খৌরাংনা ঙাইনরকপা ফিল্ম বাজার রিকম্মেন্দেদ ফিল্মশিংগী লিস্ত লাউথোক্লে‍। চহি অসিগী ওইনা খনগৎলবশিংগী মরক্তা ফিক্সন, দোকু-সোর্ত, দোকুমেন্তরী, হোরর ফিল্ম অমা, অমদি এনিমেতেদ ফীচর অমা য়াওনা ভারত অমদি মপান লৈবাকশিংদা লৈবা দাইস্পোরা, পেত্রিয়ার্কী, ময়োল্লমশিংদা চরাংনবা ৱাখল, পৎ তৎনা লায়রবা, ক্লাইমেৎ ক্রাইসিস, নেস্নেলিজম, অমদি শন্ন-খোৎনবা/মশা মউ ফনা লৈবনচিংবা হীরমশিংদা য়ুম্ফম ওইবা ফিল্মশিং ওইরি‍।  ফিল্মশিং অসি ইংলিস, হিন্দী, বেঙ্গালী, মর্ৱারী, কন্নরা, অমদি মাউরী (নিউ জীলেন্দগী লোল) লোলগীনি অমদি তোঙান তোঙানবা হীরমশিংগী মিক্স অমগী মহাউ পীরি‍। ফিল্মশিং অসিগী স্তিলশিং লিঙ্ক অসিদা ফংবিগনি:

লিস্ত অসিদা মখাদা পীরিবা ফিল্মাশিং অসি য়াওরি:

ফিক্সন সোর্ত:

১.      অনু (মিনত ১৪), পুলকিৎ অরোরানা দাইরেক্ত তৌবা (ইংলিস/হিন্দী/মাউরী): নৌনা লুখ্রা ওইহৌরবী অমনা নিউ জীলেন্দদগী ইন্দিয়াদা হোংলকপা মতমদা, মহাক্না চহি অমরোমগী মমাঙদা লৈখিদ্রবা মহাক্কী খোঙবুগী শহুম অমদগী হেন্দোকপা ঙমদনা লৈখি‍। অদুবু অরাপ্পদা থোকপা থৌদোক অমগী শাফুনা মহাকপু মাগী অৱাবা অদু তোপ তোপ্পা ফীভম অমদা ইচম চম্বা লাইথৌ অমগা লোয়ননা মায়োক্নবা তাখি: ক্বারেন্তিন

২.     রোতী কুন বনাসী নৎত্রগা কনানা তল হৌবিগনি (মিনত ২৫) চন্দন সিংহ সেখাৱতনা দাইরেক্ত তৌবা (মর্ৱারী): রাজস্থানগী খুঙ্গংগী ইমুং অমদা সেত তৌবনি‍। ‘কনানা তল হৌবিগনি?’ হায়রিবসি সন্তোসকী ৱারীদা য়ুম্ফম ওইবা ফিল্মনি‍। রুপাগী মপুরোইবা অদুগা রঞ্জীৎকীনা মচানুপা অহল, সন্তোস পেত্রিআর্কী অমদি নুপা থোকপগী চৎনরিবা মচৎ অসিনা পুন্দুনা লৈরিবা মীওই অমনি‍। মহাকপু মাগী মায়থিবশিং অমদি মীথানবিদবা মতৌগী মরমদা মপানা মতম চুপ্পা নীংশিংহন্দুনতা লৈ‍। নুপীবু য়ুমদগী হেন্দোকহন্দনা থমগদবনি হায়বা মপাগী থাজবগী ওন্ন-তৈনবদা, মহাক্না মাগী লোয়নবী রুপাবু লৈঙাক্কী থবক্কী চাংয়েং অমদা অরোইবা চান্স অমদা শৌগৎপিবা পাম্মি‍। ফিল্ম অসিনা চহি  চা কয়া নুপানা খুৎলিংবা খুন্নাইগী ৱাখল্লোন অমদি মসিনা মীরোল অমদগী অমদা, মপা/মচাগী মরীগী খুত্থাঙদা মতৌ করম্না থঙথরকপগে হায়বা উৎলি‍। ফিল্ম অসি রাজস্থানগী নুপীশিংনা নুমিৎ খুদিংগী থেংনরিবা অৱাবশিং লোয়ননা থোং মান্নদবা, নুপা থোকপগী অরানবা ৱাখল্লোন অমদি নুপানা খুৎলিংবা চৎনবীনা মরম ওইরগা নুপা অমদি নুপী অনিমকপু তোঙান তোঙানবা সেক্সনশিংদা ওৎপি নৈবিবগী থেংনরিবা খুন্নাইগী ফীভমশিং ইচঙ থৌনা উৎলিবা ফিল্ম অমনি‍।

৩.    ত্যুসদে’স ৱুমেন (২৯ মিনৎ), ইমাদ সাহনা দাইরেক্ত তৌবা (ইংলিস): ৱাখল ময়োল চোংহনবা অয়ুক অমনি‍। লৈরঙদা স্পেঘেতী মফুৎ মফুৎ কাম্লি, রেদিওদা ক্লাসিকেল ম্যুজিক থারি, অমদি ঐখোয়গী প্রোতাগোনিস্ত চফুদু তপ্না তপ্না ওৎলি‍। মীৎকুপ অদু অয়াকপা খোঞ্জেলদা খিঙলক্লিবা তেলিফোনগী মখোলনা কায়হল্লি‍। মহাক্না মমৈথঙদা পায়খৎলুবদা মতমদা, মহাক্না মশক খঙদবা মখোল শিরপ তৌবা অমেঙবা খোঞ্জেল অমা তাই‍। খোঞ্জেলদুনা মঙোন্দগী শুপ্নতগী মিনৎ তরাখক পাম্মি হায়রকখি‍। ৱাখল তামিন্ননবগী মিনৎ তরা‍। ৱাখল তামিন্ননবা? মহাক্না হংই‍‍। ঐখোয়গী পুক্নিং ইহুলগী‍। মহাক ফোন অদু থম্বা পাম্লম্মি অদুবু থম্বদি ঙমদে‍। মহাক্না ৱা হংদুনা ফোন তৌরক্লিবদু কনানো খঙদোক্নবা হোৎনখি, অদুবু মশক খঙদবা নুপীদুনা ফোনদু থমখি‍, অদুগা স্পাঘেতিদু কাদুনা লৈরম্লে‍। মথোঙ মরম খঙখিদ্রবা ৱারীদুনা মঙলা তাইবঙলা খঙদবা নুমিৎ অমা ওইহল্লক্তুনা, মহাক্না মাগী দাইরীদা করিগুম্বা খরা ইবা পাম্লবসু, ফোন অদু ঙাইহাক লৈতনা খীংলকখি অমদি শকখঙদবা, অঙকপা নুপীদুনা মহাক্কী য়ুমগী থবকশিংদা অয়েৎপা লেপ্তনা পীখি, অমদি মহাক্কী পুন্সিগী মরমদা মরুওইবা মীৎয়েঙ কয়া থম্লকখি‍। ফিল্ম অসিদগী ফজরবা ৱারীদুগী অঙকপা মতৌদুগী মমি তাবা তাইবঙ লঅমা শেমগত্তুনা মদুবু ভারতকী ওইবা ফীভমদা পানশিনবা য়াগনি হায়না ঐখোয়না থাজবা থম্মি‍। মসি হারুকি মুরাকামীনা ইবা ৱারী মচা অহুম পুনশিন্দুনা ঐখোয়গী প্রোতাগোনিস্তগী পুন্সিগী নোংমা ওইহন্দুনা শেমদোকপনি‍। মহাক থবক তৎলে অমদি হৈনিংদবা ফীভম অমদা লৈরিবনি‍। ঐখোয়না লোল অমদি ম্যুজিক্কা লোয়ননা শান্নহন্নবা তৌরিবা থৌরাং অসি নুংশিরবা জাপানীজ অইবা অসিগী ৱারী লীবগী মওং মতৌ, খোঙজেল, তোনবু সিনেমাতিক ওইবা মওংদা পুথোক্নবা হোৎনবনি‍। ফিল্ম অসিনা, ভারতকী ফীভমসিদা মীয়াম্না পাম্নদ্রবসু অমদি চুশিন্নদ্রবসু, সবজেক্ত মেতরিএল অসিদা চাংয়েং অমা ওইনা মরোমদোম লেপচবা ঙমগনি হায়না থাজবা থম্লি‍।

৪.     গিদ্ধ (মিনত ২৫), মনিস সাইনীনা দাইরেক্ত তৌবা (হিন্দী): অহল ওইরবা নুপা অমনা ইমুং পুনবা ৱানা হোৎনৈ‍। মহাক্না, ফুরিৎখাউদা লুপা খরখক য়াওবনা হিদাক লৈবা নৎত্রগা চীঞ্জাক লৈবা, অনিমক্তি কোন্নদবনা, মাগী শাথিনা নারবা মচানুপাবু কনবা ঙমখিদে‍। অহল ওইরবা চরা শুনা চাদ্রবা নুপাদু য়েংবদা থবক শুবা ঙমগদবা মান্দবনা থবকসু পাক্না ফংলমদে‍। ফীভম শাথিনা চারমদে অদুবু নোংমা থাজরুদবা পুন্সি হিংনবগী লম্বী অমা থেংনখি, অদুবু মদুগী মমল অমদি লোয়নদুনা লাকখি‍। মহাক্না চেঙ মরু খরগী মহাক্কী ফিদমবু তুংওইনরম্বা তারম্মি‍। লাংফমগী খুদোংথিবা অমা তাখি অমদি অহলদুনা মদুদগী কান্নবা লৌবা য়ারম্মি‍। তেংবাংবিনবা অমদি পাম্বৈ লৈত্রবা কনাগী মফমদা অচুম্বা অরানবা করিনো খঙদে, অদুবু অচুম্বা অমদি অরানবা হায়বসি ফীভমগী মখা পোন্দবরা‍। নুংগী ওইবা লান অমা কন্না শোক্নখি অদুবু থুনমক চরাম চদৎনবগা পুক্নিংদা লাল্লুবগী ইথিলগা থেংগাইনরকখি‍। মহাক্কী পুখমদা চীঞ্জাক লৈরক্লোইদবা ফীভমদা লাক্লবদা, মহাক্কী চরাম চদৎনবা নৎত্রগা মরালগী পোৎলুম অনিসিদা করম্বনা হেন্না লুমগনি‍? পুখমদা চীঞ্জাক অদুগা নঙ্গনদা ফিরোল অনি অসিনা মীওইবা অমগী খ্বায়দগী তঙায় ফদবা মথৌ তাবনি‍। অদুবু লাইবক থিবা কনাগুম্বা খরদি নুমিৎ খুদিং মথৌ তাবা অহুম্মক ফংবা ঙম্নবা লান্থেংনদুনা লৈ‍। ৱারী অসিনা ফিরোল মথৌ তাবা অমদি চীঞ্জাক মথৌ তাববু হিংনবগী লান্থেংগা মরী শম্নহল্লি‍।

দোকু সোর্ত:

৫.    গোপী (মিনৎ ১৪), নিসন্থ গুরুমুর্তীনা দাইরেক্ত তৌবা (কন্নরা): গোপী সিদ্দী মশাবু সিদ্দী ফুরুপকী (খা ভারত্তা লৈবা অফ্রিকান দাইস্পোরা) মীওইনি হায়না শক্তাকচবা ৱারী লীবা মীয়ায় চল্লবী নুপী অমনি‍। চীনহায় ওইনা ৱারী লীবগী মচৎনা পুক্নিং থৌগত্তুনা, গোপীনা মহাক্কী ৱারীবু মশানা ফোঙদোকচবা পামখি; অদুম ওইনমক, মহাক্না অহানবদা ইন্থোকপিবা, খুন্নাইগী ফীভম, অমদি অকোয়বগী ফীভমদা থোক্লিবা মাঙ তাকপশিংগা থেংনরিবা লান্থেং অদু হান্না থেংনবা তাই‍।

৬.    আইরন ৱুমেন ওফ মনিপুর (মিনত ২৬), হাউবম পবন কুমারনা দাইরেক্ত তৌবা (মনিপুরী/ইংলিস): ফিল্ম অসি নুপীশিংবু শান্ন-খোৎনবদা মফম অমা কনবদা চাউনা থৌদাং য়াখিবা লৈবাকসিগী নুপী শান্নরোয়শিংগী মফমদা কত্থোকপা ফিল্ম অমনি‍। নুপী ৱেৎলিফ্তিংগী লময়ানবী, কুঞ্জরানী দেবী (পদ্মশ্রী, ২০১১), অনিতা চনু (ধ্যানচন্দ মনা), অমদি মিরাবাই চনু (পদ্মশ্রী, ২০১৮, অমুং তোকিও ওলিম্পিক্স ২০২০দা সিল্ভর মেদল ফংখিবা) মখোয়গী পুক্নিং থৌগৎনিংঙাই ওইরবা ৱারীশিংনা ভারতকী শান্নরোয়গী মীরোল অমবু অমদি মপুং ওইনা লৈবাক অসিবু পুক্নিং থৌগৎখি‍।

দোকু মিদ-লেঙ্থ:

৭.    ৱ্যের মাই গ্রান্দমাদর লিব্স (মিনত ৫১), তাস্মিয়া অফ্রিন মৌনা দাইরেক্ত তৌবা (বেঙ্গালী): ফিল্মমেকর মৌনা মহাক্কী নুংশিরবা মবোক্কী ময়ুমদা মহাক্কী মরমদা ফিল্ম নম্নবা চৎখি‍। মহাক্কী চহি ১০০ শুরবা য়ুমদুদা, মবোক্তুআ চহি ২৭গী মমাঙদা মপুরোইবা লৈখিদ্রবা মতুংদগী মথন্তা লৈরকখি‍। মৌগীদমক্তদি, মবোক্কী ময়ুম হায়বসি পাত্থি কোমথি, অশং অমান অমদি নীংথিরবা ইংখোলগী ইকোনশিংনা থনবা ইং-চিক্লবা খুঙ্গংগী কাউঙমদ্রবা শক্লোনশিংনি‍। ইকোন অদুদা, মীরোল কয়াদগী, লৈকায়গী অঙাংশিং ঈরোয়বা তমদুনা চাউরকখিবনি‍। মবোক্কী অতোপ্পা মশুনুপা রোনক, য়ুমথঙননা মাগী ইমুং মনুংগা লৈ‍। রোনক্কী য়ুমদা, অপিকপা ইকোন অমা হৌজিকসু লৈরি, অদুবু রোনক্কী মপাগী মচা মশুশিংনা ইকোন অদুসু য়োন্থোকপা পাম্লম্মি‍। রোনক্না মপাগী নীংশিং মমি তারিবা মহাক্কী ইমুংগী ইকোন অদু য়োন্বা পামখিদে‍। অঙকপদি, মহাক্কী বিজিনেসতি পাত্থি কোমথি নৎত্রগা ইকোনশিং লৈরগা, মফমশিংদুবু য়ুম্ফম ওইনা লৈবাক থোন্দুনা শেম্লগা য়োনবনি‍। অসুম্না শেমগৎ শাগৎপা অসি লৈবাক পুম্বদা চত্থদুনা, ঈশিং তুংফমশিং মাঙহন তাকহল্লি অমদি মদুদা লৈবা থৱায় পানবা মচা মচাশিংবুসু মাঙহনবিরি‍।

৮.    লদাখ ৪৭০ (মিনত ৩৮), সিবম সিংহ রাজপুতনা দাইরেক্ত তৌবা (হিন্দী/ইংলিস): জীনেস ৱর্ল্দ রন্নিং রেকোর্দ মঙারক ফংলগা অল্ত্রারন্নর, রাজস্থানগী অজমেরদগী লমজোল্লোয় সুফিয়ানা মহাক্কী খ্বায়দগী মঙলান চাউবা পান্দম অমা ওইরিবা – কনানসু চেনখিদ্রিবা মরাথোন অমগীদমক শেম শারি‍। মহাক্না কার্গিল লান্দা লৈখিদ্রবা ভারত লান্মীগী লানগী অথৌবা পুম্নমকপু ইকায়খুম্নবা উৎপা ওইনা নুমিৎ ৭ নিদা সিয়াচিন বেজ কেম্পতগী কার্গিল ৱার মেমোরিএল ফাওবা ফীত ১১,০০০ হেন্না ৱাংবা মফমদা কিলোমিতর ৪৭০ লমজেল চেন্ননবা থৌরাং তৌরি‍। মহাক্না ফীত ১৭৯৮০ ফাউবা ৱাংবা চীংগী লম্বীদা চেনবা মতমদা, সুফিয়াগী ওজা, মহাক্কী খোঙবু অমদি ভারত লান্মী পুম্নমক্না মহাকপু মাগী পান্দম ফংনবগীদমক মতেঙ পাংননবা কন্না হোৎনরি‍। মহাক অমদি মাগী সুফি ৱাখল্লোন্না লমজেল অসিবু মহাক্কী হীরি কোনবগী এক্সপরিএন্স অমা ওইহন্দুনা মহাক্কী পন্থুংফম য়ৌখি‍।

ফীচর:

৯.    দি একজাইল (হোরর) – (মিনত ৮২), সম্মন রোইনা দাইরেক্ত তৌবা (বেঙ্গালী): ফিল্ম অসিনা কুইদ্রিঙৈদা মহাক্কী নুপী লৈখিদ্রবা, বেঙ্গলগী খুঙ্গং অমদগী নহা ওইরিবা নুপা, গৌরাঙ্গগী ৱারী লীরি‍। লৈখিদবা অসিনা চহি কয়া অৱাফমদা তাদুনতা লাক্লবা ইমুংদুদা চাউনা শাফু পীবতা নত্তনা, মহাক্কী নুপী লৈখিদবগী নুংঙাইতবা লান্থোকপা ঙমদনা লৈরিবা গৌরাঙ্গগী পুন্সিদসু চাউনা শাফু পীরি‍। সুপরনেচরেল লোমদা নকশিনবা খুঙ্গংগী লমদা নম্বা ফিল্ম অসিদা, মতমগী মতুং ইন্না, গৌরাঙ্গনা মহাক্কী পুক্নিংদা লৈরিবা ইথিল কয়াবু মায়োক্নবতা নত্তনা অরিবা থাজনবী কয়া থেংনরকপা খোঙচৎ অমদা লাক্লি‍। ফিল্ম অসি অথেঙবা ১৯৬০গী মতমদা সেত তৌবনি অমদি মাঙ তাকপা, অমম-থাজনবী, খুন্নাইগা চুনদবা সেক্সুএল মচৎ, সুপরনচরেল অমদি অরিবা চৎনবীগী থাজনবীনা শিথরকপা অমদি পোস্তমোদর্ন ৱাখল্লোন অমসুং রাজনিতী নৌনা লাকপগী লংদাইগী মতমদা খুন্নাইদা নুপীশিংগী শক্লোন্নচিংবা হীরমশিং পুশিল্লক্লি‍।

১০.   রিতর্ন ওফ দি জঙ্গল (এনিমেসন) – (মিনত ১০৫), ভয়ভব কুমারেস (হিন্দী): চহি ৯ শুরবা মিহির অমদি মহাক্কী মরুপশিং স্কুলগী খ্বায়দগী চাউবা অমদি খ্বায়দগী মবুকচেল লুদবা গুন্দা – রাহুল মলহোত্রাবু মায়থিবা পীনবগী অকিবনা থল্লবা ফীভম অমা মায়োক্নরম্মি‍। ওইথোক্লরোইদবা খোঙচৎ অসিদা চঙশিনবদা মতেঙ পাংনবগীদমক মখোয়গী মনাক্তা ময়োল্লম অদুদা খ্বায়দগী হৈ শিংবা মপু – থাথা অমদি ভারতকী অরিবা উমংশিংদগী পুক্নিং থৌগৎনিংঙাই ওইরবা মহাক্কী ৱারীশিং লৈরম্মি‍। মখোয় পুনশিন্নদুনা, মীনুংশি লৈতবা দাইনোসর অমা শাদুনা পুক্নিং লৈতাহন্দবা ক্রিকেৎকী মশান্না অমদা থেংনবা তাই অমদি রাজস্থান ফাওবা চত্তুনা মরূপ মপাং ওইবগী, মীনুংশিগী অমদি অচেৎপা ফিরেপগী মতিক অমুক হন্না থেংনবা তাই‍। রিতর্ন ওফ দি জঙ্গল অসি হৌজিক মতমগী ইন্দিয়াগী এনিমেসন্নি – মমাঙদা অমুক্তা উখিদ্রিবা মখলগীনি‍! পুক্নিং থৌগৎনিংঙাই ওইরবা ইমুং মনুং পুন্না নুংঙাইহনগদবা –হৌখ্রবা নীংশিং মমিশিং পুথোক্তুনা, ৱাখলদা ইথিল পীগদবা লমদমসিগী ফিল্ম অমনি‍।

******