Ka Tnat Kam Jngoh kai, Sorkar India kan pynlong ia ka bynta ba 11 jong ka International Tourism Mart ha nongbah Shillong, Meghalaya naduh ka 21 haduh 23 tarik Naiwieng 2023. Ka International Tourism Mart kadei ka prokram kaba ju pynlong shisien shi snem da ka Tnat ha kawei na ki jylla ka thain shatei lammihngi da ka pali, da ka jing thmu ban plie ka rynsan ia ki briew ka thain shatei lammihngi kiba don bynta ha kane ka kam ban iamir jingmut bad kito kiba don bynta ha kane ka kam na ka ri bad nabar ri ruh kumjuh ban ai jingtip shaphang ki lad ba iadei bad ki kam jngoh kai ba don ha ka thain shatei lammihngi bad ban pyni ia ki tiar ba kyrpang kiba iadei bad ki kam jngoh kai, ka jingriewspah ha ki jingdon jingem, ka deiriti ba kyrpang kynthup ki dustur tynrai, ki jingshad tynrai, ki jingsaindur, ki kam shna tiar bad thain jain sha ki briew jong ka ri bad shabar ri ruh kumjuh.

Ka International Mart kan long ruh ka prokram kaba kham kyrpang, namar ba la saindur ia ka kum ka prokram ka bym pynmih jaboh da kaba pdiang ia ki lad pynduna carbon ha kaba iadei bad ki rukom treikam ba la wanrah da ka Tnat Environment, Forest and Climate Change, Sorkar India na ka bynta ka jingpyntreikam ia ka Mission LiFE bad ai jinghikai ia kito kiba don bynta ha ka kam bad ka jingai jingtip shaphang ki thong jong ka. Kan nym don ka jingpyndonkam ia ki pla plastic, ki rukom treikam da ki lad digital kumjuh ruh kan don ka prokram thung dieng.

Ia kane ka prokram yn plie da u Myntri Sorkar Pdeng ba dei khmih ia ka Tnat kam jngoh kai, Deiriti bad DoNER, u G. Kishan Reddy bad yn iadonlang ruh ki Myntri ka thain shatei lammihngi kiba dei khmih ia ka Tnat kam Jngoh kai, ki heh ophisar jong ki jylla ka thain shatei lammihngi, ki sorkar jylla bad ki heh duh jong ki Tourism & Hospitality Association. Ia ki bynta ba ladep jong kane ka Mart la pynlong ha Guwahati, Tawang, Shillong, Gangtok, Agartala, Imphal, Kohima bad Aizwal. Ka nongbah Shillong kan pynlong ia kane ka prokram ha ka sien kaba ar, naduh ba la sdang ia ka. Kin don kumba 100 ngut ki delegate ba kynthup napoh ri bad nabar ri ki ban iashim bynta ha kane ka prokram.

Ha kane ka prokram yn don ruh ka jingialang iamir jingmut na ka bynta ka kam khaii pateng hapdeng kito kiba iadon bynta na ka thain shatei lammihngi bad ki nongthied tiar na kiwei kiwei ki bynta jong ka ri bad nabar ri. Ki phra tylli ki jylla ka thain shatei lammihngi kin ai jingtip shaphang ki jaka jngoh kai ba thymmai jong ki kumjuh ruh ki kabu ba thymmai ba don ha ki jylla jong ki. Ha ki jingialang bad ki riewshemphang na ka Sorkar bad na ki kam shimet, yn don ka jingiakren shaphang ka jingkiew ki lad ka leit ka wan bad ka roi ka par ha kane ka thain. Ki lad ka leit ka wan lyngba ki liengsuin ki la kiew bha ha ka thain shatei lammihngi ha kine ki khyndiat snem ba la leit. Mynta, ki don palat 16 tylli ki kad liengsuin kiba la plie lad sha ki jaka jngoh kai ha ka thain shatei lammihngi. Ka Tnat Kam jngoh kai ka la iatreilang bad ka Tnat Civil Aviation hapoh ka skhim RCS-UDAN jong ki. Kum shi bynta kane ka jingiatreilang, la pyntreikam 53 tylli ki jingleit sha ki jaka jngoh kai ha kaba 10 tylli ki long ha ka thain shatei lammihngi. Ki 3 tylli ki rel vistadome ba la pyntreikam ha ka thain shatei lammihngi ki la nohsynniang shikatdei ym tang ha ka lad ka leit ka wan hynrei ki dei ruh ka jingkyntiew ia ka jingkhring ki kam jngoh kai.

Shuh shuh, khnang ban rah shakhmat ia ka Travel for LiFE, ka prokram ba la sdang da ka Tnat Kam jngoh kai, hapoh ka Mission LiFE, ka Tnat ka iatreilang bad baroh kito kiba don bynta ha ki kam jngoh kai, kynthup ki sorkar jylla, ki kompani, ki jaka jngoh kai bad ki nongjngoh kai. Ka prokram Travel for LiFE kadei kaba la saindur ban kyntiew ia ka India kum ka nongialam ha ka jingkyntiew ia ki kam jngoh kai kiba iaineh bad kiba don jingbahkhlieh bad ka jingpyndonkam ia ki kam jngoh kai ban pynurlong ia ki thong Sustainable Development Goal shuwa u snem 2030. Kane ka Mart ka bat ruh ia ki rukom treikam ba la saindur da ka MoEF kiba iadei bad ka jingpynlong ia ki jingialang ha ka ri bad nabar ri.

Ka jingkyntiew ia ki jingdon jingem ha ki kam jngoh kai bad ka jingkyntiew ia ka kam jngoh kai ha ka thain shatei lammihngi

Ka jingkyntiew ia ki jingdon jingem ha ki kam jngoh kai bad ka jingkyntiew ia ka kam jngoh kai ha ka thain shatei lammihngi ka long kawei na ki kam ba kongsan jong ka tnat Kam Jngoh kai. La dep sanction khathynriew tylli ki projek ha ki jylla ka thain shatei lammihngi hapoh ka skhim Swadesh Darshan ha ka jinglut kaba kot T.1309.00 klur. La shim ia 15 tylli ki jaka jngoh kai ha ka thain shatei lammihngi na ka bynta ka jingkyntiew ia ki hapoh ka skhim Swadesh Darshan 2.0 ba la pynkylla da ka jing thmu ban kyntiew ia ki jaka jngoh kai kiba iaineh bad kiba don jingbahkhlieh da kaba peit shuwa ia ka bha ka miat jong ki nongjngoh kai. Shuh shuh, ka tnat Kam Jngoh Kai hapoh ka skhim PRASHAD ka la sanction 8 tylli ki projek ha ka jinglut kaba kot sha ka T.256.45 klur na ka bynta ka jingkyntiew ia ki jaka leit pilkrim ha ki jylla ka thain shatei lammihngi. Ka tnat Kam Jngoh Kai ka la sanction ruh ia ka jingkyntiew ia 22 tylli ki jaka peit kai ha ka jinglut kaba T.44.44 klur ban pynbiang ia ki jingdon jingem katkum ka juk mynta bad ki jingai jingshakri na ka bynta ki jaka surok bah kiba kynthup ia ki jaka die jingdie, ki logictic park, ki jingdonkam jong ki nongleit nongwan harud ki surok ha ka thain shatei lammihngi. Bun na kine ki projek ba la sanction hapoh ka skhim SD 1.0 bad PRASHAD ki dei kiba la pyndep bad kiba la aiti sha ka ri.

****