ওক্তোবর ২৪,২০২৩দা রক্ষ মন্ত্রী শ্রী রাজনাথ সিংহনা অরুনাচল প্রদেসকী ফোরৱার্দ পোস্তশিংদা চৎখ্রে অমসুং মফম অদুদা আমর্দ ফোর্সশিংনা ওপরেসনগী থৌরাং তৌরিবশিংগী ফিবম হকথেংননা য়েংশিনখ্রে। মহাক্না লাইন ওফ কন্ত্রোল(এল এ সি) পরিং য়াওনা ফ্রন্তলাইন মফমশিংদা লৈরিবা লান্মীশিংগা ৱারি শানখ্রে অমসুং মখোয়গা লোয়ননা দশেরা থৌরম পাংথোকমিন্নখ্রে। খুদোংচাদবা ফিবমশিংদা ঙমখৈগী শরুকশিংদা মথৌ পাংথোক্লিবা লান্মীশিংগী লাম্বা লৈত্রবা থৌনা অমসুং কৎথোকপা রক্ষ মন্ত্রীনা থাগৎপা ফোঙদোকখ্রে অমসুং মখোয়না মরম ওইদুনা মতম পুম্নমক্তা লৈবাক অসি অমসুং মসিগী মীয়াম অশোই-অঙাম থোক্তনা লৈরিবনি। মহাক্না হায়খি আর্মদ ফোর্সশিংগীদমক লৈবাক অসিনা চাউথোকচবা ফাওরি অমসুং মখোয়গীদমক লেপ্লি।

শ্রী রাজনাথ সিংহনা তৱাংদা লান্মীশিংগা লোয়ননা শাস্ত্রা পুজা পাংথোকখি অমসুং অফবনা ফত্তবা মাইথিবা পীবা অদু দশেরানা উৎলি হায়না মহাক্না অমুক হন্না ফোঙদোকখি। মহাক্না হায়খি বিজয়াদশ্মী কুহ্মৈগী ফিদম অসি থৌনা ফরবা লান্মীশিংগী অচুম্বা অমসুং ধর্মগী অহিংবা খুদম অমনি।

রক্ষ মন্ত্রীনা হায়খি মালেমগী ফম্পাক্তা ভারতকী মিংচৎ হেনগৎলক্লিবা অসিগী মরুওইবা মরম অমদি আর্মদ ফোর্সশিংগী থৌনা অমসুং কৎথোকপা অসিনি অমসুং লৈবাক অসি হৌজিক খ্বাইদগী শক্তি লৈরবা লৈবাকশিংগী মনুংদা য়াওরে। মহাক্না হন্দক ইতালিদা চৎলুবা অদুদা, মালেমগী অনিশুবা লাঞ্জাউদা মোন্তোনে মনিং তমহন্নবা ইতালিগী লান্দা শরুক য়াখিবা নাইক যাসৱান্ত ঘারগে অমসুং ভারতকী অতোপ্পা লান্মীশিং ইকায়খুম্নবা উৎনবা শাখিবা মোন্তোনে মেমোরিএলদা মহাক চৎখি। মেমোরিএল অদুদা ভারতমচাশিং খক নত্তনা ইতালিগী মীয়াম্না ইকায়খুম্নবা উৎখিবা অসি ভারত লান্মীশিংগী থৌনা ফবা অদু মালেমগী ওইনা শকখঙবগী খুদম অমনি।

মহাক্না হায়খি মালেমগী হৌজিক ওইরিবা ফিবম অসিদা লৈবাক অসিনা মশাগী ওইনা ঙাক-শেনগী খুৎলায়শিং শাদুনা লৈবাক অসিগী ঙাক-শেনগী খুৎলায় মপাঙ্গল কনখৎহনবা নত্তনা অতোপ্পা পাম্বৈ অমতা লৈতে। প্রধান মন্ত্রী মোদীগী লমজিং মখাদা ঙাক-শেনগী লমদা অত্মানির্ভর ফংনবা মাইকৈদা অচৌবা থবকশিং পায়খৎলে। হান্না ঐখোয়গী লান্মীগী মপাঙ্গল কনখৎহন্নবা ঐখোয়না মপান লৈবাকশিংদগী খুৎলায়শিং লৈরম্বনি। ঙসিদি লৈবাক অসিদা মরুওইবা খুৎলায়শিং অমসুং প্লেতফোর্মশিং শারে। মপানগী কম্পেনিশিং মখোয়গী তেক্নোলোজি শরুক য়ানবা অমসুং ভারত্তা খুৎলায়শিং শানবা পুক্নিং থৌগৎলে। ২০১৪দা দিফেন্স এক্সপোর্তকী ভেলু লুপা করোর ১,০০০ ওইরমখি অমসুং হৌজিক ঐখোয়না লুপা করোর লিশিং কয়াগী ঙাক-শেনগী খুৎলায়শিং মপান্দা থাদোক্লে।

রক্ষ মন্ত্রীনা তৱাং ৱার মেমোরিএলদা চৎখি অমসুং ১৯৬২গী  লালদা থৱায় কৎখ্রবা অথৌবশিংগী মফমদা লৈ কত্তুনা ইকায়খুম্নবা উৎখি। মহাক্কী খোঙচৎ অদুদা চীফ ওফ আর্মি স্তাফ জেনেরেল মনোজ পান্দে; জেনেরেল ওফিসার কম্মান্দিং-ইন-চীফ ইস্তর্ন কমান্দ লেপ্তনেন্ত জেনেরেল আর.পি কলিতা; জি.ও.সি, ৪ কোর লেপ্তনেন্ত জেনেরেল মনিস ইরি অমসুং ভারত লান্মীগী অতোপ্পা সেনিয়ার ওফিসারশিং লোয়নখি।

রক্ষ মন্ত্রীনা অসামগী তেজপুরদা লৈবা ৪ কোর হেদক্বার্তরসতা চৎখি। মহাক্না লৈবাক অসিগী খ্বাইদগী নোংপোক থংবা শরুক্তা ওপরেসনগী থৌরাং তৌরিবশিং হন্না য়েংশিনখি। এল.এ.সি পরিংদা ইনফ্রাস্ত্রকচর শেমগৎলিবশিং অমসুং ফ্রান্তলাইন্দা লৈরিবা লান্মীশিংগী শীজিন্নরিবা অনৌবা লালগী খুৎলায়শিং অমসুং তেক্নোলোজিগী মতাংদা রক্ষ মন্ত্রীদা পাউদমখি।  অরুবা ফিবম কয়াগী মখাদা কোরশিংগী রেঙ্ক খুদিংমক্না পায়খৎলিবা থাগৎনিঙাই ওইরবা থবকশিং মহাক্না শিংথাখি।

*****