Ka ri ka dang rakhe ia ka tamasa kaba 14 sngi jong ka jingkhuid lyngba ka Swachhata Hi Seva (SHS) 2023 campaign hapoh ka phang ‘Ka India kaba lait na ka jingbret niut pathar’. Da kaba pyni ia ka jingskhem jingmut bad ka jingiatylli, bad da ka jingioh mynsiem na ka jingkyntu u Myntri Rangbah Duh, u Narendra Modi na ka bynta ka jingkhuid, haduh mynta, palat 32 klur ngut ki briew ki la iashim bynta ha kane ka campaign kaba ha baroh kawei ka ri ha kine ki 14 sngi ba la dep, ha kaba ka jingiashim bynta ka long kumba 2.3 klur ngut ki briew ha ka shi sngi ha kylleng ka ri. Kane ka ‘jan Andolan’ ka la wanrah ia ki jingjop ia ka ri kum ka jingithuh ia 75% ki shnong ka India kum kiba la long ODF Plus lane ka jingpynneh ia ka jinglong Open Defecation Free jong kine ki shnong ha ryngkat ki jingpynbeit ba pynkhuid ia ki jaboh bad ki um jakhlia. Ka pyni ruh ia ka jingkut jingmut jong ka imlang sahlang bad ka Sorkar na ka bynta ka jingkhuid jingsuba.

Ka campaign mynta u snem ka la ioh ia ka jingiashim bynta kaba shitrhem jong 32 klur ngut ki briew na kylleng ka ri kiba la wan iashim bynta ha kine ki 14 sngi ha kaba ka jingiashim bynta ka long da 2.3 klur ki briew ha ka shi sngi. Na kine, jan 15 klur ngut ki briew ki la iashim bynta ka ka Shramdaan, ha kaba ki la wan trei mon sngewbha ha 3.68 lak tylli ki kam SBM. Kine ki kynthup ia ka jingpynkhuid ia jan 5300 tylli ki jaka khap duriaw, ka jingkhyllie im biang ia ki khap pud wah, ka jingpynkylla ia palat 10,700 ki jaka theh niut, ka jingkyntiew ia 2400 tylli ki jaka jngoh kai bad ki jaka ba kongsan, bad ruh ka jingpynbha ia palat 93,000 tylli ki jaka paidbah. Shuh shuh, la dep pynkhuid ia palat 12,000 tylli ki jaka shong um, bad pynbha ia palat 60,000 tylli ki jingtei bad ruh la pynkhuid jan 47,000 tylli ki jaka ba ki briew ki ju bret niut. Kine baroh ki pyni ia ka jingkut jingmut bad ka bor jong ka ‘Jan Andolan’ ban wanrah ia ka jingkylla kaba stet.

Ka jingpynkut jong ka jingrakhe mynta u snem kan long ha ka 1 tarik u Risaw, ha kaba baroh kawei ka Sorkar bad ruh ki briew jong ka ri kin iatrei lang ban pynlong ki jingpynkhuid ha ki jaka bapher bapher kum shi bynta ka ‘Ek Tareekh Ek Ghanta Ek Saath’ – ka jingkyntu ia baroh kawei ka ri na ka bynta ka ‘Shramdaan for Swachhata’ kaba shi kynta kaba ialam lynti da ki briew ha ka por 10 baje mynstep. Kane ka jingkyntu da u Myntri Rangbah Duh ka ban jur ia ka jingdonkam jong ka jingkhuid jingsuba ha baroh ki bynta jong ka imlang sahlang. Ha ka bynta kaba 105 jong ka Mann Ki Baat, u Myntri Rangbah Duh u la ai jingkyntu ba kan don ka Shramdaan na ka bynta ka Swachhata kaba 1 kynta ha ka por 10 baje mynstep ha ka 1 tarik u Risaw ka ban long ka ‘Swachhanjali’ ia u Bapu ha ka sngi shuwa ka Jayanti jong u. U Myntri Rangbah Duh u la ong, “Yn pynlong ia ka prokram kaba heh na ka bynta ka jingkhuid ha ka 1 tarik u Risaw lane ka Sngi u Blei ha ka por 10 baje mynstep. Phi ruh phi dei ban ai ka por jong phi ban iarap ha kane ka campaign kaba iadei bad ka jingkhuid. Phi lah ban iashim bynta ha kane ka campaign na ka bynta ka jingkhuid ha ka surok, ka dong ne ka park, ka wah, ka jaka shong um lane kano kano ka jaka paidbah.”

Ka bynta kaba kongsan jong ka campaign mynta u snem ka dei ka jingpyllait lang ia ka SHS Campaign da lai ngut ki Myntri Sorkar Pdeng kaba dei ka dak jong ka jingiatreilang jong ki tnat bapher bapher ban pynurlong ia ka ‘Swachh Bharat’ kumba la thmu da u Myntri Rangbah Duh, u Narendra Modi. Ha tang shi taiew hadien ba la plie ia ka campaign, u Myntri Sorkar Pdeng ba dei khmih ia ka tnat Jal Shakti, u Gajendra Singh Shekhawat u la pynbna ia ka jingkot 75% ka jingdon ki shnong ODF Plus ha kylleng ka ri.

Ka rukom treikam jong baroh kawei ka sorkar ka dei kaba paw shai, ha ryngkat ka jingpyniahap ia ki sienjam hapdeng ka Swachh Bharat Mission- Rural bad Urban, bad ki don ruh shibun ki sienjam na kiwei kiwei ki tnat Sorkar ban pynthikna ia ka ‘Swachh Bharat’. Ka tnat Tourism ka la sdang ia ka Travel for LiFE for Cleanliness Campaign ha 108 tylli ki jaka, ka tnat Information & Broadcasting ka la pynthikna ia ka jingpyni ia ka SHS video ha baroh ki cinema jong ka ri katba ka tnat Telecom ka pynsawa ia ka SHS ringtone ha baroh ki mobile network. Ka tnat Civil Aviation bad Railway Board ki kyrshan ia ka SHS campaign ha baroh ki kad liengsuin bad ki jaka iaid rel katba ka ASI ka la pynthaba ia baroh ki jaka kyrpang kiba heh da ka SHS branding. Ka tnat School Education & Literacy ka la wanrah ia ki kam pynkhuid sha baroh ki skul sorkar bad ki sluk shimet jong ka ri katba ka tnat Higher education ka pynshlur ia ki kolej bad ki skul bah ba kin pynsaphriang ia ka khubor jong ka jingkhuid. Man ka tnat ki dang kyrshan bad shim bynta ha ka SHS campaign ha ki rukom kiba kyrpang.

Sa kawei ka bynta kaba kyrpang ka dei ba kane ka campaign ka dang trei na ka bynta ka bha ka miat jong ki nongpynkhuid - ki Safai Mitra. La pynlong ia ki health check-up camp bad ki yoga shivir na ka bynta ka bha ka miat jong ki. Baroh ki dkhot jong ka imlang sahlang ruh ki dang wan shakhmat ban pynlong ia ka SHS kaba jop. Ki SHG jong ki longkmie ki la wan shakhmat bad bun na ki ki la shimti ia ki shnong na ka bynta ka Shramdaan. Ki samla ha ki kolej bad ki skul ki la iashim bynta ha ka jingpynkhuid ia ki nongbah, ki shnong ha kaba ki kolej ki la shimti ruh ia ki shnong. Ki tymmen ki kro ki la leh ia ka Shramdaan ha ki jaka khap pud duriaw, ki park, ki jaka paidbah bad ki la shim ia la ka bynta na ka bynta ka imlang sahlang kaba khuid. Ki nongialam niam ha ki jaka mane ki dang pynlong ia ka Shramdaan. Ki kynhun bapher bapher kum ka Chambers of Commerce, Red Cross, ki kynhun kiba iadei bad ka khaii pateng bad ka rep ka riang ki la iashim bynta ha ki kam pynkhuid.

Ki kam ban khring ia ki briew ki kynthup ka Swachhata Pledge, ki jingmaren Swachhata bad ki jingiasnohkti ki briew, ki jingpynkhuid ha ki ophis (ka jingpyniasoh bad ka campaign kyrpang 3.0 jong ka DAPRG), ki lynti bad ki steshon rel, ki jaka ba jan ia ki kad liengsuin, ki jaka jngoh kai, ki jaka leit pilkrim ha ka jingpyniasoh bad ka World Tourism Day, ki jaka kyrpang ASI, ki jaka pule, ki surok bah bad ki jaka ba jan ia kine, ki zoo, sanctuary, park bad kiwei kiwei ki jaka ba bun briew, ka jingsmai ban tehlakam ia ka jingpyndonkam plastic bad ki prokram ha kaba ym pynmih jingjaboh. Kine ki sienjam ki la khyllie im ia ka mariang bad ki la wanrah ia ka jingkhuid bad ka koit ka khiah. Ka dei ka bor jong ka 'Team India.'

Ka long kaba shai ba ka Swachhata Hi Seva, 2023 campaign ka la khyllie im biang ia ka jingtrei mon sngewbha jong ki briew. Ka la pynurlong ia ka thong jong ka campaign ba baroh kin shim ia ka jingkhuid kum ka kamram jong ki.

Kane ka campaign ka pyni ba lah ban leh ia ki kam kiba khraw haba ki briew, ka imlang sahlang bad ki kynhun ka Sorkar ki iatrei lang na ka bynta kawei ka thong kum ka ‘Swachh Bharat’ Mission.

****