প্রধান মন্ত্রী, শ্রী নরেন্দ্র মোদীনা ঙসি ভারত মন্দপমদা তীম জি২০গা উনদুনা ৱারী ৱাতায় শাখ্রে‍। প্রধান মন্ত্রীনা থৌরমদুদা তিনখিবশিংগী মফমদসু ৱা ঙাঙখি‍।

থৌরমদুদা ৱা ঙাঙলদুনা, প্রধান মন্ত্রীনা, জি২০ মায় পাক্না পাঙথোকখিবগীদমক থাগৎনরকপশিংবু পুথোক্তুতা থমখি অমদি মায় পাক্লিবা অসি লৈমায়দা কুমথদুনা থবক তৌরিবা থৌমীশিংগী মপান্দগীনি হায়খি‍।

মওং মরিল নাইনা থৌরাং য়াৎপা অমদি থবক পায়খৎপগী থৌওংগী মতাঙদা পল্লদুনা, প্রধান মন্ত্রীনা থৌমীশিংগী মফমদা মখোয়না থেংনখিবশিং অমদি তমশিনহৌবশিং নীংথিনা দোকুমেন্ত তৌশিন্দুনা থম্নবা ৱাফম হায়খি‍। অসুম্না শেম্লবা দোকুমেন্ত অসিনা তুংদা পাঙথোকপা থৌরমশিংগীদমক কান্নরবা লমজিং ওইগদৌরিবনি হায়না মহাক্না হায়খি‍।

অসিগুম্লবা অচৌবা থৌরম অমা মায় পাক্না পাঙথোক্লিবসিগী মরুমদা লৈরিবা অরোনবা ৱাফমদি এন্তরপ্রাইজকী মরুওইবা অমদি অদুগুম্বা এন্তরপ্রাইজ অদুগী নুংগী ওইবা শরুক অমা ওইবগী মরুওইবা ৱাখল্লোন অদুনি হায়না প্রধান মন্ত্রীন হায়খি‍।

প্রধান মন্ত্রীনা থৌমীশিংগী মফমদা ইনফোর্মেল ওইনা ফমদুনা মখোয়গী দিপার্তমেন্তশিংদা থেংনরকপশিং অমগা অমগা তাথোক তাশিন তৌননবা হায়খি‍। মসিনা পুম্নমক্কী থবক থৌওংশিংবু হেন্না পাক চাউবা মীৎয়েঙ অমদা পুরক্কনি‍। অদুগা অতোপ্পা মীওইশিংনা হোৎনরিবদু ঐখোয়না খঙলকপা মতমদা মদুনা ঐখোয়বু হেন্না ফনা থবক তৌননবা ইনোৎ হাপকনি‍। ‘ঙসিগী থৌরম অসি শিন্মীশিংগী অপুনবগী শক্তম্নি অদুগা অদোম অমসুং ঐ শিন্মী ঙাক্তনি’ হায়না মহাক্না হায়খি‍।

ঐখোয়না চাং নাইনা তৌরিবা ওফিসকী থবকসিদা ঐখোয়গী কলীগশিংগী মতিং ঐখোয়না খঙবা ঙমদে‍। অদুগা লৈমায়দা পুন্না থবক তৌমিন্নবনা মরক্তা লৈরম্বা পলশিং, ফৈনা অমদি য়ুংনা লৈরম্বা পলশিং লৌথোকখি অমদি কাঙবু অমা শেম্মি‍ হায়না মহাক্না হায়খি‍। মহাক্না ৱাফম অসিবু হৌজিক চত্থরিবা স্বচ্চতা অভিয়ানগী খুদম পীদুনা শন্দোক্না তাকখি অমদি দিপার্তমেন্তশিংদা পুন্না থবক তৌমিন্ননবা ৱাফম থমখি‍। মসিনা প্রোজেক্ত অমবু থবক ওইনা উবগী মহুত্তা কুমহৈ অমগুম ফাওহনগনি‍। অপুনবগী ৱাখল্লোন্দা পাঙ্গল লৈবনি হায়না মহাক্না মখা তাখি‍।

মহাক্না ওফিসশিংদা লৈরিবা মথক মখাগী ফীভমশিংদগী থোরক্তুনা মখোয় মখোয়গী কলীগশিংগী মতিকশিং খঙননবা হোৎনবিয়ু হায়বা ৱাফমসু থমখি‍।

প্রধান মন্ত্রীনা হ্যুমেন রিসোর্স অমদি তমশিনবগী ওইবা মীৎয়েঙদা করিগুম্বা থৌরম অমা মায় পাক্না পাঙথোকপগী মরুওইবা ৱাফমশিং থমখি অমদি করিগুম্বা থৌরম অমা শুপ্নতগী ইচম চম্না পাঙথোকপগী মহুত্তা মওং মরিল নাইনা নীংথিনা পাঙথোক্লবদি, মদুনা তুং কোইবা ইথিল অমা পীবা ঙম্মি হায়খি‍। মহাক্না মসিগী খুদম ওইনা পীরদুনা কম্মনৱেল্থ গেম্স অসি লৈবাক অসিবু ব্রান্দিং তৌননবা ফজরবা তাঞ্জা অমা ওইহৌবা য়ারম্বনি, অদুবু মদুনা মসিদা য়াওরিবা মীওইশিং অমদি লৈবাকসিবু মীংচৎ থিহনবতা নত্তনা লৈঙাক্লোন্দা নীংবা কায়বগী ইহুল অমা পোকহনখি হায়খি‍। নাকল অমরোমদনা, জি২০গী মপুং ওইবা ইথিলদি লৈবাক অসিগী মতিকপু মালেমগী মফমদা উত্থোকপদা মায় পাকপদুনি‍। “ঐবু ইদিতোরিএলশিংদা থাগৎপিবদুদা ঐ থৌওইনা পুক্নিং চিংশিল্লুদে, অশেঙবা নুংঙাইবদি ঈরৈবাক অসিনা অসিগুম্লবা অচৌবা থৌরম অমা হেক্তবু খ্বায়দগী ফবা মওংদা শিনবা ঙম্লগনি হায়বগী ফাওরিবা থাজবদুনি,” হায়না মহাক্না হায়খি‍।

নেপালগী য়ুহা হাবা, ফিজিগী সাইক্লোন, শ্রী লঙ্কাদা তেংবাং পোৎলমশিং থাখিবা, মাল্দিব্সকী মৈ অমদি ঈশিংগী ৱাথোক, য়েমেন্দগী মী হোন্দোরকপা, তুর্কীগী য়ুহা হাবনচিংবা মালেমগী ওইবা খুদোংথিবা থৌদোকশিংদা মতেং পাংবদা ভারতনা লৌরিবা অচৌবা থৌদাংশিং পল্লদুনা, হেনগৎলক্লিবা থাজবা অসিবু মহাক্না শন্দোক্না তাকখি‍। পুম্নমক অসিনা তাক্লি মদুদি, মীওইবা খুন্নাইগী য়াইফনবগীদমক, ভারতনা থৌনা লৈনা লেপ্লি অমদি মথৌ তারকপা মতমদা মফম খুদিংদা য়ৌশিল্লি, হায়না মহাক্না হায়খি‍। জি২০ মীফমগী মনুংদা জোর্দান্দা থোকখিবা অমাঙ অতাগী থৌদোক্তা, মফমদুদা চৎলুবগী থোইদোকপা মথৌ তাদ্রবসু, মী কনবগী থবক্কগীদমক শেম শাখিববুসু মহাক্না পাউদমখি‍।

থৌরম অসিদা, মন্ত্রী অমদি মকোক থোংবা ওফিসরশিংনা মনিংদা লৈরগা লৈমায়দা থবক তৌরিবা মীওইশিংনা মাঙদা লৈখি‍। “শিল লাংখিবা অদু ঐ য়ানিংখি মরমদি মদুনা ঐগী য়ুম্ফম অসি চেৎলে হায়বা থাজবা ঐঙোন্দা পীখি,” হায়না মহাক্না হায়খি‍।

প্রধান মন্ত্রীনা মখা তানা ফীভম ফগৎহন্নবগীদমক মালেমগী ওইবা এক্সপোজরগী মথৌ তাবা ৱাফমসু থমখি‍। হৌজিক্তি মালেমগী ওইবা মচৎ অমদি ৱাফমশিংদা ঐখোয়গী থবক খুদিংগী মরুওইবা মীৎয়েঙ থমগদবনি হায়না মহাক্না হায়খি‍। জি২০ মনুংদা মরুওইবা ফিরেপ লৌবা মীওই লাখ অমা হেনবনা ভারত্তা লাকখি অমদি মখোয়না ভারতকী তুরিজম এম্বেসেদর ওইনা হনখি‍ হায়নসু মহাক্না ফোঙদোকখি‍। হায়রিবা এম্বেসেদরগী মরু অসি লৈমায়দা থবক তৌরিবা থৌমীশিংনা তৌখিবা অফবা থবকশিংদুনা হুনখিবনি‍। হৌজিক্তি তুরিজমবু অনৌবা পন্দোল অমা তম্না পুখৎপা মতম ওইরে হায়না মহাক্না হায়খি‍।

প্রধান মন্ত্রীনা থৌমীশিংগা ৱারী ৱাতায় শাদুনা মখোয়না থেংনরকপশিং তাখি‍।

উনবা অদুদা জি২০ মীফম মায় পাক্না পাঙথোকপদা থৌদাং য়াখিবা মীওই ৩০০০ লোম্না শরুক য়াখ‍ি‍। শিৎ-শেংবা মীওই, দ্রাইভর, ৱেতর অমদি তোঙান তোঙানবা মন্ত্রালয়শিংদগী অতৈ স্তাফশিং য়াওনা মীফম অদু অপনবা লৈতনা পাঙথোক্নবা হোৎনখিবা লৈমায়দা থবক তৌরিবা মীওইশিং থৌরমদুদা মরুওইনা শরুক য়াখি‍। থৌরম অদুদা মন্ত্রীশিং অমদি তোঙান তোঙানবা দিপার্তমেন্তশিংগী ওফিসিএলশিংসু শরুক য়াখি‍।

***