ঙসি প্রধান মন্ত্রী শ্রী নরেন্দ্র মোদী উত্তর প্রদেসকী বরানসীদা বিকসিত ভারত সংকল্প যাত্রা(সহর) শরুক য়াখ্রে। শ্রী মোদীনা স্তোলশিং য়েংখি অমসুং বিকসিত ভারত সংকল্প যাত্রা ভেন অমসুং কুইজগী থৌরম য়েংখি। সরকারগী তোঙান-তোঙানবা স্কিমশিংগী কান্নবা ফংলবা মীওইশিংগা প্রধান মন্ত্রীগা ৱারি শানখি অমসুং থৌরম অদুদা মখোয়দা ৱা ঙাংখি। থৌরম মনুংদা, বিকসিত ভারত সংকল্প ৱাশক লৌখি।

তিনখিবা মীয়ামদা ৱা ঙাংবদা, প্রধান মন্ত্রীনা হায়খি ভারত শীনবা থুংনা মখোয় মখোয়গী কেন্দ্রশিংদা এম.পিশিং বিকসিত ভারত সংকল্প যাত্রা শরুক য়ারি অমসুং এম.পি অমা ওইনা অমসুং সহর অসিগী ‘সেবক’ অমা ওইনা মহাক বরানসীদা বিকসিত ভারত সংকল্প যাত্রা শরুক য়ারি। অপনবা অমতা লৈতনা অকক্নবা মতমগী মনুংদা খুদোংচাবা ফংবা য়ারবা বেনিফিসরিশিংদা সরকারগী স্কিমশিং ফংহনবা দরকার ওই। বেনিফিসরিশিংনা সরকারগী মতুংইন্নবা মথৌ তাদে। মদুগী মহুত্তা সরকারনা বেনিফিসরিশিং থিরক্কদবনি।

প্রধান মন্ত্রীনা হায়খি পি.এম.এ.ৱাইগী মখাদা ইমুং করোর ৪দা পাক্কাগী য়ুমশিং শীন্নখ্রে। স্কিম অমা হেক্তা মপুংফাহনবা দরকার ওই অমসুং কান্নবা ফংহৌদ্রবা মীওইশিংদা খুদোংচাবা ফংহনবা দরকার ওই। বেনিফিসরিশিংনা থেংনরকপশিং রেকোর্দ তৌশিন্নবা বিকসিত ভারত সংকল্প যাত্রানা পান্দম থম্লি। বিকসিত ভারত সংকল্প যাত্রা অসি ঐগী পরিক্ষা অমনি। করিগুম্বা পাম্লিবা ফলশিং অদু ফংলবদি ঐনা মীয়ামগী খোল্লাউ তাবা পাম্মী। ঙাইহাক্কী মমাঙদা বেনিফিসরিশিংগা ৱারি শানখিবা অদু নিংশিংলদুনা, অয়ুস্মান ভারত অমসুং অয়ুস্মান কার্দশিংগী কান্নবগী মতাংদা প্রধান মন্ত্রীনা পনখি।

সরকারগী স্কিমশিং হকথেংননা পায়খৎলিবা ওফিসারশিংগী অফবা থবক্কী ফলগী মতাংদা প্রধান মন্ত্রীনা হায়খি মসিনা মখোয়দা হরাওবা অমসুং পেন্থোকপগী অনৌবা ৱাখল অমা ফাওহল্লে। সরকারগী স্কিমশিং থবক ওইনা পাংথোকপগী অফবা ফল অসিনা সরকারগী থবক তৌবা মীওইশিংদা হরাওবগী অনৌবা মশক অমা উৎলে অমসুং মসি বিকসিত ভারত সংকল্প যাত্রানা ওইথোকহনবনি।

স্কিমশিংগী কান্নবশিং ফংবা উবদা অপেনবা ফোঙদোক্লদুনা প্রধান মন্ত্রীনা হায়খি স্কিমশিংনা চাকশঙশিং মৈখু থাংহন্দ্রে, পাক্কাগী য়ুমশিংনা অনৌবা থাজবা পীরে, লায়রবশিং থৌনা হাপ্লে অমসুং ইনাকখুনবা অমসুং লায়রবগী মরক্তা লৈবা খেন্নবা হন্থহল্লে।

প্রধান মন্ত্রীনা হায়খি মাইপাক্লবা স্কিমশিংনা মীয়াম মরক্তা মপু ওইবগী ৱাখল অমা ফাওহল্লে। লোন অমসুং অতোপ্পা খুদোংচাবশিং ফংলবা মীওই অমনা মসি মহাক্কী লৈবাক্নি, মহাক্কী রেলৱেজনি, মহাক্কী ওফিসনি, মহাক্কী হোস্পিতালনি  হায়বা ফাওহল্লে। মসিগী মপু ওইবগী ৱাখল অসি ফাওরকপদা, লৈবাক্কীদমক করিগুম্বা খর পাংথোক্নিংবগী ৱাখল লাকখি। মসিনা তুংগী মীরোলশিংগীদমক অফবা তুংলমচৎ অমা শেমগৎনবা মীয়াম মরক্তা থাজবা লৈহনগনি। 

প্রধান মন্ত্রীনা হায়খি নিংতম্বা ফংদ্রিঙৈ মমাংদা লৈবাক অসিদা হৌদোকপা থবক খুদিংমক নিংতম্বা ভারত অমা ফংনবা মান্নবা পান্দম ওইখি। নাগরিক খুদিংমক মখোয়না ঙমজবা মওংদা নিংতম্বা ফংনবা থবকশিং শরুক য়াখি। মসিনা অমতা ওইবগী শক্তম অমা শাগৎখি অমসুং মসিগী ফল ওইনা বৃতিসনা ভারত থাদোক্তুনা চৎখি। চাউখৎলবা ভারত অমা শেমগৎনবা ৱাশক মপুংফানবা মসিগা মান্নবা ইহুল অমা পোকহনগদবনি। বিকসিত ভারতকী মরুশিং হেক হুনখিবগা, মথং চহি ২৫গী মহৈ-মরোং ঐখোয়গী তুংগী মীরোলশিংনা লোক্কনি। ভারতমচা খুদিংমক মসিগী ৱাখল্লোন অসি চেনবা দরকার ওই।

মহাক্না হায়খি বিকসিত ভারত সংকল্প যাত্রা অসি লৈবাক্কী থবক অমনি, মসি রাজনিতি দল অমগী থবক নত্তে, শেংবা থৌদাং অমনি। মসিদা মীয়াম্না হকথেংননা শরুক য়াগদবনি। কনাগুম্বা অমনা মসিগী মতাংদা পাউ-চেশিং পাবদা পেন্দ্রবদি, মহাক করিগুম্বা মরুওইবা খর মাঙজরবনি। যাত্রাগী তোঙান-তোঙানবা শক্তমশিংদা শরুক য়াবা ফংবদা মহাক্না অপেনবা ফোঙদোকখি।

মহাক্না হায়খি অফবা থবকশিংনা অফবা ফিবম শেমগৎপা মরমনা বেনিফিসরিশিং অমসুং নাগরিকশিংনা যাত্রাগী মরমদা শন্দোক্কদবনি। বিকসিত ভারত সংকল্প যাত্রা অসি অচৌবা ৱাশক অমনি অমসুং সবকা প্রয়াসকী খুৎথাংদা মসি থবক ওইনা পাংথোক্কদবনি। চাউখৎলবা ভারত অমা শেন-থুমগী ফিবম ফগনি অমসুং মসিনা মীয়ামগী অৱাবশিং কোকহনগনি। বিকসিত ভারতকী ৱাশক্কী খুৎথাংদা খুদোংচাদবা খুদিংমক কোকহন্নবা লম্বী লৈগনি। অদোমগী মীহুৎ অমা ওইনা অমসুং অদোম্না পীবা লৈবাক্কী থৌদাংগীদমক, ঐনা থবক অমতা পাংথোক্তনা তোক্লোই হায়না ঐনা কাসিগী মীয়ামদা থাজবা পীরি।

থৌরম অদুদা প্রধান মন্ত্রীনা উত্তর প্রদেসকী চীফ মিনিস্তর শ্রী য়োগী অদিত্যনাথকা লোয়ননখি।

Interacting with beneficiaries of Viksit Bharat Sankalp Yatra in Varanasi. https://t.co/H9crhvRr7U

— Narendra Modi (@narendramodi) December 17, 2023

*****