ভারতকী প্রধান মন্ত্রীগী প্রিন্সিপাল সেক্রেতরী, দাঃ পি.কে. মিশ্রানা লুচিংদুনা নই দিল্লীগী প্রগতী মৈদান্দা লৈবা ভারত মন্দপমদা ভারতকী G20 প্রসিদেন্সীগী কোওর্দিনেসন কম্মিত্তীগী 7শুবা মীফম ফমখ্রে। মীফম অসিদা সম্মিৎকী মপুং ওইবা অমসুং লোজিস্তিক্সকী মতাংদা শীন লাঙলিবশিংগী মতাংদা খন্নখি। শের্পা অমসুং ফাইনান্স ত্রেক্কী হৌজিক ওইরিবা ফিভম অমসুং মহৈশিংসু মীফম অসিদা হঙ্গৎনা য়েংশিনখি।

শের্পা (G20), সেক্রেতরী (ইকোনোমিক এফিয়র্স বিভাগ) অমসুং সেক্রেতরী (ইনফোর্মেসন অমসুং ব্রোদকাস্তিং)না হীরম অসিগা মরী লৈনবা প্রজেন্তেসন কয়াসু লান্থোকখি। গ্রীন দিভেলপমেন্ত, সস্তেনেবল দিভেলপমেন্ত গোল (SDG) খোঙজেল য়াংশিনহনবা, সস্তেনেবেল ওইবা খল মান্নবা অমসুং ইনক্লুসিব ওইবা মপাঙ্গল লৈবা শাহৌ লৌবা, দিজিতেল পব্লিক ইনফ্রাস্ত্রকচর, জেন্দর ইক্বেলিতী অমসুং মলতিলেতরেল ইন্সতিত্যুসনশিংগী রিফোর্ম য়াওনা ভারতকী প্রসিদেন্সীগী প্রাইওরিতীশিংগী মতাংদা ৱাফম কয়া মীফমসিদা খন্নখি।

মন্ত্রীগী থাক্তা লৈবা মীফম 13 য়াওনা, পুন্না মীফম 185পু লৈবাক্কী রাজ্য অমসুং য়ুনিয়ন তেরিতোরী অয়াম্বদা হৌজিক ফাওবদা পাংথোকখ্রে হায়না শের্পানা পাউদমখি। আউতকম দোক্যুমেন্ত 12গী মথক্তা, কন্সেন্সস্কা লোয়নবা অতোপ্পা দেলিভরেবল 12 অমসু য়ানবা পুরকখি হায়না মসিনা মখা তাখি। 

সেক্রেতরী (DEA)না কৃপ্তো এসেত, ফাইনেন্সিএল ইনক্লুজন, ক্লাইমেত ফাইনান্স মোবিলাইজ তৌবা অমসুং SDGশিংগী ফাইনান্স য়াহনবা য়াওনা ফাইনান্স ত্রেকশিংদা মশক থোকপা থবক কয়া পাংথোকখ্রে হায়না পাউদমখি।

সেক্রেতরী (I&B)না মীদিয়া সেন্তর অমসুং মীদিয়া এক্রেদিতেসন শেম্বগুম্বা মীদিয়াগীদমক্তা শীন-লাঙলিবশিংগী মতাংদা পাউদমখি। মীরমগী মীদিয়া 1800 অমসুং লৈবাক্কী মীদিয়া 1200 হেনবনা সম্মিত অসিগীদমক্তা হৌজিক ফাওবদা রেজিস্তর তৌরকখ্রে। মীরমগা লোয়ননা লৈবাক্কী মীদিয়াশিংগী খুদোংচাবা পীনবা মতিক চাবা থৌওং কয়াসু শীন লাঙলি হায়না মহাক্না মখা তানা পাউদমখি।

লোজিস্তিক অমসুং সেক্যুরিতীগী হীরমগা মরী লৈননা মমাংদা লৌখিবা ৱারেপশিং থবক্তা ওন্থোকপগী থৌওংশিংসু প্রিন্সিপাল সেক্রেতরীনা য়েংশিনখি। দিল্লী সরকার অমসুং দিল্লী পুলিস্কী কম্মিস্নর য়াওনা সেক্যুরিতী ওফিসিএলশিংদা মীথুংলেনশিংবু হোস্ত তৌবগী কাঙলোন, ত্রাফিক শেন্নবগী থৌরাং, এয়রপোর্ত অমসুং সেক্যুরিতীগীদমক্তা শীন লাঙলিবা, অমসুং লীদর্স সম্মিত অসিগীদমক্তা দিল্লী NCRদা পায়খৎলিবা শহর অসিবু মশক ফজহনবগী খোঙথাং কয়াগী মতাংদা তাকখি। মথংগী থাদা পাংথোক্কদৌরিবা G-20 লীদর্স সম্মিত অসিবু শীন লাঙলিবা অসিদা হৌজিক ফাওবদা ফংলিবা মায় পাকপশিংবু খঙলদুনা, প্রিন্সিপাল সেক্রেতরীনা মরী লৈনবা মীওই খুদিংদা মথংগী নুমিৎ খরনিসিদা শীন লাঙবগী থবক পুম্নমক লোইশিন্দুনা রিহর্সেল তৌবা য়ানবা ফিভম পুরক্নবা হায়খি।

হোল ওফ দি গবর্নমেন্ত এপ্রোচ অমসুং মতম চানা অমসুং মতিক চানা শীন লাঙবগী মরু ওইবা হেনগৎলক্লিবা অসিদা শ্রী মিশ্রানা অহেনবা মিৎয়েং চঙখি। সম্মিত অসি থা অমখক্তা ঙাইশিল্লক্লবনিনা হৌজিক্কী মতমসিদি লাস্ত মাইল দেলিবরী নীংথিনা পাংথোকপগী মতম ওইরে হায়না মহাক্না ফোংদোকখি। থৌরম অসি নীংথিনা অমসুং মায় পাক্না পাংথোক্নবগীদমক্তা অকুপ্পা SOP শেমগদবনি অমসুং ওফিসরশিংগী মফমদা অখন্নবা থৌদাং শিন্নগদবনি হায়না মহাক্না হায়খি। প্রধান মন্ত্রীগী পাউতাক্কী মখাদা, লৈবাক শিনবা থুংবগী নহা ওইরিবা ওফিসরশিংদা সম্মিত অসিদা শরুক য়াদুনা মসিদগী তমজবগী খুদোংচাবসু পীরিবনি।

দিল্লীগী লেফতেনেন্ত গবর্নর, কেবিনেত সেক্রেতরী অমসুং মরী লৈনবা মন্ত্রালয়/বিভাগশিংগী সেনিয়র ওফিসরশিংসু মীফমসিদা শরুক য়াখি।

****