য়োর হাইনেস,

এক্সেলেন্সিজ,

ঐখোয়গী জি-২০ প্রেসিদেন্সীদা ভারতনা তুং কোইগদবা চাউখৎপা অমদি অইং অশাগী খল হোংলকপা হায়রিবা হীরম অনিসিদা মরুওইবা মীৎয়েঙ থমখি‍।

ঐখোয়না মালেম অমা, ইমুং অমা, তুংলমচৎ অমা হায়বসিদা মরুওইবা ৱাখল্লোনসু থমখি‍।

অদুগা ময়াম্না থম্নরকপা সজেসনশিংদগী, হীরম কয়াদা অমত্তা ওইনা মায় পাক্না য়ানখি‍।

মরূপশিং,

ভারত য়াওনা মালেমগী খা থংবা শরুক্কী লৈবাক পুম্নমক্না অইং অশাগী খল হোংলকপদা থৌদাং চাউনা য়াওদে হায়বা ঐখোয় পুম্নমক্না খঙই‍।

অদুবু অইং অশাগী খল হোংলকপগী চৈথেংদি হায়রিবা লৈবাকশিংসিদা খ্বায়দগী হেন্না থেংনরি‍।

কাঙলোন ৱাৎচরবসু হায়রিবা লৈবাকশিং অসিনা অইং অশাগী খল হোংলকপা থেংননবা থৌরাংশিং পায়খৎলি‍।

মালেমগী খা খংবা শরুক্কী অনিংবা অপাম্বশিং থুংহন্নবগীদমক ক্লাইমেৎ ফাইনান্স অমসুং তেক্নোলোজীগী য়াম্না মথৌ তাই‍।

মালেমগী খা থংবা শরুক্কী লৈবাকশিংগী অপাম্বদি অইং অশাগী খল হোংলকপা থেংননবগীদমক চাওখৎপা লৈবাকশিংনা মখোয়দা হেক য়ারিবমখৈ মতেঙ পাংলকপদুনি‍।

মসি মরমসু চাই অমদি অচুম্বা থবকসু ওইগনি‍।

মরূপশিং,

জি-২০দা ক্লাইমেৎ এক্সনগীদমক ২০৩০ ফাওবদা দোলর ত্রিলিয়ন কয়াগী ক্লাইমেৎ ফাইনান্স মথৌ তাগনি হায়না য়ানখি‍।

হায়রিবা ক্লাইমেৎ ফাইনান্স অদুমক ফংবা, শীজিন্নবা য়াবা অমদি পু-থাংবা ঙম্বা ওইগদবনি‍। 

মায়কৈ অসিদা য়ু.এ.ই.গী ক্লাইমেৎ ফাইনান্স ফ্রেমৱর্ক ইনিসিএতিবতগী অচৌবা পাঙ্গল ফংগনি হায়না ঐনা থাজৈ‍।

ঙরাং লৌখিবা লোস এন্দ দেমেজ ফন্দ চৎনহন্নবা পুৱারী ওইরবা ৱারেপ্পু ভারতনা তরাম্না ওক্লি‍।

মসিনা সি.ও.পি. ২৮ সমিত্তা অনৌবা থাজবা অমা পোকহল্লি‍।

সি.ও.পি. সমিত্তগী ক্লাইমেৎ ফাইনান্সকা মরী লৈনবা অতৈ হীরমশিংদসু অফবা মহৈ ফংবা ঙমগনি হায়না ঐনা থাজবা থমজরি‍।

অহানবদা, সি.ও.পি.-২৮তা নিউ কল্লেক্তিব ক্বান্তিফাইদ গোল ওন ক্লাইমেৎ ফাইনান্সতা মশক থোক্না খুমাঙ চাওশিনবা ঙমগনি‍।

অনিসুবদা, গ্রীন ক্লাইমেৎ ফন্দ অমদি এদাপ্তেসন ফন্দদা অৱাৎপা লৈহল্লোই, ফন্দ অসিদা অৱাৎপশিং লেপ্তনা হাপচিনগনি‍।

অহুমসুবদা, মল্তিলেতরেল দিভেলপমেন্ত বেঙ্কশিংদগীসু, চাওখৎপগা পুরকপগা লোয়ননা ক্লাইমেৎ এক্সনশিংগীদমকসু পু-থাংবা ঙমগদবা মওংদা শেল শীজিন্নবা য়াহনবনি‍।

অদুগা মরিশুবদা, চাওখৎলবা লৈবাকশিংনা ২০৫০গী মাঙওইননা মখোয়গী কার্বোন ফুৎপ্রিন্ত শোয়দনা লোইশিনবা হায়বসিনি‍।

ঐনা য়ু.এ.ই.না মাঙজিল থাদুনা ক্লাইমেৎ ইনভেস্তমেন্ত ফন্দ লিংখৎনবা লাউথোকখিববু থম্মোয় শেংনা তরাম্না ওকচরি, মদুগীদমক থাগৎচবা ফোঙদোকচরি‍।

হন্না হন্না থাগৎচরি‍‍।

থাগৎচরি‍।

*******