কেন্দ্রগী মন্ত্রী মন্দলদা লৈরিবা ঐহাক্কী মরুপ, শ্রীমান পিয়ুশ গোয়লজী, নরায়ন রানেজী, ইচল দর্শনা জর্দোশজী, ইন্দস্ত্রী অমসুং ফেশনগী মালেমগী মরুপ্লোই, হেন্দলুম অমসুং খাদীগী লিরবা চৎনবীগা মরী লৈনবা ওন্তোপ্রিনর অমসুং ঐহাক্কী ফিশা-লোন্সা তৌবা ইচিল ইনাওশিং, মফমসিদা তিল্লিবা শক্নাইরবা মীওই, ইবেম্মা অমসুং ইবুংঙোশিং!

নুমিৎ খরনিগী মমাংদা ভারত মন্দপম্বু অচৌবা থৌরম অমগা লোয়ননা শঙ্গাখি। অদোমগী মরক্তগী মীওই কয়া অমনা মফমসিদা হান্নসু লাক্লম্মে, তেন্ত খন্দুনা ইশাগী শক্তাক থম্লম্লবনি। অদুগা ঙসিদি, অহোংবা নাইরবা লৈবাক অমা উবা ফংলমগনি। ঐখোয়না ভারত মন্দপম অসিদা লৈবাক্কী হেন্দলুম নুমিৎ পাংথোক্লি। ভারত মন্দপমগী মসিগুম্বা নীংথিরবা মতৌসিদা ভারতকী হেন্দলুমগী অচৌবা থৌদাং য়াওরিবনি। অরিবগা অনৌবগগী অপুনবা অসিনা ঙসিগী ভারতকী শক্তাক অমা ওইরি। ঙসিগী ভারতনা ভোকেল ফোর লোকেলখক্তা নত্তনা গ্লোবেল ওইহন্নবা তঙাই ফদবা ফম্বাক শেম্লি। ঐহাক্না মতম খরগী মমাংদা ফিশা লোনশা তৌবা মরুপ খরগা ৱারী শাবগী তাঞ্জা ফংজখি। লৈবাক শিনবা থুংবগী হেন্দলুম ক্লস্তরশিংগী ঐখোয়গী ফিশা লোনশাগী মরুপ কয়ানা অথাপ অথাপ্পা মফমশিংদগী লাক্তুনা ঙসি ঐখোয়গা থৌরমসিদা পুল্লি। ঐহাক্না ঙসিগী চাউরবা থৌরম অসিদা পুম্নমকপু থম্মোই শেংনা তরাম্না ওক্লি অমসুং ইকায় খুম্নবা উৎচরি।

মরুপশিং,

হৌজিক্কী ওগস্ত থা অসিদি ইহৌ হৌবগী থানি। মতম অসিদি নিংতম্বগীদমক্তা কত্থোকখিবা কয়াবু নীংশিংবগী মতম্নি। ঙসিগী নুমিৎ অসিদা স্বদেশী আন্দোলন হৌদোকখিবনি। স্বদেশী হায়বগী ৱাখল্লোন অসিদি মীরম লৈবাক্কী ফিরোল খক্তমক্কী মাইয়োক্তা লেপ্পা নত্তে। মসিনা ঐখোয়গী ইশাগী শেন্মিৎলোনবু চাউখৎহন্নবা অচৌবা ইথিল অমসু পীখিবনি। মসিদি ভারতকী মীয়াম্বু ইশাগী ফিশা লোন্সা তৌবা মীওইশিংগা অমুক্কা হন্না পুনবগী খোঙজং অমনি। ঙসিগী নুমিৎপু সরকারনা লৈবাক্কী হেন্দলুম নুমিৎ হায়না লাউথোক্লিবা অসি মসিগী অচৌবা মরম অসিগীনি। মমাংগী চহিশিং অসিদা ভারতকী ফিশা লোন্সা তৌবা, ভারতকী হেন্দলুম সেক্তরবু হেন্না চাউখৎহন্নবা খোঙথাং কয়া পায়খৎখ্রে। স্বদেশীগীদমক্তা খন্দুনা লৈবাক অসিদা অচৌবা ইহৌ অমা লাক্লে। মসিগুম্বা ইহৌ অসিগী মতাংদা লাল কিলাগী ফম্বাক্তগী ৱাফম থম্নিংবা পাম্লিবা অসিসু মহৌশানা অদুম লাকপা ইথিলনি। অদুগা, ওগস্ত 15শু নকশিল্লকপা অসিনা মরী লৈনবা ৱাফম থম্নিংবগী ইথিলসু লাকই। অদুবু ঙসি, লৈবাক পুম্বগী মশিং য়াম্লবা ফিশা লোন্সাগী মরুপশিংগা পুনবা অসিদা, মখোয়না মরম ওইরগা লৈবাক অসিনা ফংখিবা মায় পাকপা কয়াগী মতাংদা ৱাফম থম্বা পাম্মি, অমসুং মসিগীদমক্তা চাউথোকচবদু ফাওই।

মরুপশিং,

ঐখোয়গী ফিজেৎকা ঐখোয়গী শক্তাক্কা অচেৎপা মরী লৈনদুনা লাক্লি। কনা অমগী ফিজোল উবদা মহাক অসি কদাইদগী লাকপনো হায়বা খঙবা ঙম্মি। হায়বদি, ঐখোয়গী দাইবর্সিতীনা ঐখোয়গী শক্তাক্নি হায়বনি, অদুগা মসিগুম্বা দাইবর্সিতী অসি খ্বাইদগী অহানবদা ঐখোয়গী ফিজোলদা উবা ঙম্মি। অদুগা ঙসি অসিদি ঐখোয়গী দাইবর্সিতীগী নুংঙাইবা ফোংদোকপগী খুদোংচাবা অমসু ওইরি। লৈবাক্কী মনুং হঞ্জিনবা মফমদা লৈবা ত্রাইবেল ইচিল ইনাওদগী হৌরগা, উন্না কুপ্তুনা লৈবা চিংজাওশিংদা লৈবা ইচিল ইনাওশিং লৈরি, সমুদ্র মপান্দা মপুন্সি হিংবা মীওই কাঙলুপ অমসু নাকল অমদা লৈরি, মফমদুদগী হৌরগা ইকংলা অমসুং পাক্লবা লম্পাক্তা লৈরিবা মীওই কয়াগী ফিজোলনা চুম্থাং মচুগুম্না লৈবাক অসিবু লৈতেংলি। ঐখোয়গী ফিজোলগী মসিগুম্বা দাইবর্সিতী অসিবু ঐখোয়না ইখত্তুনা লিস্ত শেম্ফম থোকই হায়না ঐহাক্না হায়খিবা লৈরবনি। অদুগা ঙসিদি, ইন্দিয়ন তেক্সতাইল ক্রাফ ফন্দগী মওংদা, ঐহাক্কী ৱাফম অসিনা ওইথোক্লকপা অসিদা ঐহাক্না য়াম্না নুংঙাইবা ফাওই।

মরুপশিং,

মমাংগী চহিশিংদা মপাঙ্গল য়াম্না লৈরম্বা ঐখোয়গী তেক্সতাইল ইন্দস্ত্রীবু নিংতম্বা ফংলবা মতুংদা মপাঙ্গল হাপ্নবা করিগুম্বা অমত্তা পাংথোকপীদবা হায়বসি য়াম্না লাইবক থীবনি। খাদীবুসু মশানা অদুমক লৈজরসনু হায়বা ফিভমদা লংথোকপীরম্লিবনি। খাদী শেৎপশিংবু হন্থবা মিৎয়েংদা ফাওবা য়েংনরম্লবনি। অদুবু, ঐখোয়না ইং 2014দগী সরকারদা লাক্লবা মতুংদা মসিগুম্বা ৱাখল্লোন্দা অহোংবা পুরক্নবা খোঙফম চেৎনা লেপখি। খাদীগী পোৎলম অমা হেক্তা ওইরবসু, মীয়াম্না লৈবীনবা ঐহাক্না মন কী বাতকী অহৌবা মতমদা হায়খিবা ঐহাক্না নীংশিংলি। মদুগী মহৈ করি ওইনা ফংলে হায়বদি ঐখোয়া ঙসি মিৎনা উরে। মমাংগী চহি 9দা খাদী পুথোকপগী ফিভমদা শরুক 3 হেন্না হেনগৎখি। খাদী ফিরোল লৈনবগী চাংসু শরুক 5 হেন্না হেনগৎলে। লৈবাক মনুং অমসুং মীরমদা খাদী পাম্নবগী চাং য়াম্না হেনগৎলে। ঐহাক নুমিৎ খরনিগী মমাংদা পেরিস্তা লৈরম্মি, মফমদুদা ঐহাক্না অচৌবা ফেশন ব্রান্দ অমগী সি.ই.ও. অমগা উন্নরকই। খাদী অমসুং ভারতকী হেন্দলুমগী দিমান্দ অসি মশক থোক্না লৈরে হায়না মহাক্না ঐঙোন্দা তম্লকখি।

মরুপশিং,

খাদী অমসুং খুঙ্গংগী পোত্থোকশিংগী ইন্দস্ত্রীগী কারবার অসি চহি মাপনগী মমাংদা লুপা করোর লিশিং 25, 30গী অদাইদা লৈরম্মি। ঙসিদি, মসিনা লাক্ষ অমগা লিশিং কুন্থ্রাগী ময়াদা য়ৌরে। মমাংগী চহি 9দা চাউরাকপা লুপা করোর লাক্ষ অমগী ইনভেস্তমেন্ত সেক্তর অসিদা লাকখি, শেনফম অসি কদাইদা অমসুং কনাদা য়ৌখি? শেনফম অসি ঐখোয়গী হেন্দলুম সেক্তরগা মরী লৈনবা ইচিল ইনাও, ঐখোয়গী খুঙ্গং অমসুং ঐখোয়গী ত্রাইবেলশিংগী মনাক্তা য়ৌখিবনি। অদুগা, মমাংগী চহি মঙাদা ভারতকী লাইরবা মিলিয়ন 135না লাইরবগী খয়াত্তগী থোক্লকখি হায়না নিতি আয়োগকী পাউদম অমনা হায়খ্রে। মসিগুম্বা মায় পাকপা অসিদা অদোমগী অচৌবা থৌদাং য়াওরি। ঙসিদি, ভোকেল ফোর লোকেলগী ৱাখল্লোনগা লোয়ননা লৈবাক মীয়াম্না স্বদেশী পোত্থোকশিংবু মখুৎমক্না লৈনবা হৌখ্রে, মসিবু জন-অন্দোলন অমা ওইহনখ্রে। রক্সা বন্ধনগী কুহ্মৈসু নকশিল্লক্লে, গনেশ উৎসব, দশেরা, দিপাবলী, দুর্গা পুজা লাক্কদৌরে। কুহ্মৈশিং অসিদসু ঐখোয়না স্বদেশীগী থৌওং অমুক্কা হন্না পাংথোকপা তাবনি। মসিগুম্বা থৌওংনা ঐখোয়গী হেন্দিক্রাফ, ফিশা লোন্সা, হেন্দলুমগী মালেমগা মরী লৈনবা মীওইশিংদা য়াম্না চাউনা মতেং পাংবা ঙমগনি। রক্সা বন্ধনগী মতমদা ইচে-ইচলশিংনা রাখী কীবিবা মতমদা ঐখোয়না ঙাক শেনবগী ৱাফম ফোংদোক্নৈ। মসিগুম্বা কুহ্মৈ অসিদা ঐখোয়না করিগুম্বা লাইরবা ইমা অমগী মখুৎমক্না শাবা রাখী অমা লৈবা মতমদা, ঐহাক্না ইমা অদুবুসু ঙাক শেনগদৌরবনি।

মরুপশিং,

ঐখোয়না তেক্সতাইল সেক্তরগীদমক্তা শেমখিবা স্কিম কয়া অসিনা সোসিএল জস্তিস পুরকপগী অচৌবা পাম্বৈ অমা ওইবসিদা ঐহাক্না য়াম্না নুংঙাইবা ফাওই। ঙসিদি, লৈবাক শিনবা থুংবগী খুঙ্গং অমসুং শহর মচাশিংদা মীওই লাক্ষ কয়া অমনা হেন্দলুমগী থবক পায়নরি। মসিদা অয়াম্বা মীওইশিংদি মাইনোরিতী, শোত্থবা খুন্নাই অমসুং ত্রেইবেলশিংগী মীওইনি। মমাংগী চহি 9দা সরকারনা হোৎনখিবা কয়ানা মখোয়শিং মশিং য়াম্লবা থবক পীবতা নত্তনা মখোয়গী শেন্থোকসু হেনগৎহনখি। মৈ, ঈশিং, গ্যাস কন্নেক্সন, স্বচ্ছ ভারতকুম্বা খোঙথাংশিংগী কান্নবশিংসু মখোয়শিংদা হেন্না ফংলি। অদুগা মখোয়গী মফমদা মোদীনা গেরেন্তী অমা পীখি – লেম্না রেসন ফংবগী। অদুগা মোদীনা গেরেন্তী পীখ্রবদি, মদুনা ইমুং অমগী চাকখুম্বু নুমিৎ 365 মৈ চাকহনখি। মোদীনা পক্কা য়ূমগী গেরেন্তীসু পীখি। লুপা লাক্ষ 5 ফাওবগী লেম্না লাইয়েংবগী গেরেন্তী অমসু মোদীনা পীখি। ঐখোয়গী ফিশা লোন্সা তৌজবা মীওইশিংনা দিকেদ কয়াদগী ঙাইরক্লবা খুদোংচাবশিং পুম্নমক ঐখোয়না ফংহনখি।

মরুপশিং,

তেক্সতাইল সেক্তরগা মরী লৈনবা চৎনবী খুদিংবু হিংহনবতা নত্তনা, অনৌবা শক্লোনগা লোয়ননা মালেমগী মাঙদা থোক্নবগীদমক্তা ঐখোয়না হোৎনখি। অদুনা, মসিগুম্বা থৌওংগা মরী লৈনবা মরুপশিংদা মখোয়গী মহৈ-মশিং, ত্রেনিং অমসুং শেন্দান লম্বী শেম্বদা অহেনবা মিৎয়েং চঙখি। ঐখোয়না ফিশা লোন্সা অমসুং হেন্দিক্রাফকী মীওইশিংগী মচা-মশুশিংগী অপাম্বশিংদা মশা পালহনবা পাম্মি। অঙাংশিং অসিনা তেক্সতাইল ইন্দস্তিত্যুতশিংদা লুপা লাক্ষ 2 ফাওবগী স্কোলার্শিপ ফংলি। মমাংগী চহি মাপন্দা হেন্দলুম ক্লস্তর 600 হেন্না শেমখ্রে। মসিদা ফিশা লোন্সা তৌবা মীওই লিশিং কয়াদা ত্রেনিং পীখি। ফিশা লোন্সাগী থবকশিং হেন্না লাইহনবা, পোত্থোক হেন্না পুথোকপা ঙমহনবা, ক্বালিতী লৈহনবা, দিজাইনশিংশু হেন্না ফজহনবা হায়বসিদা ঐখোয়না লেপ্তনা হোৎনদুনা লাক্লি। মরম অদুনা, মখোয়শিংদা কম্প্যুতর শিজিন্নদুনা চলায়বা মেছিন কয়া ফংহনখ্রে। মসিদদি, অনৌ-অনৌবা দিজাইন কয়াসু খোঙজেল য়াঙনা পুথোকপা ঙম্লে। মোতোর শিজিন্নবা মেছিনশিংগা তান চান্ননা চৎপসু ঙম্লে। মসিগুম্বা থৌওং কয়া, মছিন কয়া অমবু ফিশা লোন্সা তৌবা মীওইশিংদা ফংহল্লে। সরকারনা হেন্দলুমগী ফিশা লোন্সা তৌবশিংদা রো মেতরিএলসু পীরি। রো মেতরিএল পুথোক পুশিনগী চাদিংসু সরকারনা পুথোক্লি। ফিশা লোন্সা তৌবা মীওইশিংদা কোলেতরেল য়াওদবা লোন কয়াসু মুদ্রা য়োজনাগী খুত্থাংদা ফংহল্লি।

মরুপশিং,

ঐহাক্না গুজরাত্তা লৈদুনা ঐহাক্কী ফিশা লোন্সাগী মরুপশিংগা মতম য়াম্না লেনমিন্নরকখি। ঐহাক্না এম.পি. ওইনা কারক্লিবা মফম, কাশীগী শেন্মিৎলোনগী চাউখৎ থৌরাংদা হেন্দলুমগী অচৌবা থৌদাং য়াওরি। ঐহাক্না মখোয়গা তোয়না উন্নৈ, ৱারী শাই। অদুনা ঐহাক্না তসেংবা ফিভমগী মতাংদসু খঙজৈ। ঐখোয়গী ফিশা লোন্সা তৌবশিংগী খুন্নাইগী শিংনবা অমা লৈ। মখোয়না পোত্থোক্তি পুথোক্লে, অদুবু মদুবু য়োন্নবা সপ্লাই চেনগী খুদোংচাদবা অমদি অদুমক থেংনৈ, মার্কেতিংগী খুদোংচাদবা মাইয়োক্নৈ। ঐখোয়গী সরকারনা মসিগুম্বা শিংনবশিং অসিদগী থোক্লকপা হৌরে। খুৎনা শাবা পোত্থোকশিংগী মার্কেতিংদসু সরকারনা হৌজিক মিৎয়েং চঙলে। লৈবাক্কী মফম অমা হেক্তদা নুমিৎ খুদিংগী একজিবিসন পাংথোক্লি। ভারত মন্দপমগুম্বা মফম কয়াসু লৈবাক্কী শহর কয়াদা ঙসি শারে। মফমসিদা, দেলি এলাৱেন্সকী মথক্তা স্তোল কয়াসু লেম্না পীরি। হেন্দলুমগী পোত্থোক, হেন্দিক্রাফকী পোত্থোক, কোতেজ ইন্দস্ত্রীনা শাবা পোত্থোকশিংগী অনৌ-অনৌবা তেক্নিক, পেত্তর্ন, মখোয়গী মার্কেতিংগী অনৌবা খুদোংচাবা কয়া, স্তার্তঅপ কয়া ঐখোয়গী থম্মোই শেংবা অমসুং হোৎনবা কনবা নহাশিংনা হৌদোরকপা অসিদা ঐহাক্না য়াম্না নুংঙাইবা ফাওই। তুংগী মতমনা অনৌবা মতৌ অমা ফংজবগী ফিভম অমা ঐহাক্না ঙসিদি উবা ফংজরে।

ঙসিদি, ৱান দিস্ত্রিক্ত, ৱান প্রদক্ত স্কিমগী খুত্থাংদা জিলা খুদিংগী অখন্নবা পোত্থোকশিংবু পুক্নিং থৌগৎপগী থবক পাংথোক্লি। লৈবাক্কী রেলৱে স্তেসনশিংদা মসিগুম্বা পোৎলম য়োন্নবা অখন্নবা স্তোল কয়া অমসু লৈহল্লে। জিলা, রাজ্য খুদিংগী হেন্দিক্রাফ পোৎলম, হেন্দলুমগী পোত্থোকশিংবু হেন্না খুমাং চাউশিলহন্নবা লৈবাক অসিনা য়ুনিতী মোল শারি। য়ুনিতী মোল অমদা রাজ্য অদুগী হেন্দিক্রাফ পোৎলম খুদিংমক ফংহনগনি। মসিগী অচৌবা কান্নবা অমদি ঐখোয়গী হেন্দলুমগা মরী লৈনবা ইচিল ইনাওশিংনা ফংগনি। অদোমগী মরক্তগী গুজরাতকী স্তেচ্যু ওফ য়ুনিতী য়েংলুরবা মীওইশিংনা মফমদুদা লৈবা য়ুনিতী মোল উরম্লগনি। হিন্দুস্তানগী হেন্দিক্রাফশিংনা শাবা পোৎলম খুদিং মফমদুদা ফংবনি। মফমদুদা লাকপা লমকোয়বশিংনা ভারতকী য়ুনিতীগী শক্তম উবা ফংবতা নত্তনা হিন্দুস্তানগী মফম অমা হেক্তদা শাবা পোৎলম খুদিংমকসু মফমদুদা ফংগনি। মসিগুম্বা য়ুনিতী মোল অসি লৈবাক্কী রাজ্য খুদিংগী কোনুংদা শাবগী থবক অমসু ঐখোয়না পায়খৎলি। মসিগুম্বা পোত্থোক্কী মগুন য়াম্না লৈ। লৈবাক্কী প্রধান মন্ত্রীনা মীরম লৈবাক্কী খোঙচৎ চৎপদা মালেমগী শক্নাইবা মীওই কয়াগা উন্নৈ, মখোয়গী মফমদা মসিগুম্বা পোৎলমশিংবু খুদোল ওইনা পী। মখোয়নসু পোত্থোকশিং অসিবু য়াম্না থাগৎলি। মসিদি মদুগী মফমদা মদুগী মীয়াম্না শাবনি হায়বা মতমদা, মখোয়নসু মফমশিং অমসুং মীওইশিং অসিগী মরমদসু খঙবগী খুদোংচাবা ফংলিবনি।

মরুপশিং,

ঐখোয়গী হেন্দলুম সেক্তরগী ইচিল ইনাওশিংনা দিজিতেল ইন্দিয়াগী কান্নবসু ফংহন্নবা ঐখোয়না লেপ্তনা হোৎনরি। পোৎলম কয়া লৈবা য়োনবগী পোর্তেল অমা সরকারনা শারে হায়বা অদোম খঙলম্লগনি – মদুগী মার্কেতপ্লেস অদুদি GeMনি। GeMদা খ্বাইদগী পীকপা ইন্দস্ত্রী, ফিশা-লোন্সা তৌবশিংনা মখোয়গী পোৎলম য়োনবা য়াহল্লি। ফিশা লোন্সাগী মীওই মশিং য়াম্বনা মসিগী কান্নবা লৌনখ্রবনি। ঙসিদি, হেন্দলুম অমসুং হেন্দিক্রাফকা মরী লৈনবা লুপ লাক্ষ 1.2না GeM পোর্তেলগা মরী লৈনরি।

মরুপশিং,

ঐখোয়গী সরকারনা ঐখোয়গী ফিশা লোন্সাগী মালেমগীদমক্তা অচৌবা কৈথেল অমা শেম্নবা নীংথিনা থৌরাং য়াৎলি। ঙসিদি, মালেমগী চাউর-চাউরবা কম্পেনীশিংনা ভারতকী MSME, ঐখোয়গী ফিশা লোন্সাগী মীওই, ইন্দস্ত্রী তৌজবা, লৌমীশিংগী পোত্থোকশিংবু মালেমগী মাঙদা পুথোক্নবা মাঙজিল থানা থোক্লক্লি। ঐহাক্না মসিগুম্বা কম্পেনীশিংগী মকোকশিংসু হকথেংননা ৱারী শানরে। মখোয়গী দুকান কয়া মালেম শিনবা থুংনা লৈরি, রিতেল সপ্লাই চেন লৈ, অচৌ-অচৌবা মোল অমসুং দুকান লৈনৈ। ওনলাইনগী মালেমদসু কান্নবা লৌবগী পাম্বৈ য়াম্না লৈ। মখোয়গুম্বা কম্পেনীশিং অসিনা ভারতকী মসিগুম্বা লোকেলগী পোত্থোকশিংবু মালেমগী মফম শিনবা থুংবদা য়ৌহন্নবা পান্দম থম্লি। ঐখোয়না শ্রী অন্না হায়না কৌরিবা মিল্লেত ওইরো, হেন্দলুমগী পোত্থোক ওইরো, মসিগুম্বা মালেমগী কম্পেনী অচৌবশিংনা পোত্থোকশিং অসিবু মালেমগী কৈথেলদা শোইদনা য়ৌহল্লগনি। মসিনা হায়বদি, পোত্থোক্তি ভারতকী ওইগনি, ভারত্তা শাবা ওইগনি, ভারতকী মীয়ামগী হুমাংগী মনম চেনগনি, অদুগা সপ্লাই চেন্না মখোয়গুম্বা মলতি নেস্নেল কম্পনীশিংগী শিজিন্নগনি হায়বনি। মসিগী অচৌবা কান্নবা অমদি সেক্তর অসিগা মরী লৈনবা ঐখোয়গী মীওই খুদিংমক্না ফংগনি।

মরুপশিং,

সরকারগী মসিগুম্বা হোৎনজমন অসিগী মরক্তা, ঐহাক্না তেক্সতাইল ইন্দস্ত্রী অমসুং ফেশন মালেমগী মরুশিংগী মফমদা ৱাফম খরসু থমজবা পাম্মি। ঐখোয়না ঙসিদি মালেমগী মকোক থোংবা শেন্মিৎলোন অহুমগী মনুং চন্নবা খোঙদাবা হৌরবনি, অদুনা ঐখোয়গা ৱাখল্লোন অমসুং থবক তৌবগী মতৌসু চাউথোকপা তাবনি। ঐখোয়না ঐখোয়গী হেন্দলুম, হায়বদি, খাদী, ইশাগী তেক্সতাইল সেক্তরবু ৱর্ল্দ চেম্পিয়ন ওইহনবা পাম্মি। অদুবু, মসিদা পুম্নমক্কী মতেংগী মথৌ তাই। শিন্মী ওইরো, ফিশা লোন্সা তৌবা ওইরো, দিজাইনর ওইরো, ইন্দস্ত্রী ওইরো, পুম্নমক্না অমত্তা ওইনা থবক তৌবা তাবনি। অদোম্না ভারতকী ফিশা লোন্সা তৌবগী স্কিলবু স্কেলগা মরী লৈনহনবীয়ু, তেক্নোলোজীগা মরী লৈনহনবীয়ু। ঐখোয়না ঙসিদি ভারত্তা নিও মিদ্দল ক্লাস অমা শাফোংলকপা উরে। পোত্থোক খুদিংগী নহা কঞ্জ্যুমর কয়া ভারত্তা লৈবা হৌরক্লে। মসিদি, ভারতকী তেক্সতাইল কম্পেনীশিংগী ওইনা অচৌবা খুদোংচাবা অমনি। অদুনা, লোকেল সপ্লাই চেনবু মপাঙ্গল হাপ্পা হায়বসি মসিগুম্বা কম্পেনীশিং অসিগী থৌদাং অমসু ওইরি, মসিদা ইনভেস্ত তৌফম থোক্লি। হান্নদগী শাদুনা লৈরবা পোত্থোক মীরমদা ফংলবদি, মদু ইম্পোর্ত তৌসি হায়বসি ঙসিগী ৱাখল্লোন্নি। অদুবু মহাত্মা গান্ধীনা তাকপীরম্বা ৱাফমগী মখা পোন্না চৎকে হায়রবদি, মসি চুনবা থৌওং নত্তে। ঐখোয়গী থৌওংদা অহোংবা পুরকপা তাবনি। থবকশিং অসি অসুক থুনা করম্না পাংথোক্কনি, লোকেল সপ্লাই চেন করম্না শেমগনি হায়বগী ৱা থৈদোকপগী থৌওং অসি ঐখোয়গী সেক্তরগী মশক নাইবা মীওইশিংনা তৌদবা তাই। ঐখোয়না তুংদা কান্নবা লৌগে হায়রবদি, লোকেল সপ্লাই চেন্দা ঙসি ইনভেস্ত তৌবা তাবনি। মসিদি চাউখৎপা ভারত অমা পুরকপগী পাম্বৈনি, মসিনা ঐখোয়গী চাউখৎপা ভারতকী মঙলান মঙফাওনহনগনি। ত্রিলিয়ন 5গী শেন্মিৎলোনগী মঙলান মঙফাওনহনগনি, মালেমগী মকোক থোংবা অহুমগী মফমদা লাকপা ঙমহনগনি। অদুগা ঐখোয়না থম্মোইনুংগী খোল্লাও তাদুনা য়েংলবদি, মসিগী লম্বীসিদা চত্তুনা ঐখোয়গী নিংতম লান্মীশিংগী মঙলান মঙফাওনহনবা ঙমগদৌরিবনি, স্বদেশীগী মঙলান মঙফাওনগদৌরিবনি।

মরুপশিং,

অদুগা মশাবু ইকায় খুম্নজবা, মশাগী শক্তাক্তা চাউথোকচবা, অদুগা মরোমদোম লেপচবা ভারত অমগী মঙলান থমজবা মীওই অমগী ওইনদি, খাদী হায়বসিনা চুনবা ফিজোলনি।

মরুপশিং,

ঙসিদগী নোংমগী মতুংদা ওগস্ত 9 ওইগনি। ঙসিগী নুমিৎ অসিনা স্বদেশী আন্দোলনগা মরী লৈনরবদি, ওগস্ত 9না ভারতকী খ্বাইদগী চাউবা আন্দোলন অমা উখিবনি। নুংশিরবা বাপুনা ওগস্ত 9দা ক্বিত ইন্দিয়া মুবমেন্ত, হায়বদি ভারত থাদোকউ ইহৌ হৌদোকখিবনি। ভারত থাদোকউ হায়না নুংশিরবা বাপুনা তসেং-তসেংনা হায়খিবনি। মসিগী নুমিৎ খরনিগী মতুংদা লৈবাক অসিদা মিকপ থোকপগী ফিভম অমা লাকখিবনি, ব্রিতিশশিংনা ভারত তসেংনা থাদোকপগী মতম অসি অরোইবদা লাক্লে হায়বা খঙদুনা থাদোকপসু তাখিবনি। বাপুগী থৌজালদগী লাকখিবা মসিগুম্বা ৱাখল চেৎপগী পাঙ্গল অসি হৌজিক মতমগী খ্বাইদগী তঙাই ফদবনি, মসিবু ঐখোয়না হেন্না খুমাং চাউশিলহনবা তাবনি। ব্রিতিশশিংবু তান্থোকপা ঙমখিবা মন্ত্রা অদুমক্না ফত্তবা ইথিল কয়াবু তান্থোকপগী মথৌ পাংথোকপা ঙমগনি। ঙসিদি, ঐখোয়গী মাঙদা চাউখৎপা ভারত অমগী পান্দম লৈরি। পান্দম অসিগী মমাংদা ফত্তবা খরনা অয়েৎপা পীদুনা লৈরে। অদুনা, ভারতনা অমত্তা খোঞ্জেলগা লোয়ননা হায়রি – ভারত থাদোকউ। ঙসিদি ভারতনা হায়রি, শাগৈ নাতৈ – ভারত থাদোকউ; মীওই পেলহনবগী থৌওং – ভারত থাদোকউ। ভারত্তা লৈরিবা মসিগুম্বা ফত্তবশিংনা লৈবাক্কী মফমদা খুদোংথীবা নংহনবা য়াই। মসিনা লৈবাক্কী অচৌবা শিংনবা অমসু ওইরি। মসিগুম্বা ফত্তবশিংবু ঐখোয় পুন্না হোৎনমিন্নদুনা তান্থোকপা ঙমগনি, মায়থীবা পীবা ঙমগনি হায়না ঐহাক্না থাজবা থম্মি। অদুগা, ভারতনা অমুক্কা হন্না মায় পাক্কনি, লৈবাক মীয়াম খুদিংনা মায় পাক্কনি।

মরুপশিং,

ওগস্ত 15, য়ুথোং খুদিংগী তিরঙ্গা অদুগা চহি কয়াদগী তিরঙ্গা শাবগী থবক তৌদুনা লাক্লবা ইচে-ইচলশিংগা ঙসিদি ঐহাক্না উন্নবা ফংলে। মখোয়বু নমস্তে তৌবগী, মখোয়গা ৱারী শাবগী ঙসি খুদোংচাবা ফংলে। হন্দক্কী ওগস্ত 15 অসিসু, মমাংগী চহিগুম্না হর ঘর তিঙ্গাবু মায় পাকহন্নবা হোৎনবা তাবনি। মচু অহুমগী ফিরাল অসিবু য়ুম্থোং খুদিংদা পাইহনবতা নত্তনা থম্মোইনুংদসু পাইহনগদবনি। ঐহাক্না লৈবাক্কী হেন্দলুম নুমিৎকী য়াইফ পাউজেল অমুক্কা হন্না পীজরি অমসুং পুম্নমক্কী মফমদা থাগৎপসু ফোংদোকচরি। থাগৎচরি।

***