କେନ୍ଦ୍ର ଜଙ୍ଗଲ, ପରିବେଶ, ଜଳବାୟୁ ପରିବର୍ତ୍ତନ, ଶ୍ରମ ଓ ନିଯୁକ୍ତି ମନ୍ତ୍ରୀ ଶ୍ରୀ ଭୂପେନ୍ଦ୍ର ଯାଦବ କହିଛନ୍ତି ଯେ ଭାରତ ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ବୈଶ୍ୱିକ ମାନ୍ୟତା ଲାଭ କରିଛି । ଜଳବାୟୁ ପରିବର୍ତ୍ତନର ମୁକାବିଲା, ଇନୋଭେସନ ବା ନବସୃଜନ ଏବଂ ଟେକ୍‌ନୋଲୋଜି କ୍ଷେତ୍ରରେ ଭାରତର ନେତୃତ୍ୱକୁ ସମଗ୍ର ବିଶ୍ୱ ଏବେ ସ୍ୱୀକୃତି ପ୍ରଦାନ କରୁଛି । 

ବିଶ୍ୱରେ ଭାରତର ପ୍ରଭାବ ଓ ପ୍ରତିଷ୍ଠା ବୃଦ୍ଧି ସଂକ୍ରାନ୍ତ ଏକ ସାମ୍ବାଦିକ ସମ୍ମଳିନୀରେ ମନ୍ତ୍ରୀ ଶ୍ରୀ ଯାଦବ କହିଛନ୍ତି ଯେ ଭାରତ ମାତ୍ର ୬୧୫ କୋଟି ଟଙ୍କା ଖର୍ଚ୍ଚ କରି ସଫଳତାର ସହିତ ବିଶ୍ୱର ପ୍ରଥମ ଦେଶଭାବେ ଚନ୍ଦ୍ରର ଦକ୍ଷିଣ ମେରୁରେ ପହଞ୍ôଚପାରିଛି । ଭାରତ ଯେଉଁ ଚନ୍ଦ୍ରଯାନ-୩ ଅଭିଯାନ ଚଳାଇଥିଲା ଏହା ତାହାର ସବୁଠୁ ବଡ ଉପଲବ୍‌ଧି । ଏହି ସଫଳତା ସହିତ ଭାରତ ଏ କ୍ଷେତ୍ରରେ ଆତ୍ମନିର୍ଭରତା ହାସଲ କରିଛି । ପୂର୍ବରୁ ଭାରତ ଚନ୍ଦ୍ର ଅଭିଯାନରେ ଆନ୍ତର୍ଜାତିକ ସହଯୋଗ ଲୋଡୁଥିଲା । ଚନ୍ଦ୍ରଯାନ-୩ ସେହି ବାହ୍ୟ ନିର୍ଭରଶୀଳତାର ଅବସାନ ଘଟାଇ ଆତ୍ମ ନିର୍ଭରଶୀଳ ହୋଇପାରିଛି । ଭାରତର ଚନ୍ଦ୍ରଯାନ ନିଜସ୍ୱ କାରିଗରୀ ଜ୍ଞାନକୌଶଳ ଓ ଉଦ୍ୟମରେ ଚନ୍ଦ୍ର ପୃଷ୍ଠର ସବୁଠୁ ସମସ୍ୟା ବହୁଳ ଅଞ୍ଚଳ ଦକ୍ଷିଣ ମେରୁରେ ସଫଳତାର ସହିତ ଅବତରଣ କରିଛି । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱ ଓ ଦୂରଦୃଷ୍ଟି ଯୋଗୁଁ ଏହା ସମ୍ଭବ ହୋଇଛି ବୋଲି ମନ୍ତ୍ରୀ ଶ୍ରୀ ଯାଦବ କରିଛନ୍ତି ।

କୋଭିଡ ମହାମାରୀର ସଫଳ ମୁକାବିଲା କରି ଭାରତ କିପରି ସମଗ୍ର ବିଶ୍ୱକୁ ଚକିତ କଲା ସେ ସମ୍ପର୍କରେ ମଧ୍ୟ ମନ୍ତ୍ରୀ ଶ୍ରୀ ଯାଦବ ଏହି ଅବସରରେ ଉଲ୍ଲେଖ କରିଛନ୍ତି । ସେ କହିଛନ୍ତି ଯେ କୋଭିଡ ମହାମାରୀ ଯେତେବେଳେ ବ୍ୟାପିଲା ସମଗ୍ର ବିଶ୍ୱ ଭାବିଲା ଯେ ଏହାର ପ୍ରଭାବରେ ଭାରତ ଭୁଶୁଡି ପଡିବ । ଭାରତ କିନ୍ତୁ କୋଭିଡ ମହାମାରୀରେ ଭୁଶୁଡି ପଡି ନ ଥିଲା; ବରଂ ଏହାର ସଫଳ ମୁକାବିଲା କରି ସାରା ପୃଥିବୀ ପାଇଁ ଉଦାହରଣ ସୃଷ୍ଟି କଲା । ଭାରତ କେବଳ ବିଶ୍ୱର ସର୍ବବୃହତ କୋଭିଡ୍ ଟିକାକରଣ ଅଭିଯାନ ସଫଳତାର ସହ ସମ୍ପନ୍ନ କରି ନ ଥିଲା, ଖୁବ୍ କମ୍ ସମୟରେ ଅତି ଦ୍ରୁତ ଗତିରେ ଦେଶର ସବୁ ଲୋକଙ୍କୁ ଟିକା ଦେଇ ଏହା ବିଶ୍ୱରେ ଏକ ରେକର୍ଡ ପ୍ରତିଷ୍ଠା କରିଥିଲା । ଏ କ୍ଷେତ୍ରରେ ଆହୁରି କିଛି ଅଧିକ କଥା ଥିଲା । ଲୋକଙ୍କୁ ଦିଆଯାଇଥିବା କରୋନା ଟିକା ମଧ୍ୟ ଭାରତରେ ତିଆରି ହୋଇଥିଲା । ନିଜ ଦେଶର ଆବଶ୍ୟକତା ପୂରଣ କରି ଭାରତ “ଭ୍ୟାକ୍ସିନ ମୈତ୍ରୀ” କାର୍ଯ୍ୟକ୍ରମରେ ବିଶ୍ୱରେ ଅନେକ ଦେଶକୁ କରୋନା ଟିକା ଯୋଗାଇ ଦେଇଥିଲା । ଏହି କାର୍ଯ୍ୟକ୍ରମରେ ବିଶ୍ୱର ୧୦୦ରୁ ଅଧିକ ଦେଶ ଉପକୃତ ହୋଇଥିଲେ ବୋଲି ମନ୍ତ୍ରୀ ମନ୍ତ୍ରୀ ଶ୍ରୀ ଯାଦବ କହିଛନ୍ତି ।

କୋଭିଡ ମହାମାରୀର ସଫଳ ମୁକାବିଲା କରିବା ପରେ ବିଶ୍ୱସ୍ତରରେ ଭାରତ ଯେଉଁ ପ୍ରଶଂସା ପାଇଥିଲା ସେ ବିଷୟରେ ଉଲ୍ଲେଖ କରି ମନ୍ତ୍ରୀ ଶ୍ରୀ ଯାଦବ କହିଛନ୍ତି ଯେ ସେଥିରୁ ସବୁଠୁ ଗୁରୁତ୍ୱପୂର୍ଣ୍ଣ ଥିଲା ବିଶ୍ୱ ସ୍ୱାସ୍ଥ୍ୟ ସଂଗଠନ ବା ‘ହୁ’ର ପ୍ରଶଂସାମୂଳକ ଉକ୍ତି । ‘ହୁ’ କହିଥିଲା- “ଏକ ପ୍ରସ୍ତୁତ ଭାରତର ଅର୍ଥ ଏକ ପ୍ରସ୍ତୁତ ପୃଥିବୀ ।” 

ଭାରତର ଅର୍ଥନୀତିକ ଶକ୍ତି ଓ ସାମର୍ଥ୍ୟ ସମ୍ପର୍କରେ ମନ୍ତ୍ରୀ ଶ୍ରୀ ଯାଦବ କହିଛନ୍ତି ଯେ କୋଭିଡ ସମୟରେ ଏକ ଆଶଙ୍କା ପ୍ରକାଶ ପାଇଲା ଯେ ଏହି ମହାମାରୀ ପରେ ଭାରତର ଅର୍ଥନୀତି ଭୁଶୁଡି ପଡିବ । ମାତ୍ର ସେ ଆଶଙ୍କା ଭୁଲ ପ୍ରମାଣିତ ହେଲା । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ବଳିଷ୍ଠ ନେତୃତ୍ୱ ବଳରେ ଭାରତ ଏକ ସଂକଟକୁ ଏକ ସୁଯୋଗରେ ପରିଣତ କରିବାରେ ସଫଳ ହେଲା । କୋଭିଡ-୧୯ ବିରୋଧରେ ଭାରତର ସଫଳ ଲଢେଇକୁ ସମଗ୍ର ବିଶ୍ୱ ପ୍ରଶଂସା କଲା । ଆନ୍ତର୍ଜାତିକ ମୁଦ୍ରାପାଣ୍ଠି (ଆଇଏମ୍‌ଏଫ୍‌), ବିଶ୍ୱ ବ୍ୟାଙ୍କ ଓ ଅନ୍ୟାନ୍ୟ ସଂସ୍ଥା ତଥା ସଂଗଠନ ଭାରତର ଅର୍ଥନୀତିକ ପୁନରୁଦ୍ଧାରକୁ ପ୍ରଶଂସା କରିଥିଲେ । କୋଭିଡ ଯୋଗୁଁ ଯେଉଁ ଢଙ୍ଗରେ ଭାରତର ଅର୍ଥନୀତି ତଳମୁହାଁ ହୋଇଥିଲା ସେହି ଢଙ୍ଗରେ ପୁଣି ଉପର ମୁହାଁ ହେଲା । ଏହି ଅର୍ଥନୀତିକ ପୁନରୁଦ୍ଧାର ପ୍ରକ୍ରିୟାରେ ଭାରତ ଚୀନ ଓ ଆମେରିକାକୁ ମଧ୍ୟ ପଛରେ ପକାଇ ଦେଇଥିଲା । ଅନେକଙ୍କର ସନ୍ଦେହ ଥିଲା ଯେ ଭାରତର ଅର୍ଥନୀତିକ ପୁନରୁଦ୍ଧାର ୟୁ(U) ଆକାରରେ ହେବ; ମାତ୍ର ଭାରତ ଭି(V) ଆକାରର ଅର୍ଥନୀତିକ ପୁନରୁଦ୍ଧାର ହାସଲ କରି ସବୁ ସଂଶୟବାଦୀଙ୍କୁ ଚକିତ କରିଥିଲା । 

ମନ୍ତ୍ରୀ ଶ୍ରୀ ଯାଦବ ଆହୁରି କହିଛନ୍ତି ଯେ ସେତେବେଳେ ଭାରତର ଅର୍ଥନୀତିକ ସ୍ଥିତିର ପୁନରୁଦ୍ଧାରକୁ ମଧ୍ୟ ବିଶ୍ୱ ବ୍ୟାଙ୍କ ଓ ଆର୍ନ୍ତଜାତିକ ମୁଦ୍ରାପାଣ୍ଠି ଆଦି ପ୍ରଶଂସା କରିଥିଲେ । ସେମାନେ କହିଥିଲେ ଯେ ସମଗ୍ର ବିଶ୍ୱ କରୋନା ମହାମାରୀ ପରବର୍ତ୍ତୀ ଆର୍ଥିକ ମାନ୍ଦାବସ୍ଥା ଓ ଗୁରୁତର ସ୍ଥିତି ଦେଇ ଗତି କରୁଥିବାବେଳେ ଭାରତ ତାହାର ଆର୍ଥିକ ପୁନରୁଦ୍ଧାର ଓ ଅଭିବୃଦ୍ଧିକୁ ଜାରି ରଖି ସମଗ୍ର ଦୁନିଆ ପାଇଁ ଏକ ଉଜ୍ୱଳ ଉଦାହରଣ ପାଲଟିଥିଲା । “୨୦୨୨ରେ ଭାରତ ଏହାର ପୂର୍ବତନ ଉପନିବେଶବାଦୀ ଶାସକ ରାଷ୍ଟ୍ର ବ୍ରିଟେନକୁ ଜିଡିପି ଆଧାରରେ ପଛରେ ପକାଇ ବିଶ୍ୱର ପଞ୍ଚ ମ ସର୍ବବୃହତ୍ ଅର୍ଥନୀତିରେ ପରିଣତ ହୋଇଥିଲା । ବିଶ୍ୱବ୍ୟାଙ୍କ ୨୦୨୩ -୨୪ରେ ଭାରତର ଜିଡିପି ଅଭିବୃଦ୍ଧି ୬.୩ ଶତାଂଶ ହେବ ବୋଲି ଆକଳନ କରିଛି । ଭାରତର ଅଭିବୃଦ୍ଧି ନିରନ୍ତର ଭାବେ ବଢି ବଢି ଚାଲିଛି ଏବଂ ଆମେରିକା (୨.୧%), ଚୀନ (୪.୪.%), ୟୁରୋ ଜୋନ (୦.୭%)କୁ ପଛରେ ପକାଇଛି ବୋଲି ଶ୍ରୀ ଯାଦବ ଆନ୍ତର୍ଜାତିକ ମୁଦ୍ରାପାଣ୍ଠିର ତଥ୍ୟ ଉଦ୍ଧାର କରି କହିଛନ୍ତି । ସେ କହିଛନ୍ତି ଯେ ଭାରତ ଏବେ ବିଶ୍ୱର ଏକ ମାନୁଫ୍ୟାକଚରିଂ ହବ୍‌ରେ ପରିଣତ ହେବାକୁ ଯାଉଛି । ସେଥି ପାଇଁ ସମସ୍ତଙ୍କ ନଜର ଭାରତ ଉପରେ ।

“ଆପଲ” କମ୍ପାନୀ ତାହାର ସର୍ବଶେଷ ବ୍ରାଣ୍ଡର ଆଇଫୋନ -୧୫ର ଉତ୍ପାଦନ ଭାରତରେ ଆରମ୍ଭ କରିଛି । ବାହାରୁ ଉପକରଣ ସବୁ ଅଣାଯାଇ ଭାରତରେ ଏହାକୁ ସମବେତ କରି ଏହି ଫୋନ ଉତ୍ପାଦନ କରାଯାଉଛି । ତାଇୱାନର ଫକ୍ସକନ୍ କମ୍ପାନୀ, ଭାରତରେ ବେଦାନ୍ତ କମ୍ପାନା ସହିତ ମିଶି ଆମ ଦେଶରେ ସେମିକଣ୍ଡକ୍ଟରା ନିର୍ମାଣ କରିବାକୁ ଉଦ୍ୟମ ଚଳାଇଛି । ୨୦୨୫ ସୁଦ୍ଧାଭାରତ ଜିଡିପିରେ ଜର୍ମାନୀକୁ ଅତିକ୍ରମ କରିବ ଏବଂ ୨୦୨୭ରେ ଜାପାନକୁ ପଛରେ ପକାଇ ବିଶ୍ୱର ତୃତୀୟ ସର୍ବବୃହତ୍ ଅର୍ଥନୀତିରେ ପରିଣତ ହୋଇ ଆମେରିକାର ଓ ଚୀନ ପଛକୁ ରହିବ ବୋଲି ଶ୍ରୀ ଯାଦବ କହିଛନ୍ତି । 

ମନ୍ତ୍ରୀ ଶ୍ରୀ ଯାଦବ କହିଛନ୍ତି ଯେ ଭାରତକୁ ୨୦୪୭ ସୁ୍‌ଦ୍ଧା ବିଶ୍ୱର ଏକ ବିକଶିତ ରାଷ୍ଟ୍ରରେ ପରିଣତ କରିବା ପାଇଁ ପ୍ରଧାନମନ୍ତ୍ରୀ ଶ୍ରୀ ମୋଦୀ ଶପଥ ନେଇଛନ୍ତି । ଦେଶର ସ୍ୱାଧୀନତାର ୧୦୦ ବର୍ଷ ପୂର୍ତ୍ତି ଅବସରରେ ଅମୃତକାଳରେ ଭାରତ ଏହି ସଫଳତା ହାସଲ କରିବାର ଲକ୍ଷ୍ୟ ରଖିଛି । 

ଆନ୍ତର୍ଜାତିକ ବ୍ୟବସ୍ଥାରେ ଭାରତର ଭୂମିକାକୁ ନେଇ ପ୍ରଧାନମନ୍ତ୍ରୀ ଶ୍ରୀ ମୋଦୀ ବ୍ୟକ୍ତିଗତ ଭାବେ ଅବଗତ । ନିଜର ଆଧ୍ୟାତ୍ମିକ ଓ ସାଂସ୍କୃତିକ ଶକ୍ତି ବଳରେ ଭାରତ ବସୁଧୈବ କୁଟୁମ୍ବକମ୍ ନୀତିରେ ସମଗ୍ର ବିଶ୍ୱକୁ ଏକାଠି କରି ତାହାର ନେତୃତ୍ୱ ନେବାକୁ ଆଗ୍ରହୀ । ତେଣୁ ବିଶ୍ୱର ଲୋକଙ୍କୁ ସୁଖ ଶାନ୍ତିରେ ରଖିବାକୁ ନୀତି ଓ ବ୍ୟବସ୍ଥା ପ୍ରବର୍ତ୍ତନ ଉପରେ ଭାରତ ବୈଶ୍ୱିକ ସ୍ତରରେ ଉଦ୍ୟମ କରୁଛି । ପ୍ରଧାନମନ୍ତ୍ରୀଙ୍କର ବିଚାର, ଦୂରଦୃଷ୍ଟି ଓ ବିଶ୍ୱ ଭାବନା ସମଗ୍ର ପୃଥିବୀକୁ ଅନୁପ୍ରାଣିତ କରିଥିବାବେଳେ ବିଦେଶରେ ରହିଥିବା ଭାରତୀୟମାନଙ୍କ ଆତ୍ମବିଶ୍ୱାସ ଓ ଆତ୍ମସମ୍ମାନ ମଧ୍ୟ ବଢିଛି । ମୋଦୀ ଏଭଳି ଏକ ସୁରକ୍ଷିତ ଓ ଭରସାଯୋଗ୍ୟ ଭାରତ ଗଠନ କରିବାକୁ ଚାହାନ୍ତି ଯେଉଁଠି ଏହା ନିଜକୁ ନିର୍ଣ୍ଣାୟକ ସ୍ଥିତିରେ ରଖି ବିଶ୍ୱର ପ୍ରମୁଖ ସମସ୍ୟାର ସ୍ଥାୟୀ ସମାଧାନ କରି ସମସ୍ତଙ୍କୁ ସୁଖଶାନ୍ତିରେ ରଖିବାକୁ ସମର୍ଥ ହୋଇପାରିବ । ଏ କ୍ଷେତ୍ରରେ ଭାରତ ପ୍ରୟାସକୁ ମଧ୍ୟ ସଫଳତା ମିଳୁଛି ବୋଲି ଶ୍ରୀ ଯାଦବ କହିଛନ୍ତି ।

 ସେ ଆହୁରି କହିଛନ୍ତି ଯେ ଭାରତର କୋମଳ ଶକ୍ତି ଓ ସାଂସ୍କୃତିକ ଐତିହ୍ୟ ଏହାର ବୈଶ୍ୱିକ ପ୍ରଭାବ ବୃଦ୍ଧିରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଛି । ଯୋଗ ଓ ଆୟୁର୍ବେଦ ଭଳି ଭାରତର ପ୍ରାଚୀନ ପରମ୍ପରା ବିଶ୍ୱବ୍ୟାପୀ ଲୋକପ୍ରିୟ ହେବା ପଛରେ ରହିଛି ପ୍ରଧାନମନ୍ତ୍ରୀ ଶ୍ରୀ ମୋଦୀଙ୍କ ଏକନିଷ୍ଠ ଉଦ୍ୟମ । “ ନାଟୁ ନାଟୁ ଓ ଏଲିଫ୍ୟାଣ୍ଡ ହୁଇସପର”କୁ ଓସ୍କାର ପୁରସ୍କାର ମିଳିବା ଭାରତୀୟ କୋମଳ ଶକ୍ତିର ଏକ ବଡ ବିଜୟ । ଏହାଛଡା ବିଶ୍ୱର ବିଭିନ୍ନ ପ୍ରାନ୍ତରେ ବସବାସ କରୁଥିବା ଭାରତୀୟମାନେ ଭାରତୀୟ ମୂଲ୍ୟବୋଧ, ବିଚାର ଓ ପରମ୍ପରାକୁ ପ୍ରୋତ୍ସାହିତ କରି ସାଂସ୍କୃତିକ ବିନିମୟକୁ ବଳ ଦେଉଛନ୍ତି । 

ସେ କହିଛନ୍ତି ଯେ ଶ୍ରୀ ନରେନ୍ଦ୍ର ମୋଦୀ ଭାରତର ପ୍ରଧାନମନ୍ତ୍ରୀ ଦାୟିତ୍ୱ ଗ୍ରହଣ କରିବା ପରେ ବିଶ୍ୱସ୍ତରରେ ଦେଶର ପ୍ରଭାବ ଓ ପ୍ରତିଷ୍ଠାକୁ ବଢାଇଛନ୍ତି । ବିଶ୍ୱ ନେତାମାନଙ୍କ ଉପରେ ମୋଦୀଙ୍କ ପ୍ରଭାବ ବେଶ୍ ଭଲଭାବରେ ପଡିଛି । ସେମାନେ ସମସ୍ୱରରେ ମୋଦୀଙ୍କୁ ପ୍ରଶଂସା କରୁଛନ୍ତି । 

ମନ୍ତ୍ରୀ ଶ୍ରୀ ଯାଦବ କହିଛନ୍ତି ଯେ ବିଗତ ୧୦ ବର୍ଷ ମଧ୍ୟରେ ଦେଶର ସବୁ ସ୍ତରରେ ଏକ ସକାରାତ୍ମକ ମନୋଭାବ ଉଦ୍ରେକ କରିବାରେ ଭାରତ ସଫଳ ହୋଇଛି । ଏବେ ଆମ ଯୁବବର୍ଗ ଚାକିରି ପ୍ରତ୍ୟାଶୀ ହେବା ପରିବର୍ତ୍ତେ ନିଯୁକ୍ତି ପ୍ରଦାନ କରୁଛନ୍ତି । ଦୈନିକ ନୂଆ ଷ୍ଟାର୍ଟଅପ୍ ପ୍ରତିଷ୍ଠା କରିବାରେ ଭାରତ ଏବେ ବିଶ୍ୱର ଏକ ନମ୍ବର । ଷ୍ଟାର୍ଟଅପ୍ ସଂଖ୍ୟା ଦୃଷ୍ଟିରୁ ଆମେ ଏବେ ବିଶ୍ୱରେ ଦ୍ୱିତୀୟ ସ୍ଥାନରେ ଅଛୁ । ବୃହତ୍ତମ ଷ୍ଟାର୍ଟଅପ୍ ପରିତନ୍ତ୍ର ଦୃଷ୍ଟିରୁ ବିଶ୍ୱରେ ଭାରତର ସ୍ଥାନ ତୃତୀୟ । ଏବେ ସର୍ବାଧିକ ୟୁନିକର୍ଣ୍ଣ ପ୍ରତିଷ୍ଠା କ୍ଷେତ୍ରରେ ବିଶ୍ୱରେ ଭାରତର ସ୍ଥାନ ୩ ନମ୍ବର । ୨୦୨୧ରେ ଭାରତରେ ପ୍ରତି ୨୯ଦିନରେ ଗୋଟିଏ ୟୁନିକର୍ଣ୍ଣ ଗଠିତ ହେଉଥିଲା । ୨୦୨୨ରେ ଆମକୁ ଗୋଟିଏ ୟୁନିକର୍ଣ୍ଣ ଗଠନ କରିବାକୁ ମାତ୍ର ୯ ଦିନ ଲାଗିଲା ।

ଜଳବାୟୁ ପରିବର୍ତ୍ତନର ମୁକାବିଲା ପାଇଁ ଭାରତ ଗ୍ରହଣ କରିଥିବା ପଦକ୍ଷେପ ଓ ତାହାର ମୁକାବିଲା ସମ୍ପର୍କରେ ସେ ମଧ୍ୟ କହିଥିଲେ ବିଶ୍ୱ ସ୍ତରରେ ଜଳବାୟୁ ପରିବର୍ତ୍ତନର ମୁକାବିଲା କ୍ଷେତ୍ରରେ ଭାରତ ଗ୍ରହଣ କରିଥିବା ନେତୃତ୍ୱ ସମ୍ପର୍କରେ ସୂଚନା ଦେଇଥିଲେ । ଭାରତ ଏବେ ବିଶ୍ୱରେ ଅକ୍ଷୟ ଶକ୍ତି ଉତ୍ପାଦନ ଓ ବ୍ୟବହାର ବଢାଇବାକୁ ନେତୃତ୍ୱ ନେଇଛି । ୨୦୧୯ର ଗ୍ରୀନ ହାଉସ ଗ୍ୟାସ ଇନଭେନଟୋରୀ ମାଧ୍ୟମରେ ପରିବେଶ ସୁରକ୍ଷା କ୍ଷେତ୍ରରେ କାମ କରୁଛି । ଭାରତର ଉଦ୍ୟମ ଓ ନେତୃତ୍ୱରେ ଆନ୍ତର୍ଜାତିକ ସୌର ମେଣ୍ଟ , ଲିଡ-ଇଟ୍‌, ସିଡିଆର୍‌ଆଇ, ଆଇଆର୍‌ଆଇଏମ୍‌,ଗ୍ରୀନ କ୍ରେଡିଟ୍ ଇନସିଏଟିଭ ଓ ଆର୍ନ୍ତଜାତିକ ବ୍ୟାଘ୍ର ସୁରକ୍ଷା ମେଣ୍ଟକାର୍ଯ୍ୟ କରୁଛି । ୨୦୩୦ ସୁଦ୍ଧା ଯେଉଁ ପରିମାଣ ଅକ୍ଷୟଶକ୍ତି ଉତ୍ପାଦନ କରିବାର ଲକ୍ଷ୍ୟ ଭାରତ ଘୋଷଣା କରିଥିଲା ୨୦୨୦-୨୧ ସୁଦ୍ଧା ତାହାକୁ ପୂରଣ କରିପାରିଛି ବୋଲି ମନ୍ତ୍ରୀ ଶ୍ରୀ ଯାଦବ କହିଛନ୍ତି ।

ସେ ଆହୁରି କହିଛନ୍ତି ଯେ ଜଳବାୟୁ ପରିବର୍ତ୍ତନ ର ସଫଳ ମୁକାବିଲା, ବୈଶ୍ୱିକ ସହଯୋଗ ଓ ନିରନ୍ତର ବିକାଶ କ୍ଷେତ୍ରରେ ଆଜି ଯାହା ସବୁ ସଫଳତା ମିଳିଛି ତାହା ପ୍ରଧାନମନ୍ତ୍ରୀ ଶ୍ରୀ ମୋଦୀଙ୍କ ନିଷ୍ଠା, ଆଗ୍ରହ,ଦୂରଦୃଷ୍ଟି ଓ ଦିଗ୍‌ଦର୍ଶନ ଯୋଗୁଁ ସମ୍ଭବ ହୋଇଛି । ଜଳବାୟୁ ଓ ପରିବେଶ ସୁରକ୍ଷା ତାଙ୍କ କାର୍ଯ୍ୟସୂଚୀରେ ଅଗ୍ରାଧିକାର ପାଇଛି । ବିଶ୍ୱର ବିଭିନ୍ନ ପ୍ରାନ୍ତରରେ ଶାନ୍ତି ରକ୍ଷା ଉଦ୍ୟମରେ ଭାରତର ଭୂମିକା ସମ୍ପର୍କରେ ମଧ୍ୟ ମନ୍ତ୍ରୀ ଶ୍ରୀ ଯାଦବ ଏହି ଅବସରରେ ଆଲୋକପାତ କରିଛନ୍ତି ।

ସେ କହିଛନ୍ତି ଯେ ପ୍ରାକୃତିକ ବିପର୍ଯ୍ୟୟର କ୍ଷତିଗ୍ରସ୍ତ ଲୋକମାନଙ୍କୁ ତୁରନ୍ତ ରିଲିଫ ଓ ଅନ୍ୟାନ୍ୟ ସାହାଯ୍ୟ ସହଯୋଗ ଯୋଗାଇ ମାନବିକତାର ଏକ ନୂଆ ଉଦାହରଣ ସୃଷ୍ଟି କରିଛି । ବିିଭିନ୍ନ ସ୍ୱଳ୍ପ ବିକଶିତ ରାଷ୍ଟ୍ରଙ୍କୁ ମଧ୍ୟ ଭାରତ ଜେନେରିକ ଔଷଧ ଓ ସୁଲଭ ସ୍ୱାସ୍ଥ୍ୟସେବା ଯୋଗାଇ ଦେଉଛି । ଟେଲି ମେଡିସିନ ଓ ଆର୍ଟିଫିସିଆଲ ଇଣ୍ଟେଲିଜେନ୍ସର ବ୍ୟବହାର କରି ସ୍ୱାସ୍ଥ୍ୟ କ୍ଷେତ୍ରର ସମସ୍ୟା ସମାଧନ କରିବାକୁ ଭାରତ ଉଦ୍ୟମ କରୁଛି ଏବଂ ଅନ୍ୟ ଦେଶକୁ ସାହାଯ୍ୟ ଯୋଗାଉଛି । ଯୁଦ୍ଧ ପ୍ରପୀଡିତ ଦେଶର ଲୋକଙ୍କୁ ଭାରତ ମାନବିକତା ଦୃଷ୍ଟିରୁ ରିଲିଫ ଓ ଅନ୍ୟାନ୍ୟ ସହାୟତା ଯୋଗାଇ ଆସୁଛି ବୋଲି ମନ୍ତ୍ରୀ ଶ୍ରୀ ଯାଦବ କହିଛନ୍ତି ।

******

TKM/SLP