U Myntri Rangbah duh, u Narendra Modi u la plie ia ka bynta kaba ar jong ka prokram kaba heh bha ba iadei bad ki mar bam kaba la tip kum ka ‘World Food India 2023’ ha Bharat Mandapam, Pragati Maidan, ha New Delhi mynta ka sngi U la sam ruh ia ka jingiarap bai seng kam sha palat shi lak ki dkhot SHG ban pynkhlain ia ki Self Help Group. U Modi u la leit jngoh ruh ia ka exhibition ba don ha kane ka jaka. Kane ka prokram ka thmu ban pyni ia ka India kum ka ‘jaka Pdeng jong ka jingpynbiang mar bam ha ka pyrthei’ bad ban rakhe ia u snem 2023 kum ka International Year of Millets.

Ha ka jingai jingkren ha ka jingialang, u Myntri Rangbah duh u la iaroh ia ka teknoloji bad ki startup bad ki food street ba don ha kane ka sngi bad ong ba ka jingkhleh lang ia ka teknoloji bad ka jingbam kan plie lynti ia ka ioh ka kot ha ki por ban wan. Ha ki jingkylla jong ka por, u Myntri Rangbah duh u la kdew ia kawei na ki jingeh ba hakhmat jong ka jingshngain ha ka jingdon ka bam bad u la kdew ia ka jingkongsan jong ka World Food India 2023.

U Myntri Rangbah duh u Modi u la ong ba ki jingjop jong ka World Food India kilong ka nuksa ba khraw jong ka kam pynmih mar bam jong ka India namar la ithuh ia ka kum ka ‘kam kaba plié lad’. Ha ki 9 snem ba la leit, u Myntri Rangbah duh u la pyntip ba kane ka kam ka la khring ia ka jingbei tyngka nabar ri kaba palat T. 50,000 klur namar ki polisi jong ka Sorkar kiba iarap ia ki karkhana bad ki nongrep. Haba pynshai halor ka skhim PLI ha ka kam pynmih mar bam, u Myntri Rangbah duh u la ong ba ka ai jingiarap ia kito kiba rung thymmai ha ka kam. U la kdew ba ka kam ka dang iaid shaphrang ha ki hajar tylli ki projek hapoh ka Agri-Infra Fund na ka bynta ki jingdon jingem kiba iadei bad ki kam hadien ba la dep rep lyngba ka jingbei tyngka kaba palat T. 50,000 klur katba la pynshlur ruh ka jingpynbit pynbiang ia ki jingdon jingem ha ki kam ri dohkha bad kam ri jingri lyngba ka jingbei tyngka da ki hajar klur.

“Ki polisi jong ka sorkar kaba pynsuk ia ki nongbei tyngka ka la rah shakhmat ia ki kam ba iadei bad ki mar bam sha ki kyrdan ba thymmai,” la ong u Modi. Ha ki 9 snem ba la leit, u Myntri Rangbah duh u la pyntip ba ka bynta jong ki bam ba shna ha ka jingshalan ia ki mar rep jong ka India shabar ri ka la kiew na ka 13 percent sha ka 23 percent, kaba long baroh ka jingkiew kaba 150 percent ka jingshalan ia ki mar bam ba shna. “Mynta, ka India ka don ha ka kyrdan kaba 7 ha ka jingshalan mar kaba palat 50,000 million USD ka long ha ki mar rep,” u la pyntip. U la kdew ba kam don kano kano ka kam ha ka kam shna mar bam ha kaba ka India ka la kiew sted bad ong ba kalong kabu ksiar ia man ki kompani bad ki start up ba iadei bad ka kam shna mar bam. 

U Myntri Rangbah duh u la ai jingiaroh ia ki sienjam jong ka sorkar ha lyndet ka jingkiew sted ki kam shna mar bam jong ka India. U la kren shaphang ka jingthaw ia ka Agri-Export Policy ha ka sien ba nyngkong ha India, ka jingkyntiew ia ki kam logistic bad ki jingdon jingem ha kylleng ka ri, ka jingthaw palat 100 tylli ki jaka pdeng ha ki distrik ba pyniasoh ia ka distrik bad ki iew shabar ri, ka jingkyntiew ka jingdon ki Mega Food Park na ka 2 sha palat 20, bad ka jinglah pynmih mar bam ka India ka la kiew na ka 12 lak metric ton sha palat 200 lak metric ton, kaba long 15 shah ka jingkiew ha ki 9 snem ba la leit. U Myntri Rangbah duh u la ai nuksa ia ki mar rep ba la shalan na India ha ka sien ba nyngkong bad u la kren shaphang u black garlic na Himachal Pradesh, u dragon fruit na Jammu & Kashmir, ka powder soya milk na Madhya Pradesh, ki soh apple Karkitchoo na Ladakh, ka kait Cavendish na Punjab, ki tit Gucchi na Jammu, bad ka ngap khlaw na Karnataka.

Haba kren shaphang ka jingroi sted ki jaka sor ha India, u Myntri Rangbah duh u la kdew sha ka jingkiew ka jingdonkam ia ki mar bam ba shu song kaba la plié lad bha ia ki nongrep, ki start-up bad ki nongseng lajong barit baria. U Modi u la ban jur ka jingdonkam ia ka jingpynkhreh bha ia ki kam ban ioh jingmyntoi bha na kine ki kabu.

U Myntri Rangbah duh u la kdew ia lai tylli ki rishot ba kongsan jong ka jingkiew ka India ha ka kam pynmih marbam- ki nongrep barit baria, ki karkhana barit bad ki longkmie. U la kren shaphang ka jingpyndonkam pura ia ki Farmer Produce Organization lane ki FPO kum ka rynsan ban kyntiew ka jingiashim bynta bad ki jingiohnong jong ki nongrep barit baria. “Ngi la seng 10 hajar tylli ki FPO ba thymmai ha India, bad na kane 7 hajar ki dei kiba la pyndep,” u la pyntip. U la kren shaphang ka jingkiew ka jingioh lad ban rung sha ki iew bad ka jingioh lad ki nongrep ban iadon bynta bad ki jaka pynmih mar bam bad u la pyntip ruh kumba 2 lak ki karkhana ba rit ki dei kiba dang pyntreikam ha ki kam shna mar bam ban kyntiew ia ka jingiashim bynta ki karkhana kiba rit. “Ki Skhim kum ka ‘One District One Product’- ODOP ki ai ka jingithuh ba thymmai ia ki nongrep barit baria bad ki karkhana barit,” u la bynrap.

Ha ka jingkren shaphang ka roi ka par kaba ialam lynti da ki longkmie ha India, u Myntri Rangbah Duh u la kdew sha ka jingkiew ka bynta jong ki longkmie ha ka ioh ka kot kaba iarap ruh ia ki kam pynmih mar bam. U la ithauh ba palat 9 klur ngut ki longkmie ha India ki iadon bynta had ki self help group mynta. U la ong ba ki longkmie ki la ialam lynti ha ka science kaba iadei bad ki mar bam ha India da ki hajar snem, bad u la ong ba ka jingbun ki jait bam ha India ka wan na ka jingtbit bad ka jingstad jong ki longkmie jong ka ri. U la ong ba ki dei ki longkmie kiba ju pyniaid ia ka iew jong ki mar bapher bapher kum ki ashar, ki papad, ki chip, murabba bad kiwei kiwei na ki iing jong ki. “Ki longkmie jong ka ri ki don ka jinglong tynrai ban lamkhmat ia ki kam shna jingbam,” la ong u Modi da kaba pyntip ruh ba ka don ka jingkyntiew ia ki karkhana rit bad ki self help group ha baroh ki kyrdan na ka bynta ki longkmie. U Modi u la kren ruh shaphang ka jingsam ia ki bai seng kam kaba kot sha ki klur tyngka sha palat 1 lak ngut ki longkmie mynta ka sngi.

“Ka jingbun ki jait bam ha India ka long kum ka jingiar jong ka deiriti jong ka ri. Ka jingbun ki jait bam ha India ka dei kaba plié lad ia baroh ki nongbei tyngka na baroh kawei ka pyrthei,” la ong u Myntri Rangbah Duh. Da kaba kdew shaphang ka jingkiew ka jingpeit ia ka India mynta, u Myntri Rangbah Duh u la ong ba ki kam pynmih mar bam ha kylleng ka pyrthei ki lah ban ioh jingnang jingstad na ki rukom pynbiang bam jong ka India. U la ong ba ka rukom pynbiang bam jong ka India kaba iaineh naduh ki por mynshuwa ka wan na ka jingiaid lynti da ki hajar snem sha ka roi ka par. Ha ka jingkren shaphang kane ka jingiaineh jong ki rukom pynbiang kam jong ka India da ki hajar snem, u Myntri Rangbah Duh u la ong ba ki longshuwa jong ka India ki pyniahap ia ki rukom bam bad ka Ayurveda. “Ha ka Ayurveda, ki ju ong ba ka ‘Rita-Bhuk’ lane ka jingbam kum ka samoi, ‘Mit Bhuk’ lane ka bam kaba pynbiang ia ki jingdonkam jong ka met bad ‘Hit Bhuk’ lane ki bam kiba tei met ki long ki bynta kiba kongsan jong ka jingsngewthuh ka India ia ka jingstad science,” u la ong. U la kren ruh shaphang ka jingshalan ia ki mar bam khamtam ki musli musla na India sha kylleng ka pyrthei. Ha ka jingkren shaphang ka jingshngain ha ka jingioh mar bam ha kylleng ka pyrthei, u Myntri Rangbah Duh u la ban jur halor ka jingdonkam ia ki kam pynmih mar bam ba kin sngewthuh bad pyntreikam ia ki jingstad naduh ki por ba hyndai shaphang ki kam pynbiang bam kiba iaineh bad kiba tei met. U Modi u la ong ruh ba ka pyrthei ka rakhe ia u snem 2023 kum ka ‘International Year of Millets’. “Ki krai ki long shi bynta ka ‘thup ki mar bam ba tei met’ jong ka India bad ka Sorkar ka la ithuh ia kane kum ka Shri Anna”, la ong u Modi. Watla ki longshuwa na kylleng ka pyrthei ki la niewkor bha ia ki krai, bun kiba la klet ia ka jingpyndonkam ia kine ki mar bam ha ki ri bapher bapher ba kynthup ruh ia ka India ha kine ki phew snem ba la dep bad kane ka la ktah ia ka kot ka khiah, ka kam rep ba iaineh bad ka ioh ka kot kaba iaineh. “Ha ka jingialam lynti ka India, la sdang ia ka prokram ai jingtip shaphang ki krai ha kylleng ka pyrthei,” la ong u Myntri Rangbah Duh da kaba bynrap ba u ngeit skhem ba ki krai kin poi sha kylleng ka pyrthei kumba la poi ka International Yoga Day. U la kren shaphang ka jingpynkhreh ia ki jait bam na u krai na ka bynta kito kiba la wan sha India na ka bynta ka G-20 summit bad ruh ka jingdon ki mar bam ba la shna na ki krai ha ki iew. U Myntri Rangbah Duh u la kyntu ia ki nongwan sha ka ri ha kane ka por ba kin iakren shaphang ki lad ki lynti ban kyntiew ia ka bynta jong ki Shri Anna bad pynkhreh ia ka rukom treikam lang na ka bynta ka bha ka miat jong kito kiba trei ha kane ka kam bad ruh ki nongrep.

U Modi u la ong ba ka kynhun G-20 ka la ban jur halor ka kam rep kaba iaineh, ka jingshngain ha ka jingioh mar bam bad ka jingshngain ha ka bam kaba tei met ha ka Delhi declaration, bad ka la kdew ia ka bynta jong baroh kiba don bynta ha ki kam shna mar bam. U la ban jur halor ka jingpynkynriah ia ka rukom pynbiang mar bam sha ka jingpyniar ia ki jait bam bad ka jingpynduna ia ki jingsepei na ki kam rep. U la ban jur ruh halor ka jingpynduna ia ka jingsepei da kaba pyndonkam ia ka teknoloji. U la kyntu ia ka jingkyntiew ia ka jingpyndonkam ia ki mar kiba lah ban pyut ban pynmih mar bam khnang ban pynduna ia ka jingsepei bad khnang ban ai jingmyntoi ia ki nongrep bad ruh ban iada na ka jingkylla kynsan jong ki dor. Ha ka jingpynkut ia ka jingai jingkren jong u, u Myntri Rangbah Duh u la ban jur halor ka jingdonkam ban don ka jingryntih hapdeng ka bha ka miat jong ki nongrep bad ka jinghun jong ki nongthied mar. U la ong ba u ngeit skhem ba ki rai kiba wan na kane ka prokram kin bun ia ka nongrim na ka bynta ka lawei kaba don ka jingshngain ha ka jingbiang ki mar bam ha kylleng ka pyrthei.

U Myntri Sorkar Pdeng ba dei khmih ia ka tnat Consumer Affairs, Food and Public Distribution, u Piyush Goyal, u Myntri Sorkar Pdeng ba dei khmih ia ka tnat Food Processing Industries, u Pashupati Kumar Paras, u Myntri Sorkar Pdeng ba dei khmih ia ka tnat Rural Development, u Giriraj Singh, u Myntri Khynnah ka tnat Animal Husbandry, Dairying and Fisheries, u Parshottam Rupala, bad u Myntri Khynnah ka tnat Food Processing Industries, u Prahlad Singh Patel ki la iadon lang ha kane ka sngi ha ryngkat kiwei kiwei.

Ka Nongrim

Ban pynkhlain ia ki Self Help Group, u Myntri Rangbah Duh u la sam ia ka jingiarap bai seng kam sha palat 1 lak ngut ki skhot SHG. Kane ka jingiarap kan plié lad ia ki SHG ba kin ioh ia ki dor ba kham biang ha ki iew lyngba ka jingsong kaba kham bha ia ki mar bad ka jingpynbha shuh shuh ia ki mar ba ki pynmih. U Myntri Rangbah Duh u la plié paidbah ruh ia ka Food Street kum shi bynta ka World Food India 2023. Kane kan pyni ia ki jait bam bapher bapher na ki thain jong ka ri ha kaba 200 ngut ki nongshet ba la pyntbit kin iashim bynta bad pyni ia ki jait bam tynrai jong ka India.

Kane ka prokram ka thmu ban pyni ia ka India kum ka ‘jaka Pdeng jong ki mar bam ha ka pyrthei’ bad rakhe ia u snem 2023 kum ka International Year of Millets. Kan pynbiang ia ki rynsan na ka bynta ki jingkhaii mar da ki tnat Sorkar, kito kiba la pyntbit ha ki kam, ki nongrep, ki nongseng kam lajong bad kiwei kiwei ba kin iakren, sdang ia ki jingiatreilang bad peit ia ki lad bei tyngka ha ki kam kiba iadei bad ka kam rep bad ki mar rep. Ki jingiakynduh jong ki CEO kin peit bniah ia ki lad bei tyngka bad ka jingsuk ha ka jingtrei ha ki kam khaii.

Yn don ki bynta bapher bapher kiba pyni ia ka jingsaindur thymmai bad ka bor jong ki kam shna mar bam jong ka India. Ha kane ka prokram, yn don 48 tylli ki bynta halor ki bynta bapher bapher jong ka kam pynmih mar bam da kaba ban jur halor ka jingpynkupbor ha ka ioh ka kot, ka jingpynthikna ia ka jingbha ki tiar bad ki jingsaindur thymmai ha ki kor bad ki teknoloji.

Ha kane ka prokram yn wan iashim bynta ki briew na palat 80 tylli ki ri kiba kynthup ia ki CEO na ki kompani pynmih mar bam. Yn don ruh ka Reverse Buyer Seller Meet, ha kaba yn don palat 1200 ngut ki nongthied mar na palat 80 tylli ki ri. Ka Netherlands kan long ka ri kaba iatrei lang bad ka Japan ka dei ka ri ia kaba yn peit bniah ha kane ka prokram.