মন্ত্রী মন্দলদা ঐহাক্কা পুন্না লৈমিন্নরিবা শ্রী অনুরাগ থাকুরজী, অর্জুন রাম মেঘৱালজী, মহামনা সম্পুর্ন ৱাংমেগী ইদিতর-ইন-চীফ, ঐহাক্কী য়াম্না লিরবা মরুপ রাম বহাদুর রাইজী, মহামনা মালবিয়া মিসনগী চিয়র্মেন প্রবু নরায়ন শ্রীবাস্তবজী, স্তেজদা ফম্বীরিবা মকোকথোংবা কলিগশিং, ইচিল ইনাওশিং, 

অহানবমক্তদা পুম্নমকপু খৃস্তমাসকী য়াইফ-পাউজেল পীজরি। ঙসি অসি ভারত অমসুং ভারতকী ৱাখল্লোন্দা থাজবা মীওই করোর কয়াদা ইথিল পীরিবা হরাউ কুহ্মৈ অমনি। ঙসি অসি মহামনা মদন মোহন মালবিয়াজীগী মপোক কুমওন্নি। ঙসি অসি অতলজীগী মপোক কুমওনসুনি। ঙসি য়াইফরবা নুমিৎ অসিদা মহামনা মালবিয়াজীগী খুয়াখাদা নোলুক্না খুরুমজরি। ঐহাক্না অতলজীগী মফমদসু ইকাইখুম্নবা উৎচরি। ঙসি লৈবাক অসিনা অতলজীগী মপোক কুমওন নুমিৎ অসিবু গুদ গভর্নান্স দে হায়না পালন তৌরি। ঐহাক্না ইরৈচা পুম্নমকপু গুদ গভর্নান্স দে নুমিৎ অসিদা য়াইফ-পাউজেল পীজরি।

মরুপশিং,

ঙসিগী য়াইফরবা থৌরম অসিদা পনদিৎ মোহন মালবিয়াগী মপুংফাবা লাইরিক অসি ফোঙবা অসি য়াম্না মরুওইবা অমনি। মসিগী মপুংফাবা লাইরিক অসিনা মহামনাগী ৱাখল্লোন অমসুং মহাক্কী পুন্সিগী মরমদা ঐখোয়গী হৌগৎলক্লিবা নহারোলশিং অমসুং তুংগী য়ুম্বীরেলশিংদা খংহনবদা শক্তি লৈরবা মেদিয়ম অমা ওইরগনি। মসিগী খুত্থাংদা ভারতকী নীংতম ইহৌ অমসুং মতম অদুগী পুৱারী মমুৎ তানা খংনবা থোং অমা হাংদোক্লগনি। রিসর্চ স্কোলর, হিস্ত্রী অমসুং পোলতিকল সাইন্সকী মহৈরোইশিংগী ওইনা মসি অখন্নবা ইন্তেলেকচ্যুল ত্রেজর অমা ওইরগনি। BHU লিংখৎপগী থৌদোকশিং, কোংগ্রেশকী মকোকথোংবা লুচিংবশিংগা মহাক্কী ৱারী শাখিবগী দাইলোগশিং, ব্রিতিশ সাসনগী মায়োক্তা লৈখিবা মহাক্কী মতৌ, ভারতকী লিরবা কলাশিংবু ইকাই খুম্নবচিংবশিং অসি লাইরিক অসিদা য়াওরি। খ্বাইদগী মরুওইনা রাম বহাদুর রাইজীনা পল্লিবা ভোল্যুমশিং অসিগী মরক্তা অমা ওইরিবা অদুদি মহামনাগী পর্সনেল দাইরীগা মরী লৈনবা অদুনি। মহামনাগী দাইরী অসিনা ভারতকী মীয়াম্বু সমাজ, লৈবাক অমসুং লাইনীং লাইশোলগী ওইবা হীরম খুদিংমক্তা লমজিং লমতাকপা ঙমগনি।

মরুপশিং, মসিগী থবক অসিগীদমক মিসন তীম চহি কয়া চংনা হোৎনরকখিবগে হায়বদু ঐহাক্না খংই। লৈবাক্কী মফম খুদিংমক্তগী মালবিয়াজীগী চিধী অমসুং দোক্যুমেন্ত লিশিং কয়া থিজিনবা অমসুং খোমজিনবা হায়বসি অরিবা কয়াগী ইরোলনুংদা থিবা অমসুং চেনা খুদিংমক থিবা, নিংথৌ অমসুং নিথৌরেলশিংগী মশাগী ওইবা অরিবা চে-চাংশিং খোমজিনবগা মান্নৈ। মসি ইচং থৌবা অমগী মতৌনি। য়াম্না কন্না হোৎনবগী মহৈ ওইনা ঐখোয়গী মাংদা ঙসিদি ভোল্যুম 11গী অপুনবা লাইরিক অমা ওইনা মহামনাগী শীংথানীংঙাই ওইরবা মগুন অদু উবা ফংলে। ঐহাক্না ইনফোর্মেসন অমসুং ব্রোদকাস্তিং মন্ত্রালয়, মহামনা মালবিয়া মিসন অমসুং রাম বহাদুর রাইজী অমসুং মহাক্কী তীমবু থবক অসিগীদমক পুকচেল শেংনা থাগৎপা ফোঙদোকচরি। লাইব্রেরীগী মীওই কয়া অমসুং মহামনাগী ইনুং মনুংগী মীওই কয়ানসু মসিগী চাউনা থৌদাং লৌখি। হায়রিবা মরুপশিং অদুবুসু ঐহাক্না পুকচেল শেংনা থাগৎপা ফোঙদোকচরি।

ঐগী নুংশিজরবা ইমুং মনুংশিং,

মহামনাগুম্বা মীওই অসি চহি চা কয়াদা অমুক্তং পোকপা মীওইনি। মখোয়না  ঐখোয়বু মীকুপ খুদিং, মতম পুম্বদা অমসুং লাক্কদবা চারোল কয়াদা ইথিল পী। ভারতনা চারোন কয়াগী ওইনা মহামনাদা লমন অমা তোনশিনজরে। মহাক অসি মহাক্কী মতমগী এজুকেসন অমসুং কম্পিতেন্সতা মগুন লৈরবা স্কোলর অমনি। মহাক অসি মোর্দর্ন থিংকিং অমসুং অরিবা চৎন-লোনচৎশিংগী অপুনবা অমনি! মহাক্না নীংতম ইহৌগী মতমদা অচৌবা থৌদাং লৌবতা নত্তনা লৈবাক অসিগী মীওই কয়াগী থৌনা লিংজেল ফুদোকহনবদা অচৌবা থৌদাং লৌরম্মি! করিগুম্বা মহাক্কী ৱাকল্লোন অসি মতমদুগী শিংনবশিংদা ওইরবসু অতোপ্পা অমনা তুংগী লম্বেল য়াৎপদা ওইরম্মি!  মহামনানা লৌরম্বা থৌদাং খুদিংমক্তা ‘লৈবাক্না অহানবা’ হায়বা ৱাখল্লোন অসিনা মাংজিল থারম্মি। মহাক্না খ্বাইদগী শক্তি লৈরবা কাংলু অদুগা লৈবাক অসিগীদমক লান্থেংনরম্মি। য়াম্না অৱাবা মতম অদুদা ফাওবদা মহাক্না লৈবাক অসিগী ওইথোকপা য়াবা কয়াগী মরু হুল্লম্মি। অসিগুম্বা মহামনাগী খুদোল কয়ামরুম ভোল্যুম 11গী অপুনবা কলেক্সন অসিদা উবা ফংলগনি। ঐখোয়গী সরকারনা মহাকপু ভারত রত্ন পীবা ঙমখিবা অসি ঐহাক্না লাইবক ফবনি হায়না লৌজৈ। ঐহাক্কী ওইনা মহামনা অসি অতোপ্পা মরম অমগীদমক য়াম্না অখন্নবা ওই। মহাক্কুম্না কাশিগী শেবা তৌনবা ইশ্বরনা ঐঙোন্দসু খুদোংচাবা অমা পীবীরি। ঐহাক্না 2014গী নোমিনেসন পেপর খুৎয়েক পীবা মতমদা প্রপোজর অদু মহামনাগী ইমুং মনুংগী মীওই ওইখিবা অদু ঐহাক্কী লাইবক ফবনি। মহামনানা কাশিদা থাজবা থম্মি। ঙসিদি কাশি অসি চাউখৎ থৌরাংগী লমদা পন্দোম লোম্মে, মসিগী হেরিতেজ অদু অমুক হনজিনবা ঙম্লে।

ঐগী নুংশিজরবা ইমুং মনুংশিং,

মীনাই নাইথাংগী ৱাখল্লোন্দগী মনিং তমলম্তুনা লৈবাক অসিনা ঙসিদি মশাগী হেরিতেজকীদমক চাউথোকচরি অমসুং নীংখাতম্বগী ‘অমৃত কাল’ অসিদা মাংলমদা চংশিনবা ঙম্মি। ঐখোয়গী সরকারগী থবক থৌরমশিংদা নখোয়না মালবিয়াজীগী ৱাখল্লোনগী মমি খরা উবা ফংলম্লগনি। মালবিয়াজীনা হৌজিক মতমগী মীওইশিংনা অরিবা থলাই অমা ওইনা লৌনরিবা লৈবাক অসিগী ৱাখল্লোন শাগৎপীরম্মি। বৃতিশনা মপাঙ্গল কনখৎলকপা মতমদা য়ানীংদবা ফোঙদোকপা ওইনা এজুকেসন বোইকোত তৌনবা ৱাখল্লোন পুখৎলকপা মতমদা মালবিয়াজীনা মসিগী মায়োক্তা লেপখি। মহাক্না হায় এজুকেন বোইকোত তৌবগী মহুত্তা ইন্দিয়ন ভেল্যুশিংদা য়ুম্ফম ওইরগা ঐখোয়গী ওইবা এজুকেসন সিস্তমে অমা শেমদুনা মাংলোমদা চংশিনগদবনি। অদুগা মহাক্না মসিগী থৌদাং অসি লৌখিবদা নত্তনা লৈবাক অসিগী ওইনা মমিং লৈরবা ইন্সতিত্যুসন অমা ওইরিবা বনারস হিন্দু য়ুনিভর্সিতী লীংখৎখি। মহাক্না ওক্সফোর্দ অমসুং কেমব্রিজগুম্বা ইন্সতিত্যুসনশিংদা মহৈ তম্লিবা নহারোলশিংবু BHU দা লাক্নবা পুক্নীং থৌগৎখি। ইংলিশগী মমিং লৈরবা স্কোলর অমা ওইনা মহাক্না ভারতকী লোনশিং য়োকখৎনবা অচৌবা থৌদাং লৌখি। পর্সিয়ন অমসুং ইংলিশনা লৈবাক অসিগী এদমিনিস্ত্রেসন অমসুং কোর্তশিংদা খুদুম চনবা মতম অমা লৈরম্মি। মালবিয়াজীনা মসিগী মায়োক্তা খোলাউ লাউরম্মি। মহাক্না হোৎজবগী মহৈ ওইনা দেবনাগিরী ময়েক অসি শিজিন্নবা হেনগৎলম্মি অমসুং ভারতকী লোনশিং অসি মশক খংলম্মি। ঙসিদি মালবিয়াজীগী হোৎনজমন অদু অনৌবা নেস্নেল এজুকেসন পোলিসী অসিদা মমি তাবা উবা ফংলগনি। ঐখোয়না হায়র এজুকেসন অসি ভারতকী লোনশিংদা তম্নবা খোঙথাং লৌখৎলে। সরকার অসিনা কোর্তশিংদা ভারতকী লোনশিং শিজিন্নবা পুক্নীং থৌগৎলি। লাইবক থীবদি লৈবাক অসিনা মসিগী থবকশিং অসি পাংথোক্নবা চহি 75 ঙাইবা তাখি।  

মরুপশিং,

লৈবাক অমগী মপাঙ্গল হায়বসি মদুগী ইন্সতিত্যুসনশিং এম্পাৱর তৌবগী মখা পোল্লি। মালবিয়াজীনা লৈবাক অসিগী পর্সনেলিতী শেমগৎলকপা মতমদা মহাক্কী পুন্সিদা অসিগুম্বা ইন্সতিত্যুসন কয়ামরুম শেমগৎলম্মি। মালেমপুম্বনা বনারস হিন্দু য়ুনিভর্সিতীগী মরমদা খংনরবসু অতোপ্পা ইন্সতিত্যুসন কয়ামরুম মহামনাজীনা শেমগৎলম্মি। হরিদ্বারগী রিশিকুল ব্রহ্মচার্য় আশ্রম, প্রয়াগরাজদা লৈবা ভার্তি ভৱন লাইব্রেরী নত্রগা লাহোরদা লৈবা সনাতন ধর্ম মহাবিদ্যলয়বু ওইরো লৈবাক অসিবু শেমগৎনবা মালবিয়াজীনা ইন্সতিত্যুসন কয়ামরুম লিংখৎলম্মি। করিগুম্বা মতম অসি হৌজিক্কী মতমগা চাংদম্নরবদি ভারতনা লৈবাক অসিবু শেমগৎনবা ইন্সতিত্যুসন অমগী মথংদা অমা লিংখৎলি। কোর্পোরেসনগী শক্তিগী খুত্থাংদা লৈবাক অসিগী চাউখৎ থৌরাংগী খোংজেল য়াংখৎনবা তোঙানবা কোওপরেসন মন্ত্রালয় অমা লিংখৎখ্রে। ভারতকী মহৌশাদগী লৈরক্লবা অনা লায়েংগী লমদা খুমাং চাওশিন্নবা কেন্দ্র সরকারনা তোঙানবা আয়ুশ মন্ত্রালয় অমা লিংখৎখ্রে। জামনগরদা ত্রেদিস্নেল মেদিসিনগী WHO গ্লোবল সেম্তর অমগী উরেপ উয়ুং তমখ্রে। শ্রী অন্না হায়বসি মিলেতশিংদা রিসর্স তৌনবা ইন্দিয়ন ইন্সতিত্যুসন ওফ মিলেত রিসর্স লিংখৎখ্রে। ইনর্জী সেক্তরদা মালেমগা চাংদম্ননবা ভারতনা গ্লোবল বাইওফ্যুল এলাইন্স শেমখ্রে। ইন্তরনেস্নেল সোলর এলাইন্স, দিজস্তর রেসিলেন্ত ইনফ্রাস্ত্রকচরগী কোলিসন, গ্লোবল সাউথকী ওইনা DAKSHIN শেম্বা নত্রগা ইন্দিয়ন মিদ্দল ইস্ত-য়ুরোপ ইকনোমিক কোরিদোর, স্পেস সেক্তরগী IN-SPACe লিংখৎপা নত্রগা নবেল সেক্তরদা পাইখৎলিবা SAGAR ইনিসিএতিবপু ওইরো ভারতনা ঙসিদি নেস্নেল অমসুং ইন্তরনেস্নেল ইন্সতিত্যুসন কয়ামরুম লিংখৎলি। মসিগী ইন্সতিত্যুসন, ইনিসিএতিবশিং অসি 21শুবা চহিচাগী ভারত খক্তগী নত্তনা 21শুবা চহিচাগী মালেমদা অনৌবা মায়োল অমা পীবা ঙম্লগনি।

মরুপশিং,

মহামনা অমসুং অতলজী অসি ৱাখল্লোন মান্নৈ। অতলজীনা মহামনাগী মরম হায় “ কয়াগুম্বা মীওই অমনা সরকারগী মতেং য়াওদনা করিগুম্বা খরা পাংথোক্কে খল্লবদি মহামনাগী ৱাখল্লোন্না মহাক্কী লম্বেল অদু ময়েক শেংনা তাক্কনি”। ঙসিদি লৈবাক অসিনা মালবিয়াজী, অতলজী অমসুং নীংতম লান্মী খুদিংমক্না লৈবাক অসিগী মংজরম্বা মংলান অদু মংফাওনহন্নবা অমত্তা ওইনা লেপ্পে। ঐখোয়না মসু গুদ গভর্নান্সতা য়ুম্ফম ওইহল্লি। গুদ গভর্নান্সনা হায়বদি পাৱর সেন্ত্রিকগী মহুত্তা সর্ভিস সেন্ত্রিক ওইবা অদুবুনি। মসিগী গুদ গভর্নান্সকী প্রিন্সিপল অসি ঐখোয়গী সরকারগী শক্তাক হায়বদু ওইরি।

ঐখোয়গী সরকারনা নাগরিকশিংনা তঙাইফদবা ফেসিলিতীশিংগীদমক মফম খুদিংদা চত্তনা লেপ্পা লৈতনা হোৎনরি। মসিগী মহুত্তা সরকার অসিনা নাগরিক খুদিংমক্কী মনাক্তা চত্তুনা মখোয়গী তঙাইফদবশিং অদু ফংহল্লি। হৌজিক ঐখোয়গী পান্দমদি খুদোংচাবা খুদিংমক ফংহনবা অমসুং চাদা 100 ইম্প্লিমেন্ত তৌবনি। মসিগী থবক অসিগীদমক লৈবাক পুম্বদা ‘বিক্ষিৎ ভারত সঙ্কল্প য়াত্রা’ পাংথোক্লি। অদোম্না মোদীগী গরেন্তিগী গারীশিং খুঙ্গংশিং অমসুং সহরশিংদা য়ৌরকপা উরম্লগনি। মফম অদুমক্তদা বেনিফিসিয়রীশিংনা কান্নবা কয়ামরুম খুদক্তা ফংবা উরম্লগনি। ঐহাক খুদম অমা হায়গে। ঙসি কেন্দ্র সরকারনা লাইরবা মীওই খুদিংমক্তা লুপা লাখ 5 ফাওবগী লেম্না লায়েংবগী আয়ুশ্মান কার্দশিং পীরি। মসিগী কার্দ অসি হৌখিবা চহি খরা অসিদা লাইরবা মীওই করোর কয়াদা পীখ্রে। অদুমওইনমক মফম কয়াদা মসিগী এৱ্যেরনেস ফংদবদগী লাইরবা মীওই কয়ানা মসিগী আয়ুশ্মান কার্দ অসি ফংবা ঙমদ্রি। হৌজিক্তি মোদী গরেন্তি ভেহিকলশিংনা লৈবাক অসিদা নুমিৎ 40গী মনুংদা অনৌবা আয়ুশ্মান কার্দ করোর অমা হেন্না য়েন্থোকখ্রে। বেনিফিসিয়রীশিং মশক খংদোক্লবা মতুংদা কার্দশিং পীরি। কনাগুম্বা অমত্তা চিত্থদনা পীরি। ‘সবকা সাথ, সবাক বিকাস’ হায়বসি গুদ গভর্নান্সনি।

মরুপশিং,

গুদ গভর্নান্সকী অতোপ্পা শক্লোন অমদি পুকচেল শেংবা অমসুং ত্রান্সপরেন্সীনি। ঐখোয়গী লৈবাক্তা অচৌবা স্কেমশিং অমসুং করপ্সন য়াওদনা সরকারশিং চলাইবা ঙমদে হায়বা ৱাখল্লোন অমা লৈরম্মি। 2014গী মমাংদা লুকা করোর লাখ কয়াগী স্কেমশিংগী মরমদা তারম্মি। অদুমওইনমক ঐখোয়না সরকারনা গুদ গভর্নান্সকী খুত্থাংদা অদুগুম্বা চিংনবশিং অদু কোকহনবা ঙমখ্রে। ঙসিদি খন্ন-নৈনবা অসি লাইরবশিংগী চাউখৎ থৌরাংগী লুপা করোর লাখ কয়াগী স্কিমশিংগী মতাংদা ওইনা খন্নরে। ঐখোয়না লাইরবশিংগী লেম্না রাসন ফংহন্নবা স্কিমদা লুপা করোর লাখ 4 চাদিং তৌরি। ঐখোয়গী সরকারনা লাইরবশিংগী পর্মনেন্ত য়ুমশিং ফংহন্নবা লুপা করোর লাখ 4 হেন্না চাদিং তৌরি। য়ুমথোং খুদিংদা তোতি ঈশিং ফংহন্নবা লুপা করোর লাখ 3 হেন্না চাদিং তৌরি। পুকচেল শেংবা তেক্সপেয়রশিংগী শেনফম খুদিংমক লৈবাক অসিগী চাউখৎ থৌরাংদা শিজিন্নরি….. মসিনি গুদ গভর্নান্স হায়বদু। 

অদুগা মরুপশিং,

করিগুম্বা থবকশিং অসি অসিগুম্না পুকচেল শেংনা পাংথোক্লবা অমসুং মসিগী মতুং ইন্না থৌশিলশিং শেম্লবদি মসিগী ফল অদু উবা ফংগনি। মসিগী গুদ গভর্নান্স অসিগী ফল অসিনা ঐখোয়গী সরকার অসিগী চহি মঙা খক্তদা মীওই করোর 13.5 লাইরবদগী কোকহনবা ঙমখ্রে।

মরুপশিং,

মীগী অৱাবা খঙদনা অফবা লৈঙাক শেম্বা ঙমলোই। ঐখোয়গী লৈবাক অসিদা শোত্থৈ হায়না লৌবা জিলা 110 হেন্না লৈ, মসি মখোয় মশাগী থোকপা লৈজগনি হায়না থাদোক্তুনা থমখি। জিলা 110 অসি শোত্থৈ অমসুং লৈবাক অসিসু শোত্থৈ হায়না থাজনরমখি। ওফিসর অমবু দন্দী ওইনা পোস্তিং পীবা মতমদা জিলাশিং অসিদা থারমখি। জিলা 110 অসিদা অহোংবা অমত্তা পুরকপা ঙমলোই অমসুং লৈবাক অসি চাউখৎপা কৈদৌনুংদা ঙমলোই হায়না লৌনরমখি। মরম অসিনা ঐখোয়গী সরকারনা জিলা 110 অসি এস্পিরেস্নেল দিস্ত্রিক্ত হায়না থোনখি। ঐখোয়না জিলাশিং অসি চাউখৎনবা মিসন মোদতা মীৎয়েং চংখি। ঙসি এস্পিরেস্নেল জিলাশিং অসিনা তোঙান-তোঙানবা দিবেলপমেন্ত পেরামিতরশিংদা অতোপ্পা জিলাশিংদগী হেন্না নীংথিনা পরফোর্ম তৌরি। চপ মান্নবা ৱাখল্লোন্দা এখোয়না এস্পিরেস্নেল ব্লোক্স প্রোগ্রামদা থবক তৌরি।

মরুপশিং,

ৱাখল্লোন অমসুং এপ্রোচতা অহোংবা লাক্লবা মতমদা ফলশিং লাকপা হৌই। দিকেদ কয়া ঐখোয়গী ঙমখৈদা লৈরিবা খুঙ্গংশিং অসি অরোইবা খুঙ্গংশিং ওইনা লৌরমখি। ঐখোয়না মখোয়দা  মখোয় অসি লৈবাক্কী অহানবা খুঙ্গংশিংনি হায়না থাজবা পীখি। ঐখোয়না ঙমৈগী খুঙ্গংশিংদা বাইব্রেন্ত ভিলেজ প্রোগ্রাম হৌদোকখি। ঙসি সরকারগী ওফিসিএলশিং অমসুং মন্ত্রীশিংনা মফমশিং অসিদা চৎলি, মীওইশিং অসিগা ৱারী শারি। ঐহাক্না ঐগী মন্ত্রী-মন্দলদা লৈরিবা মন্ত্রীশিংনা মমাংঙৈদা অরোইবা খুঙ্গংনি হায়না লৌনরম্বা খুঙ্গং অসিদা অহিং অমা লেনবা কমপলসরী ওইহনখি। মখোয় খরনা ফীত 17,000 ফাওবা ৱাংনা কাখি।

ঙসি সরকারগী স্কিমশিংগী কান্নবশিংনা মফম অসিগী মীয়ামদা য়ৌরি। করিগুম্বা মসি অফবা লৈঙাক নত্ত্রবদি, মসি করি ওইগনি? লৈবাক অসিদা লাইবক থীবা থৌদোক নত্ত্রগা খুদোংথিবা থৌদোক অমা থোকপা মতমদা সরকারনা তেংবাং পীবগী থবক খোঙজেল য়াংনা পাইখৎলি। ঐখোয়না মসি কোরোনা লাইচৎ অমসুং য়ুক্রেন লোন মনুংদা উবা ফংখি। মালেমদা খুদোংথিবা থোকপা খুদিং লৈবাক অসিনা মাগী প্রজাশিং কন্নবা থবক কন্না পাইখৎলি। অফবা লৈঙাক্কী খুদম কয়ামরুম ঐহাক্না পীখ্রে। লৈঙাক্তা অহোংবশিং লাকপা অসিনা খুন্নাইদা লৈরিবা ৱাখল্লোনশিংদা অহোংবা লাকহল্লি। মসিগী ফল ওইনা মীয়াম অমসুং সরকারগী মরক্তা ঙসি ভারত্তা অনৌবা থাজবা অমা লৈরে। থাজবা অসিনা লৈবাক অসিগী আত্মবিশ্বাস হেনগৎলক্লি তাক্লি। থাজবা অসিনা নীংতম্বগী ‘অমৃত কাল’দা ‘ভিক্ষিৎ ভারত’ অমা ওইহন্নবা শক্তি ওইরক্লি।

মরুপশিং,

মহামনা অমসুং অতলজীনা পীবীরম্বা প্রিন্সিপলশিংবু বেঞ্চমার্কশিং ওইনা লৌদুনা নীংতম্বগী ‘অমৃত কাল’দা ঐখোয়না ‘ভিক্ষিৎ ভারত’গী মঙলানগী মাইকৈদা থবক তৌগদবনি। লৈবাক্কী প্রজা খুদিংমক্না অখাং কনবগা লোয়ননা মাইপাকপগী লম্বেলদা মপুং ফানা কত্থোকপগা লোয়ননা শরুক তমগদবনি। থাজবা অসিগা লোয়ননা ঐহাক্না ৱারোল পীবা লোইশিল্লি, মহামনাদা অমুক হন্না ঐহাক্না ইকাই খুম্নবা উৎচরি। হন্না-হন্না থাগৎচরি।

*****