প্ৰধানমন্ত্ৰী শ্ৰী নৰেন্দ্ৰ মোদীয়ে আজি দিল্লী বিশ্ববিদ্যালয়ৰ ক্ৰীড়া কমপ্লেক্সৰ বহুমুখী প্ৰেক্ষাগৃহত শতবাৰ্ষিকী উদযাপনৰ সামৰণি অনুষ্ঠানত ভাষণ আগবঢ়ায়। সেই উপলক্ষে তেওঁ বিশ্ববিদ্যালয়খনৰ প্ৰযুক্তি আৰু কম্পিউটাৰ কেন্দ্ৰ আৰু প্ৰশাসনিক ভৱনৰ আধাৰশিলাও স্থাপন কৰে। শতবাৰ্ষিকী উপলক্ষে তেওঁ স্মৃতিসৌধ সংকলন, দিল্লী বিশ্ববিদ্যালয় আৰু ইয়াৰ সংযুক্ত মহাবিদ্যালয়সমূহৰ ল’গ’সহ পুস্তিকা আৰু দিল্লী বিশ্ববিদ্যালয়ৰ শতবাৰ্ষিকী সন্দৰ্ভত সংকলন প্ৰকাশ কৰে।

এই উপলক্ষে মেট্ৰ’ ৰে’লযোগে দিল্লী বিশ্ববিদ্যালয়ত উপস্থিত হয় প্ৰধানমন্ত্ৰী। যাত্ৰাৰ সময়ত তেওঁ ভ্ৰমণকাৰী ছাত্ৰ-ছাত্ৰীৰ সৈতে মত বিনিময় কৰে৷ বিশ্ববিদ্যালয়ত উপস্থিত হোৱাৰ লগে লগে শ্ৰী মোদীয়ে "দিল্লী বিশ্ববিদ্যালয়ৰ শতবৰ্ষ যাত্ৰা" শীৰ্ষক এখন প্ৰদৰ্শনী পৰিদৰ্শন কৰে। সংগীত আৰু সূক্ষ্ম কলা বিভাগে তেওঁৰ সন্মুখত সৰস্বতী বন্দনা আৰু বিশ্ববিদ্যালয়ৰ কুল গীত পৰিৱেশন কৰে৷

এই উপলক্ষে আগবঢ়োৱা ভাষণত প্ৰধানমন্ত্ৰীয়ে কয় যে বিশ্ববিদ্যালয়খনৰ শতবাৰ্ষিকী সামৰণি অনুষ্ঠানত অংশগ্ৰহণ কৰিবলৈ তেওঁ নিষ্ঠাৰে সিদ্ধান্ত গ্ৰহণ কৰে। তেওঁৰ বাবে এই ভ্ৰমণ ঘৰলৈ উভতি অহাৰ দৰেই। তেওঁৰ ভাষণৰ পূৰ্বে এখন চুটি ছবি প্ৰদৰ্শন কৰা হয়৷এই ছবিখনৰ বিষয়বস্তুৰ কথা উল্লেখ কৰি প্ৰধানমন্ত্ৰীয়ে কয় যে ইয়াৰ জৰিয়তে দৰ্শকে বিশ্ববিদ্যালয়খনৰ বিষয়ে বহু তথ্য জানিব পাৰিব। বিশ্ববিদ্যালয় চৌহদত সৃষ্টি হোৱা উৎসৱমুখৰ পৰিৱেশক লৈ তেওঁ সন্তুষ্টি প্ৰকাশ কৰে। ভ্ৰমণৰ সময়ত যিকোনো বিশ্ববিদ্যালয়ৰ ছাত্ৰ-ছাত্ৰীয়ে সংগ দিয়াৰ গুৰুত্বৰ কথা উল্লেখ কৰি প্ৰধানমন্ত্ৰীয়ে কয় যে এই অনুষ্ঠানলৈ মেট্ৰ’যোগে অহাৰ সুযোগ পাই তেওঁ সুখী।

দিল্লী বিশ্ববিদ্যালয়ৰ শতবাৰ্ষিকী উদযাপনৰ সময়ত দেশত স্বাধীনতাৰ ৭৫ বছৰ উপলক্ষে আজাদী-কা অমৃত মহোৎসৱ উদযাপন কৰা হৈছে। “যিকোনো দেশৰ সফলতা ইয়াৰ বিশ্ববিদ্যালয় আৰু শিক্ষানুষ্ঠানৰ জৰিয়তে প্ৰতিফলিত হয়”। এই শিক্ষানুষ্ঠানৰ ছাত্ৰ-ছাত্ৰী আৰু শিক্ষক-শিক্ষয়িত্ৰীসকলে বিশ্ববিদ্যালয়খনৰ এশ বছৰীয়া যাত্ৰাত বহু ঐতিহাসিক ঘটনাৰ সৈতে জড়িত হৈ পৰিছে। দিল্লী বিশ্ববিদ্যালয় কেৱল বিশ্ববিদ্যালয় নহয় ই এক আন্দোলন, যাৰ জীৱনৰ প্ৰতিটো উপাদান আছে। প্ৰধানমন্ত্ৰীয়ে শতবাৰ্ষিকী উপলক্ষে বিশ্ববিদ্যালয়খনৰ প্ৰতিগৰাকী ছাত্ৰ-ছাত্ৰী আৰু শিক্ষক-শিক্ষয়িত্ৰীক অভিনন্দন জ্ঞাপন কৰে।

এই অনুষ্ঠানত বিশ্ববিদ্যালয়খনৰ প্ৰাক্তন ছাত্ৰ-ছাত্ৰীসকলৰ সমাগম সন্দৰ্ভত উল্লেখ কৰি প্ৰধানমন্ত্ৰীয়ে কয় যে এই ধৰণৰ অনুষ্ঠানতেই সকলোৱে সকলোকে লগ পায়। "দিল্লী বিশ্ববিদ্যালয়ে এই এশ বছৰত নিজৰ আবেগ বজাই ৰাখিছে আৰু নিজৰ সজীৱ চৰিত্ৰ প্ৰকাশ কৰিছে"। শিক্ষণৰ গুৰুত্বৰ কথা উল্লেখ কৰি তেওঁ কয় যে, নালন্দা, তক্ষীলাৰ দৰে সজীৱ বিশ্ববিদ্যালয় থকাৰ সময়ত ভাৰতবৰ্ষ সমৃদ্ধিশালী আছিল। "ভাৰতৰ চহকী শিক্ষা ব্যৱস্থাই ইয়াৰ সমৃদ্ধিৰ বাহক"। সেই সময়ত বিশ্বৰ মুঠ ঘৰুৱা উৎপাদনৰ ডাঙৰ অংশ ভাৰতৰ পৰা আহিছিল। ঔপনিৱেশিক শাসন কালত এই শিক্ষানুষ্ঠানসমূহ ধ্বংস হৈছিল। ফলত ভাৰতৰ উন্নয়ন যাত্ৰা স্থবিৰ হৈ পৰিল।

শ্ৰী মোদীয়ে কয় যে স্বাধীনতাৰ পিছত বিশ্ববিদ্যালয়সমূহে এক প্ৰতিভাৱান আৰু শক্তিশালী যুৱ প্ৰজন্মৰ বিকাশৰ ক্ষেত্ৰত গুৰুত্বপূৰ্ণ ভূমিকা পালন কৰে। ইয়াত দিল্লী বিশ্ববিদ্যালয়ৰ ভূমিকাও উল্লেখযোগ্য। আমাৰ অস্তিত্ব বজাই ৰাখিবলৈ আমাৰ অতীতৰ বিষয়ে স্পষ্ট বুজাবুজি থাকিব লাগিব আৰু যিটোৱে আমাক ভৱিষ্যতৰ সপোন পূৰণ কৰাত সহায় কৰিব।

প্ৰধানমন্ত্ৰীয়ে কয় যে, "যেতিয়া কোনো বিশেষ ব্যক্তি বা সংগঠনে ৰাষ্ট্ৰৰ সৈতে জড়িত সিদ্ধান্ত লয়, তেতিয়া ইয়াৰ সফলতা দেশৰ সফলতাৰ সমান হৈ পৰে"। তেওঁ কয় যে আৰম্ভণিতে দিল্লী বিশ্ববিদ্যালয়ৰ অধীনত মাত্ৰ ৩খন কলেজ আছিল, আজি ৯০খনলৈ বৃদ্ধি পাইছে। আগতে ভাৰতৰ অৰ্থনীতি ভংগুৰ বুলি গণ্য কৰা হৈছিল। আজি ভাৰত বিশ্বৰ শীৰ্ষ পাঁচখন অৰ্থনৈতিক শক্তিৰ ভিতৰত অন্যতম। দিল্লী বিশ্ববিদ্যালয়ত পুৰুষ ছাত্ৰতকৈ মহিলা ছাত্ৰ-ছাত্ৰীৰ সংখ্যা বেছি। শ্ৰী মোদীয়ে  কয় যে দেশত পুৰুষ আৰু মহিলাৰ অনুপাত ভাল অৱস্থাত উপনীত হৈছে। এখন বিশ্ববিদ্যালয় আৰু ৰাজ্যৰ মাজত পাৰস্পৰিক যোগাযোগৰ গুৰুত্বৰ কথা উল্লেখ কৰি তেওঁ কয় যে শিক্ষানুষ্ঠানসমূহ সম্প্ৰসাৰণ হ’লে দেশৰ উন্নয়ন দ্ৰুত হ’ব।

দিল্লী বিশ্ববিদ্যালয়ৰ আৰম্ভণিতে দেশৰ স্বাধীনতা লাভৰ মূল লক্ষ্য আছিল। এই বিশ্ববিদ্যালয়ৰ ১২৫ বছৰীয়া জয়ন্তীত ভাৰতৰ স্বাধীনতাৰ শতবাৰ্ষিকী উদযাপন কৰা হ’ব। সেয়ে এই বিশ্ববিদ্যালয়ে এখন উন্নত ভাৰত গঢ়াত গুৰুত্বপূৰ্ণ ভূমিকা ল'ব।"যোৱা শতিকাৰ তৃতীয় দশকে ভাৰতৰ স্বাধীনতা আন্দোলনক নতুন গতি প্ৰদান কৰিছিল, এতিয়া এই শতিকাৰ তৃতীয় দশকে দেশৰ উন্নয়ন যাত্ৰাত নতুন শক্তি সংযোজন কৰিছে"। প্ৰধানমন্ত্ৰীয়ে কয় যে দেশত বৃহৎ সংখ্যক বিশ্ববিদ্যালয়, মহাবিদ্যালয়, আইআইটি, আইআইএম, এইমছৰ দৰে শিক্ষানুষ্ঠান স্থাপন কৰা হৈছে। "এই প্ৰতিষ্ঠানসমূহে নতুন ভাৰত গঢ়ি তোলাত গুৰুত্বপূৰ্ণ ভূমিকা পালন কৰিব"।

প্ৰধানমন্ত্ৰীয়ে কয় যে শিক্ষা কেৱল পাঠদানৰ পদ্ধতি নহয়, ইয়াৰ জৰিয়তে আমি অহৰহ বহু কথা শিকিবলৈ পাওঁ। বহুদিনৰ মূৰত এজন ছাত্ৰই যি জানিব বিচাৰে তাৰ ওপৰত গুৰুত্ব দিয়া হৈছে। নতুন শিক্ষা নীতিত বিষয় বাছনিৰ ক্ষেত্ৰত নমনীয়তাৰ কথা উল্লেখ কৰি মোদীয়ে কয় যে ৰাষ্ট্ৰীয় পৰ্যায়ত শিক্ষানুষ্ঠানসমূহৰ মানদণ্ড নিৰ্ধাৰণৰ প্ৰক্ৰিয়াটো অতি গুৰুত্বপূৰ্ণ। ইয়াৰ জৰিয়তে বিভিন্ন শিক্ষানুষ্ঠানসমূহে নিজৰ মান উন্নত কৰাৰ বাবে অনুপ্ৰাণিত হ’ব। শিক্ষাৰ মানদণ্ডক শিক্ষানুষ্ঠানৰ আত্মশাসনৰ সৈতে সংযোগ কৰাৰ বাবে এক পদক্ষেপ গ্ৰহণ কৰা হৈছে।

ভৱিষ্যতৰ প্ৰয়োজনীয়তাক বিবেচনা কৰিলে শিক্ষাৰ ক্ষেত্ৰত নতুন নীতি গ্ৰহণৰ ফলত দেশৰ বিশ্ববিদ্যালয়ৰ সংখ্যা বৃদ্ধি পাইছে। ২০১৪ চনত ১২খন ভাৰতীয় বিশ্ববিদ্যালয়ে QS World Ranking ত স্থান লাভ কৰিছিল। বৰ্তমান এই সংখ্যা ৪৫লৈ উন্নীত হৈছে। পৰিস্থিতিৰ পৰিৱৰ্তনৰ সমগ্ৰ কৃতিত্ব দেশৰ যুৱক-যুৱতীসকলৰ। দেশৰ যুৱক-যুৱতীসকলে এতিয়া শিক্ষা কেৱল ডিগ্ৰী লাভ আৰু চাকৰি লাভৰ মাজতে সীমাবদ্ধ কৰি ৰখা নাই। নতুন নতুন পদক্ষেপত অংশগ্ৰহণ কৰিছে। বৰ্তমান ১ লাখৰো অধিক ষ্টাৰ্টআপ কোম্পানী গঠন কৰা হৈছে। ২০১৪-১৫ চনৰ তুলনাত বৰ্তমান ৪০ শতাংশ অধিক পেটেণ্টৰ বাবে আবেদন কৰা হৈছে। আন্তঃৰাষ্ট্ৰীয় উদ্ভাৱন সূচকাংকত ভাৰতৰ উত্থানে যুৱ সমাজৰ নতুন চিন্তাধাৰাৰ প্ৰতিফলন।

শেহতীয়াকৈ আমেৰিকা ভ্ৰমণৰ সময়ত অত্যাধুনিক প্ৰযুক্তিৰ ব্যৱহাৰ সন্দৰ্ভত এক চুক্তি স্বাক্ষৰিত হোৱা বুলি মোদীয়ে কয়। ফলত কৃত্ৰিম বুদ্ধিমত্তাৰ পৰা আৰম্ভ কৰি অৰ্ধপৰিবাহীলৈকে বিভিন্ন ক্ষেত্ৰত দেশৰ যুৱক-যুৱতীসকলৰ বাবে নতুন সুযোগৰ সৃষ্টি হ’ব। এসময়ত আমাৰ যুৱ সমাজে প্ৰযুক্তি ব্যৱহাৰ কৰাৰ সুযোগ পোৱা নাছিল। আজি সেই সুযোগৰ সৃষ্টিৰ ফলত তেওঁলোকৰ দক্ষতা বিকাশ হৈছে। মাইক্ৰন, গুগল, এপ্লাইড মেটেৰিয়েলছৰ দৰে বিভিন্ন কোম্পানীয়ে ভাৰতত বিনিয়োগ কৰাৰ সিদ্ধান্ত লৈছে। দেশৰ যুৱ সমাজৰ উজ্জ্বল ভৱিষ্যতৰ ভৱিষ্যদ্বাণী কৰা হৈছে।

শ্ৰী মোদীয়ে কয় যে ঔদ্যোগিক বিপ্লৱৰ চতুৰ্থ পৰ্যায় ভাৰতৰ দুৱাৰমুখত। কৃত্ৰিম বুদ্ধিমত্তা, এআৰ বা ভিআৰ আদি প্ৰযুক্তি এসময়ত ছবিত প্ৰদৰ্শিত হৈছিল। আজি ই আমাৰ জীৱনৰ অংশ হৈ পৰিছে। অস্ত্ৰোপচাৰৰ সময়ত ৰবটিক ব্যৱহাৰ কৰা হৈছে। এই ক্ষেত্ৰসমূহে দেশৰ যুৱক-যুৱতীসকলৰ বাবে নতুন বাটৰ সন্ধান কৰিছে। পূৰ্বে ভাৰতৰ মহাকাশ আৰু প্ৰতিৰক্ষা খণ্ড ব্যক্তিগত খণ্ডৰ বাবে বন্ধ আছিল যদিও এতিয়া নীতিৰ পৰিৱৰ্তনৰ বাবে আনুষংগিক ক্ষেত্ৰসমূহত বিভিন্ন সুযোগৰ সৃষ্টি হৈছে। ড্ৰোন প্ৰযুক্তিয়ে দেশৰ যুৱক-যুৱতীসকলক আগুৱাই লৈ গৈছে।

ছাত্র-ছাত্রীৰ বাবে ভাৰতৰ গুৰুত্ব সন্দর্ভত ভাষণ দি প্রধানমন্ত্রীয়ে কয় যে এতিয়া আন্তর্জাতিক পর্যায়ৰ মানুহে ভাৰতৰ বিষয়ে জানিব বিচাৰিছে৷ ক’ৰোনা কালত আমি সমগ্ৰ বিশ্বক সহায় কৰিছো। সেই সংকটৰ সময়ত দেশখনে কেনেকৈ সহায়ৰ হাত আগবঢ়াইছিল সেয়া জানিবলৈ সমগ্ৰ বিশ্বই আগ্ৰহী। জি-২০ গোটৰ অধ্যক্ষতাই যোগ, বিজ্ঞান, সংস্কৃতি, উৎসৱ, সাহিত্য, ইতিহাস, ঐতিহ্য আৰু খাদ্য সংৰক্ষণৰ ক্ষেত্ৰত নতুন সুযোগৰ সৃষ্টি কৰিছে। "ভাৰতীয় যুৱ সমাজৰ চাহিদা বৃদ্ধি পাইছে, তেওঁলোকে বিশ্বক ভাৰতৰ বিষয়ে ক'ব আৰু আমাৰ সামগ্ৰী তেওঁলোকৰ ওচৰলৈ লৈ আহিব"।

শ্ৰী মোদীয়ে কয় যে গণতন্ত্ৰ, সমতা আৰু পাৰস্পৰিক সন্মানৰ দৰে ভাৰতীয় মূল্যবোধক এতিয়া মানৱ দেশৰ মূল্যবোধ হিচাপে গণ্য কৰা হৈছে। ফলত ভাৰতীয় যুৱ সমাজৰ বাবে ৰাজহুৱা প্ৰশাসন আৰু কূটনীতিৰ ক্ষেত্ৰত নতুন সুযোগৰ সৃষ্টি হৈছে। ইতিহাস, সংস্কৃতি আৰু পৰম্পৰাৰ ওপৰত গুৰুত্ব দিয়াৰ বাবে দেশৰ যুৱ সমাজৰ বাবে নতুন নতুন সুযোগ গঢ় লৈ উঠিছে। বিভিন্ন ৰাজ্যত আদিবাসী আৰ্কাইভ সৃষ্টি কৰা হৈছে। স্বাধীন ভাৰতৰ উন্নয়ন যাত্ৰা প্ৰধানমন্ত্ৰী সংগ্ৰহালয়ৰ জৰিয়তে উপস্থাপন কৰা হৈছে। দিল্লীত নিৰ্মাণ হ'ব বিশ্বৰ সৰ্ববৃহৎ ঐতিহ্য সংগ্ৰহালয়-'যুগে যুগৰ ভাৰত'। ভাৰতীয় শিক্ষকৰ আন্তঃৰাষ্ট্ৰীয় স্বীকৃতি বৃদ্ধি পোৱাৰ বাবে বিশ্বৰ নেতাসকলে প্ৰায়ে মোদীক তেওঁলোকৰ ভাৰতীয় শিক্ষকৰ বিষয়ে অৱগত কৰে। "ভাৰতৰ ছফট পাৱাৰ দেশৰ যুৱক-যুৱতীসকলৰ সফলতাৰ চাবিকাঠি হৈ পৰিছে"। এই বিকাশৰ লগত খাপ খুৱাবলৈ বিশ্ববিদ্যালয়সমূহে প্ৰয়োজনীয় ব্যৱস্থা গ্ৰহণ কৰিব লাগিব। দিল্লী বিশ্ববিদ্যালয়ে ১২৫ বছৰীয়া জয়ন্তী উদযাপন কৰাৰ সময়ত বিশ্ববিদ্যালয়খন বিশ্বৰ অন্যতম প্রধান বিশ্ববিদ্যালয় হিচাপে পৰিগণিত হোৱাৰ বাবে প্রয়োজনীয় পৰিকল্পনা কৰিব লাগিব৷ "ভৱিষ্যতৰ প্ৰয়োজন অনুসৰি ইয়াত প্ৰয়োজনীয় উদ্ভাৱনীমূলক কাম কৰা উচিত, যাতে ইয়াৰ পৰাই বিশ্বৰ শ্ৰেষ্ঠ নেতা আৰু ধাৰণা উপলব্ধ হয়, আপুনি প্ৰয়োজনীয় কাম অবিৰতভাৱে অব্যাহত ৰাখিব লাগিব"।

ভাষণৰ শেষত প্ৰধানমন্ত্ৰীয়ে জীৱনৰ লক্ষ্য পূৰণৰ বাবে প্ৰয়োজনীয় ব্যৱস্থাসমূহৰ ওপৰত গুৰুত্ব আৰোপ কৰে। এখন শিক্ষানুষ্ঠানে যিকোনো জাতিৰ মানসিকতা গঢ়ি তুলিব পাৰে। তেওঁ আশা কৰিছে যে দিল্লী বিশ্ববিদ্যালয়ে এই প্ৰয়োজনীয়তাসমূহ পূৰণ কৰিব। "আমাৰ ভৱিষ্যৎ প্ৰজন্মইও যুগৰ লগত সংগতি ৰাখি প্ৰয়োজনীয় প্ৰস্তুতি চলোৱাৰ প্ৰয়োজন আছে।" যিকোনো সমস্যাৰ সন্মুখীন হ’ব পৰা মানসিকতা থাকিব লাগিব। আৰু এই মানসিকতা এটা শিক্ষানুষ্ঠানৰ সঠিক পৰিচালনাৰ জৰিয়তে গঢ় লৈ উঠিব”।

এই উপলক্ষে অনুষ্ঠানত কেন্দ্ৰীয় শিক্ষামন্ত্ৰী শ্ৰী ধৰ্মেন্দ্ৰ প্ৰধান আৰু দিল্লী বিশ্ববিদ্যালয়ৰ উপাচাৰ্য শ্ৰী যোগেশ সিং উপস্থিত থাকে।

On the way to the DU programme by the Delhi Metro. Happy to have youngsters as my co-passengers. pic.twitter.com/G9pwsC0BQK

— Narendra Modi (@narendramodi) June 30, 2023

*****