“সাইলেন্ত কন্ভরসেসন: ফ্রোম মার্জিন্স তু দি সেন্তর” হায়না মিংথোনবা, নেস্নেল তাইগর কঞ্জার্বেসন ওথোরিতী (NTCA), মিনিস্ত্রী ওফ এনভাইরনমেন্ত, ফোরেস্ত এন্দ ক্লাইমেৎ চেঞ্জ (MoEF&CC) অমদি সঙ্কলা ফাউন্দেসন্না নই দিল্লীদা নবেম্বর ৩ – ৫, ২০২৩ ফাওবা পাঙথোকখিবা, অসিগুম্বা মখলগী অহানবা আর্ত একজিবিসন অসি মায় পাক্না লোইশিনখ্রে‍।

হায়রিবা একজিবিসন অসি ইকায়খুম্নরবা ভারতকী রাস্ত্রপতী, শ্রীমতী দ্রৌপদী মুরমুনা নবেম্বর ৩, ২০২৩দা হৌদোকখি‍। থৌরমদুদা তিল্লিবা মীয়ামদা ৱা ঙাংলদুনা রাস্ত্রপতীনা মহৌশাগী অকোয়বগী ফীভম ঙাক শেন্দুনা থম্নবখক্কী নত্তনা মীওইবা খুন্নাইনা হিংনবগীদমক মরুওইরিবা অইং অশাগী খল কায়থরকপগী ৱাফমগী পাম্বৈ পুরক্নবগী মায়কৈদা মপুং ফাবা অমদি লিংজেল মান্নবা খোঙথাং অমগী মথৌ তাবা ৱাফম থমখি‍। মহাক্কী ৱারোল অদুদা ত্রাইবেল অমদি অতৈ উমংদা লৈবা ফুরুপশিংগী চৎনবীবু কোনশিনবগী মরুওইবা ৱাফম থমদুনা মহৌশাগী পুন্না চৎমিন্নদুনা নুংঙাই য়াইফবা পুন্সি অমা কমদৌনা হিংগনি হায়বসিদা মখোয়দগী তমজবা য়াবা মমল নাইদ্রবা পারাশিং শিংথাখি‍।

রাস্ত্রপতীগী মফমদা কন্হা তাইগর রিজর্বকী মহার ফুরুপকী আর্তিস্ত অমনা শেম্বা মেমেন্তো অমা খুদোল তমখি‍। দোৎ/ ফুৎ থিনবা মওংদা য়েকপা বাঘদেব হায়না মিংথোনবা লাই অদুনা মতৌ করম্না মহারশিংনা নুমিদাংগী অতিয়া মখাদা কৈশিংবু মতম চুপ্পগী ঙাকথোকপিনবা লাই খুরুম্বগী চৎনবীবু মশক তাক্লি‍।

হৌদোকপগী থৌরমদুদা এনভাইরনমেন্ত, ফোরেস্ত অমদি ক্লাইমেৎ চেঞ্জকী কেন্দ্র মন্ত্রী, শ্রী ভুপেন্দর য়াবদ, MoS, MoEF&CC শ্রী অস্বিনি কুমার চৌবে, MoEF&CC সেক্রেতরী শ্রীমতী লীনা নন্দন, NHRC সেক্রেতরী জেনেরেল শ্রী ভারত লাল; DG (ফোরেস্ত) অমদি MoEF&CC গী স্পিসিএল সেক্রেতরী শ্রী সি.পি. গোয়ল, ADG (PT & E)/ মেম্বর সেক্রেতরী, NTCA শ্রী এস.পি. য়াদব অমদি লৈঙাক্কী অতৈ মকোক থোংবা ওফিসিএলশিংসু শরুক য়াখি‍।

মখোয়শিংগী মথক্তা, এম্বেসেদর/ হায় কম্মিস্সরশিং/ দিপ্লোমেৎশিং, আর্ত অমদি ৱাইল্দলাইফকী লমদগী মশক নাইবা মীওইশিংসু হৌদোকপগী থৌরমদা শরুক য়াখি‍।

একজিবিসন অদুদা গোন্দ, ভিল, পতচিত্র, খোবর, সোহরাই, ৱার্লি, অমদি অতৈ আর্ত মখলশিং মহুৎ শিন্দুনা ভারতকী স্তেত ১২দগী আর্তিস্ত ৪৩গী তোপ তোপ্পা হৈশিংবশিং উৎখি‍। উৎখিবা অদুনা ত্রাইবেল অমদি ভারতকী তাইগর রিজর্বশিংগী অকোয়বদা খুন্দারিবা উমংদা লৈবা ফুরুপশিংগা উমং অমদি লম্লক্কী শা-উচেক্কা লৈনরিবা অচেৎপা মরীবু উত্থোক্লি‍।

আর্তিস্তশিং অদু রাস্ত্রপতী ভবন্দা লাক্নবা পাউজেন্দুনা, মফমদুদা মখোয়না রাস্ত্রপতীগা উননবা তাঞ্জা ফংখি‍।

একজিবিসন অদুনা মীয়ামদা হায়রিবা ফুরুপশিং অসিগী আর্ত অমদি কল্চরশিংদা পুক্নিং লুপশিন্নবা তোপ তোপ্পা ফম্পাক অমা পীদুনা, মখোয়গী মনাৎ অমদি মচৎপু মনুং হুৎনা খঙবা ঙমহনখি‍। ৱীকেন্দ পুম্বা, দিল্লী NCR না তোঙান তোঙানবা লৈবাকশিং মহুৎ শিল্লিবা এম্বেসেদর অমদি হায় কম্মিস্নরনচিংবা মশক নাইরবা মীথুংশিংবু তরাম্না ওকখি‍। মখোয়না মখোয়গী ইমুং মনুংশিংগা লোয়ননা, আর্তিস্তশিংগা ৱারী ৱাতায় শাননবখক্কী নত্তনা তোপ তোপ্পা অয়েকপা লাই অমদি আর্তিফেক্তশিংবু লৈননবগী থৌরমদুদা শরুক য়াদুনা, ত্রাইবেল আর্তি অমদি হেরিতেজ য়োকখপদা অমদি ঙাক শেন্দুনা থম্বদা থৌদাং য়াখি‍। একজিবিসন অসিনা মীয়ামদা লমলক্কী শা উচেকশিং ঙাক শেনবগী মরুওইবা, তাইগর রিজর্বশিংনা থেংনরিবা শিংনবশিং অমদি মহৌশাগী খল কায়হন্দনা থম্বদা কৈশিংনা লৌরিবা মরুওইবা থৌদাংগী মরমদা খঙহন্নবগী ফম্পাক অমা ওইখি‍। আর্তৱর্ক য়োন্দুনা, একজিবিসন অদুনা শরুক য়াখিবা আর্তিস্তশিংগী শেন্মিৎলোনগ মপাঙ্গল হাপ্তুনা, মখোয়দা অতোপ্পা অমদি তুং কোইবা য়াবা পুন্সি হিংনবগী লম্বী ফংহনখি‍। শিংথানিংঙাই ওইবা ৱাফম অমদি য়োনবদগী লাকপা শেনফম অদু QR কোদকী খুত্থাঙদা আর্তিস্তশিংগী বেঙ্ক একাউন্ততা হকথেংননা থাজিনখিবা অদুনি‍।

আর্তিস্তশিং অদুনা ময়োল্লম অসিগী মশক নাইবা মফম খরা দে তুরদা কোয়দুনা মখোয়গী এক্সপরিএন্স হেনগৎহনখি‍। মখোয়গী থোঙচত্তা, লৈবাক্কী চাউথোকচফম অমদি কত্থোকপগী খুদম ওইরিবা ইন্দিয়া গেৎ, অমদি থৌদাংগী ৱাখল্লোন পোকহল্লিবা মফম অমা ওইরিবা কর্তব্য পথ অমদি অতৈ মফমশিংদা চৎপা য়াওখি‍। মসিনা আর্তিস্তশিংবু মফমশিংদুগী পুৱারী অমদি নাৎকী মরুওইবা মশকশিংগা মরী শম্নহন্দুনা ভারতকী কোনুংদা মপুং ফাবা এক্সপরিএন্স অমা পীবদা মতেঙ ওইখি‍।

একজিবিসন অসিনা আর্ত, কলচর, অমদি কৈ কনবগী পাউজেলবু হেন্না পাক চাউনা মীয়ামদা শন্দোক্নবগীদমক ভারতকী অতৈ অচৌবা ময়োল্লমশিংদা উৎগদবা সেরিজ অমগী অহৌবা ওইরি‍।

****