শক্নাইরবশিং,

ময়াম পুম্নমক ঐনা তরাম্না ওকচরি।

শক্নাইরবশিং,

ভারতমচা করোর ১৪০গী মহুৎশীন্দুনা, ২শুবা ভোইস ওফ গ্লোবেল সম্মিৎ হৌদোকপদা ঐনা ময়াম পুম্নমক তরাম্না ওকচরি। ২১শুবা চহিচাগী হোংলক্লিবা মালেম অসিদা গ্লোবেল সাউথকী খোল্লাউ অসি খ্বাইগী মরুওইবা মফম অমনি। লম্মিৎ-তুম্মিৎকী ওইনা, গ্লোবেল সাউথ অসি মতম পুম্নমক্তা মফম অসিদা লৈরি। মসি ঐখোয় পুম্নমক্কী অপুনবা থবক্না ওইহনবনি। ঐখোয় লৈবাক ১০০ হেনবগী অপুনবনি, অদুবু ঐখোয়গী পামজবা, ঐখোয়গী মরুওইবশিংদি মান্নৈ।

মরুপশিং,

হৌখিবা চহিগী দিশেম্বরদগী, ভারতনা জি-২০গী প্রসিদেন্তগী ফম পায়রকখি। ফোরম অসিদা গ্লোবেল সাউথকী লৈবাকশিংগী খোল্লাউ তাহনবা হায়বসি ঐখোয়গী থৌদাংনি হায়না ঐখোয়না খল্লি। জি-২০ অসি মীওই খুদিংমক কোনশিনবা অমসুং মালেমগী থাক্তা মীওইবা খুন্নাইগী থবক পায়খৎপা হায়বসি ঐখোয়গী মরুওইবা থবক্নি। জি-২০গী পান্দম অসি- মীয়ামগীদমক, মীয়াম্না শেমগৎপা অমসুং মীয়ামগীদমক হায়বা অসিদা পান্দম থম্বা হায়বসি ঐখোয়গী থবক্নি। পান্দম অসিগীদমক চহি অসিগী জনুৱারিদা ঐখোয়না অহানবা ওইনা ভোইস ওফ গ্লোবেল সম্মিৎ পাংথোকখ্রে। ভারতকী তোঙান-তোঙানবা রাজ্যশিংদা জি-২০গী মীফম ২০০ হেন্না পাংথোকখি, ঐখোয়না মরুওইনা গ্লোবেল সাউথতা মীৎয়েং থমখি। নিউ দিল্লি লিদরস দিক্লারেসন্দা গ্লোবেল সাউথকী ৱাফমশিং লৈবাক খুদিংমক্না য়ানবা পুরকখি।

শক্নাইরবশিং,

গ্লোবেল সাউথকী য়াইফনবা জি-২০ মীফমদা লৌখিবা মরুওইবা ৱারেপ খর অদোমগী মফমদা খঙহনবা ঐনা পাম্মী। ভারতনা হোৎনবদগী নিউ দিল্লি সম্মিৎতা অফ্রিকান য়ুনিয়ন জি-২০গী লেংদবা মেম্বর ওইখিবা পুৱারি ওইরবা মিকুপ অদু ঐনা কাউবা ঙম্লোই। মালেমগী চাউখৎ-থৌরাংগী বেঙ্কশিং অওনবা পুরক্নবা জি-২০দা য়ানবা পুরকখ্রে অমসুং চাউখৎলক্লিবা লৈবাকশিংদা শেন থাদনবা মীৎয়েং চঙগদবনি।

​হৌখিবা চহি খরদা শোৎথনা লৈহৌরবা স্তেনেবল দিবলপমেন্ত গোলশিং য়াংখৎনবা এক্সন প্লান অমা শেম্লে। মসিনা গ্লোবেল সাউথকী লৈবাকশিংদা লায়রবা কোকহন্নবা হৌজিক পায়খৎলিবা থবক-থৌরমশিং মপাঙ্গল হাপ্লগনি। জি-২০দা মমাঙদা অমুক্তা ওইখিদ্রিবা মওংদা ক্লাইমেত ফাইনান্স মরুওইনা লৌরে। গ্লোবেল সাউথকী লৈবাকশিংদা ক্লাইমেতকী অওনবশিং পুরক্নবা শেন্থং অমসুং তেক্নোলোজি পীবা হায়না য়ানরে। ক্লাইমেত এক্সন, লাইফ(লাইফস্তাইল ফোর ইনভাইরোনমেন্ত) না মসিগী অৱাংবা থাক্কী প্রিন্সিপালশিং চৎনরে। মীফম অসিদা গ্লোবেল বাইওফুয়েল এল্লাইন্স হৌদোক্লে। মসি গ্লোবেল সাউথ লৈবাকশিংগী য়াম্না মরুওইবনি। মসিদা অদোম শরুক য়াগনি হায়বগী থাজবা ঐখোয়না থম্লি।

অনৌবা তেক্নোলোজিনা অৱাং অমসুং খা অনিগী মরক্তা খেন্নবা পাকথোক-চাউথোক্নবা অনৌবা হৌরকফম অমা ওইহল্লোইদবনি হায়না ভারতনা থাজৈ। হৌজিক অসি আর্তিফিসিএল ইন্তিলিজেন্সকী যুগনি, তেক্নোলোজি অসি দাইত্ব খঙনা শীজিন্নবা য়াম্না দরকার ওইরে। মথং থাদা ভারত্তা এ.আই গ্লোবেল পার্তনরশিপ সম্মিৎ পাংথোক্কনি। অরাপ্পা মফমশিংদা তঙাইফদবা খুদোংচাবশিং ফংহনবদা মতেং পাংনবা জি-২০দা দিজিতেল পব্লিক ইনফ্রাস্ত্রকচরগী ফ্রেমৱার্ক চৎনরে। মালেমগী দি.পি.আইগী পুক্কৈ অমা শেম্বা হায়না য়ানরে। মসিগী মখাদা, ভারতনা লৈবাক অসিগী হৈজবা অমসুং খঙজবশিং গ্লোবেল সাউথ শীনবা থুংনা শরুক য়ামিন্ননবা থৌরাং তৌদুনা লৈরি।

গ্লোবেল সাউথকী লৈবাকশিং মহৌশাগী ওইবা অমাং-অতাশিংনা হেন্না শোকহল্লে। মসিগীদমক ভারতনা কোলিএসন ফোর দিজাস্তর রেসিলিয়েন্ত ইনফ্রাস্ত্রকচর হৌদোক্লে। দিজাস্তর হন্থহন্নবা অমসুং রিসিলিয়েন্ত ইনফ্রাস্ত্রকচর শেমগৎনবা জি-২০দা অনৌবা ৱার্কিং গ্রুপ অমা শেম্লে।

ভারতকী থৌরাংদা, চহি অসি য়ুনাইতেদ নেসন্সনা মালেমগী লৈবাকশিংগী চহি হায়না পাংথোক্লি। জি-২০গী মখাদা, সুপরফুদ মিল্লেতশিং থিজিন্নবা অনৌবা থবক অমা পায়খৎলে,মসি ঐখোয়না ভারত্তা শ্রী অন্না হায়না মশক তাক্লে। মসিনা গ্লোবেল সাউথনা ক্লাইমেত চেঞ্জনা মরম ওইদুনা থোরকপা চীঞ্জাক ৱাৎপগী অৱাবা গ্লোবেল সাউথনা থেংনবা ঙমহনগনি।

অহানবা ওইনা, জি-২০দা, তুংকোইনা চৎনবা য়াবা সমুদ্রদা য়ুম্ফম ওইবা ইকোনোমি অমা শেমগৎনবা থবক পায়খৎলে। মসি গ্লোবেল সাউথকী অপীকপা চাউখৎলক্লিবা ইথৎ লৈবাকশিংগী য়াম্না মরুওইবনি। মীফম অসিদা, গ্লোবেল ভেলু চেন মেপ্পিং অমসুং দিজিতেল সর্তিফিকেতশিং শকখঙনবা মরুওইবা ৱারেপশিং লৌরে। মসিদা গ্লোবেল সাউথকী লৈবাকশিংদা এম.এস.এম.ই সেক্তর অমসুং ললোন-ইতিক্কী অনৌবা খুদোংচাবশিং পীরগনি।

শক্নাইরবশিং,

মালেমগী নুংঙাই-য়াইফবা পুরক্নবা মীওই খুদিংমক মতেং পাংনবা অমসুং চাউখৎপা তঙাইফদে। নোংচুপ এসিয়াগী থৌদোকশিং অসিনা অনৌবা খুদোংচাদবা কয়া থোরকপা ঐখোয়না উবা ফংলে। ওক্তোবর ৭দা ইজরেলদা চৎথখিবা তমথিরবা তেরোরিস্তশিংগী এত্তেক অদু ভারতনা য়ানিংদবা ফোঙদোক্লি। মসিগা লোয়ননা, ৱারি শানবা অমসুং দিপ্লোমেসিদা ঐখোয়না থাজবা থম্লি। ইজরেল অমসুং হামাসশিংগী মরক্তা খুৎথোক্নবদা মীচম কয়া শিবদা ঐখোয়না অকনবা মওংদা য়ানিংদবা ফোঙদোক্লি। রাস্ত্রপতি মোহমদ অব্বাসকা ৱারি শানরবা মতুংদা ঐখোয়না পেলেস্তাইনগী মীয়ামগীদমক তেংবাং পোৎলমশিং থাখ্রে। মালেমগী য়াইফনবগীদমক গ্লোবেল সাউথকী লৈবাকশিং খোঞ্জেল অমদা লাউনবগী মতম য়ৌরক্লে।

‘মালেম অমা, ইমুং অমা, তুংলমচৎ অমা”গীদমক ঐখোয় পুম্নমক 5-Cs গা লোয়ননা মাংলোমদা চঙশিল্ল। ঐনা 5-Cs- কন্সলতেসন, কোওপরেসন, কম্মুনিকেসন, ক্রিয়েতিবিতি অমসুং কেপাসিতি বিল্দিংগী মরমদা ফোঙদোক্লি।

শক্নাইরবশিং,

অহানবা ভোইস ওফ গ্লোবেল সাউথ সম্মিৎতা, গ্লোবেল সাউথকী সেন্তর ওফ এক্সলেন্স অমা লিংখৎনবা ঐনা হৌদোকখি। ঙসি দাক্ষিন-দিবলপমেন্ত এন্দ নোলেজ সিয়ারিং ইনিসিয়েতিপ-গ্লোবেল সাউথ সেন্তর ফোর এক্সলেন্স শঙ্গাবদা ঐ হরাওই। জি-২০মীফম মনুংদা, গ্লোবেল সাউথকীদমক ভারতনা ৱেদর অমসুং ক্লাইমেত য়েংশিন্নবা সেতেল্লাইত অমা থাগৎনবা ঐনা হৌদোকখি। মসি অথুবা মতমদা পাংথোক্নবা ঐখোয়না থবক পায়খৎলি।

মরুপশিং,

ৱাফমশিং অসিগা লোয়ননা ঐগী ৱারোল লোইশিঞ্জরে। অদোমগী ৱারোলশিং তাবদা ঐ য়াম্না হরাওরে। অদোম থৱায় য়াওনা শরুক য়াবগীদমক, ঐগী থম্মোয়দগী ময়াম পুম্নমক ঐনা থাগৎপা ফোঙদোকচরি।

অদোম থাগৎপা ফোঙদোকচরি।

​****