প্রধানমন্ত্রীগী লোইশঙ
প্রধান মন্ত্রীনা ভর্চুএল G20 লীদর্স সম্মিত (নবেম্বর 22, 2023) হৌদোকপদা থমখিবা ৱারোলগী মনিপুরী ৱাহন্থোক
Posted On:
22 NOV 2023 6:36PM by PIB Imphal
এক্সেলেন্সীশিং,
নমস্কার!
পুম্নমক্না ঐহাক্কী পাউজেলবু য়াদুনা সম্মিত অসিদা শরুক য়াবীবগীদমক্তা ঐহাক্না পুম্নমক্কী মফমদা তৌবীমল খঙবা উৎচরি। ভারত মচা করোর 140গী মাইকৈদগী ঐহাক্না পুম্নমকপু তরাম্না ওকচরি।
মরুপশিং,
ঐহাক্কী মরুপ, ইন্দোনেসিয়াগী রাস্ত্রপতি, জোকো ৱিদোদোনা মমাংগী চহিগী নবেম্বর 16দা হৌনবী মখা পোনবা গেবেল (ৱায়েল পীবদা শিজিন্নবা উনা শাবা নুংথং) পীরকখিবা পুঙফম অদু ঐহাক্না নীংশিংলি। মতমদুদা, ঐহাক্না G20বু ঐখোয় ময়াম পুমদুনা ইনক্লুসিব, ৱাহন্থোক য়াম্বা, থবক পাংথোকপদা মিৎয়েং চঙবা অমসুং ৱারেপ চেৎপা ওইহন্সি হায়খিবনি। হৌখিবা চহি অমসিদা, ঐখোয়না পান্দম অদু ফংমিন্নরে। ঐখোয়না G20বু অমত্তা ওইনা পুন্দুনা অনৌবা থাক্তা পুখৎলে।
শিংনবা অমসুং থাজনদবনা থল্লবা মালেমসিগী মনুংদা, ঐখোয়বু অমত্তা ওইনা পুন্দুনা থমগদবদি ঐখোয়গী মশেল মরক্তা থাজনবা লৈবনি, মসিনা ঐখোয়বু শম্নহল্লিবনি।
মসিগী চহি অমসিদা, ঐখোয়না “ৱান আর্থ, ৱান ফেমিলী, ৱান ফ্যুচর”দা থাজবা থমখি। অদুগা, ঐখোয়না ৱাথোক কয়া অমগী মাইয়োক্তা অমত্তা ওইনা লেপখি, তেংবাংনখি।
ঐখোয় পুম্নমক্না য়েৎনবা অমত্তা লৈতনা, দিল্লীদা, অফ্রিকাগী য়ুনিয়নবু G20দা তরাম্না ওকখিবগী পুঙফমদু ঐহাক্না কৈদৌনুংদা কাওবা ঙম্লোই।
G20না মালেম পুম্বদা পীরিবা পুম্নমকপু মনুং চলহনবা হায়বসিগী পাউজেল অসিদি মমাংদা অমুক্তা পাংথোকখিদ্রিবা থৌওংনি। ভারতকী প্রসিদেন্সী মনুংদা অফ্রিকানা ভোত অমা ফংখিবা হায়বসিদি ভারতকী ওইনা চাউথোকচনীংঙাইনি।
মসিগী চহি অমসিদা, মালেম পুম্বনা G20দা গ্লোবেল সাউথকী খোন্থাং তানখি।
মমাংগী চয়োলগী ভোইস ওফ গ্লোবেল সাউথ সম্মিত্তা, লৈবাক, চাউরাক্না, 130না নই দিল্লীগী G20 সম্মিত্তা লৌখিবা ৱারেপশিংবু থম্মোই শেংনা থাগৎনখি।
G20না মীওইবদা অহেনবা মিৎয়েং চঙবা থৌওং পাংথোকপবু অহেনবা মিৎয়েং চঙদুনা লাকখিবগা লোয়ননা ইন্নোভেসন অমসুং দিজিতেল তেক্নোলোজীবুসু শৌগৎলি। G20না মলতিলেতরিজমদা থাজবসু অমুক্কা হন্না পুরক্লে।
ঐখোয়না মলতিলেতরেল দিভেলপমেন্ত বেঙ্ক অমসুং গ্লোবেল গবর্নেন্স রিফোর্মশিংদা পুন্না মাইকৈ তাকমিন্নখ্রে।
পুম্নমক অসিগা লোয়ননা, ভারতকী প্রসিদেন্সী মনুংদা, G20বু চহি 20গী মখাদা লৈবা মীওইশিংনা শকখঙখি।
ভারত মচা করোর কয়ানা G20দা শরুক য়াখি অমসুং কুহ্মৈ অমগুম্না পাংথোকখি।
ইকায় খুম্ননীংঙাই ওইরবা অথোইবা মীওইশিং,
এক্সেলেন্সীশিং,
ঐহাক্না মসিগী ভর্চুএল সম্মিত অসিগী ৱাহৌদোক থমখিবা মতমদা ঙসি ওইরিবা মালেমগী ফিভম অসিমক ওইগনি হায়বদি করিমত্তা খঙলমদে। হন্দক্কী থা খরসিনা অনৌবা শিংনবা কয়া মাঙদা পুরক্লে। নোংচুপ এসিয়াগী লমদমদা তংদু লৈতাদবা অমসুং অশোয়-অঙাম্না থল্লিবা অসিগা ঐখোয় পুম্নমক্কা মরী লৈনৈ। ঐখোয়না ঙসি অমত্তা ওইনা পুল্লিবা অসিনা ঐখোয়না হীরমশিং অসি খঙই অমসুং ৱারোইশিন পুরক্নবা লেপমিন্নরি হায়বগী পাউদম অমনি।
ঐখোয়না পুম্নমক্না তেরোরিজম্বু কৈদৌনুংদা য়াবা ঙম্লোই হায়বা ঐখোয় পুম্নমক্না থাজৈ।
মফম অমদা হেক্তা ওইরো, মীচম শিবা হায়বসিগী মাইয়োক্তা য়ানীংদবা ফোংদোক্কদবনি।
ঙসি লানফা খরা থাদোক্কনি হায়বগী পাউ অসি ঐখোয়না তরাম্না ওক্লি, অমসুং লানফা খুদিংমক অথুবা মতমদা থাদোকপীরক্কনি হায়না ঐখোয়না থাজবা থম্লি। হ্যুমেনিতরিয়ন এইদ মতম চানা অমসুং লেপ্তনা য়ৌহনবা হায়বসি খ্বাইদগী মরু ওইবনি। ইজরেল অমসুং হমাসকী মরক্তা থোক্লিবা ইরাংনা ধর্মা অমা হেক্তগী শক্তম লৌহন্দনবা হোৎনবা হায়বসিসু য়াম্না মরু ওইরি।
ইরাং কয়া অমা ঙসি ঐখোয়না ইমুং অমা ওইনা উরি, শান্তিগীদমক্তা মাইকৈদা চঙশিনবগী পাঙ্গলসু ঐখোয়দা লৈ।
মীওইবা খুন্নাইগী য়াইফ য়ুম্বালগী মিৎয়েংদগী য়েংলুরগসু, ঐখোয়না মীওইবা খুন্নাইগীদমক্তা, অকি-অখঙ অমসুং মীহাৎ-মীপুনগী মাইয়োক্তা ঐখোয়না খোল্লাও লাওবা ঙম্মি।
ঙসিদি, ভারতনা মালেম অমসুং মীওইবা খুন্নাইনা থম্লিবা থাজবা অসিমক পাংথোকপা ঙম্নবা লেংগা-লেংগা চৎমিন্ননবা শেম শারে।
মরুপশিং,
21শুবা চহি-চাগী মালেম অসিনা গ্লোবেল সাউথনা তুংলমচত্তা চঙশিনবা পাম্লিবা অসিদা অহেনবা প্রাইওরিতী পীবা তাবনি।
গ্লোবেল সাউথকী লৈবাকশিংনা মখোয়গা মরী লৈনদবা থৌদোক কয়ানা থোকহনবা অৱাবা অমসুং শিংনবা কয়া মাইয়োক্নরি।
হীরম অসিগী মতাংদা, হৌজিক মতমগী খ্বাইদগী তঙাই ফদবদি চাউখৎ থৌরাংগী এজেন্দাদা ঐখোয় পুম্নমক্না শৌগৎপনি।
মালেমগী শেন্মিৎলোন অমসুং লৈঙাকপগী মওং-মতৌশিংবু চাউথোকহন্নবা, ফগৎহন্নবা, মথৌ নীংথিনা পাংথোকপা হেনগৎহন্নবা, মীহুৎ শিনবা ঙমহন্নবা অমসুং তুংগী মতমগীদমক্তা শেম শাদুনা লৈহন্নবগীদমক্তা শেমদোকপা হায়বসি য়াম্না মরু ওইরি।
মতেংগী তঙাই ফদবা লৈবাকশিংদা মতম চানা অমসুং শেল চঙদনা তেংবাংবা ঙম্নবগীদমক্তা 2030 সস্তেনেবল দিভেলপমেন্ত গোল খোঙজেল য়াঙনা ফংবা ঙমহন্নবা য়াৎখিবা এক্সন প্লান অদুবু থবক ওইনা পাংথোকপা তাবনি।
মরুপশিং,
ঐখোয়গী এস্পিরেস্নেল দিস্ত্রিক্ত প্রোগ্রাম্না SDGনা লোকেলগী থাক্তা ভারত্তা খুমাং চাউশিনবগী মশক নাইবা খুদম অমা ওইরি। ঐহাক্না G20 লৈবাকশিং অমসুং গ্লোবেল সাউথনা এস্পিরেস্নেল দিস্ত্রিক্ত প্রোগ্রাম অসিবু য়েংবীনবা অমসুং ভারত মচা করোর 25গী পুন্সিদা মসিনা পীরিবা শাফুবু য়েংবীয়ু হায়না পাউজেল পীজরি।
মরুপশিং,
নই দিল্লী সম্মিত্তা দিজিতেল পব্লিক ইনফ্রাস্ত্রকচর রিপোজিতরী অমা শেম্বগী ৱারেপ লৌখি অমসুং হায়রিবা অসি লোইরে হায়না লাউথোকচবদা ঐহাক্না নুংঙাইবা ফাওজরি। লৈবাক 16গী DPI 50 হেনববু রিপোজিতরী অসিগী শরুক ওইহনখ্রে। গ্লোবেল সাউথ লৈবাকশিংদা DPI চৎনহন্নবা তেংবাংনবগীদমক্তা, ঐহাক্না সোসিএল ইম্পেক ফন্দ অমা শেম্বগী ৱাহৌদোক থমজরি। ঐহাক্না ভারতকী মহুৎ শিন্দুনা, ফন্দ অসিদা মিলিয়ন দোল্লর 25কী অহানবা তেংবাং অমা পীজরে হায়না ঐহাক্না লাউথোকচরি অমসুং খোঙথাং অসিদা অদোমসু শরুক য়ারক্কনি হায়বগী থাজবা থমজরি।
আর্তিফিসিএল ইন্তেল্লিজেন্সকী য়ুগ অসিদা, তেক্নোলোজীবু থৌদাং খঙনা শিজিন্নবগী মথৌ তাই। AIবু অরানবা মওংদা শিজিন্নরকপা অসিগী মতাংদা মালেমদা খন্থনবগী মতৌ অমা লৈরক্লি।
AIগী গ্লোবেল রেগ্যুলেসনগীদমক্তা ঐখোয়না পুন্না হোৎনমিন্নগদবনি হায়না ভারতনা খল্লি।
ঐখোয়না দীপফেক অসিনা খুন্নাই অমসুং মীওই অমদা খুদোংথীবা কয়া য়াম্না থোকহনবা ঙম্বগে খঙদুনা ঐখোয়না তুংলমচত্তা চঙশিনবা তাবনি।
AIনা মীপুম খুদিংদা য়ৌবা হায়বসি ঐখোয়সু পাম্মি, অদুবু, মদুনা খুন্নাইগী তেক্ত-কায়দবা মওংদদি ওইবা তাবনি।
মসিগুম্বা ৱাখল্লোন অসিগা লোয়ননা, ভারত্তা গ্লোবেল AI পার্ত্নরশিপ সম্মিত অমা মথংগী থাদা শীন-লাঙলি।
অদোম পুম্নমক্না মসিদা শরুক শোইদনা য়াগনি হায়না ঐহাক্না থাজৈ।
মরুপশিং,
নই দিল্লী সম্মিত্তা ঐহাক্না অকোয়বগী শক্তম ঙাক শেনবগী মতাংদা গ্রীন ক্রেদিত পীবগী ৱাফম থমখি।
ঐখোয়না মসি ভারত্তা হৌরে হায়বা অদোমসু খঙলমগনি। নই দিল্লীদা হৌদোকখিবা গ্লোবেল বাইওফুএল এল্লাইএন্সকী খুত্থাংদা, ঐখোয়না কার্বন হন্থহনবগা লোয়ননা মহুত শিনবা য়াবা অতোপ্পা ফুএল শেমগৎপবুসু খুমাং চাউশিনহল্লি।
G20না প্রো-প্লানেত এপ্রোচ অমগীদমক্তা ওইরিবা মিসন LiFE, হায়বদি, লাইফস্তাইল ফোর ইনভাইরনমেন্ত অসিবু শকখঙলে; ইং 2030 ফাওবদা রিন্যুএবল ইনর্জী শিজিন্নবগী চাংদা শরুক অহুম হেনগৎহল্লসি হায়খ্রে; ক্লীন হাইদ্রোজেনগীদমক্তা খোঙফম চেৎলে উৎখ্রে; ক্লাইমেত ফাইনান্সপু বিলিয়ন্দগী ত্রিলিয়ন্দা পুবগী তঙাই ফদববু শকখঙখ্রে।
নুমিৎ খরনিগী মতুংদা, UAEদা পাংথোক্কদৌরিবা COP-28কী মনুংদা, হায়রিবা খোঙথাংশিং অসিগী মতাংদা মশক থোকপা থবকশিং পায়খৎফম থোকই।
মরুপশিং,
নুপীশিংবু পাঙ্গল হাপ্নবা অনৌবা ৱর্কিং গ্রুপ অমসু শেমখ্রে।
হীরম অসিগা মরী লৈননা, ভারতনা মশাগী অনৌবা পার্লিয়ামেন্ত হাউসকী অহানবা সেসন্দা পুৱারী ওইরবা ৱারেপ অমা লৌখ্রে পাউদম্বদা ঐহাক্না নুংঙাইবা ফাওজরি।
নুপীশিংনা লুচিংদুনা চাউখৎ-থৌরাং পুরকপগী থৌওংবু মপাঙ্গল হাপ্নবগীদমক্তা, ঐখোয়না পার্লিয়ামেন্ত অমসুং স্তেত লেজিস্লেতিব এসেমব্লীদা নুপীশিংগী চাদা 33%গী ফম খাকপা হায়বা ৱারেপ অমা লৌখ্রে।
মরুপশিং,
ঐহাক্না ঐহাক্কী ৱারোল মতাংসিদা লোইশিঞ্জগে।
***
(Release ID: 1979287)
Visitor Counter : 86
Read this release in:
Kannada
,
English
,
Odia
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Tamil
,
Telugu
,
Malayalam