প্রধানমন্ত্রীগী লোইশঙ

পি.এম.না আন্ধ্র প্রদেশকী শ্রী সত্যা সাই জিলাদা লৈবা পলাসমুদ্রমদা নেস্নেল একাদেমী ওফ কস্তমস, ইন্দাইরেক্ত তেক্সেস এন্দ নরকোতিক্সকী অনৌবা কেম্পস শঙ্গাখ্রে


ইন্দিয়ন রিভেন্যু সর্ভিস (কস্তম এন্দ ইন্দাইরেক্ত তেক্সেস)কী 74শুবা অমসুং 75শুবা বেৎচশিং অমদি রোয়েল সিভিল সর্ভিস ওফ ভুতানগী ওফিসর ত্রেনীশিংগা লোয়ননা ৱারী ৱাতাই শাখ্রে

“NACINগী থৌদাং অসি লৈবাক অসিদা মোদর্ন ইকোসিস্তেম অমা লৈহনবনি”

“শ্রী রাম অসি অফবা লৈঙাক্কী অথোইবা খুদম অমনি মরম অসিনা মহাক্না NACINগীসু অচৌবা ইথিল ওইরগনি”

“ঐখোয়না লৈবাক অসিদা GST অমসুং অচম্বা ইনকম তেক্সকী মওংদা অমদি ফেসলেস এসেসমেন্ত হৌদোকখিবনা মোদর্ন সিস্তেম অমনা পীরি। রিফোর্ম পুম্নমক অসিনা রেকোর্দ ওইনা তেক্স কল্লেক্সন তৌবা ঙমহনখি”

“ঐখোয়না মীয়ামদগী লৌবা খুদিংমক, ঐখোয়না মখোয়দা অমুক পীরি অমসুং মসিনি অফবা লৈঙাক অমসুং মসিনা রাম রাজ্যাগী পাউজেলনি”

“শেঞ্জা-থুমজাগী মায়োক্তা থেংনবা, শেঞ্জা থুমজা তৌবা মীওইশিংগী মায়োক্তা এক্সন লৌখৎপা অসিনা লৈবাক্কী মরু ওইবা ওইরি”

“লৈবাক্কী লায়রবশিংদা রিসোর্সশিং পীরবদি মখোয়দা শক্তি লৈগনি, মখোয় মশানা লৈতা-লায়রববু মাইথীবা পীবা ঙমগনি”

“হৌজিক পাল্লিবা সরকারগী খোঙথাংশিংনা হৌখিবা চহি 9দা মীওই করোর 25রোম লৈতা-লায়রবা কোকহনবা ঙমখ্রে”

Posted On: 16 JAN 2024 6:08PM by PIB Imphal

প্রধান মন্ত্রী, শ্রী নরেন্দ্র মোদীনা ঙসি আন্ধ্র প্রদেশকী শ্রী সত্যা সাই জিলাদা লৈবা পলাসমুদ্রমদা নেস্নেল একাদেমী ওফ কস্তমস, ইন্দাইরেক্ত তেক্সেস এন্দ নরকোতিক্সকী অনৌবা কেম্পস শঙ্গাখ্রে। মহাক্না থৌরম অসিদা উৎখিবা একজিবিসন কোইনা চৎতুনা য়েংখি। প্রধান মন্ত্রীনা ইন্দিয়ন রিভেন্যু সর্ভিস (কস্তম এন্দ ইন্দাইরেক্ত তেক্সেস)কী 74 অমসুং 75শুবা বেৎচশিংগী ওফিসর ত্রেনীশিং লোয়ননা রোয়েল সিভিল সর্ভিস ওফ ভুতানগী ওফিসর ত্রেনীশিংগসু ৱারী শাখ্রে।

থৌরম অসিদা ৱা ঙাংলদুনা প্রধান মন্ত্রী পলাসমুদ্রমদা নেস্নেল একাদেমী ওফ কস্তমস, ইন্দাইরেক্ত তেক্সেস এন্দ নরকোতিক্স শঙ্গাবদা মীপুম খুদিংমক্তা নুংঙাইবা ফোঙদোকখি। পলাসমুদ্রমগী লমদমগী অখন্নবা অদু ফোঙদোক্লদুনা প্রধান মন্ত্রীনা হায়খি মদুদি মসি স্পিরিচুএলিতী, লৈবাক শেমগৎপা অমসুং অফবা লৈঙাক্কা মরী লৈনৈ অমসুং ভারতকী হেরিতেজকী মশক তাক্লি। মহাক্না শ্রী সত্য সাই বাবাগী পোক্নফম অসি পুত্তাপর্থিদা লৈ, অথৌবা নীংতম লান্মী পদ্ম শ্রী কল্লুর সুব্বা রাও, মশক নাইবা পপেত্রী আর্তিস্ত দলাবাই ছলাপথী রাও অমসুং বিজয়নগর সমরাজ্যাগী মতিক ময়াই লৈরবা অফবা লৈঙাক অসিনা লমদম অসিগী ইথিলগী হৌরকফমসু ওইরি হায়না ফোঙদোকখি। মহাক্না NACINগী অনৌবা কেম্পসনা অফবা লৈঙাক্কী অনৌবা মায়োল অমা ওইরগনি অমসুং মসিনা লৈবাক্কী ললোন-ইতিক অমসুং ইন্দস্ত্রীদা শাহৌ অমা পীরগনি।

ঙসি অসি তিরুবল্লুবর নুমিৎনি হায়রদুনা প্রধান মন্ত্রী মশক নাইবা তামিল লম্বোইবা অসিগী মরমদা পনখি অমসুং দেমোক্রেসীদা মীয়ামগী য়াইফনবা লমজিংলিবা রিভেন্যু ওফিসরশিংনা তেক্স খোমগৎপগী লৌরিবা থৌদাংগী মতাংদা পনখি।

পি.এম.না লেপক্ষীদা লৈবা বীরভাদ্রা মন্দিরদা চৎখি  অমসুং রঙ্গানাথা রামায়ন তাখি। প্রধান মন্ত্রীনা ভক্তাশিংগা লোয়ননা ভজন কীর্তনদা শরুক য়াখি। রাম জাতায়ু সম্বদ অসি মনাক অনকপদা থোকখি হায়য়গী থাজবা ফোঙদোক্লদুনা প্রধান মন্ত্রীনা হায়খি মহাক্না অয়োধ্যা তামদা লৈবা মন্দিরগী প্রান প্রিস্থাগী মাংওইননা নুমিৎ 11নিগী অখন্নবা অনুস্থান চত্থরি। শেংলবা মতমগী মনুংদা মন্দির অসিদা থৌজাল ফংজবা অসিদা মহাক্না নুংঙাইবা ফোঙদোকখি। লৈবাক অসিদা রাম ভক্তিগী ওইরিবা এতমোস্ফিয়র অসিগী মতাংদা প্রধান মন্ত্রীনা হায়খি মদুদি শ্রী রামনা পীবা ইথিল অসি নীংজবদগী হেল্লি। মহাক্না হায়খি মদুদি শ্রী রাম অসি অফবা লৈঙাক্কী অথোইবা খুদম অমনি মরমদি মহাক অসি NACINগীসু ওইনা অচৌবা ইথিল অমা ওইগনি।

মহাত্মা গান্ধী পল্লদুনা প্রধান মন্ত্রীনা হায়খি মদুদি রাম রাজ্যগী ৱাখল্লোন অসিমক তশেংবা দেমোক্রেসীগী ৱাহন্থোক অদুনি। মহাক্না মহাত্মা গান্ধীগী পুন্সি এক্সপরিয়েন্স অসিনা রাম রাজ্যা আইদিওলোজীবু ঙাকলৌ পীরিবা ৱাখল্লোন অদুনি হায়খি অমসুং প্রজা খুদিংমক্কী ৱাখল্লোনবু তাবীবা অমসুং মীপুম খুদিংমক্না মখোয়গী ফংফম থোকপা ইকাই খুম্নবা ফংবা লৈবাক অমগী মরমদা হায়রমখি। “রাম রাজ্য বাসি (প্রজা), নখোয়গী কোক ৱাংনা থাংগৎতুনা অমসুং জস্তিসকীদমক থেংনবীয়ু, মীপুম খুদিংমক চপ মান্ননা লোইনৌ, অশোনববু ঙাকপী শেনবীয়ু, ধর্মবু খ্বাইদগী মরু ওইনা লৌ” হায়না হায়রমখিবা সংস্ক্রৃতকী শ্লোকা অদু পল্লদুনা প্রধান মন্ত্রীনা “রাম রাজ্যদা প্রজাশিংগী মরমদা হায়রমখি” হায়না ফোঙদোকখি। মহাক্না হায়খি মদুদি রাম রাজ্য অসি মীপুম খুদিংমক্না কোক ৱাংনা থাংগৎতুনা চৎপা ঙম্বা অমসুং ইকাই খুম্নবা ফংবা, প্রজা খুদিংমক চপ মান্ননা লোইনবা, অশোনববু ঙাকপী-শেনবীবা, অমসুং ধর্মবু খ্বাইদগী মরু ওইনা লৌবা হায়বা য়ুম্বী মরী অসিদা শেমখি। “21শুবা চহিচা অসিদা মোদর্ন ইন্সতিত্যুসনশিং অসিগী রুল অমসুং রিগ্যুলেসনশিং শেম্মিবা এদমিনিস্ত্রেতরশিং ওইনা নখোয়না পান্দম মরি অসিদা মীৎয়েং চংগদবনি অমসুং মসি কাওরোইদবনি” হায়না প্রধান মন্ত্রীনা ফোঙদোকখি।

প্রধান মন্ত্রীনা রাম রাজ্যদা স্বামী তুলসিদাসনা তেক্স সিস্তেমগী মরমদা হায়রমখিবা অদুসু পনখি। রামচরিৎ মানসকী মতাংদা পল্লদুনা প্রধান মন্ত্রীনা তেক্সেসনগী য়াইফনবা লৈরিবা লম অমসুং মীয়ামদগী লাকপা তেক্সকী শেল খুদিংমক চাউখৎপা পুরক্নবা মীয়ামগী য়াইফনবদদা থাদগদবনি হায়না ফোঙদোকখি। মসিগী মরমদা মখা তারদুনা পি.এম.না হৌখিবা চহি  10 অসিদা তৌখিবা তেক্স রিফোর্মশিংগী মরমদা ঙাংখি। মহাক্না মমাংদা লৈরম্বা মলতিপল, নন-ত্রান্সপরেন্ত তেক্স সিস্তেমশিংগী মরমদা নীংশিংখি। “ঐখোয়না GST অমসুং অচম্বা ইনকম তেক্সকী মওংদা অমসুং ফেসলেস এসেসমেন্ত হৌদোক্তুনা মোর্দন সিস্তেম অমা পীখি। রিফোর্ম পুম্নমক অসিনা রেকোর্দ ওইনা তেক্স খোমজিনবা ঙমহনখি”, হায়না প্রধান মন্ত্রীনা ফোঙদোখখি। ‘ঐখোয়না তোঙান-তোঙানবা স্কিমশিংগী খুত্থাংদা মীয়ামগী শেল অদু হন্দোক্লি’ হায়না মহাক্না মখা তাখি। মহাক্না হায়খি মদুদি IT একজেম্পজন লিমিৎ অসি লুপা লাখ 2গী ইনকম লাকপা ওইরম্বদগী লুপা লাখ 7দা হেনগৎহনখি। 2014গী মতুংদা তৌখিবা তেক্স রিফোর্মশিং অসিনা প্রজাশিংগী লুপা করোর লাখ 2.5রোমগী তেক্স তুংশিনবা ঙমহনখি। মহাক্না হায়খি মদুদি লৈবাক অসিদা তেক্সপেয়রশিংগী মশিং লেপ্পা লৈতনা হেনগৎলক্লি মরমদি মখোয়না মখোয়গী তেক্সকী শেনফম অসি অফবা মওংদা শীজিন্নবনা নুংঙাইবা পোক্লি। “ঐখোয়না মীয়ামদগী লৌবা খুদিংমক, ঐখোয়না মখোয়দা অমুক পীরি অমসুং মসিনি অফবা লৈঙাক অমসুং মসিনা রাম রাজ্যাগী পাউজেলনি”, হায়না মহাক্না মখা তাখি।

প্রধান মন্ত্রীনা রাম রাজ্যদা রিসোর্সশিং নীংথিনা শীজিন্নবদা অখন্নবা মীৎয়েং চংলি হায়নসু ফোঙদোকখি। মমাংগী সরকার লৈবাক অসিদা অচৌবা অমাংশিং থোকহন্দুনা প্রোজেক্তশিং পন্দুনা অমসুং থৈদোক্তুনা থমলমখী হায়না ফোঙদোক্লদুনা প্রধান মন্ত্রীনা ভগৱান রামগা ভারতকা ৱারী শাবদা অসিগুম্বা মতৌশিং অসিদগী চেকশিন্নবা হায়খিবা অদুগা চাংদম্নখি অমসুং হায়খি, “ঐহাক্না থাজৈ মদুদি নখোয়না শেল চংবা হন্থনা থবকশিং অসি লোইশিনগনি অমসুং মতম মাংহনবা তৌদনা কান্নবা হেন্না পীগনি”। মহাক্না হায়খি মদুদি হৌখিবা চহি 10 অসিদা হৌজিক পাল্লিবা সরকারনা মসি খঙনা চৎখি অমসুং প্রোজেক্তশিং মতম চানা লোইশিনবদা মীৎয়েং থমখি।

অমুক হন্না গোস্বামী তুলসিদাসকী মতাংদা পনদুনা প্রধান মন্ত্রীনা লায়রববু শৌগৎপা অমসুং ফংফম থোক্তবশিং লৌথোক্লিবা সিস্তেম অমগী মথৌ তাই হায়খি। মহাক্না হায়খি হৌখিবা চহি 10 অসিদা দোক্যুমেন্তশিংদগী অশাবা মীওইশিংগী মমিং করোর 10 লৌথোকখি। “ঙসি ফংফম থোকপা বেনিফিসরীগী বেঙ্ক একাউন্তদা শেল খুদিংমক য়ৌরি। শেঞ্জা-থুমজাগী মায়োক্তা থেংনবা অমসুং শেঞ্জা-থুমজা তৌবা মীওইশিংগী মায়োক্তা এক্সন লৌখৎপনা সরকারগী মরু ওইবা ওইখি” হায়না মহাক্না ফোঙদোকখি।

হৌজিক পাল্লিবা সরকারগী খোঙথাংশিংনা হৌখিবা চহি 9দা মীওই করোর 25রোম লৈতা-লায়রবদগী কোকহনখি হায়না ফোঙদোকখিবা ঙরাং ফোঙখিবা NITI আয়োগকী খ্বাইদগী নৌবা রিপোর্তকী মরমদা জাতিদা খঙহল্লদুনা পি.এম. মোদীনা হায়খী মদুদি থাজবা অসিগী পোজিতিব ওইবা ফলশিং অসি লৈবাক্কী চাউখৎ-থৌরাংগী থবক পাইখৎলিবা অসিদা উবা ফংলি। মরু ওইনা দিকেদ অসিদা লৈতা-লায়রবা কোকহন্নবগী খোলাউ লাউরিবা লৈবাক অসিদা মসিবু পুৱারী ওইরবা অমসুং অমুক্তা ওইখিদ্রিবা মাইপাকপা অমনি হায়রদুনা প্রধান মন্ত্রীনা হায়খি মদুদি মসি 2014দা শক্তি পাইখিবা সরকার অসিনা লায়রবশিংগী য়াইফনবা মীৎয়েং চংখিবগী মহৈনি। প্রধান মন্ত্রীনা থাজবা ফোঙদোকখি মদুদি লৈবাক অসিগী লায়রবশিংদা পাম্বৈ অমসুং রিসোর্সশিং পীরবদি মখোয়না লৈতা লায়রবা মাইথীবা পীবা ঙম্নবগী মতিক ময়াই লৈগনি। “ঐখোয়না মসি ঙসিদি মঙফাওনবা ঙম্বা উবা ফংলে”, হায়না মহাক্না মখা তাখি। মহাক্না হায়খি মদুদি সরকারনা হকশেল, এজুকেসন, এম্প্লোয়মেন্ত অমসুং সেল্ফ-এম্প্লোয়মেন্তদা চাদিং তৌখি অমসুং লায়রবশিংগী খুদোংচাবশিং হেনগৎহল্লি। “লায়রবশিংগী শক্তি হেনগৎহল্লবা অমসুং খুদোংচাবশিং পীরবা মতমদা মখোয়না লৈতা লায়রবদগী থোরকপা ঙমগনি” হায়না মহাক্না ফোঙদোক্লদুনা হায় মদুদি জনুৱারী 22দা রাম মন্দির থোং হাংগদৌরিবা অসিগী মমাংদা নুংঙাইবা পাউ অমগা লৈ”। “ভারত্তা লৈতা লায়রবা হন্থহনখি, মসিনা মীপুম খুদিংমক্তা অনৌবা থাজবনা থলহনগনি অমসুং লৈবাক অসিগী থাজবা হেনগৎহনগনি” হায়না মহাক্না ফোঙদোকখি। পি.এম. মোদীনা লৈতা লায়রবা হন্থহনবা অসিনা নিও-মিদ্দল ক্লাস অমসুং মিদ্দল ক্লাসকী প্রোলিফরেসন হন্থহনবা ঙমখি হায়না ফোঙদোকখি। মহাক্না হায়খি মদুদি ইকনোমীগী লমদা লৈরিবা মীওইশিংনা নিও-মিদ্দল ক্লাসকী গ্রোথকী পোতেন্সিএল খঙখি অমসুং মখোয়না ইকনোমিক এক্তিবিতীশিংদা শরুক তম্মিবা অসি খঙখি। “অসিগুম্বা ফীভম অমদা NACINনা পুক্নিং চংবগা লোয়ননা মখোয়গী থৌদাং মপুংফানা পাংথোক্কদবনি।

পি.এম. মোদীনা লাল কিলাগী লানবন্দগী মহাক্না লাউখিবা সবকা প্রয়াস খোলাউগী মতাংদা পল্লদুনা ভগৱান রামগী পুন্সি ৱারীগী মতাংদা শন্দোক্না তাকখি। মহাক্না শ্রী রামনা রাবনগী মায়োক্তা লান্থেংনবদা মহাক্না লৌশিং লৈনা রিসোর্সশিং শিজিন্নখিবা অমসুং মদুবু অচৌবা ফোর্স অমা ওইহনখিবা অদুগী মতাংদা ফোঙদোকখি। মহাক্না ওফিসরশিংদা নেসন-বিল্দিংদা মখোয়না লৌগদবা থৌদাং অদু মশক খংনবা অমসুং লৈবাক অসিগী ইনকম অমসুং ইনবেস্তমেন্ত হেনগৎহন্নবা অমসুং ইজ ওফ দুইং বিজিনেস হেনগৎহন্নবা পাউজেল পীরদুনা ৱারোল অদু তেনশিনখি।    

থৌরম অদুদা তিনখিবা মীওইশিংগী মরক্তা আন্ধ্র প্রদেশকী রাজ্যপাল শ্রী এস. অবদুল নজীর, আন্ধ্র প্রদেশকী মুখ্য মন্ত্রী জগন মোহন রেদ্দী, কেন্দ্রগী শেল-থুম মন্ত্রী শ্রীমতি নিরমলা সিতারামন অমসুং সেন্ত্রেল বোর্দ ওফ ইন্দাইরেক্ত তেক্সেস অমসুং কস্তমগী চিয়রমেন শ্রী সঞ্জয় কুমার অগর্ৱাল য়াওরি।

বেকগ্রাউন্দ

সিভিল সর্ভিস কেপাসিতী বিল্দিংগী খুত্থাংদা লৈঙাক ফগৎহন্নবা প্রধান মন্ত্রী মীৎয়েং অদুবু মঙফাওনহন্নবা খোঙথাং অমা ওইনা আন্ধ্র প্রদেশকী শ্রী সধ্যা সাই জিলাগী পলসমুদ্রমদা নেস্নেল একাদেমী ওফ কস্তমস, ইন্দাইরেক্ত তেক্সেস এন্দ নার্কোতিক্স (NACIN)গী অনৌবা কেম্পস অমা শাখ্রে। একর 500 শিনবা থুংনা শারিবা একাদেমী অসি ইন্দাইরেক্ত তেক্সেসন (কস্তমস, সেন্ত্রেল এক্সাইজ অমসুং গুদ এন্দ সর্ভিস তেক্স) অমসুং নার্কোতিক্স কন্ত্রোল এদমিনিস্ত্রেসন লমদা কেপাসিতী বিল্দিংগীদমক ভারত সরকারগী এপেক্স ইন্সতিত্যুসন অমনি। নেস্নেল লেভেল ৱর্ল্দ ক্লাস ত্রেনিং ইন্সতিত্যুত অসিনা ইন্দিয়ন রেভেন্যু সর্ভিস (কস্তম অমসুং ইন্দাইরেক্ত তেক্স)কী ওফিসিএলশিংগা লোয়ননা সেন্ত্রেল এলাইদ সর্ভিসশিং, রাজ্য সরকার অমসুং পার্তনর লৈবাকশিংগী ত্রেনিং পীবা ঙমলগনি।

মসিগী কেম্পস অসি হাপচিনখিবগা লোয়ননা NACINনা ত্রেনিং অমসুং কেপাসিতী বিল্দিংগী ওইনা ওকমেন্তেদ অমসুং ভর্চ্যুএল রিএলিতী, ব্লোক চেনগা লোয়ননা আর্তিফিসিএল ইন্তিলিজেন্স অমসুং অতোপ্পা ইমর্জিং তেক্নোলোজীশিংগুম্বা মতমগা চুনরবা তেক্নোলোজিশিং শিজিন্নবদা মীৎয়েং চংগনি।

***



(Release ID: 1996923) Visitor Counter : 44


Read this release in: English , Urdu , Marathi , Hindi , Bengali , Assamese , Punjabi , Gujarati , Odia , Tamil , Telugu , Kannada , Malayalam