ওজাশিংগী নুমিৎকী মাংওইননা প্রধান মন্ত্রী শ্রী নরেন্দ্র মোদীনা ঙসি 7, লোক কল্যান মার্গতা নেস্নেল তীচর্স এৱার্দ 2023 ফংখ্রবশিংগা লোয়ননা ৱারী শাখ্রে। ৱারী শাবগী থৌরমদা এৱার্দ ফংখ্রবা মীওই 75না শরুক য়াখি।

লৈবাক্কী নহাশিংগী ৱাখল্লোন্না মখোঙ শোম্নবা ওজাশিংনা লৌখৎলিবা খোঙথাংশিংবু প্রধান মন্ত্রীনা থাগৎপা ফোঙদোকখি। মহাক্না অফবা ওজাশিংগী মরু ওইবা অমসুং লৈবাক্কী তুংলমচৎ শেম্বদা মখোয়না লৌরিবা থৌদাংগী মতাংদা ফোঙদোকখি। মহাক্না গ্রাসরুৎ এচিবরশিংগী মাইপাকপগী মতাংদা মখোয়না অঙাংশিংদা তাকপী-তম্বীবগী মরু ওইবা অদুসু থমখি।

প্রধান মন্ত্রীনা ঐখোয়গী হেরিতেজ অমসুং পুৱারীদা চাউথোকচবা পোক্নবগী মতাংদা হায়খি অমসুং ওজাশিংদা মহৈরোয়শিংনা মখোয়গী লমদমগী পুৱারী অমসুং কলচরগী মরমদা তমশিন্নবা ইথিল পীনবা হায়খি। লৈবাক্কী অচৌবা দাইভর্সিতীগী মরমদা পল্লদুনা মহাক্না ওজাশিংদা মখোয়গী স্কুলশিংদা লৈবাক্কী তোঙান-তোঙানবা শরুকশিংগী কলচর অমসুং দাইভর্সিতী পালন তৌনবা হায়জখি।

চন্দ্রয়ান-3না হন্দক্তা মাইপাকখিবগী মতাংদা নৈনরদুনা প্রধান মন্ত্রীনা মহৈরোয়শিংদা সাইন্স অমসুং তেক্নোলোজীদা খঙনীংবা হেনগৎনবা পুক্নিং থৌগৎপা মথৌ তাই মরমদি 21শুবা চহিচা অসি তেক্নোলোজীনা চল্লাইবা চহিচা অমনি হায়না ফোঙদোকখি। মহাক্না নহারোলবু স্কিলিং তৌবা অমসুং মখোয়বু ফ্যুচর রেদী ওইহনবা মরু ওই হায়বা ৱাফমসু থমখি।

মিসন LiFEকী মতাংদা ৱারী শারদুনা প্রধান মন্ত্রী য়ুজ এন্দ থ্রো কলচরগী মহুৎ রিসাইক্লিংগী মরু ওইবগী মতাংদা খন্নখি। ওজা কয়ানা প্রধান মন্ত্রীদা মখোয়গী স্কুলশিংদা স্বচ্ছতা প্রোগ্রামশিং পাঙথোকখিবগী মতাংদা পাউদমখি। মখা তানা প্রধান মন্ত্রীনা ওজাশিংদা মখোয়গী কেরিয়র চুপ্পদা লেপ্পা লৈতনা তমশিন্নবা অমসুং মখোয়গী স্কিলশিং অপগ্রেদ তৌনবা পাউতাক পীখি।

নেস্নেল তীচর্স এৱার্দকী পান্দমদি লৈবাক্কী খ্বাইদগী ফবা ওজা খরনা অখন্ননা শরুক তম্বীবা অসিবু থাগৎপা অমসুং মখোয়গী কম্মিৎমেন্তগী খুত্থাংদা এজুকেসনগী ক্বালিতী হেনগৎহনবা খক্তা নত্তনা মখোয়গী মহৈরোয়শিংগী পুন্সিবুসু ফগৎহনখিবা ওজাশিংবু ইকাই খুম্নবনি। চহি অসিদা এৱার্দকী স্কোপ অসি মমাংদা লৈরম্বা অদুদগী চাউথোকহনখি, দিপার্তমেন্ত ওফ স্কুল এজুকেসন এন্দ লিতরসীনা খনবা ওজাশিং য়াওনা হৌজিক্তি দিপার্তমেন্ত ওফ হায়র এজুকেসন অমসুং স্কিল দিবেলপমেন্ত মন্ত্রালয়না খনবা ওজাশিংসু য়াওহল্লি।

***