પ્રધાનમંત્રી શ્રી નરેન્દ્ર મોદીએ આજે ગુજરાતમાં આકાશવાણી દાહોદ એફએમ રિલે સ્ટેશન પ્રોજેક્ટનો શિલાન્યાસ કર્યો હતો. પ્રધાનમંત્રીએ રાજ્યમાં બોડેલીમાં આયોજિત એક કાર્યક્રમમાં 10 કિલો વોટની એફએમ રિલે સ્ટેશન માટે શિલારોપણ તકતીનું અન્ય પ્રોજેક્ટ્સની સાથે વર્ચ્યુઅલ અનાવરણ કર્યું હતું.

આ સ્ટેશન અંદાજે રૂ. 11.00 કરોડના ખર્ચે સ્થાપવામાં આવશે અને દાહોદના આદિવાસી જિલ્લાના આશરે 75 ટકા વિસ્તારને આવરી લેતા અંદાજે 55 કિ.મી.ના ત્રિજ્યાના વિસ્તારને આવરી લેવા વ્યૂહાત્મક રીતે સ્થિત છે. એટલું જ નહીં, આ ટ્રાન્સમિટર આંશિક રીતે મધ્ય પ્રદેશના પડોશી આદિવાસી જિલ્લાઓને પણ આવરી લેશે, જેમાં અલીરાજપુર અને ઝાબુઆનો પણ સમાવેશ થાય છે.

દાહોદ સ્ટેશન શરૂ થવાથી ગુજરાત અને મધ્યપ્રદેશના 25 લાખથી વધુ રહેવાસીઓને ઉચ્ચ ગુણવત્તાવાળા એફએમ પ્રસારણની સુવિધા પ્રાપ્ત થશે. આ વિકાસ માત્ર આ પ્રદેશના સાંસ્કૃતિક અને માહિતીની ટેપસ્ટ્રીને જ સમૃદ્ધ બનાવતો નથી, પરંતુ તે જે સમુદાયોને સેવા આપે છે તેમના માટે વધુ સારા સંદેશાવ્યવહાર અને જોડાણની સુવિધા પણ આપે છે.

આ ઉપરાંત 39 કરોડથી વધુના ખર્ચે વિવિધ વીજ ક્ષમતા ધરાવતા ભુજ, ભાવનગર, દ્વારકા, રાધનપુર, અને દેસા સહિતના મહત્વના સ્થળોએ એફએમ ટ્રાન્સમિટર લગાવવાની કામગીરી પણ પ્રસાર ભારતી કરી રહી છે. આ પ્રોજેક્ટ્સ માહિતી અને પ્રસારણ મંત્રાલય દ્વારા ભંડોળ પૂરું પાડવામાં આવતી બ્રોડકાસ્ટ ઇન્ફ્રાસ્ટ્રક્ચર નેટવર્ક ડેવલપમેન્ટ સ્કીમનો એક ભાગ છે. જ્યારે આ પ્રોજેક્ટ્સ પૂર્ણ થશે અને કાર્યરત થશે, ત્યારે રાજ્યમાં એફએમ કવરેજ વધીને રાજ્યના આશરે 65 ટકા વિસ્તાર સુધી પહોંચશે અને તેની વસતિના આશરે 77 ટકા સુધી પહોંચવામાં સક્ષમ બનશે. આ પ્રોજેક્ટ્સ વ્યાપક પ્રેક્ષકોને ગુણવત્તાયુક્ત રેડિયો મનોરંજન અને માહિતી પ્રદાન કરવા તરફના નોંધપાત્ર પગલાને ચિહ્નિત કરે છે.

આ અગાઉ આ વર્ષે એપ્રિલ મહિનામાં પ્રધાનમંત્રી નરેન્દ્ર મોદીએ દેશભરમાં આકાશવાણી એફએમની હાજરીને મજબૂત કરતા 91,100 ડબલ્યુ એફએમ ટ્રાન્સમીટરનું ઉદ્ઘાટન કર્યું હતું. અત્યાર સુધી, આકાશવાણી ભારતમાં કુલ 613 કાર્યરત એફએમ ટ્રાન્સમીટર ધરાવે છે, જે દેશના લગભગ 59.2 ટકા વિસ્તારને એફએમ રેડિયો સેવાઓ પૂરી પાડે છે અને લગભગ 73.5 ટકા વસતીને સેવા પૂરી પાડે છે. આ ઉપરાંત મીડિયમ વેવ પર કામ કરતું આકાશવાણી એએમ નેટવર્ક પહેલાથી જ દેશના 88 ટકા વિસ્તાર અને 95 ટકા વસ્તીને આવરી લે છે.

આકાશવાણી એફએમ દેશભરના લાખો શ્રોતાઓને ઉચ્ચ ગુણવત્તાયુક્ત અને વૈવિધ્યસભર સામગ્રી પહોંચાડવા માટે પ્રતિબદ્ધ છે. સમૃદ્ધ ઇતિહાસ અને દૂરંદેશી અભિગમ સાથે, આકાશવાણી એફએમ મનોરંજન, માહિતી અને સાંસ્કૃતિક સંવર્ધનનો વિશ્વસનીય સ્રોત બની રહ્યો છે.

CB/GP/JD