কেন্দ্রগী স্পোর্তস মন্ত্রী শ্রী অনুরাগ সিংহ থাকুরনা ঙসি নই দিল্লীদা পাংথোকপা থৌরম অমদা এসিয়ান গেম্স 2022দগী শুতিং, সৈলিং, ৱুশু, তেনিস কন্তিজেন্তশিংগী হলক্লবা এথেলেৎশিংবু ইকায় খুম্নবা উৎখ্রে।

থৌরম অদুদা ৱা ঙাংলদুনা শ্রী অনুরাগ সিংহ থাকুরনা এথেলেৎশিংবু এসিয়ান গেম্সতা মখোয়গী থোয়দোক হেন্দোকপা পর্ফোমেন্সকীদমক থাগৎপা ফোংদোকখি। মহাক্না হায়খি মদুদি মখোয়গী এচিবমেন্তশিংনা লৈবাক অসিবু চাউথোকহল্লে। মহাক্না এথেলেৎশিংদা থাজবা অসিসু পীখি মদুদি সরকারনা মখোয়বু মখোয়গী খল্লবা স্পোর্ততা মতোল লোম্নবগীদমক মথৌ তাবা তেংবাং পুম্নমক পীনবা ৱাফম থম্লি। মহাক্না হায়খি, “ঐহাক্না শান্নরোই পুম্নমকপু য়াইফ পাউজেল পীজরি অমসুং ঐহাক্না থাজবা থম্লি মদুদি ফাইনেল (এসিয়ান গেম্সকী) পাংথোকপা মতমদা ভারতকী শান্নরোইশিংনা মেদল মশিং য়াম্না মফমদুদা শরুক য়াগনি। অথুবা মতমদা পেরিস ওলেম্পিক পাংথোক্লগনি অমসুং পুম্নমক্না মদুদা মীৎয়েং থম্লগনি। মশান্না পুম্নমক্তা মখোয়গী চাদা 100 পীনবা প্রধান মন্ত্রী মোদীনা মতম পুম্নমক্তা শান্নরোইশিংবু পুক্নিং থৌগৎলি।”

মহাক্না এথলেৎশিং সপোর্ত তৌবদা ফেদরেসনশিং অমসুং তি.ও.পি.এস. অমদি খেলো ইন্দিয়াগুম্বা সরকারগী স্কিমশিংগী মরুওইবগী মতাংদসু ঙাংখি। মহাক্না হায়খি, “ফেদরেসনশিংনা লৌগদবা অচৌবা থৌদাং লৈরি। তি.ও.পি.এস. অসি 2014দা এথেলেৎশিং খুদোং চাহন্নবা অমসুং স্পোর্তসতা মখোয়গী মীৎয়েং লেংহনদনবা মীৎয়েং অমগা লোয়ননা হৌদোকখি। খেলো ইন্দিয়া স্কিমনসু তেংবাং অদুমক ফংহল্লি। হৌজিক ফাওবা পাংথোকখিবা এসিয়ান গেম্সশিংদা মেদল মশিং য়াম্না লৌরকপগীদমক ঐহাক্না শুতিং ফেদরেসন (এন.আর.এ.আই.)বু নুংঙাইবা ফোংদোকচরি। 2002দা শুতিংদা ঐখোয়না মেদল অনি ফংখি অদুবু হন্দক ঐখোয়না মেদল 22 ফংলে।”

মন্ত্রীনা মখা তাখি “পেরিস সাইকলদা ঐখোয়না শুতিংদা পুন্না লুপা করোর 38 চাদিং তৌরে। ৱুশুগীসু এসিয়াদকী মাংওইননা লুপা করোর 1.8গী কেম্প অমা লিংখৎখি। হৌজিক গেম্স অসি চত্থগদবা নুমিৎ 7 ৱাৎলিবা অসিদা ঐহাক্না হৌজিকসু থাজবা থম্লি মদুদি ঐখোয়না হৌজিক ফাওবগী খ্ৱাইদগী য়াম্বা মেদল তেল্লী ফংগনি।”

এথেলেৎশিংনসু হাংঝৌ গেম্সতা মায় পাকপা ফংবদা মখোয়বু মতেং পাংবীবগীদমক সরকার অমসুং মখোয়গী সপোর্ত তিমশিংদা তৌবিমল খংবা ফোংদোকখি।

ৱুশুদা সিলভর মেদল ফংলবী রোশিবিনানা হায়খি, “ঐখোয়বু পোজিসন অসি ফাওবা য়ৌহনবীবগীদমক ঐখোয়না কোচ, সাই, ফেদরেসনগী লমন তোনশিনজরে। ঐহাক সাই এন.সি.ও.ই. ইম্ফালদা ত্রেন তৌরখি অমসুং চহি চুপ্পা য়েংশিনবীরকখি। হৌজিক ঐহাক্কী পান্দমদি মথংদা গোল্দ লৌবনি।”

50m 3p ইন্দিবিজুয়েল গোল্দ মেদালিস্ত সিফ্ত কৌরনা হায়খি, “মসি ঐহাক্কী অহানবা এসিয়ান গেম্স ওইখি অমসুং ঐহাক্কী স্কোর অসি ৱার্ল্দ রেকোর্দ অমা ওইগনি হায়বা ঐহাক খংখিদে। খেলো ইন্দিয়া স্কিম অসি ঐহাক্কীদমক খ্বাইদগী কানবা ওইরি।”

এসিয়াদতা ব্রোঞ্জ মেদল অমা লৌরকখিবা তোকিয়ো ওলেম্পিয়ান সেলর বিষ্ণু সারাবানন্না হায়খি, “মসি ঐখোয় পুম্নমক্কী ওইনা অথোইবা এসিয়ান গেম্স অমনি। ঐহাক্না কোচশিং, ওফিসিয়েলশিং অমসুং অখন্ননা ঐখোয়বু মতম পুম্নমক্তা সপোর্ত তৌবীরিবা ঐখোয়গী ইমুং-মনুংবু থাগৎচরি। ঐহাক ইশামক অমসুং অতোপ্পা সেলরশিংনা ভারতকী মেপতা হি হোন্নবা হোৎনরি। ঐহাক্না সাই এ.আর.এন. পুনে অমসুং তেংবাংবীরকপা পুম্নমকপু থাগৎচরি। হৌজিক ঐখোয় পুম্নমক মরুওইবা পান্দম পেরিসতা মীৎয়েং থম্লসি।”

নিংথৌকাবা নুমিৎতা পাংথোকখিবা থৌরম অসিদা য়ুথ এফিয়ার্স অমসুং স্পোর্তস মন্ত্রালয়, স্পোর্তস ওথোরিতী ওফ ইন্দিয়াগী মকোকথোংবা ওফিসিয়েলশিংগা লোয়ননা এথেলেৎশিংগী ইমুং-মনুং অমসুং মরূপশিংনা শরুক য়াখি।

****