गोंय/मुंबई, 28 नोव्‍हेंबर 2023

केंद्रीय म्हायती आनी वितरावणी, खेळ आनी युवा वेव्हार मंत्री, श्री अनुराग सिंग ठाकुर हांणी सांगलें की, भारताच्या आंतरराष्ट्रीय चित्रपट महोत्सवाची 54वी आवृत्ती ही ‘वसुधैव कुटुंबकम: एक धर्तरी, एक कुटुंब, एक फुडार’ ह्या भावनांचो आस्पाव करून विविधतायेंतल्या एकचाराची परब आशिल्ली. ह्या महोत्सवान संवसारभरांतले सृजनशील मन, चित्रपट निर्माते, सिनेमा मोगी आनी संस्कृतीक मोगीक  एकठांय हाडले. “आमचे मानादीक प्रधानमंत्री नरेंद्र मोदी हांणी दिल्लो ‘वसुधैव कुटुंबकम’ तत्वगिन्यान आपणावपाचो उलो इफ्फित पाळळो. इफ्फीची ही आवृत्ती खऱ्यांनीच असामान्य आशिल्ली, उल्लेखनीय पयल्या आनी फिल्म निर्मितीच्या उत्कृश्ट कामगिरीचें प्रदर्शन करपी ग्राउंड ब्रेकिंग कृतींनी भरिल्ली”, अशें तांणी इफ्फीच्या समारोप सुवाळ्यांत व्हिडियो संदेश दितना सांगलें.

54व्या इफ्फींत सुमार 250 चित्रपट दाखयले, तातूंत वट्ट 30,000 मिनटां पळोवपाची संद मेळ्ळी, जे 78 देशांतल्या 68 आंतरराष्ट्रीय आनी 17 भारतीय भाशांचें प्रतिनिधित्व करताले, अशें श्री ठाकुर हांणी नदरेक हाडलें. “ह्या महोत्सवांत 23 मास्टरक्लास, इन-कॉन्व्हर्सेशन सत्रां आशिल्लीं, कांय शारिरीक आनी आभासी रितीन सुलभ आसली. महोत्सवा वेळार आयोजीत केल्ल्या सुमार 50 गाला रेड कार्पेटांनी पुराय उत्सवाक चालना मेळ्ळी, अशें तांणी सांगलें. तशेंच ह्या महोत्सवाच्या हे आवृत्तीक आकार दिवपाक, मानादीक जूरी वांगड्यांचोय आदार, तांचो मोलादीक वेळ आनी समर्पीत यत्न म्हत्वाचो आशिल्लो, अशे तांणी सांगले. 

समावेशकता आनी सुलभतायेचे यत्नांचेर भर दितना मंत्री ठाकूर हांणी सांगलें की, वेगवेगळ्या सक्षम चित्रपट मोगीं खातीर चित्रपट खासा क्युरेट केल्यात, जाका लागून तांकां सांकेतिक भास आनी ऑडियो वर्णनाच्या आदारान, व्हडल्या पडद्याचेर सिनेमाची सोबीतकाय पळोवंक मेळटली. “बायलांनी दिग्दर्शीत केल्ल्या 40 परस चड सिनेमांचो आस्पाव करपाची खात्री केली, तांच्या प्रतिभेची परब मनयली”, अशें तांणी सांगलें.

पोरन्या क्लासिकांक परतून हाडपा खातीर राष्ट्रीय चित्रपट दायज मिशनाच्या यत्नांक परबीं दितना, मंत्री ठाकूर हांणी सांगलें की, भारताच्या फुडल्या पिळग्यांक ह्या व्हड लोकांची कदर, आनंद आनी प्रेरणा मेळची हाची खात्री करून, 4K डिजिटल स्वरूपांत जायत्या भाशांचे 5 हजारां वयर चित्रपट आनी डॉक्युमेंटरी परतून मेळटले. “नॅशनल फिल्म हेरिटेज मिशन खाला परतून तयार केल्ल्या सात फिल्मांचो खास क्युरेट केल्लो विभाग 54व्या इफ्फितत दाखयलो आनी फिल्म मोगींची व्हड परब जाली”, अशें श्री ठाकुर हांणी सांगले.

पोरन्याची राखण करप आनी नव्याक चालना दिवप ह्या दोट्टी मिशनाचेरूय तांणी भर दिलो. “‘75 क्रिएटिव्ह माइंड्स ऑफ टुमॉरो’ खाला जाल्ल्या ‘फिल्म चॅलेंजात तरणाट्या प्रतिभेचे दर्शन जाले. तरणाट्या सृजनशील मनांनी सादर केल्ले चित्रपट विचार करपासारके आशिल्ले आनी तातूंत पर्यावरणाची राखण आनी तिगोवन दवरपाचो एक सामको म्हत्वाचो विशय आशिल्लो. उल्लेखनीय म्हणल्यार, 75 सर्जनशील मनातल्या 45 जाणांक पयलींच ह्या क्षेत्रांतल्या मुखेल कंपनींक आपले विचार सादर करपाची संद मेळ्ळ्या. एनएफडीसी फिल्म बाजारान आपलें क्षितीज वाडयलें, विंगड विंगड आंतरराष्ट्रीय प्रेक्षकांक येवकार दिलो आनी पार-संस्कृतीक सहकार्याक पोसवण दिली. ‘व्हीएफएक्स अँड टेक पॅव्हिलियन’ आनी डॉक्युमेंटरी विभागाची वळख करून दितना, नवनिर्माण आनी नॉन फिक्शन कथा सांगपाचें प्रदर्शन जालें, अशें तांणी सांगलें.

केंद्रीय मंत्री ठाकुर हांणी 2023 वर्साचो सत्यजीत रे जिणेगौरव पुरस्कार मेळिल्ल्या खातीर श्री मायकल डग्लस हांका परबीं दिली आनी इफ्फींत हो खीण सगळ्यां खातीर खाशेलो करपा खातीर तांकां सांगात दिवपी, सुश्री कॅथरीन जीटा जोन्स हांचे उपकार मानले. तशेंच भांगराळो मोर पुरस्कार आनी इफ्फित पयलेच खेपे आशिल्ल्या बेस्ट वेब मालिका (ओटीटी) पुरस्कार विजेत्यांक तांणी परबीं दिली.

समारोप करतना मंत्री  ठाकूर हाणी राष्ट्रीय चित्रपट विकास म्हामंडळाच्या पंगडाचो, आनी मुख्यमंत्री डॉ. प्रमोद सावंत हांच्या फुडारपणा खाला गोंय राज्य सरकारान हो महोत्सव यशस्वी करपा खातीर केल्ल्या समर्पित यत्नांखातीर परबी दिली. तशेच सगळ्या फिल्म निर्मात्यांक, कलाकारांक, आनी निर्मात्यांक परबीं दिवन ताणी निमाणें सांगलें, कि इफ्फी भायर लेगीत हि फिल्मातल्यान कथा सांगपाची भावना, एकचार आनी सृजनशीलताय अशीच मुखार चालू दवरची. 

* * *

PIB Mumbai | S.Jan/M.Prabhugaonkar/D.Rane