নমস্কার!

লৈবাক অসিদা নহা লাখ কয়াদা সরকারগী থবক পীবগী খোঙথাং মখা চত্থরি। ঙসি, নহা লিশিং 51 হেনবগী মফমদা সরকারগী থবক খনবগী চিথী য়েন্থোক্লি। মসিগী থবক খনবগী চিথীশিং অসিদি অদোমগী হোৎনবা কনবা অমসুং ৱাখল চেৎপগী মহৈনি। ঐহাক্না অদোম অমসুং অদোমগী ইমুংবু থাগৎচরি।

অদোম্না লৈবাক শেম্বগী অদুগুম্বা ইচেল অমগী শরুক ওইগদৌরবনি, অমসুং মসিগা মীয়ামগা হকথেংননা মরী লৈনৈ। অদোম্না ভারত সরকারগী থৌমী অমা ওইনা থৌদাং কয়া অমা পাংথোক্কদবা লৈরে। অদোম্না পায়রিবা ফম, লৈরিবা মফম খুদিংদা খ্বাইদগী অহানবা ওইনা পীগদবা প্রাইওরিতী অসিদি পুন্সি মহিং লাইথোকহনবা (ইজ ওফ লিবিং) হায়বসিদনি।

মরুপশিং,

নুমিৎ খরনিগী মমাংদা, লৈবাক্না নবেম্বর 26তা সংবিধানগী নুমিৎ পাংথোকখি। মসিগী তাং অসিদি ইং 1949দা লৈবাক অসিনা লৈবাক মীয়াম খুদিংদা চপ মান্নবা হক পীবা সংবিধান অমবু য়াদুনা মদুগী মতুং ইন্না চৎপা হৌখিবা নুমিৎনি। সংবিধানগী মরু ওইবা আর্কিতেক্ত, বাবাসাহেব অম্বেদকরনা মঙলান অমা মঙজখিবনি, মদুদি, মীপুম খুদিংদা চপ মান্নবা মিৎয়েং য়েংদুনা সোসিএল জস্তিস লৈবা ভারত অমগী মঙলান। অদুবু লাইবক থীবদি, নিংতম্বা ফংলবা মতুংদা ফাওবা লৈবাক অসিদা মান্নবা মিৎয়েং য়েংবগী পথাপ্পু খঙশিন্নদনা লাকখি।

ইং 2014গী মমাংদা খুন্নাইগী কাঙলুপ অমবুদি তঙাই ফদবা খুদোংচাবা কয়া মৎপীদুনা লাকখি। ঐখোয়না ইং 2014দা লৈবাক্কী সেবা তৌবগী খুদোংচাবা ফংখিবা মতমদা, সরকার চলায়নবা তাঞ্জা ফংখিবা মতমদা, ঐখোয়না খ্বাইদগী অহানবদা, ইন্থোকপীরম্বশিংদা মিৎয়েং চঙবা হায়বা মন্ত্রগা লোয়ননা তুংলমচত্তা চঙশিনবগী খোঙচৎ হৌখি। স্কিম অমত্তগী খুদোংচাবা মমাংদা ফংলমদবা, সরকারগী মাইকৈদগী কান্নবা অমত্তা ফংলমদবা মীওইশিংগী মনাক্তা সরকার মশামক্না চৎখি, মখোয়গী পুন্সি মহিং নুংঙাইহন্নবা লেপ্তনা হোৎনরি।

সরকারগী ৱাখল্লোন, থবক তৌবগী মতৌদা অহোংবা অমা লাক্লিবা অসিনা মরম ওইরগা লৈবাক অসিদা ঙসিদি মশক থোকপা মায় পাকপা কয়া উবা ফংলে। ব্যুরোক্রেসীদি হান্নগুম চপ মান্নরি, মীওইশিংসু হান্নগুম্বা চপ মান্নবা ঙাক্তনি। ফাইলসু চপ মান্নৈ, থবক শুবীনবা মীওইসু চপ মান্নৈ, থৌওংসু চপ মান্নৈ। অদুবু, সরকার অসিনা লৈবাক্কী লাইরবা, মিদ্দল ক্লাসশিংদা অহেনবা প্রাইওরিতী পীরকপা মতমদগী হান্না লৈরম্বা ফিভম খুদিংদা অহোংবা লাকখি। থবক তৌবগী মওংসু অমগী মথংদা অমদা অহোংবা লাকখি। থবক পাংথোকপগী মওংদা অহোংবা লাকপা হৌরকখি, থৌদাং য়েন্থোক্নবা হৌরকখি, মীচম মীয়ামগী য়াইফ য়ুম্বালদা পোজিতিব ওইবা অহোংবা লাকপা হৌরকখি। স্তদী অমগী মতুং ইন্না, দিকেদ মঙাগী মনুংদা লৈবাক্কী লাইরবা করোর 13না লাইরবগী খয়াত্তগী মপান থোক্লকখি। সরকারগী স্কিমশিংনা লাইরবগী মনাক্তা য়ৌবা মতমদা কয়া য়াম্না চাউবা অহোংবা লাকই হায়বা মসিদগী ঐখোয়না খঙবা ঙম্লি। বিকশিৎ ভারত সঙ্কল্প য়াত্রানা খুঙ্গং-খুঙ্গংদা চৎপগী থৌওংসু অদোম্না ঙসিগী অয়ুক্তমক্তদসু উখ্রে। অদোমগুম্বা সরকারগী থৌমীশিংনা সরকারগী স্কিম কয়াবু লাইরবশিংগী য়ুম্থোংদা চত্তুনা য়ৌহল্লি। অদোম্না সরকারগী সেবাগী মনুং হেক চনবদগীদি, মসিগুম্বা ৱাখল্লোন, থৌওং অসিমক লৈদুনা মীয়ামগী মতেং পাংবা তাই। মখোয়গী নুংঙাই য়াইফবগীদমক্তা ইশাগী পুন্সি কত্থোকপা তাই।

মরুপশিং,

হোংবা নাইবা ঙসিগী ভারত অসিদা অদোম পুম্নমক্না ইনফ্রাস্ত্রকচরগী ইহৌ অমগী শাখী অমসু ওইরিবনি। মোদর্ন এক্সপ্রেসৱে ওইরো, মোদর্ন রেলৱে স্তেসন ওইরো, এয়রপোর্ত ওইরো, ৱাতর ৱে ওইরো, লৈবাক অসিদা ঙসিদি হীরমশিং অসিদি লুপা করোর লাক্ষ কয়া থাদরি। সরকারনা ইনফ্রাস্ত্রকচরগীদমক্তা অসুক য়াম্বা শেনফম থাদরিবা, ইনভেস্ত তৌরিবা অসিদদি, মসিনা থবক্কী অহেনবা খুদোংচাবা কয়া লৈহল্লকনি হায়বসিদি মহৌশানা পুরকপা ৱাফম ওইরবনি।

ইং 2014গী মতুংদা, অতোপ্পা অচৌবা অহোংবা অমসু লাকখি। মমাংদগী হৌনা পন্দুনা লৈরম্বা স্কিম কয়া ঐখোয়না কোইথী থীদুনা মিসন মোদতা লোইশিন্নবা থবক হোৎনখি। ময়াইদা পনবা প্রোজেক্তশিংনা মপুকচেল শেংবা তেক্সপেয়রশিংগী শেল অরেম্বতা মাঙহনবতা নত্তনা মসিগী কান্নবসু অমত্তা ফংহন্দনা মাঙই অমসুং লোশিনগে হায়রবসু, মদুদা চঙগদবা শেনফম অমুক ৱাংখৎলকই। মসিদি ঐখোয়গী তেক্সপেয়রশিংগী মফমদা অরানবা তৌবীবগা চপ মান্নৈ।

হৌখিবা চহি খরসিদা কেন্দ্র সরকারনা লুপা করোর লাক্ষ কয়াগী প্রোজেক্ত হৌদোক্তুনা মখোয়বু খোঙজেল য়াঙনা লোইশিনহন্নবা লেপ্তনা য়েংশিন্দুনা লাক্লি। মায় পাকপসু য়াম্না ফংলে। মসিনসু, লৈবাক্কী কাচিন কোয়াদা থবক্কী খুদোংচাবা কয়া ফংহনখি। খুদম ওইনা হায়রবদা, চহি 22-23গী মমাংদা হৌদোকখিবা বীদর-কলবুর্গী রেলৱে লাইনগী প্রোজেক্ত। প্রোজেক্ত অসি মতম শাংনা পন্দুনা লৈরুরবনি। অদুবু, ঐখোয়না ইং 2014দা মসি লোইশিনবগী ৱারেপ লৌখি অমসুং শুপ্নগী চহি 3গী মনুংদা প্রোজেক্ত অসিবু লোইশিন্দুনা উৎখি। সিক্কিমগী পাক্যোং এয়রপোর্তকী ৱাখল্লোন অসি ইং 2008তা পুথোকখিবনি। অদুবু, ইং 2014 ফাওবদা মসিনা চেদা খক লৈদুনা লাকখি। অদুগা, ইং 2014গী মতুংদা মসিগা মরী লৈনবা অপনবা খুদিংমক ঐখোয়না লৌথোক্তুনা ইং 2018 ফাওবদা ঐখোয়না লোইশিনখি। মসিনসু থবক কয়া অমা পীখি। পরাদীপ রিফানরীগী ৱাহৌদোকসু চহি 20-22গী মমাংদা থমখ্রবনি, অদুবু ইং 2013 ফাওবদা মশক থোকপা থবক অমত্তা পায়খৎখিদে। অদুগা ঐখোয়গী সরকার হেক লাকপদগী, পন্দুনা লৈরুরবা প্রোজেক্তশিং অমুক হন্না মখা চত্থবগুম্না, পরাদীপ রিফাইনরীগী থবকশু ঐখোয়না পায়খত্তুনা লোইশিনখি। মসিগুম্বা ইনফ্রাস্ত্রকচর প্রোজেক্তশিং লোইশিনবা মতমদা, মখোয়না হকথেংনবা থবক্কী খুদোংচাবা পীবতা নত্তনা অতোপ্পা থবক কয়াসু নাকোইননা পীবা ঙম্মি।

মরুপশিং,

লৈবাক অসিদা থবক চাউনা পীবা ঙম্বা অচৌবা সেক্তর অমসু লৈরি – রিএল ইস্তেত। সেক্তর অসিনা চৎলম্বা মাইকৈ য়েংলুরগদি, মসিনা বিলদরশিংতা নত্তনা মিদ্দল ক্লাসকী মীওই কয়াবুসু লুপহনবা হায়বসি শোইরমদ্রবনি। RERA আইনগী মতেংদগী ঙসিদি সেক্তর অসিদা নুং-পান ফাওনা উনা থবক তৌবদগী ফিভম লাক্লে। সেক্তর অসিদা ইনভেস্ত কয়াসু লেপ্তনা লাক্লি। ঙসিদি, লৈবাক অসিগী লাক্ষ অমদগী হেনবা রিএল ইস্তেত প্রোজেক্তশিংদি RERA আইনগী মখাদা রেজিস্তর তৌরে। প্রোজেক্ত অমা হেক পনখিবা মতমদা থবক্কী খুদোংচাবসি অদুমক মাঙখিবনি। লৈবাক অসিগী চাউখৎলক্লিবা রিএল ইস্তেতনা মশিং য়াম্লবা থবক কয়াগী খুদোংচাবা পীরি।

মরুপশিং,

ভারত সরকারগী পোলিসী অমসুং ৱারেপ কয়ানা লৈবাক্কী শেন্মিৎলোনবু অনৌবা থাক্তা পুখৎলে। মালেমগী অচৌবা ইন্সতিত্যুসন কয়ানা ভারতকী শাহৌ লৌবগী চাং অসিদা য়াম্না থাজবা থম্নরি। থাগৎনরি। হন্দক্তসু, ইনভেস্তমেন্ত রেতিংগী হীরমদা মালেমগী মকোক থোংবা লুপ অমনা ভারতকী খোঙজেল য়াঙবা শাহৌ অসিবু শকখঙখ্রে। থবক্কী খুদোংচাবা হেনগৎলক্লিবা, থবক শুবা ঙম্বা মীওইগী মীশিং য়াম্বা অমসুং লেবর প্রদক্তিবিতী হেনগৎলকপা অসিনা মরম ওইরগা ভারতকী শাহৌ লৌবগী খোঙজেল অসিনা য়াঙনা মখা চত্থখিগনি হায়না মখোয়না পানরি। মসিগী মরু ওইবা মরমদি, ভারতকী মেন্যুফেকচরিং অমসুং কনস্ত্রক্সন সেক্তরগী মপাঙ্গল হেনগৎলক্লিবা অসিনি।

ৱাফমশিং অসিনা লাক্কদৌরিবা মতমশিংদা ভারত্তা থবক ফংবা অমসুং মশানা থবক পীজবগী চাউরবা ওইথোকপা অমা লৈ হায়বা তাক্লে। মসিদি লৈবাক্কী নহাশিংগী ওইনা য়াম্না মরু ওইবা ৱাফম্নি। সরকারগে থৌমী অমা ওইনা, মসিদা অদোমগী চাউরবা থৌদাং য়াওরি। ভারত্তা লৈরক্লিবা চাউখৎ থৌরাংগী কান্নবা খুদিংমক খ্বাইদগী অরোইবা মীওইদা ফংহন্নবা অদোম্না হোৎনবা তাবনি। মফম অমনা কয়াদা মনুং হঞ্জিনবা ওইরবসু, মদুদা অদোম্না প্রাইওরিতী পীগদবনি। মীওই অমনা কয়া য়াম্না লাপ্পা মফমদা লৈরবসু, অদোম্না মহাক্কী মনাক্তা শোইদনা য়ৌশিনবা তাবনি। অদোম্না ভারত সরকারগী থৌমী অমা ওইনা ৱাখল্লোন অসিগা লোয়ননা তুংলমচত্তা চঙশিল্লবা মতমদতা চাউখৎপা ভারত অমগী মঙলান মঙফাওনগদৌরিবনি।

মরুপশিং,

মথংগী চহি 25 অসিদি অদোম অমসুং লৈবাক্কী ওইনা য়াম্না মরু ওইরি। মশিং য়ামদ্রবা মীওইদা মসিগুম্বা খুদোংচাবা অসি ফংলি। অদোম্না মসিগী মপুং ফাবা কান্নবা লৌগদবনি। অদোমসু অনৌবা লর্নিং মোদ্যুল, “কর্ময়োগী প্রারম্ভ”তা শোইদনা চঙবীয়ু হায়না অদোমগী মফমদা থমজরি। মসিগা মরী লৈনরবা তুংদা মশাগী কেপাসিতী হেনগৎখিদবা ঐখোয়গী মরুপ অমত্তা লৈখিদ্রি। করিগুম্বা অমা তম্নীংবা ফাওরুবদগী অদোম্না ঙসিগী থাক অসিদা য়ৌরক্লিবা অসিদা, তম্নীংবা ফাওবগী ৱাখল্লোন অদুবু কৈদৌনুংদা মাংহনগনু, ইশাগী থাকপু লেপ্তনা ৱাংখৎহনবীয়ু। তাঞ্জা অসিদা অদোমগী পুন্সি হৌরিবনি, লৈবাকসু চাউখৎলি, অদোমসু চাউখৎকদবনি। থাক অসিদা য়ৌরে হায়দুনা লেপকদবা নত্তে, মসিগী ওইনসু চাউরবা থৌরাং অমা শীনখ্রবনি।

কর্ময়োগী প্রারম্ভ অসি চহি অমগী মমাংদা হৌদোকখিবনি। মদুদগী হৌদুনা, সরকারগী অনৌবা থৌমী লাক্ষ কয়ানা মসিদগী ত্রেনিং লৌখ্রবনি। ঐহাক্কা লোয়ননা প্রধান মন্ত্রী ওফিস, পি.এম.ও.দা থবক তৌরিবশিং, মখোয়দি সেনিয়র ওইরবা মীওইনি, লৈবাক্কী ওইবা মরু ওইবা থৌদোক কয়া মখোয়না মাইয়োক্নখ্রবনি, মখোয়সু মসিদা য়াওদুনা লেপ্তনা তেস্ত পীরিবনি, পরিক্ষা পীরিবনি, কোর্স তৌরিবনি, মসিনা মখোয়গী কেপাসিতী, পাঙ্গল হেনগৎহল্লি, ঐহাক্কী পি.এম.ও.বুসু মপাঙ্গল লৈনা থবক তৌহল্লি, লৈবাক্কী মপাঙ্গল হাপ্লি।

ঐখোয়গী ওনলাইন ত্রেনিং প্লেতফোর্ম, iGoT Karmayogi অসিদসু কোর্স 800 হেন্না য়াওরি। ইশাগী স্কিল হেনগৎহন্নবা মসিবু শোইদনা শিজিন্নবীয়ু। অদোমগী পুন্সিদা অনৌবা অহৌবা অমা লাক্লিবা মতমসিদা, ইশাগী ইমুংগী মঙলানবু ৱাংহল্লিবা মতমসিদা, ঐহাক্না অদোম অমসুং অদোমগী ইমুংগী মফমদা থাগৎ পাউজেল পীজরি। হৌজিকপুদি সরকারগী থবক তৌরগনি। অদুবু মীচম ওইনা চহি 20, 22, 25 হিংলকপা অসিদা খুদোংচাদবা কয়াদি থেংনরমগনি। অদোম্না সরকারদা করি পেন্দবা লৈখি, বস স্তেসন্দা পেন্দবা থেংনরম্বা য়াই, লৈরক খুল্লক্তা নত্ত্রগা সরকারগী লোইশঙদা নুংঙাইতবা কয়া মাইয়োক্নরম্বসু য়াই। পুম্নমক নীংশিন্দুনা দাইরী অমদা ইশিনবা য়াই। শিংনবা নত্ত্রগা খুদোংচাদবশিং অসি সরকারগী থৌমী অমনা থোকহনবা ঙাক্তনি হায়বা অদোম খঙলমগনি। ঐহাক্না মরম ওইরগা মসিগুম্বা খুদোংচাদবা অমত্তা কনামত্তদা মাইয়োক্নহল্লোই হায়না অদোম্না খনবীয়ু, মরী লৈননা থবক তৌবীয়ু। মসিগুম্বা ৱারেপ অসিনা মীচম মীয়ামগী পুন্সিদা কয়া য়াম্না তেংবাংগনি হায়না অদোম অমুক্তা খন্থবীয়ু। লৈবাক শেম্বগী অদোমগী খোঙচৎ অসিদা ঐহাক্না য়াইফ পাউজেল পীজরি।

পুম্নমকপু হন্না হন্না থাগৎচরি।

***