চহি 60 শুরবী শ্রীমতি লাইবী ফাঞ্জৌবম্না অৱাং নোংপোক্কী রাজ্য মনিপুরগী অন্দ্রো কৌবা মনুং হঞ্জিনবা খুঙ্গং অমদা ফিশা লোন্সাগী দুকান অমা ফমজৈ। চুম্না য়েংবা মতমদদি, মসিদি য়াম্না চম্বা ৱারি অমা ওইনা উগনি। অদুবু, শ্রীমতি লাইবী ফাঞ্জৌবম অসিদি অরায়বা নুপী নত্তে। মহাক্না নুপানা মহেল্লে খনবা, শেন্মিতলোনগী অৱাবা, অমসুং মহাক্কী লিরবা খুঙ্গংগী মতমগা চুনদবা থাজনবীগী মাইয়োক্তা লেপ্তুনা নুপী ঙাক্তগী ফুতবোল ক্লব অমা চলায়রি।

পাউ-চে অমদা য়াওখিবা মহাক্কী অনৌবা থৌওং পাংথোকপগী ৱারি অমনা নেস্নেল এৱার্দ ফংলবা দাইরেক্তর মীনা লোংজমগী পুক্নিং চীংশিনখি, অদুগা ঙসিদি, মহাক্না ৱারি অসিবু অন্দ্রো দ্রীম্স হায়না মিংথোন্দুনা সিলভর স্ক্রীন্দা পুরক্লে। দোক্যুমেন্তরী অসিদি ইথিলনা থল্লবা অহল ওইরবী নুপী, লাইবী অমসুং মহাক্কী দিকেদ অহুম চলায়রক্লবা নুপী ঙাক্তগী ফুতবোল ক্লব, অন্দ্রো মহিলা মন্দল এসোসিএসন ফুতবোল ক্লব (AMMA-FC)কী ৱারিনি। মসিনা মখোয়গী খ্বাইদগী মশক নাইবা অমসুং মীয়াম্না শকখঙনরবা নির্মলাগা লোয়ননা মখোয়না থেংনখিবা অৱা-অনা কয়াবু মীয়ামদা উৎলি।

মনিপুরী ফিল্ম, অন্দ্রো দ্রীম্স, মিনিত 63 শাংবা সিনেমাগী খুত্থাংদা লিবা ৱারি, অসিনা 54শুবা IFFIদা ইন্দিয়ন পেনোরামাগী নন-ফীচর ফিল্ম সেক্সন হৌদোক্লি। অনৌবা মতৌ অমসুং চাংয়েংগী মতৌ চেনবা দোক্যুমেন্তরী অসিবু নুপী দাইরেক্তর, প্রদ্যুসর অমসুং কাস্তকী ত্রিনিতী অমনা লুচিংলি।

লাইবী ফাঞ্জৌবমগী ইথিল পীনিংঙাই ওইরবা ৱারিগী মতাংদা ৱা ঙাঙবদা, দাইরেক্তর মীনা লোংজম্না মহাক অসিদি মহাক্কী ইমুংগী মরিশুবা মচানুপীনি অমসুং মহাক্কী ইমুংনা মহাকপু অয়াম্বা মতমদা মীরায়বী হায়খি। অদুবু, শিংনবা কয়া মাইয়োক্নদুনা, মহাক্না মহাক্কী খুঙ্গংদা মেত্রিক্যুলেত দিগ্রী লোইশিনবা খ্বাইদগী অহানবা নুপী ওইখি অমসুং প্রাইমারী স্কুলগী ওজা অমা ওইখি। মহাক্না ফিশা লোন্সাগী দুকান অমসু মহাক্কী খুঙ্গংদা হাংদোক্লে।

ফিল্ম অসিগী মরু ওইবা শক্তম ওইরিবী লাইবী ফাঞ্জৌবম্না দোক্যুমেন্তরী অসি নম্বসিদা য়াম্না নুংঙাইবা ফাওই হায়না ফোংদোকখি। মুভী অসিনা মহাক্কী হোৎনজমন অমসুং অৱাবা কয়া মাইয়োক্নরকপশিং উৎলি, অমসুং পুম্নমকশিং অসিবু ইকায় খুম্নবা ওইনা মালেমগী মফমদা লান্থোক্লি।

“মসিদি মীদিয়াদা কয়া উত্তবা অমসুং মীয়াম্না খঙনদবা ঐখোয়গী মীয়ামগী ৱারিনি”, গোৱাগী 54শুবা ইন্তর্নেস্নেল ফিল্ম ফেস্তিবেল ওফ ইন্দিয়াদা PIBনা শীনবা মীদিয়াগা ৱারি শাবগী থৌরমদা মীনা লোংজম্না হায়খি। মহাক্কী ‘শোইদুনা ওইখিবা’ দাইরেক্তোরিএল খোঙথাং অসিদি মপুং ওইবা মীদিয়ানা নাথৈবীরবা মনিপুরগী মীয়ামগী পুন্সি উৎনবা হোৎনবগী থৌওংনি হায়না মহাক্না মখা তাখি। “অন্দ্রো দ্রীম্সনা লাইবীগী অশেংবা পুন্সি, মহাক্কী ফুতবোল ক্লবকী নুপীমচাশিংনা শিংনবা খুদিংমক্কা মাইয়োক্নবগী থৌওংশিং উৎলি”, দাইরেক্তরনা মহাক্কী থৱাই তাজরবা প্রোজেক্তকী মতাংদা পাউদমখি।

ফিল্ম নম্বগী দোক্যুমেন্তরী জোনর খল্লদুনা, লোংজম্না কুপ্না পাউদমখিবদা, “দোক্যুমেন্তরী নম্বা হায়বসিদা সবজেক্ত অদুগা মতম শাংনা মরী শাগৎপগী মথৌ তাই অমসুং মসিদি ৱান-ওফ প্রোজেক্ত ওইবসু য়াদে” হায়খি। মীনা লোংজম অসি মীয়াম্না শকখঙনরক্কদবী মীওই অমনি, মসিগী মরমদি, মহাক্না মহাক্কী অতোপ্পা ফিল্ম “ওতো দ্রাইভর”গীদমক্তা নেস্নেল এৱার্দ ফংবী অহানবা মনিপুরী নুপী ওইরবনি।

“নুপী হায়বসিদি মীয়াম্না খঙনদবা খুন্নাই অমগী য়ুম্বীনি অমসুং ঐহাক্না মখোয়বু মীয়াম মাঙদা য়ারিবমখৈ পুরকপা অমসুং তঙাই ফদবা খুদোংচাবা খুদিংমক পীবা পাম্মি। ঐহাক্না স্কিলদি লৈজবা অদুবু শেলদি লৈজদবা অফবা তেলেন্তশিংবু পুক্নিং থৌগৎপা, ইথিল পীবা অমসুং শৌগৎপা পাম্মি”, অন্দ্রো দ্রীম্সকী একজেক্যুতিব প্রদ্যুসর জানী বিশ্বানাথনা মসিগুম্বা ফিল্ম থীবদা করিনা ইথিল পীবগে হায়বগী মতাংদা পাউদমখি।

ফিল্ম পামজবশিংদা ফজবা সিনেমাগী নুংঙাইবা পীরিবা IFFIগী ইন্দিয়ন পেনোরামা সেক্সন অসি ফীচর সেক্সন্দা মলায়ালম ফিল্ম, আত্তম অমসুং নন-ফীচর ফিল্ম সেক্সন্দা মনিপুরী ফিল্ম, অন্দ্রো দ্রীম্সকা লোয়ননা ঙরাং হৌদোকখি। নবেম্বর 20-28, 2023দা পাংথোক্কদৌরিবা 54শুবা IFFI অসিদা হন্দক্কী চহিগী ওইনা ফীচর ফিল্ম 25 অমসুং নন-ফীচর ফিল্ম 20 উৎকনি। 

ইন্দিয়ন পেনোরামা অসি সিনেমাগী আর্তকী খুত্থাংদা ভারতকী ফিল্মগা লোয়ননা ভারতকী ফজরবা চৎনবী অমসুং হেরিতেজপু মীয়ামদা শকখঙহন্নবা IFFIগী অপুনবা পথাপকী শরুক অমা ওইনা ইং 1978তা হৌদোকখিবনি। ইন্দিয়ন পেনোরামা অসি হেক হৌদোকখিবদগী, মসিনা চহি অমগী ভারতকী খ্বাইদগী ফজবা ফিল্ম উৎনবা থৱাই য়াওনা হোৎনদুনা লাক্লি।

ৱারি ৱাতাই শাবগী থৌরম, মসিদা য়েংবীয়ু: https://www.youtube.com/watch?v=l_l_hm3kQz0

***