍ ।

 ସାବାସ୍ !

*****

NS/SLP