মান্যবৰ,

মই আপোনালোকে সকলোকে আদৰণি জনাইছোঁ৷

মান্যবৰ,

দ্বিতীয় ভইচ অফ গ্ল’বেল ছাউথ ছামিটৰ উদ্বোধনী অধিৱেশনত ১৪০ কোটি ভাৰতীয়ৰ হৈ মই আপোনালোক সকলোকে আন্তৰিক আদৰণি জনাইছো৷ ভইচ অফ গ্ল’বেল ছাউথ একবিংশ শতিকাৰ পৰিৱৰ্তিত বিশ্বৰ আটাইতকৈ অনন্য মঞ্চ৷ ভৌগোলিকভাৱে গ্ল’বেল ছাউথ সদায় আছে৷ কিন্তু তাৰ পৰা এইধৰণৰ কণ্ঠ প্ৰথমবাৰলৈ শুনিবলৈ পোৱা গৈছে৷ আৰু আমাৰ সকলোৰে যৌথ প্ৰচেষ্টাৰ বাবেই এইটো সম্ভৱ হৈছে। আমি ১০০খনতকৈও অধিক ভিন্ন দেশ, কিন্তু আমাৰ স্বাৰ্থ একে, আমাৰ অগ্ৰাধিকাৰ একে।

বন্ধুসকল,

যোৱা বছৰৰ ডিচেম্বৰ মাহত যেতিয়া ভাৰতে জি-২০ৰ অধ্যক্ষতাৰ দায়িত্ব গ্ৰহণ কৰিছিল, তেতিয়া আমি এই মঞ্চত গ্ল’বেল ছাউথৰ দেশসমূহৰ কণ্ঠ বৃদ্ধি কৰাটো আমাৰ দায়িত্ব বুলি বিবেচনা কৰিছিলোঁ। আমাৰ অগ্ৰাধিকাৰ আছিল জি-২০ক বিশ্ব সৰ্বাংগীন আৰু মানৱকেন্দ্ৰিক কৰি তোলা। আমাৰ প্ৰচেষ্টা এই যে জি-২০ৰ কেন্দ্ৰবিন্দু হ’ব লাগে-জনসাধাৰণৰ, জনসাধাৰণৰ দ্বাৰা আৰু জনসাধাৰণৰ বাবে উন্নয়ন। এই উদ্দেশ্যৰেই আমি চলিত বৰ্ষৰ জানুৱাৰী মাহত প্ৰথমবাৰৰ বাবে ভইচ অৱ গ্ল’বেল ছাউথ ছামিটৰ আয়োজন কৰিলোঁ। ভাৰতৰ বিভিন্ন ৰাজ্যত অনুষ্ঠিত ২০০ৰো অধিক জি-২০ বৈঠকত আমি গ্ল’বেল ছাউথৰ অগ্ৰাধিকাৰক প্ৰাধান্য দিলোঁ। ফলত আমি নতুন দিল্লী নেতাসকলৰ ঘোষণা পত্ৰত গ্ল’বেল ছাউথৰ বিষয়সমূহত সকলোৰে সন্মতি লাভ কৰাত সফল হ’লোঁ।

মান্যবৰ,

জি-২০ অনুষ্ঠানত গ্ল’বেল ছাউথৰ স্বাৰ্থৰ প্ৰতি লক্ষ্য ৰাখি লোৱা কিছুমান গুৰুত্বপূৰ্ণ সিদ্ধান্ত আপোনালোকৰ সৈতে বিনম্ৰভাৱে শ্বেয়াৰ কৰিব বিচাৰিছো। সেই ঐতিহাসিক মুহূৰ্তটো মই পাহৰিব নোৱাৰো যেতিয়া ভাৰতৰ প্ৰচেষ্টাৰ বাবে আফ্ৰিকান ইউনিয়নে নতুন দিল্লী শীৰ্ষ সন্মিলনত জি-২০ৰ স্থায়ী সদস্যপদ লাভ কৰিছিল। জি-২০ৰ সকলোৱে এই কথাত একমত হৈছিল যে বহুপাক্ষিক উন্নয়ন বেংকসমূহত বৃহৎ সংস্কাৰ আনিব লাগে আৰু উন্নয়নশীল দেশসমূহক বহনক্ষম বিত্ত প্ৰদানৰ ওপৰত গুৰুত্ব দিব লাগে।

বিগত কেইবছৰমানৰ পৰা মন্থৰ হৈ পৰা বহনক্ষম উন্নয়নৰ লক্ষ্যসমূহ ত্বৰান্বিত কৰাৰ বাবেও এক কাৰ্য্য পৰিকল্পনা প্ৰস্তুত কৰা হৈছিল। ইয়াৰ দ্বাৰা গ্ল’বেল ছাউথৰ দেশসমূহত চলি থকা দৰিদ্ৰতা হ্ৰাস কাৰ্যসূচী শক্তিশালী হ’ব। এইবাৰ জি-২০ দলে জলবায়ু বিত্তৰ ক্ষেত্ৰত অভূতপূৰ্ব গুৰুত্ব দেখুৱাইছে। গ্ল’বেল ছাউথৰ দেশসমূহক সহজ চৰ্তত জলবায়ু পৰিৱৰ্তনৰ বাবে বিত্ত আৰু প্ৰযুক্তি প্ৰদানৰ ক্ষেত্ৰতো সন্মতি প্ৰকাশ কৰা হৈছে। লাইফ, অৰ্থাৎ পৰিৱেশৰ বাবে জীৱনশৈলী, জলবায়ুৰ কাৰ্য্যৰ বাবে ইয়াৰ উচ্চ পৰ্যায়ৰ নীতি গ্ৰহণ কৰা হৈছিল। এই সন্মিলনত বিশ্ব জৈৱ ইন্ধন মৈত্ৰী আৰম্ভ কৰা হৈছে৷ গ্ল’বেল ছাউথৰ দেশসমূহৰ বাবে এইটো অতি গুৰুত্বপূৰ্ণ। আৰু আমি আশা কৰিছো যে আপোনালোক সকলোৱে ইয়াত যোগদান কৰিব।

ভাৰতৰ মতে নতুন প্ৰযুক্তি উত্তৰ আৰু দক্ষিণৰ মাজৰ দূৰত্ব বৃদ্ধি কৰাৰ নতুন উৎস হ’ব নালাগে। আজি কৃত্ৰিম বুদ্ধিমত্তা(এআই)ৰ যুগত, প্ৰযুক্তিবিদ্যাক দায়িত্ব সহকাৰে ব্যৱহাৰ কৰাৰ অতি প্ৰয়োজন। ইয়াক আগুৱাই নিবলৈ অহা মাহত ভাৰতত এআই গ্ল’বেল পাৰ্টনাৰশ্বিপ ছামিটৰ আয়োজন কৰা হৈছে। ডিজিটেল ৰাজহুৱা আন্তঃগাঁথনি অৰ্থাৎ ডিপিআই জি-২০য়ে গ্ৰহণ কৰিছে, যিয়ে অত্যাৱশ্যকীয় সেৱাসমূহৰ প্ৰান্তীয় লোকসকলক যোগানত সহায় কৰিব আৰু ইয়াৰ অন্তৰ্ভুক্তি বৃদ্ধি কৰিব। ইয়াৰ উপৰি এটা বিশ্ব ডিপিআই ভঁৰাল সৃষ্টিৰ বাবেও সন্মতি দিয়া হৈছে। ইয়াৰ অধীনত ভাৰত সমগ্ৰ গ্ল’বেল ছাউথৰ সৈতে নিজৰ সামৰ্থ্য শ্বেয়াৰ কৰিবলৈ সাজু।

গ্ল’বেল ছাউথৰ দেশসমূহ যিকোনো প্ৰাকৃতিক দুৰ্যোগৰ দ্বাৰা আটাইতকৈ বেছি ক্ষতিগ্ৰস্ত হয়। ইয়াৰ বাবে ভাৰতে দুৰ্যোগ সুস্থিৰতা আন্তঃগাঁথনিৰ বাবে জোট অৰ্থাৎ চিডিআৰআই আৰম্ভ কৰিছিল। এতিয়া দুৰ্যোগৰ আশংকা হ্ৰাস আৰু সুস্থিৰতা আন্তঃগাঁথনিৰ বাবে জি-২০ত এটা নতুন কৰ্মগোটো গঠন কৰা হৈছে।

ভাৰতৰ উদ্যোগত ৰাষ্ট্ৰসংঘই এই বছৰটো আন্তঃৰাষ্ট্ৰীয় বাজৰাৰ বছৰ হিচাপে উদযাপন কৰিছে। জি-২০ৰ অধীনত ছুপাৰফুড বাজৰাৰ ওপৰত গৱেষণা কৰাৰ নতুন পদক্ষেপ গ্ৰহণ কৰা হৈছে, যাক আমি ভাৰতত শ্ৰীঅন্নৰ পৰিচয় দিছো। ইয়াৰ দ্বাৰা গ্ল’বেল ছাউথে জলবায়ু পৰিৱৰ্তন আৰু সম্পদৰ অভাৱৰ ফলত উদ্ভৱ হোৱা খাদ্য সুৰক্ষাৰ উদ্বেগসমূহ মোকাবিলা কৰিবলৈ সক্ষম হ’ব।

প্ৰথমবাৰৰ বাবে জি-২০ত বহনক্ষম আৰু সাগৰভিত্তিক অৰ্থনীতিৰ ওপৰত গুৰুত্ব আৰোপ কৰা হৈছে। গ্ল’বেল ছাউথৰ সৰু দ্বীপ উন্নয়নশীল দেশসমূহৰ বাবে এইবোৰ অতি গুৰুত্বপূৰ্ণ, যিবোৰক মই বৃহৎ সাগৰীয় দেশ বুলি গণ্য কৰোঁ। এই সন্মিলনত বিশ্ব মূল্য শৃংখল মেপিং আৰু ডিজিটেল প্ৰমাণপত্ৰৰ স্বীকৃতিৰ বাবে গুৰুত্বপূৰ্ণ সিদ্ধান্ত গ্ৰহণ কৰা হয়। ইয়াৰ দ্বাৰা গ্ল’বেল ছাউথৰ দেশসমূহত এমএছএমই খণ্ড আৰু ব্যৱসায়ৰ বাবে নতুন সুযোগ মুকলি হ’ব।

মান্যবৰ,

বিশ্বৰ সমৃদ্ধিৰ বাবে সকলোৰে সমৰ্থন আৰু সকলোৰে বিকাশ অতি প্ৰয়োজনীয়। কিন্তু আমি সকলোৱে দেখিবলৈ পাইছো যে পশ্চিম এছিয়া অঞ্চলৰ পৰিঘটনাৰ পৰা নতুন প্ৰত্যাহ্বানৰ উন্মেষ ঘটিছে। ৭ অক্টোবৰত ইজৰাইলত সংঘটিত হোৱা জঘন্য সন্ত্ৰাসবাদী আক্ৰমণক গৰিহণা দিছে ভাৰতে। সংযমৰ লগতে আলোচনা আৰু কূটনীতিৰ ওপৰতো আমি গুৰুত্ব দিছো। ইজৰাইল আৰু হামাছৰ সংঘাতত সাধাৰণ নাগৰিকৰ প্ৰাণহানিক আমি তীব্ৰ গৰিহণা দিছো। ৰাষ্ট্ৰপতি মাহমুদ আব্বাছৰ সৈতে কথা পতাৰ পাছত আমি পেলেষ্টাইনৰ জনসাধাৰণলৈও মানৱীয় সাহায্য প্ৰেৰণ কৰিছো। গ্ল’বেল ছাউথৰ দেশসমূহে বৃহত্তৰ বৈশ্বিক কল্যানৰ বাবে এক কণ্ঠেৰে কথা কোৱাৰ সময় আহি পৰিছে৷

“এক পৃথিৱী এক পৰিয়াল, এটা ভৱিষ্যত”ৰ বাবে, আহক আমি সকলোৱে ৫-চিৰ সৈতে একেলগে আগবাঢ়ি যাওঁ৷ এই ৫-চি হৈছে– পৰামৰ্শ, সহযোগিতা, যোগাযোগ, সৃষ্টিশীলতা আৰু সামৰ্থ্য বিকাশ।

মান্যবৰ,

প্ৰথম ভইচ অৱ দ্য গ্ল’বেল ছাউথ ছামিটত মই গ্ল’বেল ছাউথৰ বাবে এটা উৎকৰ্ষ কেন্দ্ৰ স্থাপনৰ প্ৰস্তাৱ দিছিলো। মই সুখী যে আজি DAKSHIN – উন্নয়ন আৰু জ্ঞান বিনিময় পদক্ষেপ– গ্লবেল ছাউথ উৎকৰ্ষ কেন্দ্ৰ উদ্বোধন কৰা হৈছে। জি-২০ সন্মিলনৰ সময়ত মই ভাৰতৰ পৰা গ্ল’বেল ছাউথৰ বাবে বতৰ আৰু জলবায়ু নিৰীক্ষণৰ বাবে উপগ্ৰহ উৎক্ষেপণৰ প্ৰস্তাৱ দিছো। আমি এই দিশত দ্ৰুতগতিত কাম কৰি আছো।

বন্ধুসকল,

এই চিন্তাধাৰাৰে মই মোৰ বক্তব্যৰ সামৰণি মাৰিলোঁ। এতিয়া আপোনালোকৰ চিন্তাধাৰা শুনিবলৈ মই বৰ উৎসাহিত হৈ আছো। আৰু ইমান বৃহৎ পৰিসৰত আপোনালোকৰ সক্ৰিয় অংশগ্ৰহণৰ বাবে আপোনালোক সকলোকে আন্তৰিক কৃতজ্ঞতা জ্ঞাপন কৰিছো।

বহুত বহুত ধন্যবাদ৷

***

DS/ST/DB