য়োর মাজেস্তিজ,

য়োর হাইনেস,

এক্সেলেন্সিজ,

ইবেম্মা অমদি ইবুংঙোশিং,

ভারত মচা করোর ১৪০গী মায়কৈদগী ময়াম পুম্নমকপু খুরুমজরি‍!

ঙসি ইহান হান্না ময়াম পুম্নমক্কী মফমদা তৌবিমল খঙবা উৎচরি‍।

ঐনা পায়খৎখিবা ক্লাইমেৎ জস্তিস, ক্লাইমেৎ ফাইনান্স অমদি গ্রীন ক্রেদিৎনচিংবা হীরমশিংদা লেপ্পা লৈতনা খন্ন-নৈনবিরি‍।

ঐখোয় পুন্না হোৎনমিন্নবনা মালেমগী ওইনা চাওখৎপা পুরক্নবগীদমক পুম্নমক্কী অপাম্বশিং ঙাকপগী, পুম্নমক্না শরুক য়ামিন্নবগী মরুওইবাশিংদা লৈরিবা থাজবশিং হেনগৎলক্লি‍।

মরূপশিং,

ঙসি ভারতনা ইকোলোজী অমদি ইকনমীগী অথোইবা খল চানা থম্বগী খুদম ওইনা মালেমগী মাঙদা লেপ্লি‍। ভারতনা মালেমগী মীশিংগী চাদা ১৭ ওইজরবসু, মালেমগী কার্বোন থাদোকপদা ঐখোয়গী শরুক শুপ্নতগী চাদা ৪ দগীসু হেন্না তারি‍।

ভারত অসি এন.দি.সি. পান্দমশিং ফংবা ঙম্নবগী লম্বীদা চঙশিল্লিবা মালেমগী শেন্মিৎলোন খরগী মনুংদা চল্লি‍।

ইমিসন ইন্তেন্সিতীগা মরী লৈনবা পান্দমশিংসু ঐখোয়না চহি তরামাথোইগী মমাঙদা ফংখ্রে‍।

নন-ফোসিল ফ্যুল পান্দমসু ঐখোয়না থমখিবা মতমগী চহি ৯ ঙনখৎনা ফংখ্র‍ে‍।

অদুগা মসিনসু লোইবা নত্তে‍।

ঐখোয়গী পান্দমদি ২০৩০ ফাওবদা ইমিসন ইন্তেন্সিতী চাদা ৪৫ হন্থহনবনি‍।

ঐখোয়না নন-ফোসিল ফ্যুলগী চাংসু চাদা ৫০ হেনগৎহন্নবা ফিরেপ লৌরি‍।

অদুগা, ঐখোয়না ২০৭০ ফাওবদা নেত জিরোগী পান্দম ফংনবগী মায়কৈদা খোঙ থাংজিল্লি‍।

মরূপশিং,

ভারতনা মাগী জি-২০ প্রেসিদেন্সীদা মালেম অমা, ইমুং অমা, তুংলমচৎ অমাগী ৱাখল্লোনগা লোয়ননা ক্লাইমেৎকী হীরমদা লেপ্পা লৈতনা মরুওইবা মীৎয়েঙ থমখি‍।

সস্তেনেবল ফ্যুচরগীদমক ঐখোয় পুনশিন্দুনা গ্রীন দিভেলপমেন্ত পেক্তপু অমত্তা ওইনা য়ানখি‍।

ঐখোয়না লাইফস্তাইল্স ফোর সস্তেনেবল দিভেলপমেন্তকী পথাপশিং লেপখি‍।

ঐখোয়না মালেমগী থাক্তা রিনিউএবল ইনর্জীবু শরুক অহুম হেনগৎহন্নবা থৌরাংশিং ফোঙদোক্নখি‍।

ভারতনা অল্তরনেতিব ফ্যুলগীদমক হায়দ্রোজেনগী লমদা পুক্নিং থৌগৎলি অমদি গ্লোবেল বাইওফ্যুল এলাইন্সসু হৌদোকখি‍।

ক্লাইমেৎ ফাইনান্স কম্মিৎমেন্তপু বিলিয়ন্দগী হেনগৎহন্দুনা ত্রিলিয়ন কয়া য়ৌহনবগী মরুওইবা ৱাফমবু ঐখোয় পুম্নমক্না য়ানখি‍।

মরূপশিং,

গ্লাসগোদা ভারতনা ‘আইলেন্দ স্তেতস’কী ইনফ্রাস্ত্রকচর রেজিলিএন্স ইনিসিএতিব হৌদোকখি‍।

ভারতনা লৈবাক ১৩দা মসিগা মরী লৈনবা প্রোজেক্তশিং পায়খৎলি‍।

গ্লাসগোদা ঐহাক্না, মিসন লাইফ – লাইফস্তাইল ফোর এনভাইরনমেন্তকী মঙলান ময়ামগী মমাঙদা থমখি‍।

ইন্তরনেস্নেল ইনর্জী এজেন্সীগী স্তদীনা হায়রিবা লম্বী অসিদা চঙশিনবনা ঐখোয়না ২০৩০ ফাওবদা চহিদা বিলিয়ন তন ২গী কার্বোন থাদোকপা হন্থহনবা ঙমগনি হায়না ফোঙদোকখ্রবনি‍।

ঙসি ফোরম অসিদা প্রো প্লানেৎ, প্রোএক্তিব অমদি পোজিতিব ইনিসিএতিবকী ৱাফম অমগসু হৌদোকচরি‍।

মদুদি গ্রীন ক্রেদিৎ ইনিসিএতিব হায়বসিনি‍।

মসি কার্বোন ক্রেদিৎকী কম্মর্সিএল ওইবা ৱাখল্লোনগী ৱাংমদা, মীয়াম্না পুন্না শরুক য়ামিন্নদুনা কার্বোন সিঙ্ক শেম্নবা থৌরাং অমনি‍।

ময়াম্না হীরম অসিদা শোয়দনা শরুক য়াবিরক্কনি হায়না ঐনা থাজবা থমজরি‍।

মরূপশিং,

হৌখিবা চহিচাগী অশোয়বশিং শেমদোক্নবগীদমক ঐখোয়গী ইফমদা মতম শাংনা লৈত্রে‍।

মীওইবা খুন্নাইগী অপীকপা শরুক অমনা মহৌশাবু অমম্বা লম্বীদা চিংশিল্লি‍।

অদুবু মসিগী মহৈদি মীওইবা খুন্নাই পুম্বনা ফংলি, মরুওইনা মালেমগী খা থংবা শরুক্কী মীওইশিংনা ফংলি‍।

ঐগী ফরগা লোয়রে হায়বা ৱাখল্লোন অসিনা মালেম অসিবু অমম্বা লম্বী অমদা পুদুনা চৎলি‍।

মফম অসিদা লেঙশিনবিরিবা মীওইশিং, লৈবাক্কী মকোকশিং অচৌবা থৌদাংগা লোয়ননা লেঙবিরক্লিবনি‍।

ঐখোয় পুম্নমক্না ঐখোয়গী থৌদাং লৌবা তাই‍।

মালেম পুম্বনা ঙসি ঐখোয়দা মীৎয়েঙ থম্লি, মালেম লৈকোয়পুং অসিগী তুংলমচৎগীদমক ঐখোয়গী মায়কৈ য়েংলিবনি‍।

ঐখোয় মায় পাক্তবা য়াদবনি‍।

ঐখোয় খোঙফম চেৎনা অচেৎপা ফিরেপ লৌদবা য়াবনি‍।

লৈবাক খুদিংমক্না মখোয় মশাগী ওইবা ক্লাইমেৎ পান্দমশিং থম্লিবা অদু, লেপ্লিবা ফিরেপ অদু মপুং ফাহন্দুনা মালেমগী মফমদা উৎননবগী ফিরেপ ঐখোয়না লৌবা তাই‍।

ঐখোয় লিংজেল মান্ননা থবক তৌমিন্নবা তাই‍।

ঐখোয় পুন্না থবক পায়খৎমিন্নগনি, অমনা অমগী মতেঙ পাংনগনি, পুন্না চৎমিন্নগনি হায়বগী ফিরেপ অমা ঐখোয়না লৌমিন্নবা তাই‍।

ঐখোয়না মালেমগী কার্বোন বজেত্তা চাওখৎলবা লৈবাক খুদিংমক্না অহেনবা শরুক পুবা তাই‍।

ঐখোয় খল হেন্না চাহনবা তাই‍।

এদাপ্তেসন, মিতিগেসন, ক্লাইমেৎ ফাইনান্স, তেক্নোলোজী, লোস অমদি দেমেজ হায়রিবা পুম্নমক অসিদা খল চাননবা মাঙদা চঙশিন্নবগী ফিরেপ ঐখোয়না লৌবা তাই‍।

ঐখোয় মঙলান চাউনা থম্বসু মথৌ তাই‍।

ইনর্জী ত্রাঞ্জিসন অচুম্বা মওংদা পুরক্নবা, পুম্নমক কোনশিন্নবা, থোং মান্নহন্নবা ঐখোয়না ফিরেপ লৌবা তাই‍।

ঐখোয় অনৌবা ৱাখল্লোনশিং পুথোকপা তাই‍।

ঐখোয়না ইনোভেতিব তেক্নোলোজীশিং লেপ্পা লৈতনা পুথোক্নবা ফিরেপ লৌবা তাই‍।

ইশাগী ওইজবা থাদোক্তুনা অতৈ লৈবাকশিংদা তেক্নোলোজী ত্রান্সফর তৌবা তাই‍। ক্লীন ইনর্জী চেনবু মপাঙ্গল কনখৎহনবা তাই‍।

মরূপশিং,

ভারতনা য়ু.এন. ফ্রেমৱর্ক ফোর ক্লাইমেৎ চেঞ্জ প্রোসেসকীদমক শেম শাদুনা লৈরে‍।

মরম অসিনা, ঙসি ফম্পাক অসিদগী ২০২৮দা সি.ও.পি.-৩৩ সমিৎ ভারতনা য়ুম্বু ওইনা পাঙথোক্নবা ৱাফম হৌদোকচরি‍।

লাক্কদৌরিবা নুমিৎ ১২ অসিদা গ্লোবেল স্তোক-তেককী মখাদা ঐখোয়না শাফবা অমদি মঙাল নাইবা তুংলমচৎ অমগী লম্বী ফংগনি হায়না ঐনা থাজবা থমজরি‍।

ঙরাং লোস এন্দ দেমেজ ফন্দ চৎনহন্নবা লৌখিবা ৱারেপ অদুনা ঐখোয় পুম্নমক্কী থাজবা হেনগৎহল্লে‍।

য়ু.এ.ই.গী লমজিং মখাদা সি.ও.পি. ২৮ সমিৎনা মায় পাকপগী অনৌবা পন্দোল লোম্বা ঙমগনি হায়না ঐনা থাজৈ‍।

ঐগী মরুপ, হিজ হাইনেস সৈখ মোহম্মদ বিন জায়দ অমদি য়ুনাইতেদ নেসন্স ওর্গনাইজেসনগী সেক্রেতরী জেনেরেল হিস এক্সেলেন্সী গুতরেস জী বু, মফমসিদা ঐগী ইফমদা অখন্ননা ইকায় খুম্নবা উৎপিবগীদমক অখন্ননা তৌবিমল খঙবা উৎচরি‍।

ময়াম পুম্নমকপু হন্না হন্না থাগৎচরি!

***