0 3

କେନ୍ଦ୍ର ସୂଚନା ଓ ପ୍ରସାରଣ, କ୍ରୀଡ଼ା ଓ ଯୁବ ବ୍ୟାପାର ମନ୍ତ୍ରୀ ଶ୍ରୀ ଅନୁରାଗ ସିଂହ ଠାକୁର କହିଛନ୍ତି ଯେ ଭାରତୀୟ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ (ଆଇଏଫ୍ଏଫ୍ଆଇ ୫୪)ର ୫୪ତମ ସଂସ୍କରଣ 'ବସୁଧୈବ କୁଟୁମ୍ବକମ୍: ଗୋଟିଏ ପୃଥିବୀ, ଗୋଟିଏ ପରିବାର ଗୋଟିଏ ଭବିଷ୍ୟତ'ର ଭାବନାକୁ ପ୍ରତିଫଳିତ କରି ବିବିଧତା ମଧ୍ୟରେ ଏକତାର ଉତ୍ସବ ଅଟେ। ସମଗ୍ର ବିଶ୍ୱର ସୃଜନଶୀଳ ଚଳଚ୍ଚିତ୍ର ନିର୍ମାତା, ସିନେମା ପ୍ରେମୀ ଏବଂ ସାଂସ୍କୃତିକ ଉତ୍ସାହୀମାନଙ୍କୁ ଏହା ଏକାଠି କରିଛି । ଆମର ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଇଥିବା 'ବସୁଧୈବ କୁଟୁମ୍ବକମ୍'ର ଦର୍ଶନକୁ ଗ୍ରହଣ କରିବା ର ଆହ୍ୱାନକୁ ଆଇଏଫ୍ଏଫ୍ଆଇରେ ମଧ୍ୟ ଅନୁସରଣ କରାଯାଉଛି। ଆଇଏଫଏଫଆଇର ଏହି ସଂସ୍କରଣ ପ୍ରକୃତରେ ଅସାଧାରଣ ଥିଲା, ଉଲ୍ଲେଖନୀୟ ପ୍ରଥମ ଏବଂ ଗୁରୁତ୍ୱପୂର୍ଣ୍ଣ ଉପଲବ୍ଧିରେ ପରିପୂର୍ଣ୍ଣ ଥିଲା ଯାହା ଚଳଚ୍ଚିତ୍ର ନିର୍ମାଣର ସର୍ବୋତ୍ତମ ପ୍ରଦର୍ଶନ କରିଥିଲା", ସେ ଆଇଏଫଏଫଆଇର ସମାପନ ସମାରୋହରେ ଏକ ଭିଡିଓ ବାର୍ତ୍ତା ଦେଇ ଏହା କହିଥିଲେ ।

ଶ୍ରୀ ଠାକୁର ଉଲ୍ଲେଖ କରିଥିଲେ ଯେ ୫୪ତମ ଆଇଏଫ୍ଏଫ୍ଆଇରେ ପ୍ରାୟ ୨୫୦ଟି ଚଳଚ୍ଚିତ୍ର ପ୍ରଦର୍ଶିତ ହୋଇଥିଲା, ଯେଉଁଥିରେ ୭୮ଟି ଦେଶର ୬୮ଟି ଅନ୍ତର୍ଜାତୀୟ ଏବଂ ୧୭ଟି ଭାରତୀୟ ଭାଷାକୁ ପ୍ରତିନିଧିତ୍ୱ କରାଯାଇଥିଲା। ଏହି ମହୋତ୍ସବରେ ୨୩ଟି ମାଷ୍ଟରକ୍ଲାସ, ଇନ-କନଭର୍ସେସନ୍ ଅଧିବେଶନ ଅନୁଷ୍ଠିତ ହୋଇଥିଲା, ଯେଉଁଥିରୁ କେତେକ ଉଭୟ ଫିଜିକାଲ୍ ଓ ଭର୍ଚୁଆଲ ଭାବେ ଉପଲବ୍ଧ ଥିଲା। ମହୋତ୍ସବ ସମୟରେ ଆୟୋଜିତ ପାଖାପାଖି ୫୦ଟି ଗାଲା ରେଡ୍ କାର୍ପେଟ୍ ସମଗ୍ର ଉତ୍ସବକୁ ପ୍ରୋତ୍ସାହିତ କରିଥିଲା। ମହୋତ୍ସବର ଏହି ସଂସ୍କରଣକୁ ରୂପ ଦେବାରେ ମୂଲ୍ୟବାନ ସମୟ ଏବଂ ଉତ୍ସର୍ଗୀକୃତ ପ୍ରୟାସ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବା ସମ୍ମାନିତ ଜୁରି ସଦସ୍ୟଙ୍କ ସମର୍ଥନକୁ ମନ୍ତ୍ରୀ ସ୍ୱୀକାର କରିଥିଲେ ।

ଆଇଏଫଏଫଆଇ ଦ୍ୱାରା କରାଯାଇଥିବା ଅନ୍ତର୍ଭୁକ୍ତୀକରଣ ଏବଂ ଉପଲବ୍ଧତା ଦିଗରେ ପ୍ରୟାସ ଉପରେ ଆଲୋକପାତ କରି ମନ୍ତ୍ରୀ କହିଥିଲେ ଯେ ଭିନ୍ନକ୍ଷମ ଚଳଚ୍ଚିତ୍ର ପ୍ରେମୀମାନଙ୍କ ପାଇଁ ଚଳଚ୍ଚିତ୍ରଗୁଡ଼ିକୁ ସ୍ୱତନ୍ତ୍ର ଭାବରେ ପ୍ରସ୍ତୁତ କରାଯାଇଥିଲା ଯାହା ଦ୍ୱାରା ସେମାନେ ସାଙ୍କେତିକ ଭାଷା ଏବଂ ଅଡିଓ ବର୍ଣ୍ଣନା ସାହାଯ୍ୟରେ ବଡ଼ ପରଦାରେ ସିନେମାର ସୌନ୍ଦର୍ଯ୍ୟ ଉପଭୋଗ କରିପାରିବେ । ଆମେ ମହିଳାମାନଙ୍କ ଦ୍ୱାରା ନିର୍ଦ୍ଦେଶିତ ୪୦ରୁ ଅଧିକ ଚଳଚ୍ଚିତ୍ର କୁ ସାମିଲ କରିବାକୁ ସୁନିଶ୍ଚିତ କରିଥିଲୁ, ଯେଉଁଥିରେ ସେମାନଙ୍କ ପ୍ରତିଭାକୁ ପାଳନ କରାଯାଇଥିଲା ।

ଫଟୋ: କେନ୍ଦ୍ର ସୂଚନା ଓ ପ୍ରସାରଣ, କ୍ରୀଡ଼ା ଓ ଯୁବ ବ୍ୟାପାର ମନ୍ତ୍ରୀ ଅନୁରାଗ ସିଂହ ଠାକୁର ଆଇଏଫ୍ଏଫ୍ଆଇ ସମାପନ ସମାରୋହରେ ଏକ ଭିଡିଓ ବାର୍ତ୍ତା

ପୁରୁଣା କ୍ଲାସିକ୍ ଗୁଡ଼ିକର ପୁନରୁଦ୍ଧାର ପାଇଁ ଜାତୀୟ ଚଳଚ୍ଚିତ୍ର ଐତିହ୍ୟ ମିଶନର ପ୍ରୟାସକୁ ଅଭିନନ୍ଦନ ଜଣାଇ ମନ୍ତ୍ରୀ କହିଥିଲେ ଯେ ୪କେ ଡିଜିଟାଲ ଫର୍ମାଟରେ ଏକାଧିକ ଭାଷାର ୫,୦୦୦ରୁ ଅଧିକ ଚଳଚ୍ଚିତ୍ର ଏବଂ ଡକ୍ୟୁମେଣ୍ଟାରୀ ପୁନରୁଦ୍ଧାର କରାଯିବ ଯାହା ଦ୍ୱାରା ଭାରତର ଭବିଷ୍ୟତ ପିଢ଼ି ଏହି ମହାନ କାର୍ଯ୍ୟଗୁଡ଼ିକୁ ପ୍ରଶଂସା କରିପାରିବେ, ଉପଭୋଗ କରିପାରିବେ ଏବଂ ପ୍ରେରଣା ପାଇପାରିବେ । ଜାତୀୟ ଚଳଚ୍ଚିତ୍ର ଐତିହ୍ୟ ମିଶନ ଅଧୀନରେ ପୁନରୁଦ୍ଧାର କରାଯାଇଥିବା ୭ ଟି ଚଳଚ୍ଚିତ୍ରର ଏକ ସ୍ୱତନ୍ତ୍ର ବିଭାଗ ୫୪ତମ  ଆଇଏଫ୍ଏଫ୍ଆଇରେ ପ୍ରଦର୍ଶିତ ହୋଇ ଚଳଚ୍ଚିତ୍ରପ୍ରେମୀଙ୍କୁ ପ୍ରଶଂସା କରାଯାଇଛି ବୋଲି ଶ୍ରୀ ଠାକୁର କହିଛନ୍ତି।

ପୁରୁଣାକୁ ସଂରକ୍ଷଣ କରିବା ଏବଂ ନୂତନକୁ ପ୍ରୋତ୍ସାହିତ କରିବାର ଲକ୍ଷ୍ୟ ଉପରେ ମଧ୍ୟ ମନ୍ତ୍ରୀ ଗୁରୁତ୍ୱାରୋପ କରିଥିଲେ। '୭୫ କ୍ରିଏଟିଭ୍ ମାଇଣ୍ଡସ୍ ଅଫ୍ ଟୁମରୋ' ଅଧୀନରେ 'ଫିଲ୍ମ ଚ୍ୟାଲେଞ୍ଜ'ରେ ଯୁବ ପ୍ରତିଭାମାନଙ୍କୁ ପ୍ରଦର୍ଶିତ କରାଯାଇଥିଲା। ଯୁବ ସୃଜନଶୀଳ ମନମାନଙ୍କ ଦ୍ୱାରା ଉପସ୍ଥାପିତ ଚଳଚ୍ଚିତ୍ରଗୁଡ଼ିକ ପରିବେଶର ସୁରକ୍ଷା ଏବଂ ସଂରକ୍ଷଣ ର ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବିଷୟ ଉପରେ ମନ୍ଥନ ଏବଂ ଆଲୋଚନା କରାଯାଇଥିଲା । ଉଲ୍ଲେଖଯୋଗ୍ୟ, ୭୫ଟି କ୍ରିଏଟିଭ୍ ମାଇଣ୍ଡ୍ ମଧ୍ୟରୁ ୪୫ଟିକୁ ଏହି କ୍ଷେତ୍ରର ଅଗ୍ରଣୀ କଂପାନିମାନଙ୍କ ନିକଟରେ ସେମାନଙ୍କ ଚିନ୍ତାଧାରା ଉପସ୍ଥାପନ କରିବାର ସୁଯୋଗ ଦିଆଯାଇଛି। ଏନଏଫଡିସି ଫିଲ୍ମ ବଜାର ଏହାର ଦିଗନ୍ତକୁ ବିସ୍ତାର କରି ଏକ ବିବିଧ ଅନ୍ତର୍ଜାତୀୟ ଦର୍ଶକଙ୍କୁ ସ୍ୱାଗତ କରିବା ସହ ଆନ୍ତଃ-ସାଂସ୍କୃତିକ ସହଯୋଗକୁ ପ୍ରୋତ୍ସାହିତ କରିଥିଲା । 'ଭିଏଫଏକ୍ସ ଆଣ୍ଡଟେକ୍ ପ୍ୟାଭିଲିୟନ୍' ଏବଂ ଏକ ଡକ୍ୟୁମେଣ୍ଟାରୀ ବିଭାଗର ପରିଚୟରେ ଅଭିନବତା ଏବଂ ଅଣ-କଳ୍ପନା କାହାଣୀ ପ୍ରଦର୍ଶିତ ହୋଇଥିଲା।

୨୦୨୩ ପାଇଁ ସତ୍ୟଜିତ ରାୟ ଲାଇଫ୍ ଟାଇମ୍ ଆଚିଭମେଣ୍ଟ ପୁରସ୍କାର ଗ୍ରହଣ କରିଥିବାରୁ କେନ୍ଦ୍ରମନ୍ତ୍ରୀ ଠାକୁର ଶ୍ରୀ ମାଇକେଲ୍ ଡଗ୍ଲାସଙ୍କୁ ଅଭିନନ୍ଦନ ଜଣାଇବା ସହ ଆଇଏଫ୍ଏଫ୍ଆଇରେ ଏହି ମୁହୂର୍ତ୍ତକୁ ସମସ୍ତଙ୍କ ପାଇଁ ସ୍ୱତନ୍ତ୍ର କରିବା ପାଇଁ ତାଙ୍କ ସହ ଯାଇଥିବାରୁ ଶ୍ରୀମତୀ କ୍ୟାଥରିନ ଜେଟା ଜୋନ୍ସଙ୍କୁ ଧନ୍ୟବାଦ ଜଣାଇଥିଲେ। ଗୋଲ୍ଡେନ୍ ପିକକ୍ ଆୱାର୍ଡ ଏବଂ ଆଇଏଫ୍ଏଫ୍ଆଇରେ ଶ୍ରେଷ୍ଠ ୱେବ୍ ସିରିଜ୍ (ଓଟିଟି) ପାଇଁ ପ୍ରଥମ ପୁରସ୍କାର ବିଜେତାଙ୍କୁ ସେ ଅଭିନନ୍ଦନ ଜଣାଇଛନ୍ତି।

ଶେଷରେ, ଉତ୍ସବକୁ ସଫଳ କରିବା ପାଇଁ ଜାତୀୟ ଚଳଚ୍ଚିତ୍ର ଉନ୍ନୟନ ନିଗମ (ଏନଏଫଡିସି) ଟିମ୍ ଏବଂ ମୁଖ୍ୟମନ୍ତ୍ରୀ ଡ. ପ୍ରମୋଦ ସାୱନ୍ତଙ୍କ ନେତୃତ୍ୱରେ ଗୋଆ ରାଜ୍ୟ ସରକାରଙ୍କ ଉତ୍ସର୍ଗୀକୃତ ପ୍ରୟାସ ପାଇଁ ମନ୍ତ୍ରୀ କୃତଜ୍ଞତା ଜ୍ଞାପନ କରିଥିଲେ । ଶେଷରେ ମନ୍ତ୍ରୀ ସମସ୍ତ ଚଳଚ୍ଚିତ୍ର ନିର୍ମାତା, ଅଭିନେତା ଏବଂ ନିର୍ମାତାଙ୍କୁ ଅଭିନନ୍ଦନ ଜଣାଇବା ସହ ଆଇଏଫଏଫଆଇ ବାହାରେ କାହାଣୀ ଭାବନା, ଏକତା ଏବଂ ସୃଜନଶୀଳତାକୁ ଆଗକୁ ବଢ଼ାଇବାକୁ ଅନୁରୋଧ କରିଥିଲେ।

BS