गोंय/मुंबई, 23 नोव्‍हेंबर 2023

54वो भारतीय आंतरराष्ट्रीय चित्रपट महोत्सव फाल्यां अर्द्या वाटेर पावता, ते निमतान नुरी बिल्गे सिलान दिग्दर्शीत मनभुलोवपी ‘अबाउट ड्राय ग्रासेस’ हो तुर्की सिनेमा मिड फेस्ट फिल्म म्हूण प्रदर्शित करतले. आकर्शक कथानक आनी अपवादात्मक अभिनयाखातीर नामना मेळिल्ल्या ह्या चित्रपटाक, आंतरराष्ट्रीय पांवड्यार पुरस्कार मेळ्ळा. हे फिल्माक हल्लीच कान्स फिल्म फेस्टिवल 2023 चो उत्कृश्ट अभिनेत्रीचो पुरस्कार फावो जाला.

‘अबाउट ड्राय ग्रासेस’ फिल्मान संवसारभरांतल्या प्रतिश्ठीत चित्रपट महोत्सवांनी खासा सुवात मेळयल्या. तातूंत कान्स चित्रपट महोत्सव 2023, टोरोंटो आंतरराष्ट्रीय चित्रपट महोत्सव 2023, कार्लोवी वेरी आंतरराष्ट्रीय चित्रपट महोत्सव 2023, बुसान आंतरराष्ट्रीय चित्रपट महोत्सव 2023, आनी साओ पावलो आंतरराष्ट्रीय चित्रपट महोत्सव 2023 हांचो आस्पाव जाता. फिल्माचें आकर्शक कथानक संवसारीक प्रेक्षकांमदीं प्रतिध्वनीत जावन, सिनेमाच्या मळार हे एक बेसबरे  फिल्म थारला.

फाल्यां (24.11.2023) सांजे 5:30 वरांचेर पणजेंतल्या आयनॉक्स स्क्रीन 1नात ‘अबाउट ड्राय ग्रासेस’ दाखयतले. चित्रपट प्रदर्शना वेळार ह्या सिनेमाच्या कलाकारांक भौमानित करतले.

फिल्माच्या काणयेची  एक झलक

सक्तीचें कर्तव्य पुराय करून, ल्हान गांवच्या मर्यादेंतल्यान सुटका मेळोवपाच्या एका तरणाट्या शिक्षकाच्या आकांक्षां भोंवतणी हो चित्रपट घुंवता. उदास जिवितात निराशेक तोंड दितना, फिल्मातल्या नायकाचो दृष्टिकोन एक आदार दिवपी सहकारी, नुरेच्या आदारान अनपेक्षीत वळण घेता, आनी बदलता. 

दिग्दर्शक नुरी बिल्गे सिलान

इस्तांबुलांत 1959 वर्सा जल्मल्ले नुरी बिल्गे सिलान हाणी चित्रपट निर्मितींत एक नामनेचे व्यक्ती म्हूण नामना जोडल्यात. ताच्या प्रवासाची सुरवात 1995 वर्सा, 'कोझा' ह्या लघुपटांन फेस्टिवल दे कन्सात सर्त करून जाल्ली. तांच्या बेसबऱ्या कामगिरीत १९९८ वर्सा बर्लिन फिल्म फेस्टिवलांत 'कासाबा' खातीर कॅलिगरी इनाम आनी 2003 वर्सा कन्स हांगा 'उझाक' (डिस्टंट) खातीर ग्रँड प्रिक्स आनी उत्कृष्ट अभिनेते ह्या इनामाचो आस्पाव आसा. ताच्या 'विंटर स्लीप' ह्या चित्रपटाक 2014 वर्सा 67व्या कान्स फिल्म फेस्टिवलांत, पाम डी'ऑर पुरस्कार फावो जालो. 'अबाउट ड्राय ग्रासेस' सयत सिलानाच्या 6 सिनेमांक बेसबऱ्या आंतरराष्ट्रीय फिचर फिल्म अकादेमी पुरस्कारा खातीर, तुर्कस्तानातली नामांकना म्हणून सादर केल्ले.

अदिक तपशीलां खातीर: https://iffigoa.org/best-of-iffi-midfest-film-2023/en

* * *

PIB Mumbai | S.Jan/M.Prabhugaonkar/D.Rane

सोशल मिडियावर आम्हाला फॉलो करा:@PIBPanaji    /PIBPanaji    /pib_goa   pibgoa[at]gmail[dot]com  /PIBGoa