প্রধান মন্ত্রী শ্রী নরেন্দ্র মোদীনা বাংলাদেসকী প্রধান মন্ত্রী সৈখ হসিনাগা লৈবাক অনিগী ওইবা মীফম অমা পাংথোকখ্রে।  সেপ্তেম্বর ৯-১০,২০২৩ দা জি-২০ লুচিংবশিংগী মীফমদা লৈবাক অসিনা গেস্ত কন্ত্রি ওইনা শরুক য়ানবা প্রধান মন্ত্রী হসিনা ভারতকী খোঙচত্তা লৈরি।

রাজনিতি অমসুং সেকুরিতিগী মতেং পীনবা, ঙমখৈ ঙাক-শেনবা, ললোন-ইতিক অমসুং লম্বী-থোং, ঈশিং, মৈ অমসুং ইনর্জি, মীগা মীগা লৈনবা মরীশিং য়াওনা হিরম কয়াদা নাকল অনি মতেং পীনরিবা অসি লুচিংবশিংনা খন্নখি। লমদম অসিদা হৌজিক ওইরক্লিবা ফিবম অমসুং হিরম কয়াদা মতেং পাংনবগী মতাংদসু মখোয়না খন্নখি।

চাত্তোগ্রাম অমসুং মোঙ্গলা হিথাংফমশিং শীজিন্নবা অমসুং ভারত-বাংলাদেস ফ্রেন্দসিপ পাইপলাইন থবক হৌনবগী মতাংদা য়ানখিবশিং থবক ওইনা পাংথোকপদা লুচিংবশিংনা তরাম্না ওকখি।  লৈবাক অনি ললোন-ইতিক পাংথোকপদা ভারতকী শেন চৎনবা হৌবদা মখোয়না থাগৎখি অমসুং লৈবাক অনিমক্কী ললোন-ইতিক তৌরিবশিংনা থবক অসি পাংথোক্নবা পুক্নিং থৌগৎখি।

পোৎ-চৈ, থবকশিং অমসুং শেন থাদবা হেনগৎহন্নবগী মতাংদা কমপ্রেহেন্সিপ ইকোনোমিক পার্তনরশিপ এগ্রিমেন্ত(সিইপিএ)গী ৱারি শানবা হৌনবা মখোয়না থাজবা ফোঙদোকখি।

খুদোংচাবা নুমিৎ অমা  মখাগী প্রোজেকশিং অসি অপুনবা  ওইনা শঙ্গানবা মখোয়না য়ানখি অমসুং চাউখৎ-থৌরাংগী অপুনবা প্রোজেকশিং পায়খৎপদা অপেনবা ফোঙদোকখি:
i. অগরতালা-অখৌরা রেল লিঙ্ক
ii. মাইত্রি পৱার প্লান্তগী য়ুনিত-২
iii. খুলনা-মোঙ্গলা রেল লিঙ্ক

লৈবাক অনি মতেং পীনবা হেনগৎহন্নবা মখাগী এম.ও.য়ুশিং য়ানবদা মখোয়না তরাম্না ওকখি:
i. নেসনেল পেমেন্তস কোওপরেসন ওফ ইন্দিয়া(এন পি সি আই) অমসুং বাংলাদেস বেঙ্কগী মরক্তা দিজিতেল পেমেন্তগী থবকশিংদা মতেং পীন্নবা মেমোরেন্দম ওফ অন্দরস্তেন্দিং

ii. ২০২৩-২৫গী ওইনা ভারত অমসুং বাংলাদেসকী মরক্তা কলচরেল একচেঞ্জ প্রোগ্রাম(সি ই পি) মখা চৎথনবা মেমোরেন্দম ওফ অন্দরস্তেন্দিং
iii. ইন্দিয়ান কাউন্সিল ওফ এগ্রিকলচরেল রিছার্স(আই সি এ আর) অমসুং বাংলাদেস এগ্রিকলচর রিছার্স কাউন্সিল(বি এ আর সি)গী মরক্তা মেমোরেন্দম ওফ অন্দরস্তেন্দিং

ম্যন্মারগী রাখিনে রাজ্যদগী মীওই লাখ কয়া লাঞ্জেন্নরকপদগী বাংলাদেনা চঙজফম পীনবা থৌদাং লৌরিবা অসিদা প্রধান মন্ত্রী মোদীনা থাগৎপা ফোঙদোকখি অমসুং রিফিউজিশিং অশোই-অঙাম থোক্তনা হলহনখিনবা ভারতকী মাইকৈদগী পাংবা য়াবা মতেং পাংগনি হায়বগী থাজবা পীখি।

ইন্দো-পেসিফিক্কী মতাংদা হন্দক বাংলাদেসনা মখোয়গী মীৎয়েং লাউথোকখিবা অদু ভারতনা তরাম্না ওকখি। মখোয় মখা তানা পাক-শন্না পুন্না থবক তৌমিন্নবা হেনগৎহনবা হায়না লুচিংবশিংনা য়ানখি।

তরাম্না ওকপগীদমক প্রধান মন্ত্রী হসিনানা প্রধান মন্ত্রী মোদী অমসুং ভারতকী মীয়াম থাগৎপা ফোঙদোকখি অমসুং থাক খুদিংমক্তা মখা তানা ৱারি শানবা য়ায়না লুচিংবশিংনা থাজবা পীনখি।

***