ଭାରତ ମାତା କି - ଜୟ !

ଭାରତ ମାତା କି - ଜୟ !

ଭାରତ ମାତା କି - ଜୟ !

କେନ୍ଦ୍ର କ୍ୟାବିନେଟରେ ଥିବା ମୋର ସମସ୍ତ ସହକର୍ମୀ, ଦେଶର କୋଣ ଅନୁକୋଣରୁ ଏହି ଭବ୍ୟ ଭବନରେ ଏକାଠି ହୋଇଥିବା ମୋର ପ୍ରିୟ ଭାଇ ଭଉଣୀ, ଦେଶର ୭୦ରୁ ଅଧିକ ସହରରୁ ଏହି କାର୍ଯ୍ୟକ୍ରମରେ ଯୋଗ ଦେଇଥିବା ମୋର ସାଥୀ ନାଗରିକ, ଅନ୍ୟାନ୍ୟ ସମ୍ମାନିତ ଅତିଥି ଏବଂ ମୋ ପରିବାରଗଣ!

ଆଜି ଭଗବାନ ବିଶ୍ୱକର୍ମାଙ୍କ ଜୟନ୍ତୀ ପାଳନ । ଏହି ଦିନ ଆମର ପାରମ୍ପରିକ କାରିଗର ଏବଂ ଶିଳ୍ପକାରମାନଙ୍କୁ ସମର୍ପିତ । ବିଶ୍ୱକର୍ମା ଜୟନ୍ତୀ ଅବସରରେ ମୁଁ ଦେଶର ସମସ୍ତ ଜନସାଧାରଣଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଉଛି । ମୁଁ ଆନନ୍ଦିତ ଯେ ଆଜିର ଦିନରେ ମୋତେ ସାରା ଦେଶର ଲକ୍ଷ ଲକ୍ଷ ବିଶ୍ୱକର୍ମା ବନ୍ଧୁଙ୍କ ସହ ଯୋଡ଼ି ହେବାର ସୁଯୋଗ ମିଳିଛି । କିଛି ଦିନ ତଳେ ମୁଁ ମୋର ଅନେକ ବିଶ୍ୱକର୍ମା ଭାଇ ଭଉଣୀଙ୍କ ସହ କଥା ବାର୍ତ୍ତା ମଧ୍ୟ କରିଥିଲି । ଏଠାରେ ପହଞ୍ଚିବାରେ ମୋର ବିଳମ୍ବର କାରଣ ହେଉଛି ମୁଁ ସେମାନଙ୍କ ସହିତ କଥାବାର୍ତ୍ତା କରିବାରେ ମଗ୍ନ ହୋଇଯାଇଥିଲି, ଏବଂ ତଳେ ପ୍ରଦର୍ଶନୀ ହୋଇଛି ତାହା ମଧ୍ୟ ଏତେ ଚମତ୍କାର ଯେ, ସେଠାରୁ ବାହାରିବାକୁ ଇଚ୍ଛା କରୁନଥିଲି ଏବଂ ଆପଣ ସମସ୍ତଙ୍କୁ ମୋର ଅନୁରୋଧ ଯେ ଆପଣମାନେ ନିଶ୍ଚିତ ଭାବେ ଏହାକୁ ପରିଦର୍ଶନ କରନ୍ତୁ । ମୋତେ କୁହାଯାଇଛି ଯେ ଏହା ଆହୁରି ୨-୩ ଦିନ ପର୍ଯ୍ୟନ୍ତ ଚାଲିବ, ତେଣୁ ମୁଁ ବିଶେଷ ଭାବରେ ଦିଲ୍ଲୀବାସୀଙ୍କୁ ଅନୁରୋଧ କରୁଛି ଯେ ସେମାନେ ଏହାକୁ ନିଶ୍ଚିତ ଭାବେ ପରିଦର୍ଶନ କରନ୍ତୁ।

ସାଥୀମାନେ,

ଭଗବାନ ବିଶ୍ୱକର୍ମାଙ୍କ ଆଶୀର୍ବାଦରେ, ଆଜି ପ୍ରଧାନମନ୍ତ୍ରୀ ବିଶ୍ୱକର୍ମା ଯୋଜନାର ଶୁଭାରମ୍ଭ ହୋଇଛି । ହାତର କୌଶଳରେ ଦକ୍ଷତାର ସହ କାମ କରୁଥିବା ଏବଂ ପାରମ୍ପରିକ ପ୍ରଥାଅନୁସରଣ କରୁଥିବା ଲକ୍ଷ ଲକ୍ଷ ପରିବାର ପାଇଁ ପ୍ରଧାନମନ୍ତ୍ରୀ ବିଶ୍ୱକର୍ମା ଯୋଜନା ଏକ ନୂତନ ଆଶାର କିରଣ ଭାବେ ଆସୁଛି ।

ମୋ ପରିବାରଗଣ,

ଏହି ଯୋଜନା ସହିତ ଆଜି ଦେଶକୁ ଅନ୍ତର୍ଜାତୀୟ ପ୍ରଦର୍ଶନୀ କେନ୍ଦ୍ର- ଯଶୋଭୂମି ମଧ୍ୟ ମିଳିଛି । ଏଠାରେ ଯେଉଁ କାମ କରାଯାଇଛି ତାହା ମୋର ଶ୍ରମିକ ଭାଇ ଭଉଣୀ, ମୋର ବିଶ୍ୱକର୍ମା ସାଥୀମାନଙ୍କ ନିଷ୍ଠା ଏବଂ କଠିନ ପରିଶ୍ରମକୁ ପ୍ରତିଫଳିତ କରେ | ଆଜି ମୁଁ ଯଶୋଭୂମିକୁ ଦେଶର ପ୍ରତ୍ୟେକ କର୍ମୀ, ପ୍ରତ୍ୟେକ ବିଶ୍ୱକର୍ମା ସାଥୀଙ୍କୁ ସମର୍ପିତ କରୁଛି । ଆମର ବହୁ ସଂଖ୍ୟକ ବିଶ୍ୱକର୍ମା ସାଥୀ ମଧ୍ୟ ଯଶୋଭୂମିର ହିତାଧିକାରୀ ହେବାକୁ ଯାଉଛନ୍ତି । ଆଜି ଏହି କାର୍ଯ୍ୟକ୍ରମରେ ଭିଡିଓ ମାଧ୍ୟମରେ ଆମ ସହ ଯୋଡ଼ି ଦେଇଥିବା ହଜାର ହଜାର ବିଶ୍ୱକର୍ମା ସାଥୀଙ୍କୁ ମୁଁ ବିଶେଷ ଭାବରେ ଏହି ବାର୍ତ୍ତା ଦେବାକୁ ଚାହୁଁଛି । ଆପଣ ଗାଁରେ ଯେଉଁ ଜିନିଷ ତିଆରି କରୁଛନ୍ତି, ଯେଉଁ ଶିଳ୍ପ, ଯେଉଁ କଳା ସୃଷ୍ଟି କରୁଛନ୍ତି, ତାହାକୁ ବିଶ୍ୱ ଆଗରେ ପ୍ରଦର୍ଶିତ କରିବା ପାଇଁ ଏକ ଶକ୍ତିଶାଳୀ ମାଧ୍ୟମ ହେବାକୁ ଯାଉଛି । ଏହା ଆପଣଙ୍କ କଳା, ଆପଣଙ୍କ ଦକ୍ଷତା ଏବଂ ଆପଣଙ୍କ କଳାକୃତିକୁ ବିଶ୍ୱକୁ ପ୍ରଦର୍ଶିତ କରିବ । ଭାରତର ସ୍ଥାନୀୟ ଉତ୍ପାଦକୁ ବିଶ୍ୱସ୍ତରୀୟ କରିବାରେ ଏହା ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ।

ମୋ ପରିବାରଗଣ,

ଆମ ଏଠାରେ ଶାସ୍ତ୍ରରେ କୁହାଯାଉଛି, 'ଯିଏ ସମଗ୍ର ପୃଥିବୀ ସୃଷ୍ଟି କରେ କିମ୍ବା ଏହା ସହିତ ଜଡ଼ିତ ନିର୍ମାଣ କାର୍ଯ୍ୟରେ ସମ୍ପୃକ୍ତ ହୁଏ, ତାକୁ 'ବିଶ୍ୱକର୍ମା' କୁହାଯାଏ। ହଜାର ହଜାର ବର୍ଷ ଧରି ଯେଉଁ ସାଥୀମାନେ ଭାରତର ସମୃଦ୍ଧିର ମୂଳଦୁଆ ହୋଇ ରହିଛନ୍ତି, ସେମାନେ ହେଉଛନ୍ତି ଆମର ବିଶ୍ୱକର୍ମା। ଯେମିତି ଆମ ଶରୀରରେ ମେରୁଦଣ୍ଡର ଗୁରୁତ୍ୱପୂର୍ଣ୍ଣ ଭୂମିକା ରହିଛି, ଠିକ୍ ସେହିପରି ଏହି ବିଶ୍ୱକର୍ମା ସାଥୀମାନଙ୍କ ମଧ୍ୟ ଆମ ସାମାଜିକ ଜୀବନରେ ବହୁତ ଗୁରୁତ୍ୱପୂର୍ଣ୍ଣ ଭୂମିକା ରହିଛି । ଆମର ଏହି ବିଶ୍ୱକର୍ମା ସାଥୀମାନେ ଏଭଳି କାର୍ଯ୍ୟ ଏବଂ କୌଶଳ ସହିତ ଜଡ଼ିତ, ଯାହା ବିନା ଦୈନନ୍ଦିନ ଜୀବନ ଅକଳ୍ପନୀୟ । ଆପଣ ଦେଖନ୍ତୁ, ଆମର କମାର ବିନା କିଛି କ’ଣ ସମ୍ଭବ କି? ଲୁହାର ଜିନିଷ ତିଆରି କରୁଥିବା ଲୋକର ଯେଉଁମାନେ ଗାଁରେ ଜୋତା ତିଆରି କରନ୍ତି, ଯେଉଁମାନେ କେଶ କାଟିଥାନ୍ତି ଏବଂ ଯେଉଁମାନେ ପୋଷାକ ପ୍ରସ୍ତୁତ କରନ୍ତି, ସେମାନଙ୍କ ର ମହତ୍ତ୍ୱ କେବେ ବି କମ୍ ହୋଇପାରିବ ନାହିଁ । ଫ୍ରିଜ୍ ଯୁଗରେ ମଧ୍ୟ ଲୋକମାନେ ମାଟି ପାତ୍ର ଓ ମାଟି ପାତ୍ରରୁ ପାଣି ପିଇବାକୁ ପସନ୍ଦ କରନ୍ତି। ଦୁନିଆ ଯେତେ ଆଗକୁ ବଢେ, ଟେକ୍ନୋଲୋଜି ସବୁସ୍ଥାନରେ କିପରି ପହଞ୍ଚିବ, ସେମାନଙ୍କ ଭୂମିକା ଓ ମହତ୍ତ୍ୱ ସବୁବେଳେ ରହିବ । ତେଣୁ ସମୟର ଆବଶ୍ୟକତା ହେଉଛି ଏହି ବିଶ୍ୱକର୍ମା ସାଥୀମାନଙ୍କୁ ସମସ୍ତ ପ୍ରକାରରେ ଚିହ୍ନିବା, ସେମାନଙ୍କୁ ସମସ୍ତ ପ୍ରକାରର ସହଯୋଗ କରାଯିବା।

ସାଥୀମାନେ,

ବିଶ୍ୱକର୍ମା ଭାଇ ଭଉଣୀମାନଙ୍କ ସମ୍ମାନ, ସାମର୍ଥ୍ୟ ଓ ସମୃଦ୍ଧି ବୃଦ୍ଧି ପାଇଁ ଆମ ସରକାର ଆଜି ସହଯୋଗୀ ହୋଇ ଆପଣଙ୍କ ପାଖକୁ ଆସିଛନ୍ତି। ଏହି ଯୋଜନାରେ ବିଶ୍ୱକର୍ମା ସାଥୀଙ୍କ ଦ୍ୱାରା କରାଯାଉଥିବା ୧୮ଟି ଭିନ୍ନ ଭିନ୍ନ ପ୍ରକାର କାର୍ଯ୍ୟ ଉପରେ ଗୁରୁତ୍ୱ ଦିଆଯାଇଛି । ଏମିତି କୌଣସି ଗାଁ ନଥିବ ଯେଉଁଠି ଏହି ୧୮ ପ୍ରକାର କାମରେ କୌଣସି ବ୍ୟକ୍ତି ନିୟୋଜିତ ନଥିବେ। ଏମାନଙ୍କ ମଧ୍ୟରେ କାଠ ରେ କାମ କରୁଥିବା କାରିଗର, କାଠ ଖେଳନା ତିଆରି କରୁଥିବା କାରିଗର, ଲୁହାରେ କାମ କରୁଥିବା କମାର, ଅଳଙ୍କାର ତିଆରି କରୁଥିବା ବଣିଆ, ମାଟିରେ କାମ କରୁଥିବା କୁମ୍ଭାର, ମୂର୍ତ୍ତିଶିଳ୍ପୀ, ଜୋତା ତିଆରି କରୁଥିବା ମୋଚି, ଦର୍ଜି, ହେୟାର ଡ୍ରେସର, ଲଣ୍ଡ୍ରି ଶ୍ରମିକ, କପଡ଼ା ବୁଣାକାର, ମାଳା ନିର୍ମାତା, ମାଛଧରା ଜାଲ ନିର୍ମାତା, ଡଙ୍ଗା ନିର୍ମାଣକାରୀ ଏବଂ ଅନ୍ୟମାନେ ଅଛନ୍ତି। ପିଏମ୍ ବିଶ୍ୱକର୍ମା ଯୋଜନାରେ ସରକାର ୧୩ ହଜାର କୋଟି ଟଙ୍କା ଖର୍ଚ୍ଚ କରିବେ।

ମୋ ପରିବାରଗଣ,

କିଛି ବର୍ଷ ପୂର୍ବେ ପ୍ରାୟ ୩୦-୩୫ ବର୍ଷ ହେବ ମୁଁ ଥରେ ୟୁରୋପର ବ୍ରୁସେଲ୍ସ ଯାଇଥିଲି। ସେଠାରେ ରହୁଥିବା ବେଳେ ମୋର ଆୟୋଜକମାନେ ମୋତେ ସେଠାରେ ଏକ ଅଳଙ୍କାର ପ୍ରଦର୍ଶନୀକୁ ନେଇଯାଇଥିଲେ। ମୁଁ କୌତୂହଳ ଓ ଆଗ୍ରହର ସହ ପଚାରୁଥିଲି ଯେ, ଭାଇ ଏଠାରେ ଜିନିଷର ବଜାର କିପରି ହୋଇଥାଏ। ମୋ ପାଇଁ ଗୋଟିଏ ସପ୍ରାଇଜ୍ ଥିଲା, ସେମାନେ ମୋତେ କହିଲେ ଯେ ମେସିନ୍ ରେ ନିର୍ମିତ ଅଳଙ୍କାରର ଚାହିଦା ଏଠାରେ କମ୍ ଥାଏ, ଏବଂ ଲୋକମାନେ ହାତତିଆରି ଗହଣା କିଣିବାକୁ ପସନ୍ଦ କରନ୍ତି ଯଦିଓ ଏହା ଅଧିକ ମହଙ୍ଗା ଅଟେ । ଦୁନିଆରେ ତୁମର ସୁସଜ୍ଜିତ କାମର ଚାହିଦା ବଢିବାରେ ଲାଗିଛି । ଆଜିକାଲି ଦେଖିବାକୁ ମିଳୁଛି ଯେ ବଡ଼ ବଡ଼ କଂପାନି ଗୁଡ଼ିକ ମଧ୍ୟ ସେମାନଙ୍କ ଉତ୍ପାଦନକୁ ଛୋଟ କମ୍ପାନିକୁ ଆଉଟସୋର୍ସ କରିଥାନ୍ତି। ଏହା ବିଶ୍ୱବ୍ୟାପୀ ଏକ ବିଶାଳ ଶିଳ୍ପ । ଆମେ ସେହି ଦିଗରେ ଅଗ୍ରସର ହେଉଛୁ ଯେପରି ଆଉଟସୋର୍ସିଂ କାମ ଆମର ବିଶ୍ୱକର୍ମା ସାଥୀଙ୍କ ପାଖକୁ ଆସିବ ଏବଂ ଆପଣ ଯୋଗାଣ ଶୃଙ୍ଖଳାର ଏକ ଅଂଶ ହୋଇପାରିବେ । ଆମେ ଚାହୁଁଛୁ ଯେ ଆପଣ ଏତେ ଦକ୍ଷ ହୁଅନ୍ତୁ ଯାହା ଦ୍ୱାରା ପ୍ରମୁଖ ଅନ୍ତର୍ଜାତୀୟ କଂପାନିଗୁଡିକ ଆପଣଙ୍କ ଦକ୍ଷତାକୁ ଟ୍ୟାପ୍ କରିବା ପାଇଁ ଆପଣଙ୍କ ପାଖକୁ ଆସନ୍ତୁ। ତେଣୁ ଆମର ବିଶ୍ୱକର୍ମା ସାଥୀମାନଙ୍କୁ ଆଧୁନିକ ଯୁଗକୁ ଆଣିବା ଏବଂ ସେମାନଙ୍କ ଦକ୍ଷତା ବୃଦ୍ଧି କରିବା ପାଇଁ ଏହି ଯୋଜନା ଏକ ପ୍ରୟାସ ।

ସାଥୀମାନେ,

ଏହି ପରିବର୍ତ୍ତିତ ସମୟରେ ଆମ ବିଶ୍ୱକର୍ମା ଭାଇ ଭଉଣୀମାନଙ୍କ ପାଇଁ ପ୍ରଶିକ୍ଷଣ, ପ୍ରଯୁକ୍ତି ବିଦ୍ୟା ଏବଂ ଉପକରଣର ବହୁତ ଆବଶ୍ୟକତା ରହିଛି। ବିଶ୍ୱକର୍ମା ଯୋଜନା ମାଧ୍ୟମରେ ଆପଣ ସମସ୍ତଙ୍କୁ ପ୍ରଶିକ୍ଷଣ ଦେବା ଉପରେ ସରକାର ଗୁରୁତ୍ୱ ଦେଉଛନ୍ତି। ପ୍ରଶିକ୍ଷଣ ସମୟରେ ମଧ୍ୟ ଆପଣଙ୍କୁ ସରକାରଙ୍କ ତରଫରୁ ଦୈନିକ ୫୦୦ ଟଙ୍କା ଭତ୍ତା ମିଳିବ, କାରଣ ଆପଣ ପରିଶ୍ରମୀ ବ୍ୟକ୍ତି, ଯେଉଁମାନେ ପ୍ରତିଦିନ ନିଜର ଜୀବିକା ନିର୍ବାହ କରନ୍ତି । ଆପଣଙ୍କୁ ଆଧୁନିକ ଉପକରଣ ପାଇଁ ୧୫,୦୦୦ ଟଙ୍କାର ଟୁଲକିଟ୍ ଭାଉଚର ମଧ୍ୟ ମିଳିବ । ବ୍ରାଣ୍ଡିଂ ଏବଂ ପ୍ୟାକେଜିଂଠାରୁ ଆରମ୍ଭ କରି ମାର୍କେଟିଂ ପର୍ଯ୍ୟନ୍ତ ଆପଣ ଯାହା ତିଆରି କରିବେ ସେଥିପାଇଁ ସରକାର ଯଥାସମ୍ଭବ ସହାୟତା ପ୍ରଦାନ କରିବେ। ଏହା ବଦଳରେ ଆପଣ ଜିଏସଟି ପଞ୍ଜୀକୃତ ଷ୍ଟୋରରୁ ଟୁଲକିଟ୍ କିଣିବେ ବୋଲି ସରକାର ଆଶା ରଖିଛନ୍ତି। ବେଆଇନ କାର୍ଯ୍ୟକୁ ବରଦାସ୍ତ କରାଯିବ ନାହିଁ। ଏହାବ୍ୟତୀତ, ମୁଁ ଦୃଢ଼ ଭାବରେ ଅନୁରୋଧ କରୁଛି ଯେ ଏହି ଉପକରଣଗୁଡ଼ିକ 'ମେଡ୍ ଇନ୍ ଇଣ୍ଡିଆ' ହେବା ଉଚିତ୍ ।

ମୋ ପରିବାରଗଣ,

ସରକାର ଏହା ମଧ୍ୟ ବ୍ୟବସ୍ଥା କରିଛନ୍ତି ଯେ ଯଦି ଆପଣ ନିଜର ବ୍ୟବସାୟକୁ ବିସ୍ତାର କରିବାକୁ ଚାହୁଁଛନ୍ତି ତେବେ ପ୍ରାରମ୍ଭିକ ପୁଞ୍ଜି ବିଷୟରେ ଆପଣଙ୍କୁ କୌଣସି ଅସୁବିଧାର ସମ୍ମୁଖୀନ ହେବାକୁ ପଡିବ ନାହିଁ । ଏହି ଯୋଜନା ଅଧୀନରେ ବିଶ୍ୱକର୍ମା ସାଥୀମାନେ ବିନା ଜାମିନରେ ୩ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ପାଇପାରିବେ । ଯେତେବେଳେ ବ୍ୟାଙ୍କ ଆପଣଙ୍କୁ ଜାମିନ ମାଗିନଥାଏ, ମୋଦି ଆପଣଙ୍କ ଋଣର ଗ୍ୟାରେଣ୍ଟି ଦେଉଛନ୍ତି। ଏହା ମଧ୍ୟ ସୁନିଶ୍ଚିତ କରାଯାଇଛି ଯେ ଏହି ଋଣର ସୁଧ ହାର ବହୁତ କମ୍ ରହିବ। ଯଦି ଆପଣ ତାଲିମ ଶେଷ କରିଛନ୍ତି ଏବଂ ପ୍ରଥମ ଥର ପାଇଁ ନୂଆ ଉପକରଣ କିଣିଛନ୍ତି ତେବେ ଆପଣ ପ୍ରଥମ ଥର ପାଇଁ ୧ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ପାଇବାକୁ ଯୋଗ୍ୟ ହେବେ ବୋଲି ସରକାର ବ୍ୟବସ୍ଥା କରିଛନ୍ତି । ଆଉ ସେହି ଋଣ ଯେତେବେଳେ ପରିଶୋଧ କରି କାମ ଚାଲିଥିବା ପ୍ରମାଣ କରିବା ପରେ ପୁଣିଥରେ ଆପଣ ୨ ଲକ୍ଷ ଟଙ୍କା ପର୍ଯ୍ୟନ୍ତ ଆହୁରି ଋଣ ପାଇପାରିବେ।

ମୋ ପରିବାର ସଦସ୍ୟ,

ଆଜି ଆମ ଦେଶରେ ସେହି ସରକାର ଅଛି, ଯିଏ ଅବହେଳିତ ଲୋକଙ୍କୁ ପ୍ରାଥମିକତା ଦେଉଛି । ଏହା ଆମ ସରକାର ଯିଏ ଗୋଟିଏ ଜିଲ୍ଲା ଗୋଟିଏ ଉତ୍ପାଦ (ଓଡିଓପି) ଯୋଜନା ମାଧ୍ୟମରେ ପ୍ରତ୍ୟେକ ଜିଲ୍ଲାର ସ୍ୱତନ୍ତ୍ର ଉତ୍ପାଦକୁ ପ୍ରୋତ୍ସାହିତ କରୁଛନ୍ତି । ଆମ ସରକାର ହିଁ ରାସ୍ତାକଡ଼ରେ ଥିବା ଭେଣ୍ଡରମାନଙ୍କୁ ସହାୟତା ପ୍ରଦାନ କରିଛନ୍ତି ଏବଂ ପିଏମ୍ ସ୍ୱନିଧି ଯୋଜନା ଅଧୀନରେ ସେମାନଙ୍କ ପାଇଁ ବ୍ୟାଙ୍କର ଦ୍ୱାର ଖୋଲିଛନ୍ତି। ଆମ ସରକାର ସ୍ୱାଧୀନତା ପରେ ପ୍ରଥମ ଥର ପାଇଁ ବଞ୍ଜାରା ଓ ଯାଯାବର ଜନଜାତିଙ୍କ ଯତ୍ନ ନେଇଛି। ଆମ ସରକାର ହିଁ ସ୍ୱାଧୀନତା ପରେ ପ୍ରଥମ ଥର ପାଇଁ ପ୍ରତ୍ୟେକ ସ୍ତର ଓ ପ୍ରତ୍ୟେକ ସ୍ଥାନରେ ଦିବ୍ୟାଙ୍ଗମାନଙ୍କ ପାଇଁ ସ୍ୱତନ୍ତ୍ର ସୁବିଧା ବିକଶିତ କରିଛନ୍ତି । ଯେଉଁମାନଙ୍କୁ କେହି ପଚାରୁ ନ ଥିଲେ, ସେମାନଙ୍କ ପାଇଁ ଗରିବର ଏହି ପୁଅ ମୋଦୀ, ସେମାନଙ୍କର 'ସେବକ' ହୋଇ ଆସିଛନ୍ତି। ସମସ୍ତଙ୍କୁ ସମ୍ମାନଜନକ ଜୀବନ ଦେବା, ସମସ୍ତଙ୍କ ପର୍ଯ୍ୟନ୍ତ ସୁବିଧା ସୁନିଶ୍ଚିତ କରିବା ପାଇଁ ଏହା ହେଉଛି ମୋଦିଙ୍କ ଗ୍ୟାରେଣ୍ଟି ।

ମୋ ପରିବାରଗଣ,

ଯେତେବେଳେ ଟେକ୍ନୋଲୋଜି ଏବଂ ପରମ୍ପରା ଏକାଠି ହୋଇଥାନ୍ତି, ତେବେ କ’ଣ ଚମତ୍କାର ସୃଷ୍ଟି ହୋଇଥାଏ, ଏ ସମଗ୍ର ବିଶ୍ବ ଜି-୨୦ କ୍ରାଫ୍ଟ ବଜାରରେ ମଧ୍ୟ ଦେଖିଛି। ଜି-୨୦ରେ ଅଂଶଗ୍ରହଣ କରିବା ପାଇଁ ବିଦେଶୀ ଅତିଥିମାନେ ଆସିଥିଲେ, ଉପହାର ତାଙ୍କୁ ମଧ୍ୟ ଉପହାର ସ୍ୱରୂପ ଆମର ବିଶ୍ୱକର୍ମା ସାଥୀଙ୍କ ଦ୍ୱାରା ପ୍ରସ୍ତୁତ ସାମଗ୍ରୀ ମଧ୍ୟ ପ୍ରଦାନ କରାଯାଇଥିଲା। 'ଲୋକାଲ ଫର ଭୋକାଲ’ ପ୍ରତି ପ୍ରତିବଦ୍ଧତା ଆମ ସମସ୍ତଙ୍କର, ସମଗ୍ର ଦେଶର ଦାୟିତ୍ୱ । ମୁଁ ଏହା ବିଷୟରେ କହିବା ବେଳେ ଆପଣ କାହିଁକି ଅସହଜ ହୁଅନ୍ତି? ଯେତେବେଳେ ମୁଁ ଏହା କରେ, ଆପଣ ପ୍ରଶଂସା କରନ୍ତି, କିନ୍ତୁ ଯେତେବେଳେ ଆପଣଙ୍କୁ ଏହା କରିବାକୁ ପଡିଥାଏ, ଆପଣ କୁଣ୍ଠାବୋଧ କରନ୍ତି । ଆପଣ ମୋତେ କୁହନ୍ତୁ, ଆମର କାରିଗର, ଆମ ଲୋକମାନଙ୍କ ଦ୍ୱାରା ପ୍ରସ୍ତୁତ ଉତ୍ପାଦ ଗୁଡିକ ବିଶ୍ୱ ବଜାରରେ ପହଞ୍ଚିବା ଉଚିତ କି ନାହିଁ? ଏହି ଉତ୍ପାଦଗୁଡିକ ବିଶ୍ୱ ବଜାରରେ ବିକ୍ରି ହେବା ଉଚିତ କି ନାହିଁ? ଏଥିପାଇଁ ଆମକୁ ପ୍ରଥମେ ସ୍ଥାନୀୟ ସ୍ୱର ଉତ୍ତୋଳନ କରିବାକୁ ପଡ଼ିବ ଏବଂ ତା'ପରେ ସ୍ଥାନୀୟକୁ ବିଶ୍ୱସ୍ତରୀୟ କରିବାକୁ ପଡ଼ିବ।

ସାଥୀମାନେ,

ଏବେ ଗଣେଶ ଚତୁର୍ଥୀ, ଧନତେରସ, ଦୀପାବଳି ଓ ଅନ୍ୟାନ୍ୟ ପର୍ବପର୍ବାଣୀ ଆସୁଛି। ମୁଁ ସମସ୍ତ ଦେଶବାସୀଙ୍କୁ ସ୍ଥାନୀୟ ଉତ୍ପାଦ କିଣିବାକୁ ଅନୁରୋଧ କରିବି । ଏବଂ ଯେତେବେଳେ ମୁଁ ସ୍ଥାନୀୟ ଉତ୍ପାଦ କିଣିବା ବିଷୟରେ କହୁଛି, କିଛି ଲୋକ ଭାବନ୍ତି ଯେ ଏହା କେବଳ ଦୀପାବଳିରେ ଦୀପ କିଣିବା ବିଷୟରେ ଏବଂ ଅନ୍ୟ କିଛି ନୁହେଁ । କୌଣସି ମଧ୍ୟ ବଡ଼ ଜିନିଷ କିଣନ୍ତୁ, ଯେଉଁଥିରେ ଆମ ବିଶ୍ବକର୍ମା ସାଥୀମାନଙ୍କର ଛାପ ଥିବ, ଭାରତ ମାଟିରେ ଝାଳର ସୁଗନ୍ଧ ଥିବ। ପ୍ରତ୍ୟେକ ଛୋଟ ବଡ଼ ଜିନିଷ କିଣନ୍ତୁ ।

ମୋ ପରିବାରଗଣ,

ଆଜିର ଭାରତ ଯେମିତି ବିକଶିତ ହେବାରେ ଲାଗିଛି, ସବୁ କ୍ଷେତ୍ରରେ ନିଜର ପରିଚୟ ସୃଷ୍ଟି କରୁଛି। ନିକଟରେ ଆମେ ଦେଖିଛୁ ଯେ କିପରି ଭାରତ ମଣ୍ଡପମ୍ ମାଧ୍ୟମରେ ଭାରତ ବିଶ୍ୱର ଦୃଷ୍ଟି ଆକର୍ଷଣ କରିଥିଲା । ଏହି ଅନ୍ତର୍ଜାତୀୟ ପ୍ରଦର୍ଶନୀ କେନ୍ଦ୍ର ଯଶୋଭୂମି ଏହି ପରମ୍ପରାକୁ ଭବ୍ୟତାର ସହ ଜାରି ରଖିଛି। ଏବଂ ଯଶୋଭୂମିର ସ୍ପଷ୍ଟ ବାର୍ତ୍ତା ହେଉଛି ଯେ ଏହି ମାଟିରେ ଯାହା ବି ଘଟିବ ତାହା ଯଶ ପ୍ରାପ୍ତ କରିବ। ଭାରତକୁ ଭବିଷ୍ୟତର ପ୍ରଦର୍ଶନ କରିବା ପାଇଁ ଏହା ଏକ ଭବ୍ୟ କେନ୍ଦ୍ରରେ ପରିଣତ ହେବ ।

ସାଥୀମାନେ,

ଭାରତ ନିଜର ଅର୍ଥନୈତିକ ସାମର୍ଥ୍ୟକୁ ସଫଳତାର ସହ ଉପଯୋଗ କରି ଏକ ପ୍ରମୁଖ ବାଣିଜ୍ୟିକ ଶକ୍ତି ରେ ପରିଣତ ହେବା ପାଇଁ ରାଜଧାନୀରେ ଏଭଳି ଏକ କେନ୍ଦ୍ର ହେବା ଜରୁରୀ, ଏହା ସେହି କେନ୍ଦ୍ର ଅଟେ। ଏହା ଉଭୟ ମଲ୍ଟି-ମୋଡାଲ୍ ସଂଯୋଗ ପ୍ରଦାନ କରେ ଏବଂ ଏବଂ ପିଏମ ଗତିଶକ୍ତିକୁ ପ୍ରଦର୍ଶନ କରେ | ବର୍ତ୍ତମାନ ଦେଖନ୍ତୁ ଏହା ବିମାନବନ୍ଦର ନିକଟରେ ଅବସ୍ଥିତ ଏବଂ ମେଟ୍ରୋ ସିଷ୍ଟମ ମାଧ୍ୟମରେ ଏହା ସହ ନିରବଚ୍ଛିନ୍ନ ଭାବରେ ସଂଯୁକ୍ତ ହୋଇଛି । ଆଜି ଉଦ୍ଘାଟିତ ହୋଇଥିବା ମେଟ୍ରୋ ଷ୍ଟେସନ ସିଧାସଳଖ ଏହି କମ୍ପ୍ଲେକ୍ସରେ ସଂଯୁକ୍ତ ହୋଇଛି। ଏହି ମେଟ୍ରୋ ସୁବିଧା ଦିଲ୍ଲୀର ବିଭିନ୍ନ ଅଞ୍ଚଳରୁ ଆସୁଥିବା ଲୋକମାନଙ୍କ ପାଇଁ ଯାତ୍ରା ସମୟକୁ ଯଥେଷ୍ଟ ହ୍ରାସ କରିବ ଏବଂ ଏହା ସହଜରେ ଉପଲବ୍ଧ ହେବ । ଏଠାକୁ ଯେଉଁ ଲୋକମାନେ ଆସିବେ, ସେମାନଙ୍କ ପାଇଁ ରହିବା । ମନୋରଞ୍ଜନ, ସପିଂ ଏବଂ ପର୍ଯ୍ୟଟନର ସୁବିଧା ଯୋଗାଇଦେବା ପାଇଁ ଏହି ପୂରା ଇକୋ ସିଷ୍ଟମ କରାଯାଇଛି, ସମ୍ପୂର୍ଣ୍ଣ ବ୍ୟବସ୍ଥାରେ ହୋଇଛି। 

ମୋ ପରିବାରଗଣ,

ପରିବର୍ତ୍ତିତ ସମୟ ସହିତ ବିକାଶ ଏବଂ ନିଯୁକ୍ତିର ନୂତନ କ୍ଷେତ୍ର ସୃଷ୍ଟି ହେଉଛି । ୫୦-୬୦ ବର୍ଷ ପୂର୍ବେ ଆଜି ରହୁଥିବା ବିଶାଳ ଆଇଟି ଶିଳ୍ପ ବିଷୟରେ ଚିନ୍ତା କରିବା ଅକଳ୍ପନୀୟ ଥିଲା । ସେହିପରି ୩୦-୩୫ ବର୍ଷ ପୂର୍ବେ ସୋସିଆଲ ମିଡିଆ କେବଳ ଏକ କନସେପ୍ଟ ଥିଲା । ବର୍ତ୍ତମାନ ଭାରତ ପାଇଁ ଆଉ ଏକ ଗୁରୁତ୍ୱପୂର୍ଣ୍ଣ କ୍ଷେତ୍ର ଅସୀମ ସମ୍ଭାବନା ସହିତ ଉଭା ହେଉଛି ଏବଂ ଏହି କ୍ଷେତ୍ର ହେଉଛି ସମ୍ମିଳନୀ ପର୍ଯ୍ୟଟନର ସମଗ୍ର ବିଶ୍ବରେ କନଫରେନ୍ସ। ଗ୍ଲୋବାଲ କନଫରେନ୍ସ ପର୍ଯ୍ୟଟନ ଶିଳ୍ପର ମୂଲ୍ୟ ୨୫ ଲକ୍ଷ କୋଟି ଟଙ୍କାରୁ ଅଧିକ । ପ୍ରତିବର୍ଷ ସାରା ବିଶ୍ୱରେ ୩୨ ହଜାରରୁ ଅଧିକ ବଡ଼ ବଡ଼ ପ୍ରଦର୍ଶନୀ ଓ ପ୍ରଦର୍ଶନୀ ଅନୁଷ୍ଠିତ ହୋଇଥାଏ। କଳ୍ପନା କରନ୍ତୁ, ୨-୫ କୋଟି ଜନସଂଖ୍ୟା ଥିବା ଦେଶରେ ମଧ୍ୟ ଏହି କାର୍ଯ୍ୟକ୍ରମ ଆୟୋଜନ କରାଯାଇ ସମୃଦ୍ଧ ହୁଅନ୍ତୁ। ୧୪୦ କୋଟି ଜନସଂଖ୍ୟା ବିଶିଷ୍ଟ ଭାରତ ନିଶ୍ଚିତ ଭାବେ ଯଥେଷ୍ଟ ଲାଭ ଉଠାଇପାରିବ। ଯିଏ ଏଠାକୁ ଆସିବ ସେ ବହୁତ ଉପକୃତ ହେବ । ଏହା ଏକ ବିରାଟ ବଜାର । ସାଧାରଣତଃ ସାଧାରଣ ପର୍ଯ୍ୟଟକଙ୍କ ତୁଳନାରେ ସମ୍ମିଳନୀ ପର୍ଯ୍ୟଟକମାନେ ଏଥିରେ ଅଧିକ ଟଙ୍କା ଖର୍ଚ୍ଚ କରିଥାନ୍ତି। ବିପୁଳ ବଜାର ସତ୍ତ୍ୱେ ଏହି ଶିଳ୍ପରେ ଭାରତର ଅଂଶଗ୍ରହଣ ମାତ୍ର ଏକ ପ୍ରତିଶତ ରହିଛି। ପ୍ରତିବର୍ଷ ଅନେକ ବଡ଼ ବଡ଼ ଭାରତୀୟ କମ୍ପାନି ବିଦେଶରେ ସେମାନଙ୍କ କାର୍ଯ୍ୟକ୍ରମ ଆୟୋଜନ କରିବାକୁ ବାଧ୍ୟ ହେଉଛନ୍ତି। ଆପଣ କଳ୍ପନା କରିପାରିବେ କି ଏତେ ବଡ଼ ବଜାର ଉଭୟ ଘରୋଇ ଏବଂ ବିଶ୍ୱସ୍ତରରେ ଆମ ସାମ୍ନାରେ ଅଛି? ସମ୍ମିଳନୀ ପର୍ଯ୍ୟଟନ ପାଇଁ ନୂଆ ଭାରତ ନିଜକୁ ପ୍ରସ୍ତୁତ କରୁଛି ।

ଏବଂ ସାଥୀମାନେ, ଆପଣମାନେ ସମସ୍ତେ ଜାଣନ୍ତି ଯେ ଦୁଃସାହସିକ ପର୍ଯ୍ୟଟନ କେବଳ ସେହି ସ୍ଥାନରେ ହୋଇଥାଏ। ଯେଉଁଠାରେ ଦୁଃସାହସିକତା ପାଇଁ ସମ୍ବଳ ଅଛି | ଯେଉଁଠି ଅତ୍ୟାଧୁନିକ ଚିକିତ୍ସା ସୁବିଧା ଅଛି ସେଠାରେ ହିଁ ମେଡିକାଲ ଟୁରିଜିମ୍ ହେବ। ଐତିହାସିକ, ଧାର୍ମିକ ଓ ଆଧ୍ୟାତ୍ମିକ କାର୍ଯ୍ୟକଳାପ ଥିବା ସ୍ଥାନରେ ହିଁ ଆଧ୍ୟାତ୍ମିକ ପର୍ଯ୍ୟଟନ ହେବ। ଇତିହାସ ଓ ଐତିହ୍ୟ ପ୍ରଚଳିତ ଥିବା ସ୍ଥାନରେ ହିଁ ଐତିହ୍ୟ ପର୍ଯ୍ୟଟନ କରାଯିବ। ସେହିଭଳି ସମ୍ମିଳନୀ ପର୍ଯ୍ୟଟନ କେବଳ ସେହି ସ୍ଥାନରେ ହେବ ଯେଉଁଠାରେ କାର୍ଯ୍ୟକ୍ରମ, ସଭା ଓ ପ୍ରଦର୍ଶନୀ ପାଇଁ ଆବଶ୍ୟକ ସମ୍ବଳ ରହିଥିବ। ତେଣୁ ଭାରତ ମଣ୍ଡପମ୍ ଏବଂ ଯଶୋଭୂମି ଏଭଳି କେନ୍ଦ୍ର ଯାହା ଏବେ ଦିଲ୍ଲୀକୁ କନଫରେନ୍ସ ପର୍ଯ୍ୟଟନର ସବୁଠାରୁ ବଡ଼ ହବ୍ ରେ ପରିଣତ କରିବାକୁ ଯାଉଛି। କେବଳ ଯଶୋଭୂମି କେନ୍ଦ୍ରର ଲକ୍ଷ ଲକ୍ଷ ଯୁବକଯୁବତୀଙ୍କୁ ରୋଜଗାର ମିଳିବାର ସମ୍ଭାବନା ରହିଛି। ଭବିଷ୍ୟତରେ ଯଶୋଭୂମି ଏପରି ଏକ ସ୍ଥାନ ରେ ପରିଣତ ହେବ ଯେଉଁଠାରେ ଅନ୍ତର୍ଜାତୀୟ ସମ୍ମିଳନୀ, ସଭା, ପ୍ରଦର୍ଶନୀ ଇତ୍ୟାଦି ପାଇଁ ସାରା ବିଶ୍ୱର ଲୋକମାନେ ଧାଡ଼ି ବାନ୍ଧିବେ ।

ଆଜି ମୁଁ ବିଶେଷ କରି ବିଶ୍ୱର ବିଭିନ୍ନ ଦେଶରୁ ପ୍ରଦର୍ଶନୀ ଏବଂ ଇଭେଣ୍ଟ ଶିଳ୍ପ ସହ ଜଡ଼ିତ ଲୋକଙ୍କୁ ଭାରତ, ଦିଲ୍ଲୀ, ଯଶୋଭୂମିକୁ ନିମନ୍ତ୍ରଣ କରୁଛି । ମୁଁ ଦେଶର ପ୍ରତ୍ୟେକ ଅଞ୍ଚଳ, ପୂର୍ବ-ପଶ୍ଚିମ-ଉତ୍ତର-ଦକ୍ଷିଣର ଚଳଚ୍ଚିତ୍ର ଶିଳ୍ପ ଏବଂ ଟିଭି ଶିଳ୍ପକୁ ନିମନ୍ତ୍ରଣ କରିବି । ଆପଣ ଏଠାରେ ଆପଣଙ୍କ ପୁରସ୍କାର ସମାରୋହ, ଚଳଚ୍ଚିତ୍ର ମହୋତ୍ସବ ଆୟୋଜନ କରନ୍ତି ଏବଂ ଏଠାରେ ଆପଣଙ୍କ ଚଳଚ୍ଚିତ୍ରର ପ୍ରଥମ ଶୋ'ର ଆୟୋଜନ କରନ୍ତୁ | ଭାରତ ମଣ୍ଡପମ୍ ଏବଂ ଯଶୋଭୂମିରେ ଯୋଗ ଦେବା ପାଇଁ ମୁଁ ଅନ୍ତର୍ଜାତୀୟ ଇଭେଣ୍ଟ କମ୍ପାନୀ ଏବଂ ପ୍ରଦର୍ଶନୀ କ୍ଷେତ୍ର ସହ ଜଡ଼ିତ ଲୋକଙ୍କୁ ନିମନ୍ତ୍ରଣ କରୁଛି ।

ମୋ ପରିବାରଗଣ,

ମୋର ବିଶ୍ୱାସ, ଭାରତ ମଣ୍ଡପମ୍ ହେଉ କି ଯଶୋଭୂମି, ଏଗୁଡ଼ିକ ଭାରତର ଆତିଥେୟତା, ଭାରତର ଶ୍ରେଷ୍ଠତା ଏବଂ ଭାରତର ଭବ୍ୟତାର ପ୍ରତୀକ ହେବ । ଉଭୟ ଭାରତ ମଣ୍ଡପମ୍ ଏବଂ ଯଶୋଭୂମି ହେଉଛି ଭାରତୀୟ ସଂସ୍କୃତି ଏବଂ ଆଧୁନିକ ସୁବିଧାର ସଂଗମ । ଆଜି ଏହି ଦୁଇ ମହାନ ପ୍ରତିଷ୍ଠାନ ଦେଶ ଓ ବିଶ୍ୱ ସମ୍ମୁଖରେ ନୂଆ ଭାରତର କାହାଣୀ ଗାଉଛି। ଏହା ମଧ୍ୟ ନୂତନ ଭାରତର ଆକାଂକ୍ଷାକୁ ପ୍ରତିଫଳିତ କରୁଛି, ଯିଏ ନିଜ ପାଇଁ ସର୍ବୋତ୍ତମ ସୁବିଧା ଚାହୁଁଛି ।

ସାଥୀମାନେ, ମୋ କଥା ଲେଖି ରଖନ୍ତୁ, ଭାରତ ଏବେ ଅଟକିବ ନାହିଁ । ଆମକୁ ଆଗକୁ ବଢିବାକୁ ହେବ, ନୂଆ ଲକ୍ଷ୍ୟ ହାସଲ କରିବାକୁ ପଡିବ ଏବଂ ସେହି ନୂତନ ଲକ୍ଷ୍ୟ ହାସଲ କରିବା ପରେ ହିଁ ବିଶ୍ରାମ ନେବାକୁ ପଡିବ । ଏବଂ ଏହା ଆମ ସମସ୍ତଙ୍କ କଠିନ ପରିଶ୍ରମ ଏବଂ ପ୍ରୟାସର ପରିଣାମ ଏବଂ ଆମକୁ ଏହି ସଂକଳ୍ପ ସହିତ ଆଗକୁ ବଢ଼ିବାକୁ ହେବ ଯେ ଆମେ ୨୦୪୭ ରେ ଏକ ବିକଶିତ ଭାରତ ଭାବରେ ଦେଶକୁ ବିଶ୍ୱ ସମ୍ମୁଖରେ ଦଣ୍ଡାୟମାନ ଏହି ସଂକଳ୍ପ ନେଇ ଆମକୁ ଚାଲିବାକୁ ହେବ। ଏହା ଆମ ସମସ୍ତଙ୍କ ପାଇଁ ଏକଜୁଟ୍ ହେବାର ସମୟ। ଆମର ବିଶ୍ୱକର୍ମା ସାଥୀମାନେ 'ମେକ୍ ଇନ୍ ଇଣ୍ଡିଆ'ର ଗର୍ବ ଏବଂ ଏହି ଅନ୍ତର୍ଜାତୀୟ ସମ୍ମିଳନୀ କେନ୍ଦ୍ର ଏହି ଗୌରବକୁ ବିଶ୍ୱ ଆଗରେ ପ୍ରଦର୍ଶନ କରିବାର ଏକ ମାଧ୍ୟମ ପାଲଟିବ । ପୁଣି ଥରେ ମୁଁ ସମସ୍ତ ବିଶ୍ୱକର୍ମା ସାଥୀଙ୍କୁ ଏହି ଅଗ୍ରଗତିମୂଳକ ପଦକ୍ଷେପ ପାଇଁ ଅଭିନନ୍ଦନ ଜଣାଉଛି । ଏହି ନୂତନ କେନ୍ଦ୍ର ଯଶୋଭୂମି ଭାରତର ପ୍ରସିଦ୍ଧିର ପ୍ରତୀକ ହେବା ସହ ଦିଲ୍ଲୀର ଗୌରବକୁ ଆହୁରି ବଢ଼ାନ୍ତୁ। ଏହି ମଙ୍ଗଳକାମନା ସହିତ ଆପଣ ସମସ୍ତଙ୍କୁ ଅନେକ ଅନେକ ଶୁଭକାମନା। ବହୁତ ବହୁତ ଧନ୍ୟବାଦ।

ନମସ୍କାର!

************

NS/MB