ভারতকী রাস্ত্রপতি, শ্রীমতী দ্রৌপদী মুর্মুনা ঙসি (নোভেম্বর ১৬, ২০২৩) নই দিল্লীদা পাংথোকপা ৩ লক শুবা ওদিত দিৱস পালন্দা শরুক য়াখি অমসুং ৱা ঙাংখি।

থৌরম অদুদা ৱা ঙাংলদুনা, রাস্ত্রপতিনা হায়খি মদুদি ভারতকী কোম্পত্রোল্লর অমসুং ওদিতর জেনেরেলগী লমজিং মখাদা, সরকারগী ওদিত কাংলুপ অসিনা ইন্তিগ্রিতী, গোভর্নেন্স অমসুং সীস্তেম শাগৎপগী মপাঙ্গল কনখৎহনবদা য়াম্না চাউনা থৌদাং লৌরি।

রাস্ত্রপতিনা হায়খি মদুদি ভারতকী মীয়াম্না ২০৪৭ ফাওবদা চাউখৎপা ভারত অমা ওইহন্ননবা মাঙলোমদা লেপ্তনা চঙশিনবা পাম্লি। C&AG য়াওনা, ভারতকী মরু ওইবা ইন্সতিত্যুসন অমসুং কাংলুপ খুদিংমক্না পান্দম অসিবু ফংননবা থৌদাং লৌমিন্নগদবনি। মহাক্না C&AG না তুংগীদমক্তা খনলদুনা দিজিতেল তেক্নোলোজী অমসুং অতোপ্পা অনৌবা পাম্বৈশিং শিজিন্নবা সেন্তর ফোর দেতা মেনেজমেন্ত এন্দ এনালাইতিক্স হৌদোকপনচিংবা মাঙলোমদা চংশিনবা খোঙথাংশিং লৌখৎখ্রে তাবদা নুংঙাইবা ফাওখি।  

রাস্ত্রপতিনা C&AG গী তীম পুম্নমক্না লৈবাক্কী চাউখৎ খোঙথাংগী লম্বী অসিদা পুন্না চৎমিন্নবা অমসুং লমজিংলোই ওইবা কন্ত্রোলর অমসুং একজামিনর অমা ওইনা থৌদাং লৌননবা থাজবা থম্লি হায়না হায়খি। ভারতপু মালেমগী খ্বাইদগী চাউবা শেন্মিৎলোন্দা অহুমশুবা ওইহনবদা C&AG তীমগী য়াম্না মরু ওইবা থৌদাং লৈ হায়না মহাক্না ফোংদোকখি।

গ্লোবেল কম্পিতিসন্না মপুং ওইরবা ঙসিগী মার্কেৎ সীস্তেমগী ইথিল  অসি ইন্সতিত্যুসন অমসুং ইন্তর্প্রাইজ খুদিংমক্কা মরি লৈনৈ হায়না রাস্ত্রপতিনা হায়খি। লৈবাক অসিগী ইন্তর্প্রাইজ অমসুং থবক থৌরম খুদিংমক্তা ইথিক্স কায়দনা লান্থেংনবা ঙম্বগী থৌনা অদু লেপ্পা লৈতনা হেনগৎকদবনি। শেল থুমগী মপু অমসুং লিগেলিতী ঙাক্না য়াম্না য়াঙনা চাউখৎনবগী লৈবাক্কী পান্দম অসিবু ফংননবা অয়েৎ অপনশিং লৌথোকপা হায়বসি অফবা গোভর্নেন্স ওইহন্ননবগীদমক্তা, C&AG য়াওনা ইন্সতিত্যুসন অমসুং মীওই খুদিংমক্কী অফবা থৌদাংনি। ওদিতরশিংবু ক্রিতিক্স নত্তবা, অফবা গোভর্নেন্সকী ফেসিলিতেতরশিং ওইনা লৌগদবনি হায়না মহাক্না ফোংদোকখি। মখোয়বু ঐখোয়দা য়েংশিনবীদুনা অচুম্বা লম্বীদা চৎননবা তাকপীরিবা লমজিংবশিং ওইনা লৌগদবনি হায়না মহাক্না মখা তাখি।

রাস্ত্রপতিনা হায়খি মদুদি ওদিতকী লমদা ভারতকী মাংজিল থারিবা মফম অসি  মালেমদসু উবা ফংই। সুপ্রিম ওদিত ইন্সতিত্যুসন্স ২০  (SAI 20) গী ভারতকী প্রেসিদেন্সী মনুংদা ব্লু ইকোনোমী এন্দ রেস্পোন্সিবল আর্তিফিসিএল ইন্তেলিজেন্সকী ইসুশিংদা লুমনা লৌবা অসি তুংগীদমক্তা রোদমেপ অমা শেমহৌননবা অফবা থৌরাং অমনি। মহাক্না C&AG না  অতোপ্পা ইন্তর্নেস্নেল ফোরমশিংদা মকোক চিংবা থৌদাংসু লৌরি হায়বা খঙবদা নুংঙাইবা ফাওখি।

রাস্ত্রপতিগী ৱারোল য়েংননবগীদমক্তা মসিদা নম্বীয়ু -

***