0 5

गोंय/मुंबई, 21 नोव्‍हेंबर 2023

भारत सरकार रोजगार निर्माण करपाक, अर्थवेवस्थेक चालना दिवपाक, उत्कृश्ट कलाकारांक मार्गदर्शन करपाक आनी तरणाट्यांक चित्रपट मळार उत्कृश्टताय मेळोवपाक प्रोत्साहन दिवपाक बांदील आसा, अशें केंद्रीय म्हायती आनी प्रसारण, युवा वेव्हार आनी खेळ मंत्री, श्री अनुराग सिंग ठाकुर हांणी ' ‘75 क्रिएटिव्ह माइंड्स ऑफ टुमॉरो’(सीएमओटी) उपक्रमाच्या विजेत्यां खातीर '48 वरां फिल्म मेकिंग चॅलेंज’ सुरु करतना सांगले. उत्साही व्यक्तींचो घटमूट सृजनशील पंगड घडोवपाक ‘ क्रिएटिव्ह माइंड्स ऑफ टुमॉरो’ च्या भुमिकेची तोखणाय करून मंत्री ठाकूर हाणी, खर जूरी प्रक्रियेंतल्यान वेंचून काडिल्ल्या पयल्या 75 भाग घेवप्यांक परबीं दिली.

देशाच्या पयसुल्ल्या कोनशां कोनशांतल्या तरणाट्या मनांक प्रोत्साहन आनी मार्गदर्शन दिवपाच्या सरकाराच्या यत्नांचो, सीएमओटी हो एक भाग, अशें मंत्री ठाकूर  हांणी मुखार सांगलें. "अंदूंचे '75 क्रिएटिव्ह माइंड्स ऑफ टुमॉरो'चे प्रतिनिधी भारताच्या 19 वेगवेगळी राज्यां आनी केंद्रशासित प्रदेशांतल्यान आयल्यात. तातूंत बिष्णुपूर (मणिपूर), जगतसिंहपूर (ओडिशा), आनी सरदारपूर (मध्य प्रदेश) ह्या सारक्या सुवातींचो आस्पाव आसा. मिडिया आनी मनरिजवणेच्या मळार तांकां अतुलनीय संदी उपलब्ध करून दिवपाचो हेत आसा." अशें तांणी सांगलें.

श्री. ठाकुर हांणी फाटल्या वर्सा सीएमओटींत वांटो घेतिल्ल्या तमिळनाडूच्या एका इत्सुक तरणाट्याविशी सांगले. "सुरवेक तिचे आवय-बापूय तिका गोंयांत धाडपाक तयार नाशिल्ले. सीएमओटींची निवड प्रक्रिया आनी हांगा मेळपी अविश्वसनीय संदी समजून घेतले उपरांत, तिचे आवय-बापूय तिका तिच्या सपनांच्या फाटोफाट वचपाक परवानगी दिवपाक तयार जाले. ही चली आनी तिच्या पंगडान फाटल्या वर्सा 53 वरांचें चॅलेंज जिखून 2,25,000 रुपया रोख इनाम मेळयलें. इनाम फावो जाल्ली 'डियर डायरी' ह्या सिनेमांत फुडाराक बायलांची सुरक्षीतताय कशी सामान्य गजल आसतली, हाचेर भर दिल्लो. ह्या सारकिल्यो यशस्वी कथां ह्या मंचाक जाय आसता," अशेंय तांणी सांगलें.

मंत्री ठाकूर हांणी सीएमओटीच्या आदल्या आवृत्त्यांनी जाल्ल्या कामांविशी आनी तातूंत सहभागी जाल्ल्यांच्या कारकिर्दीचेर, ह्या उपक्रमाच्या परिणामाविशी म्हायती दिली. तांणी केल्ल्या उल्लेखांत सुबरना दाश हांचो आस्पाव जाता, जाच्या एनिमेटेड फिल्मान टोरोंटो आंतरराष्ट्रीय चित्रपट महोत्सवांत, 2023 वर्सा वांटो घेतलो आनी भास्कर विश्वनाथन आनी दिगंत्र बोस सारकिले तरणाटे, जाणी ह्या वर्सा  इफ्फीत भारतीय पॅनोरमांतल्या चित्रपटांचें सहसंपादन आनी संपादन केला.

चित्रपट निर्मिती म्हळ्यार फकत कन्टेंट तयार करप न्हय, तर ते मार्केटिंग आनी ते प्रेक्षकां मेरेन वितरीत करप, हाचो लेगीत तातूंत आस्पाव जाता. आमच्या तरणाट्या आनी उद्देगा मदीं नेटवर्किंग आनी सहकार्याक प्रोत्साहन दिवपाक आनी तांका सक्षम करपाक, अंदूं इफ्फी टॅलेंट कॅम्प घडोवन हाडटा. जंय 75 क्रिएटिव्ह माइंड्साक जायत्या नामनेच्या निर्मिती, स्टुडिओ आनी ओटीटी प्लॅटफॉर्म, प्रतिनिधींक मेळपाक, संवाद सादपाक आनी एकठांय येवपाक मेळटले, अशी म्हायती मंत्री ठाकूर हाणी दिली. 

सरकारान स्टार्टअपांक दिल्ल्या आदाराचेर लक्ष केंद्रीत करून, मंत्री ठाकूर हाणी सांगलें, की नव्या स्टार्टअप धोरणाक लागून, भारत देशांत लाखां परस चड स्टार्टअप सुरु जाल्यात आनी भारत देश संवसारांतली तिसरी व्हडली स्टार्टअप प्रणाली म्हणून मुखार आयल्या. “दर दिसा एक नवो स्टार्टअप येता. कोविड 19 महामारीच्या काळांत, व्हड कंपनीं लेगीत फाटी आसली, तेन्ना भारतांतल्या पन्नास स्टार्टअपांक युनिकॉर्नाच्या पांवड्यार उंच व्हेलो आनी भारतीय तरणाट्यांची शक्त दाखयली, अशें तांणी निमाणें सांगलें. '75 क्रिएटिव्ह माइंड्स ऑफ टुमॉरो'च्या प्रतिनिधींक मंत्री ठाकूर हांणी प्रमाणपत्रां भेटयलीं.

ह्या कार्यावळीत शॉर्ट्स टीव्हीचे, सीईओ आनी संस्थापक, कार्टर पिलचर, युरोपीय चित्रपट मार्केटचे संचालक, डेनिस रुह, द आर्चीजचे कार्यकारी निर्माते, जॉन गोल्डवॉटर, म्हायती आनी वितरवणी मंत्रालय, अतिरिक्त सचीव, नीरजा सेखर आनी संयुक्त सचीव (फिल्म), म्हायती आनी प्रसारण मंत्रालय आनी वेवस्थापकीय संचालक, एनएफडीसी, पृथुल कुमार हाजीर आशिल्ले. शॉर्ट्स टीव्हीच्या सहकार्यान सीएमओटीचो एक भाग म्हूण नॅशनल फिल्म डेव्हलपमेंट कॉर्पोरेशनान '48 अवर चॅलेंज' घडोवन हाडलां.

फिल्म चॅलेंजाचो एक भाग म्हूण, 75 सीएमओटी भाग घेवप्यांक पांच पंगडांनी विभागले, जे 48 वरां भितर ‘मिशन लायफ’ ह्या विशयाचेर लघुपट तयार करतले. फिल्म महोत्सवात सीएमओटीत भाग घेवपी प्रतिनिधी संवसारीक सिनेमाच्या मास्टरांनी क्युरेट केल्ल्या कार्यशाळा आनी मास्टरक्लास सत्रांकय हाजीर रावपाचे आसात.

* * *

PIB Mumbai | S.Jan/M.Prabhugaonkar/D.Rane

सोशल मिडियावर आम्हाला फॉलो करा:@PIBPanaji    /PIBPanaji    /pib_goa   pibgoa[at]gmail[dot]com  /PIBGoa