প্রধান মন্ত্রী, শ্রী নরেন্দ্র মোদীনা জনুৱারী 12, 2024দা মহারাস্ত্রদা চৎকনি। নুমিৎ য়ুংবা মতুংগী চাউরাকপ পুং 12.15 তাবা মতমদা, প্রধান মন্ত্রীনা নাশিক্তা য়ৌগনি অমসুং মহাক্না মফমসিদা 27শুবা নেস্নেল য়ুথ ফেস্তিবেল হৌদোক্কনি। নুংথিলগী চাউরাকপা পুং 3.30 তাবা মতমদা, প্রধান মন্ত্রীনা মুম্বাইদা চত্তুনা অতল বিহারী সেৱারী – নহাবা সেবা সেতু শঙ্গাগনি অমসুং মসিদা চৎকনি। নুংথিলগী পুং 4.15 তাবা মতমদা, প্রধান মন্ত্রীনা নবি মুম্বাইদা পাংথোকপা মীয়ামগী থৌরম অমদা শরুক য়াগনি, মসিদা মহাক্না চাউখৎ থৌরাংগী তোঙান-তোঙানবা প্রোজেক্ত কয়া শঙ্গাগনি, লৈবাক মীয়ামদা খুৎশিন্নগনি অমসুং উরেপ উয়ুংসু তমগনি।

অতল বিহারী সেৱারী – নহাবা সেবা সেতু

প্রধান মন্ত্রীগী মঙলান অসিদি অর্বান ত্রান্সপোর্ত ইনফ্রাস্ত্রকচর অমসুং কন্নেক্তিবিতী হেন্না ফগৎহন্দুনা মীয়ামগী ‘ইজ ওফ মোবিলিতী’ হেন্না ফগৎহনবা হায়বসিনি। মঙলান অসিগা মরী লৈননা, মুম্বাই ত্রান্সহার্বর লিঙ্ক (MTHL), হৌজিক্না ‘অতল বিহারী সেৱারী – নহাবা সেবা সেতু’ হায়না মিংথোল্লবা অসি শাবা হৌখিবনি। থোং অসিগী উরেপ উয়ুং অসিবুনা প্রধান মন্ত্রীনা দিসেম্বর, 2016দা তমখিবনি।

অতল সেতু অসি পুন্না লুপা করোর 17,840 চঙনা শাবনি। মসি লেন-6 লৈদুনা সমুদ্রদা চাউরাকপা কিমি 16.5 অমসুং কংফালদা চাউরাকপা কিমি 5.5 লৈদুনা পুন্না কিমি 21.8 শাংই। মসিনা ভারতকী খ্বাইদগী শাংবা থোং অমসুং সী ব্রিজ অমসু ওইরগনি। মসিনা মুম্বাই ইন্তর্নেস্নেল এয়রপোর্ত অমসুং নবি মুম্বাই ইন্তর্নেস্নেল এয়রপোর্ত অনিগী মরক্তা চৎপদা হেন্না য়াঙহল্লগনি অমসুং মুম্বাইদগী গোৱা অমসুং খা ভারত্তা চৎপদা চঙবা মতমসু য়াম্না হন্থহল্লগনি। মসিনা মুম্বাইগী হিথাংফম অমসুং জৱাহর্লাল নেহরু হিথাংফমগী মরক্তা কন্নেক্তিবিতী হেন্না ফগৎহল্লগনি।

নবি মুম্বাইদা পাংথোক্কদবা মীয়ামগী থৌরম

প্রধান মন্ত্রীনা নবি মুম্বাইদা পাংথোকপা মীয়ামগী থৌরম অমদা লুপা করোর 12,700 হেনবগী  চাউখৎ থৌরাংগী তোঙান-তোঙানবা প্রোজেক্ত কয়া শঙ্গাগনি, লৈবাক মীয়ামদা খুৎশিন্নগনি অমসুং উরেপ উয়ুংসু তমগনি।

প্রধান মন্ত্রীনা ইস্তর্ন ফ্রীৱেগী ওরেঞ্জ গেত্তগী মেরিন দ্রাইব ফাওবা শম্নবা অন্দর্গ্রাউন্দ রোদ তন্নেল অমগী উরেপ উয়ুং তমগনি। কিমি 9.2 শাংবা তন্নেল অসি কুপা করোর 8700 হেন্না চঙদুনা শাগনি অমসুং মসিনা মুম্বাইগী ইনফ্রাস্ত্রকচর দিভেলপমেন্ততা মশক থোক্না তেংবাংবগা লোয়ননা ওরেঞ্জ গেত অমসুং মেরিন দ্রাইব চৎপগী মতম য়াম্না হন্থহনগনি।

প্রধান মন্ত্রীনা সুর্য় রিজনেল বল্ক দ্রিঙ্কিং ৱাতর প্রোজেক্তকী ফেজ 1বু লৈবাক মীয়ামদা খুৎশিন্নগনি। লুপা করোর 1975 হেন্না চঙনা পায়খৎপা প্রোজেক্ত অসিনা মহারাস্ত্রগী পলঘর অমসুং থানে জিলাদা থক্নবা ঈশিং পীগনি, অমসুং মীওই লাক্ষ 14দা কান্নবা ফংহনগনি।

মীয়ামগী থৌরম অসিগী মনুংদা, প্রধান মন্ত্রীনা লুপা করোর 2000গী রেলৱে প্রোজেক্ত কয়াসু লৈবাক মীয়ামদা খুৎশিন্নগনি। হায়রিবশিং অসিগী মনুংদা, ‘উরান খার্কোপর রেলৱে লাইনগী ফেজ 2’ য়াওগনি। নেরুল/বেলাপুরদগী খার্কোপরগী মরক্তা চেনবা সবঅর্বান সর্ভিসশিং অসি হৌজিক উরান ফাওবা শাংদোক্কদৌরিবা অসিনা মসিনা নবী মুম্বাইদা চৎপদা হেন্না নুংঙাইহনগনি। প্রধান মন্ত্রীনা উরান রেলৱে স্তেসন্দগী খার্কোপর ফাওবগী অনৌবা EMU ত্রেন অসিবুসু লম্থাগনি।

লৈবাক মীয়ামদা খুৎশিন্নগদৌরবা অতোপ্পা রেল প্রোজেক্তশিংগী মনুংদা থানে-বাশী/পনবেল ত্রান্স হার্বর লাইন্দা লৈবা অনৌবা সবঅর্বান স্তেসন ‘দিঘা গাও’ শঙ্গাবা অমসুং খার রোদ অমসুং গোরাগো রেলৱে স্তেসনগী মরক্কী অনৌবা 6শুবা লাইন য়াওরি। প্রোজেক্তশিং অসিনা মুম্বাইদা নুমিৎ খুদিংগী চত্থোক চৎশিন তৌরিবা মীওই লিশিং কয়াদা অহেনবা খুদোংচাবা পীরগনি।

প্রধান মন্ত্রীনা জেম অমসুং জেৱেল্লরী সেক্তরগী ওইনা সেন্তাক্রুজ ইলেক্ত্রোনিক এক্সপোর্ত প্রোসেসিং জোন – স্পিসিএল ইকোনোমিক জোন (SEEPZ SEZ)তা লৈবা ‘ভারত রত্নম’ (মেগা কম্মন ফেসিলিতেসন সেন্তর) শঙ্গাগনি। মসিনা ভারত্তা অহানবা ওইগনি, অমসুং মসিদা 3D মেতল প্রিন্তিং য়াওনা মালেমগী খ্বাইদগী অফবা মছিনশিং লৈগনি। স্পিসিএল্লী এবল্দ মহৈরোইশিং য়াওনা সেকতর অসিগী ওইবা স্কিলিং ৱর্কফোর্সকী ত্রেনিং স্কুল অমসু মসিদা লৈগনি। মেগা CFC অসিনা  জেম অমসুং জেৱেল্লরী ত্রেদকী এক্সপোর্ত সেক্তরবু হোংদোক্কনি অমসুং দোমেস্তিক মেন্যুফেকচরিংদসু তেংবাংগনি।

প্রধান মন্ত্রীনা ন্যু ইন্তর্প্রাইস অমসুং সর্ভিসেস তাৱর (NEST) অমসু SEEPZ SEZতা শঙ্গাগনি। NEST -01 অসিদি মরু ওইনা জেম অমসুং জেৱেল্লরী সেক্তর য়ুনিৎকীনি অমসুং হায়রিবা অসি হৌজিক লৈরিবা স্তেন্দর্দ দিজাইন ফেক্তরী I দগী হোংজিল্লগনি। অনৌবা তাৱর অসি লার্জ স্কেল প্রদক্সন অমসুং ইন্দস্ত্রীগী অপাম্বগী মখা পোন্না দিজাইন তৌবনি।

থৌরম অসিগী মনুংদা, প্রধান মন্ত্রীনা নমো মহিলা শশক্তিকরন অভিয়ান অসিবুসু হৌদোক্কনি। অভিয়ান অসিনা মহারাস্ত্রগী নুপীশিংদা স্কিল দিভেলপমেন্ত ত্রেনিং পীদুনা অমসুং ওন্তোপ্রিনর্শিপ দিভেলপমেন্ত করিনো খঙহন্দুনা মপাঙ্গল হাপ্নবা পান্দম থম্লি। অভিয়ান অসিনা রাজ্য অমসুং কেন্দ্র সরকারগী নুপীশিংগী চাউখৎ থৌরাংগী প্রোগ্রামশিং পুনশিনবা অমসুং সেচ্যুরেসন তৌবগী থৌদাংসু লৌগনি।

27শুবা নেস্নেল য়ুথ ফেস্তিবেল

লৈবাক অসিগী চাউখৎ থৌরাংগী খোঙচত্তা নহাশিংবু মরু ওইবা শরুক অমা ওইহন্নবা প্রধান মন্ত্রীনা য়াম্না কন্না হোৎনদুনা লাক্লি। মহাক্কী হোৎনজমন অসিগী অতোপ্পা শরুক অমা ওইনা, প্রধান মন্ত্রীনা নাশকিতা 27শুবা নেস্নেল য়ুথ ফেস্তিবেল (NYF) হৌদোক্কনি।

নেস্নেল য়ুথ ফেস্তিবেল চহি খুদিংগী জনুৱারী 12তগী 16 ফাওবা পাংথোক্তুনা লাক্লি। অমসুং, জনুৱারী 12 অসিসু স্বামী বিবেকানন্দগী মপোক কুমওন্সু ওইরিবনি। কুহ্মৈ অসিবু হন্দক্কী চহিদা য়ুম্বু ওইগদৌরিবা রাজ্যনা মহারাস্ত্র ওইবনি। কুহ্মৈ অসিগী থীম্না - “বিকশিৎ ভারত @2047: নহাগীদমক্তা, নহাগী মতেংদগী” হায়বসিনা ওইগনি।

NYFনা এক ভারত, শ্রেস্থ ভারতকী ইথিলগা লোয়ননা ভারতকী তোঙান-তোঙানবা মফমদগী লাকপা নহাশিংবু অমত্তা ওইনা পুনশিন্দুনা মপাঙ্গল লৈবা অমসুং অমত্তা ওইবা লৈবাক অমগী অকনবা ফম্বাক অমা শেম্নবা মখোয়গী ৱাখল্লোন লান্নবগী ফোরম অমা শেম্বগী পান্দম থম্মি। লৈবাক শিনবা থুংবগী নহা দেলিগেত চাউরাকপা 7500না নাশিক্তা পাংথোক্কদৌরিবা কুহ্মৈ অসিদা শরুক য়াগনি। কলচরেল পরফোর্মেন্স, ইন্দিজিনিয়স স্পোর্ত, দিক্লেমেসন অমসুং থীমেতিক বেজ প্রজেন্তেসন, য়ং আর্তিস্ত কেম্প, পোস্তর শেম্বা, ৱারী ইবা, য়ুথ কনভেন্সন, চিঞ্জাক কুহ্মৈনচিংবা তোঙান-তোঙানবা থৌরম কয়া অমা ফেস্তিবেল অসিগীদমক্তা শিন-লাঙগনি।

***