প্রধান মন্ত্রী, শ্রী নরেন্দ্র মোদীনা ঙসি মধ্য প্রদেশ রোজগার মেলাদা ভিদিও লিঙ্ককী খুত্থাংদা ৱা ঙাঙখ্রে।

প্রধান মন্ত্রীনা ঙসি তিনখিবা মীয়ামদা ৱা ঙাঙবদা, ঙসি থবক খনবগী চিথী ফংলিবশিংনা পুৱারী ওইরবা মতমসিদা মীয়ামদা লাইরিক তাকপীবগী মরু ওইবা থৌদাং অমদা শরুক য়াবা হৌগনি হায়না ফোংদোকখি। লৈবাক শেমগৎপদা নেস্নেল কেরেক্তরগী মরু ওইবা থৌদাংগী মতাংদা মহাক্না মহাক্কী লাল কিলাগী ফম্বাক্তগী থমখিবা ৱারোলদা মিৎয়েং চঙলদুনা, ঙাই থবক ফংলিবা মীওইশিংনা ভারতকী তুংগী চারোন-শুরোনশিংবু শেম্বা, মখোয়বু মতমগা চুনহনবা অমসুং অনৌবা মাইকৈ তাকপগী থৌদাং লৌগনি হায়না প্রধান মন্ত্রীনা হায়খি। রোজগার মেলা অসিগী মনুংদা ঙসি মধ্য প্রদেশকী প্রাইমারী স্কুলশিংদা ওজা ওইনা খল্লবা ওজা লিশিং মঙাগা মখায়গী মফমদা মহাক্না য়াইফ পাউজেল পীখি। মমাংগী চহি 3দা মধ্য প্রদেশ্তা ওজা লিশিং 50 হেন্না লৌখ্রে হায়না প্রধান মন্ত্রীনা পাউদম্লদুনা, থৌওং অসিগীদমক্তা মহাক্না মধ্য প্রদেশ সরকারবু থাগৎখি।  

চাউখৎপা ভারত অমগীদমক্তা ৱারেপ লৌবদা অচৌবা শরুক তম্লিবা নেস্নেল এজুকেসন পোলিসী চৎনহনবদা থবক নৌনা খল্লবশিংনা মরু ওইবা থৌদাং য়াগনি হায়বা ৱাফম পল্লদুনা, প্রধান মন্ত্রীনা তুংগী মতমগী তেক্নোলোজীদা চঙবা মিৎয়েংগা চপ মান্ননা নাৎকী লৌশিংদসু মিৎয়েং চঙখি হায়না ফোংদোকখি। প্রাইমারী এজুকেসনগী লমদা অনৌবা করিকল অমা শেম্লে, অদুগা ইমা লোলদা মহৈ তম্বীবগী মতাংদসু মশক থোক্না খুমাং চাউশিল্লে হায়না মহাক্না হায়খি। ইংলিশ খঙদবা মহৈরোইশিংদা মমা লোলদা মহৈ তম্বীদদুনা মখোয়গী মফমদা অচৌবা অরানবা অমা তৌখিবদা মিৎয়েং চঙলদুনা, হৌজিক্কী সরকারনা সিল্লীবসকী মনুং চনবা রিজনেল লোলগী লাইরিকশিংদা অহেনবা মিৎয়েং চঙলি অমসুং মসিনা লৈবাক্কী এজুকেসনগী পথাপ্তা অচৌবা অহোংবা অমা পুরকপগী পাম্বৈ ওইগনি হায়না প্রধান মন্ত্রীনা পাউদমখি। 

“অফবা ৱাখল্লোন, অচুম্বা পান্দম অমসুং মপুং ফাবা ইন্তেগ্রিতীগা লোয়ননা ৱারেপ লৌবা মতমদা, অকোয়বগী ফিভম অপুনবসি থাজবনা থল্লি”, অমৃত কালগী অহানবা চহিদা লাকখিবা নুংঙাইবা পাউ অনি, মিং ওইনা পল্লবদা, লাইরবা মুত্থৎপা অমসুং নুংঙাই য়াইফবা হেনগৎলকপা অসিগী মতাংদা পাউদম্লদুনা প্রধান মন্ত্রীনা মীয়ামদা হায়খি। অহানবা ওইনা, ভারতকী মীয়াম করোর 13.5না লাইরবগী খয়াত্তগী শুপ্নগী চহি 5গী মনুংদা থোক্লকখি হায়না নিতি আয়োগকী রিপোর্ত অমনা ফোংদোক্লি হায়না প্রধান মন্ত্রীনা হায়খি। অনিশুবা, হন্দক্কী চহিদা ইনকম তেক্স রিতর্ন ফাইল তৌখিবগী অপুনবা মশিংনা লৈবাক মীয়ামগী চাগানা মমাংগী চহি 9 অসিদা য়াম্না হেনগৎলে হায়বা তাক্লি হায়বা অতোপ্পা রিপোর্ত অমদা প্রধান মন্ত্রীনা মিৎয়েং চঙখি। ITR দেতাগী মখা পোন্না, ইং 2014দা লুপা লাক্ষ 4না মীয়ামগী চাংচৎকী ইনকম ওইরম্বা অদু ইং 2023দা লুপা লাক্ষ 13 হেনগৎলে হায়না প্রধান মন্ত্রীনা হায়খি। অনেম্বা চাগাগী কাঙলুপ্তগী অৱাংবা চাগাগী কাঙলুপ্তা কাখৎলকপা মীওই মশিংসু হেনগৎলে হায়না মহাক্না মখা তাখি। মসিগী ফিগরশিং অসিনা থবক্কী খুদোংচাবা হেনগৎলে অমসুং লৈবাক্কী সেক্তর খুদিংগী মপাঙ্গল হেনগৎলে হায়বা তাক্লি হায়না প্রধান মন্ত্রীনা ফোংদোকখি।

ইনকম তেক্স রিতর্ন্সকী অনৌবা ফিগর পল্লদুনা, প্রধান মন্ত্রীনা লৈবাক্কী নাগ্রিকশিংনা সরকারদা থাজবা থম্বা হেনগৎলি হায়বা তাক্লি হায়না ফোংদোকখি। মসিনা মরম ওইরগা, মীয়াম মশিং য়াম্বনা মশাগী তেক্স থীদোক্নবা থোক্নরক্লি, অমসুং মখোয়গী তেক্স অসি লৈবাক চাউখৎপদা তসেংনা শিজিন্নগনি খঙবগী মখোয়না তেক্স থীবদা নুংনাংবা লৈত্রিবনি হায়না প্রধান মন্ত্রীনা হায়খি। ইং 2014গী মমাংদা মালেমগী শেন্মিৎলোনগী 10শুবা থাক্তা লৈরম্বদগী হৌজিক্না 5শুবা থাক্তা লৈরিবা অসিনা ৱাফম অসিগী ম্যেক শেংবা খুদম ওইরি। ৱাথোক অমসুং শেঞ্জা থুমজানা থল্লম্বা, লাইরবশিংগী খুদোংচাবশিংবু মখোয়গী মফমদা য়ৌরক্ত্রিঙৈদা মৎপীখিবা ইং 2014গী মমাংগী মতম্বু লৈবাক মীয়াম্না কৈদৌনুংদা কাওবা ঙম্লোই হায়না মহাক্না হায়খি। “ঙসিদি, লাইরবগীদমক্তা কাইথোকপা শেনফম খুদিং মখোয়গী একাউন্ততা হকথেংননা ফংলে”, মহাক্না মখা তাখি।

পথাপশিংগী অয়ুবা মেনশিনবনা সরকারনা লাইরবশিংগী য়াইফ য়ুম্বালগীদমক্তা শেল হেন্না চাদিং তৌবা ঙমহল্লে হায়না প্রধান মন্ত্রীনা হায়খি। স্কেল য়াম্না চাউনা ইনভেস্তমেন্ত তৌবনা লৈবাক্কী কাচিন কোয়া খুদিংদা থবক্কী খুদোংচাবা লৈল্লে হায়না প্রধান মন্ত্রীনা হায়রদুনা কম্মন সর্ভিস সেন্তরগী খুদম পীখি। লৈবাক অসিদা ইং 2014দগী হৌদুনা অনৌবা কম্মন সর্ভিস সেন্তর লাক্ষ 5 শেমগৎখ্রে অমসুং মসিগুম্বা সেন্তর খুদিংনা ঙসি মীওই কয়াদা থবক পীরি হায়না মহাক্না হায়খি। “মসিনা লাইরবা অমসুং খুঙ্গংগী য়াইফ য়ুম্বাল লৈহনবগা লোয়ননা থবক্কী খুদোংচাবা পীবগী পাম্বৈসু ওইরি”, মহাক্না মখা তাখি।

এজুকেসন, স্কিল দিভেলপমেন্ত অমসুং ইমপ্লোয়মেন্তকী লমদা মিৎয়েং শানবা পোলিসী অমসুং ৱারেপ কয়াগা লোয়ননা ঙসি পায়খৎলিবা থবকশিংগী মাইকৈদা প্রধান মন্ত্রীনা মীয়ামগী পুক্নিং চীংশিনখি। প্রধান মন্ত্রীনা লাল কিলাগী ফম্বাক্তগী থমখিবা মহাক্কী নিংতম নুমিৎকী ৱারোলদা পি.এম. বিশ্বকর্মা য়োজনা লাওথোকখিবগী মতাংদা পল্লদুনা, স্কিম অসিমক থৌওংশিং অসিগী শক্তম অমনি হায়খি। পি.এম. বিশ্বকর্মা য়োজনা হায়বসি বিশ্বকর্মশিংগী স্কিলবু 21শুবা চহি-চাগী তঙাই ফদবগী মতুং ইন্না চুশিলহন্নবা শেম্বনি হায়না মহাক্না হায়খি। স্কিম অসিদা চাউরাক্না লুপা করোর লিশিং 13 থাদগনি অমসুং মসিনা স্কিল মখল 18গা মরী লৈনবা মীওইশিংদা কান্নবা পীগনি হায়না শ্রী মোদীনা পাউদমখি। কান্নবা পী হায়বদি খঙবা, অদুবু মখোয়গী ফিভম ফগৎহন্নবা থবক অমত্তদি পায়খৎখিদ্রিবা খুন্নাইগী কাঙলুপ অদুদা স্কিম অসিনা কান্নবা পীগনি হায়না প্রধান মন্ত্রীনা হায়খি। বিশ্বকর্মা স্কিমগী মখাদা বেনেফিশরীশিংগী মফমদা ভৌচর পীগনি, মসি শিজিন্নদুনা মখোয়না হৌজিক্কী মতমগী খুৎলায় লৈবা য়াগনি অমসুং ত্রেনিংসু ফংগনি হায়না প্রধান মন্ত্রীনা হায়খি। “নহাশিংনা পি.এম. বিশ্বকর্মগী খুত্থাংদা মশাগী স্কিলবু হেন্না ফগৎহনবগী খুদোংচাবা য়াম্না ফংগনি”, মহাক্না মখা তাখি।

প্রধান মন্ত্রীনা মহাক্কী ৱারোল লোইশিনবা ওইনা, ঙসি ওজা ওইবগী থবক খল্লবা মীওইশিংনা হোৎনবা কনবদগী ঙসিগী নুমিৎ অসি য়ৌরক্লিবনি হায়খি অমসুং মখোয়না তম্বগী থবক লেপ্তনবা হায়খি। মহাক্না মখোয়গী মফমদা সরকারনা শাবা ওনলাইন লর্নিং প্লেতফোর্ম – IGoT কর্ময়োগীগী মতাংদা তাকখি অমসুং মসিগী খুদোংচাবা য়ারিবমখৈ লৌনবা হায়খি।

मध्य प्रदेश रोजगार मेले को संबोधित कर रहा हूं। नवनियुक्त साथियों को बहुत-बहुत शुभकामनाएं। https://t.co/InJQ2Y5BtA

— Narendra Modi (@narendramodi) August 21, 2023

***