Ka President jong ka India, ka Droupadi Murmu ka la pynkup burom ia ki nongjop jong ka bynta kaba saw jong ka India Smart Cities Award Contest (ISAC) 2022 ha Indore mynta ka sngi, ka 27 tarik u Nailur 2023. Ka ISAC ka dei kaba pynlong hapoh ka Smart Cities Mission, ka tnat Housing and Urban Affairs jong ka Sorkar India naduh u snem 2018. Ha kane ka Conclave la wan iashim bynta da ki heh ki hain kiba kynthup ia u Mangubhai C. Patel, Lat ka jylla Madhya Pradesh, u Hardeep Singh Puri, Myntri ka tnat MoHUA, u Shivraj Singh Chouhan, Myntri Rangbah ka jylla Madhya Pradesh, u Kaushal Kishore, Myntri Khynnah ka tnat MoHUA bad u Bhupendra Singh, Myntri ka tnat Urban Development jong ka Sorkar Madhya Pradesh.

Ha ka jingai jingkren jong ka, ka President ka la ong ba ka dap da ka jingkmen halor ka jingkiew ka jingbei tyngka ha ka jingkyntiew ia ki jaka sor. Ka la iaroh ia kane ka sienjam bad ka la ong ba ka jingbei tyngka jong ka ri ha ki kam ban kyntiew ia ki jaka sor ka la kiew shiphew shah ha kine ki shiphew snem ba la dep. “Ka bynta jong ka Smart Cities Mission ban pyntreikam ia ki rukom treikam ba biang tam bad ka jingtei ia ki kam khaii pateng kiba iaid iew ka long kaba kongsan bha,” ka la ong.

Ka President ka la kren ruh shaphang ka jingpeit ka G-20 ia ki kam kiba iadei bad ka jingkyntiew ia ki jaka sor. Ka la ong ba ka Urban 20 kaba dei ka kynhun hapoh ka G20 ka la pyrshang ban wanrah ia ka jingiasoh hapdeng ki nongbah. “Lyngba kane, la pyni ruh ba ka jingpyniaid ia ki jaka sor ka don ka bynta kaba heh ha ka jingioh ia ka roi ka par kaba iaineh. Kumta, ngi dei ban ioh jinghikai na ki rukom treikam ba biang tam bad ruh ki rukom khaii pateng kiba biang tam kiba ngi iohi ha ki nongbah bapher bapher jong ka pyrthei bad ngi dei ruh ban iasam ia ki rukom treikam ba biang tam jong ngi bad kiwei kiwei ki ri. Ka jingiatreilang ha ki shnong bad ha ka pyrthei ka long kaba donkam bha na ka bynta ka roi ka par kaba iaineh,” ka la ong.

Ka President ka la kren shaphang ka jingkongsan jong ki Integrated Command and Control Center (ICCC) ha ki smart city ha kaba ka la ong baroh 100 tylli ki smart city ki don ia ki ICCC ki ba shim ia ki rai da kaba pyndonkam ia ka data. Ki CCTV surveillance camera ki iarap ban pynkhlain ia ka jingtreikam ka ain mynta. “Hynrei ka long kaba donkam ban shim ia ki sienjam kiba kham khlain khamtam ban pynthikna ka jingshngain jong ki longkmie. Nga ngeit skhem ba ki sienjam kiba dang shim ha kine ki 100 tylli ki smart city kin iarap bha ia palat 4800 tylli ki nongbah,” ka la ong.

Ha kane ka sngi, ka President ka la kyntu ia ki Mayor bad ki Municipal Commissioner na ki nongbah bapher bapher jong ka ri ba kin iaid shaphrang da ka bor bad ka jingskhem jingmut kaba thymmai. “Nga kyrmen ba baroh phin pyndonkam ia ka jingtip shaphang ki rukom treikam kiba jop ha kane ka conclave ha ki nongbah jong phi. Da kaba leh ia kane, kane ka prokram kan long kaba don jingmut shuh shuh”, ka la ong.

Ha ka jingai jingkren jong u, u Myntri Sorkar Pdeng uba dei khmih ia ka tnat Housing & Urban Affairs, u Hardeep Singh Puri u la kren shaphang ka jingthmu u Myntri Rangbah Duh, u Narendra Modi ba wanrah ia ki jingkylla na ka bynta ki jaka sor ba la saindur bha. U la ong ba ka Smart Cities Mission ka dei ka dak jong ka jingthmu u Myntri Rangbah Duh ban don ki ‘Jaka Sor ba Thymmai ka India’ bad ba kane ka dei ka bynta kaba kongsan ha ka jingthmu ban don ka India kaba la kiew shaphrang shuwa u snem 2047.

U Puri u la ong ba ka Smart Cities Mission ka la wanrah ia ka jingsaindur tymmai ha ki kam kiba iadei bad ki jaka sor ka India bad ka la pynbiang ruh ia ki jingdon jingem ha ryngkat ka jingpynkhlain ia ki jingai jingshakri ha ki 100 tylli ki nongbah ba heh tam jong ka India. Ka la wanrah ia ki jingiatreilang hapdeng ka Sorkar, ki kynhun na kylleng ka pyrthei, ki nongbah, ki riewshemphang bad ki karkhana, u la ong.

U la ong ruh ba ka la aibor ia ka kyrdan kaba lai jong ka jingsynshar ha ka ri da kaba pynbiang ia ka jingkyrshan ha ki kam pyniaid bad ki kam teknikal lyngba ki Special Purpose Vehicle (SPV) kiba la wanrah ia ka jingtei ia ki jingdon jingem ha ka rukom kaba peit bniah ia ka bha ka miat jong ki briew bad ha ka rukom kaba pynkhreh na ka bynta ka lawei.

U la ong ba ki 100 tylli ki Integrated Command and Control Centre (ICCC) kiba treikam mynta ki plie lad ban shim mardor ia ki rai lyngba ka jingpyndonkam ia ki camera, ki tiar IOT, ki sensor bad kiwei kiwei ki teknoloji bad u la ong ba kine ki la long ki ‘Jaka Pdeng’ ha ka por jong ka khlam kiba la ailad ia ki nongpyniaid kam ha ki nongbah ba kin lum jingtip, pynkhreh ia ki rukom treikam bad pyntreikam ia ki kam kiba iadei bad ki nongshong shnong.

Ha ka jingkren shaphang ki jingjop jong ka Smart Cities Mission, u Myntri u la ong ba haduh 7,934 tylli ki projek kiba kot sha ka T. 171,044 klur ki dei kiba la sanction bad 6,069 tylli ki projek kiba kot sha ka T. 1,10,794 klur ki dei kiba la pyndep hapoh ka Mission. Sa 1,865 tylli ki projek kiba kot sha ka T. 60,250 klur ki dei kba thmu ban pyndep shuwa u Jylliew 2024. Shuh shuh, ki projek PPP kiba kot sha kumba T. 25,000 klur ki dei kiba la pyndep haduh mynta. U la ong ba hapoh ka Mission, la dep shna palat 2,700 km ki smart road, la dep shna jan 7,000 tylli ki smart classroom bad la dep pyndait palat 50 lak ki sharak LED/solar bad la dep tei palat 300 tylli ki smart health centre. La dep pynbiang 1,884 tylli ki emergency call box bad 3,000 tylli ki jingpynsawa paidbah bad ki lad pyniaid kali ban wanrah shuh shuh ia ka jingshngain na ka bynta ki paidbah, u la ong.

U la iaroh ia ka nongbah Indore kaba biang bha ka jingpyniaid ia ka jaka sor. U Hardeep S Puri u la ong ruh ba ka Indore ka dei kaba ju jop ia ki khusnam. Ka la prat lynti ruh ia ki jingsaindur tymmai ha ki kam pynkhuid niut, ki carbon credit, digital technology bad ki jaka paidbah. Ka Indore ka la dei ka nuksa ia ki nongbah ka India bad ruh ia kito ha kiwei kiwei ki bynta jong ka pyrthei ha kaba iadei bad ka jingpyniaid ia ka jaka sor bad ka jingiashim bynta ka imlang sahlang.

U Myntri u la kitbok kitrwiang ia ki 31 tylli ki nongbah kiba la jop khusnam na ka bynta ki projek bad ki sienjam jong ki. “Phi dei ban ioh jingithuh ia kine baroh bad ngi la ioh haduh 840 tylli ki jingtyrwa mynta u snem na ka bynta kine ki khusnam,” u la ong.

U Myntri u la iaroh ruh ia ka Surat bad Agra kiba la wan ba ar bad ba lai hapdeng ki nongbah bad ka Tamil Nadu, Rajasthan bad Uttar Pradesh hapdeng ki jylla.

Hashuwa kine baroh, u Mangubhai C. Patel, Lat ka Jylla Madhya Pradesh u la pyllait saw tylli ki document kiba long ka (a) ISAC awards 2022 compendium, (b) Compendium of newsletter of SCM, (c) Report by UN Habitat: Smart Cities Mission – Localizing Sustainable Development Goals bad (d) ISAC awards 2023 brochure (e-release).

Ha kane ka Conclave la wan iashim bynta da baroh 100 tylli ki smart city kiba dang ialam lynti ha ka jingkylla ha ka rukom kyntiew ia ki nongbah da kaba long ki nongialam lynti ha ki jingsaindur thymmai ha ki jaka sor. Kane ka porkram ka la ai rynsan ia ki nongbah ba kin pyni ia ki kam ba ki trei hapoh ka Mission bad ka la plie lad ruh ban ioh jingnang jingstad bad ki nuksa jong ki rukom treikam ba biang tam.

Ha kane ka conclave la don ka jingpyni ia ki projek ba jop khusnam ba la pyntreikam da ki nongbah hapoh ka Smart Cities Mission ha kaba 2000 ngut ki briew ki la leit peit ia kine baroh. Ki la don 5 tylli ki stall jong ki Jylla/UT, 13 tylli ki stall jong ki nongbah bad 15 tylli ki nuksa jong ki projek. Shuh shuh la pynbiang ia ka smart street kaba pyni ia ki jaka ba lah ban iaid briew, ka Intelligent Traffic Management System (ITMS) bad ki smart signage. La don ruh ki jingiakren bad ki CEO jong ki nongbah ba jop khusnam kum ka Indore, Surat, Chandigarh, Ahmedabad, Belagavi, Ranchi bad kiwei kiwei kiba la plie lad ban ioh jingtip shaphang ki rukom treikam kiba biang tam.

*******