প্ৰধানমন্ত্ৰী শ্ৰী নৰেন্দ্ৰ মোদীয়ে অহা ৬ আৰু ৭ জানুৱাৰী, ২০২৪ ত জয়পুৰৰ ৰাজস্থান আন্তঃৰাষ্ট্ৰীয় কেন্দ্ৰত ২০২৩ চনৰ সৰ্বভাৰতীয় আৰক্ষী সঞ্চালক প্ৰধান/মহাপৰিদৰ্শকসকলৰ সন্মিলনত অংশগ্ৰহণ কৰিব।

৫ ৰ পৰা ৭ জানুৱাৰীলৈ তিনিদিনীয়াকৈ অনুষ্ঠিত হ’বলগীয়া সন্মিলনত চাইবাৰ অপৰাধ, আৰক্ষীৰ ক্ষেত্ৰত প্ৰযুক্তি, সন্ত্ৰাসবাদ বিৰোধী প্ৰত্যাহ্বান, বাওঁপন্থী উগ্ৰবাদ, কাৰাগাৰ সংস্কাৰকে ধৰি বিভিন্ন ধৰণৰ আৰক্ষীৰ কাৰ্যকলাপ আৰু আভ্যন্তৰীণ নিৰাপত্তা আদি বিষয়ত আলোচনা কৰা হ'ব। সন্মিলনৰ আন এটা মূল কাৰ্যসূচী হ'ল নতুন অপৰাধ নিয়ন্ত্ৰণ আইন ৰূপায়ণৰ বাবে পথ মানচিত্ৰৰ ওপৰত আলোচনা। লগতে, সন্মিলনখনত আৰক্ষীৰ কাৰ্যকলাপ তথা নিৰাপত্তাৰ ক্ষেত্ৰত অত্যাধুনিক বিষয়বস্তু, যেনে-কৃত্ৰিম বুদ্ধিমত্তা, দীপফে’ক আদিৰ দৰে নতুন প্ৰযুক্তিৰ দ্বাৰা উত্থাপিত প্ৰত্যাহ্বান আৰু সেইবোৰৰ সৈতে মোকাবিলা কৰাৰ উপায়ৰ ওপৰতো আলোচনা কৰা হ’ব। এই সন্মিলনত আনুসংগিক কাৰ্যবিন্দু চিনাক্ত কৰা আৰু সেইবোৰৰ প্ৰগতি নিৰীক্ষণ কৰাৰ সুযোগ প্ৰদান কৰা হয়, যিটো প্ৰতি বছৰে প্ৰধানমন্ত্ৰীৰ সন্মুখত উপস্থাপন কৰা হয়।

এই সন্মিলনখনত জিলা, ৰাজ্যিক আৰু ৰাষ্ট্ৰীয় পৰ্যায়ৰ আৰক্ষী তথা চোৰাংচোৱা বিষয়াসকলৰ অন্তৰ্ভুক্তিৰে বিভিন্ন বিষয়বস্তু চিনাক্ত কৰি সেই বিষয়ে আলোচনা কৰা হয়। প্ৰতিটো বিষয়ৰ অধীনত ৰাজ্য/কেন্দ্ৰীয় শাসিত অঞ্চলৰ পৰা সৰ্বশ্ৰেষ্ঠ পদ্ধতিবোৰ সন্মিলনত উপস্থাপন কৰা হ'ব যাতে ৰাজ্যবোৰে পৰস্পৰৰ পৰা শিকিব পাৰে।

২০১৪ চনৰ পৰা প্ৰধানমন্ত্ৰীয়ে আৰক্ষী সঞ্চালক প্ৰধানসকলৰ সন্মিলনৰ প্ৰতি তীব্ৰ আগ্ৰহ প্ৰকাশ কৰি আহিছে। পূৰ্বৰ প্ৰধানমন্ত্ৰীসকলৰ প্ৰতীকী উপস্থিতিৰ বিপৰীতে, তেওঁ সন্মিলনৰ সকলো গুৰুত্বপূৰ্ণ অধিৱেশনত অংশগ্ৰহণ কৰে। প্ৰধানমন্ত্ৰীয়ে সকলো আলোচনা ধৈৰ্য্য সহকাৰে শুনাই নহয়, লগতে মুক্ত আৰু অনানুষ্ঠানিক আলোচনাক উৎসাহিতও কৰে যাতে নতুন ধাৰণা আহিব পাৰে। ইয়াৰ দ্বাৰা জ্যেষ্ঠ আৰক্ষী বিষয়াসকলে দেশক প্ৰভাৱিত কৰা গুৰুত্বপূৰ্ণ আৰক্ষীৰ কাৰ্যকলাপ আৰু আভ্যন্তৰীণ নিৰাপত্তা বিষয়ত তেওঁলোকৰ মতামত আৰু পৰামৰ্শ প্ৰধানমন্ত্ৰীক জনোৱাৰ সুযোগ পায়।

প্ৰধানমন্ত্ৰীয়ে ২০১৪ চনৰ পৰা সমগ্ৰ দেশতে বাৰ্ষিক আৰক্ষী সঞ্চালক প্ৰধানসকলৰ সন্মিলনক উৎসাহিত কৰি আহিছে। সন্মিলনখন ২০১৪ চনত গুৱাহাটীত আয়োজন কৰা হৈছিল। ২০১৫ চনত ৰণ কচ্ছৰ ধোৰ্ডো; ২০১৬ চনত ৰাষ্ট্ৰীয় আৰক্ষী একাডেমী, হায়দৰাবাদ; ২০১৭ চনত বিএছএফ একাডেমী, টেকানপুৰ; ২০১৮ চনত কেৱাদিয়া; ২০১৯ ত আই.আই.এছ.ই.আৰ., পুনে; ২০২১ চনত লক্ষ্ণৌৰ আৰক্ষী মুখ্য কাৰ্যালয়ত; আৰু ২০২৩ চনত দিল্লীৰ পি.ইউ.এছ.এ.-ৰ ৰাষ্ট্ৰীয় কৃষি বিজ্ঞান প্ৰাংগণত এই সন্মিলন অনুষ্ঠিত হয়। এই পৰম্পৰা অব্যাহত ৰাখি, এই বছৰ জয়পুৰত সন্মিলনৰ আয়োজন কৰা হৈছে।

সন্মিলনখনত কেন্দ্ৰীয় গৃহ মন্ত্ৰী, ৰাষ্ট্ৰীয় নিৰাপত্তা উপদেষ্টা, গৃহ পৰিক্ৰমা বিভাগৰ এমঅ'এছ, কেবিনেট সচিব, ভাৰত চৰকাৰৰ জ্যেষ্ঠ বিষয়া, ৰাজ্য/কেন্দ্ৰীয় শাসিত সংস্থাৰ আৰক্ষী সঞ্চালক প্ৰধান আৰু কেন্দ্ৰীয় সশস্ত্ৰ আৰক্ষী বাহিনী তথা কেন্দ্ৰীয় আৰক্ষী সংগঠনৰ মুৰব্বীসকল উপস্থিত থাকিব।

***

DS/ST/AK/ MK/ID