অৱাং-নোংপোক লমদমদা স্পোর্তস ইনফ্রাস্ত্রকচরশিং শেমগৎপগী মতাংদা সংসদতা হংলকপা ৱাহং অমগী পাউখুম পীবদা, য়ুথ এফেয়ার্স অমসুং স্পোর্তসকী য়ুনিয়ন মিনিস্তর শ্রী অনুরাগ সিংহ থাকুরনা হায়খি প্রধান মন্ত্রী শ্রী নরেন্দ্র মোদীগী লমজিং মখাদা, হৌখিবা চহি ৯দা অৱাং নোংপোক লমদমদা স্পোর্তস ইনফ্রাস্ত্রকচরশিং শিংথানিঙাই ওইনা ফগৎলে। ‘লুক ইস্ত পোলিসি’দগী ‘এক্ত ইস্ত পোলিসি’দা হোংলক্তুনা, অৱাং-নোংপোক লমদমদা স্পোর্তস ইনফ্রাস্ত্রকচরশিং চাউখৎহন্নবা সরকারনা অখন্নবা মীৎয়েং চঙলে। অপুনবা লুপা করোর ৬৪৩.৩৪ চঙনা অৱাং-নোংপোক্কী রাজ্য মনিপুরদা লৈবাক অসিগী অহানবা নেসনেল স্পোর্তস য়ুনিভর্সিতি লিংখৎলে।

মহাক্না মখা তানা হায়খি চহি অসিদা লৈবাক অসিদা খেলো ইন্দিয়া সেন্তর ১০০০ কৎথোক্কনি, মসিগী মনুংদা অৱাং নোংপোক্তা খেলো ইন্দিয়া সেন্তর ২২৭ লিংখৎকনি। অপুনবা লুপা করোর ৫২০.৬০গী শেনফম অমা চঙনা স্পোর্তস ইনফ্রাস্ত্রকচর প্রোজেক ৭৫ মিনিস্ত্রিনা অয়াবা পীরে। অৱাং নোংপোক রাজ্যশিংদা হান্নদগী হৌনা নেসনেল সেন্তর ওফ এক্সলেন্স ৩, সাই ত্রেনিং সেন্তর ১২ অমসুং খেলো ইন্দিয়া এক্রিদিতেদ স্পোর্তস একাদেমি ২২ থবক তৌখ্রে।

শান্নবদা অৱাং-নোংপোক্না লৌরিবা থৌদাং পল্লদুনা, য়ুনিয়ন মিনিস্তরনা হায়খি অৱাং-নোংপোক্কী শান্নরোয়শিং মরুওইনা মেরি কোম, মিরাবাই চনু অমসুং লভলিনা বোগোহাইন্না লৈবাক্কী মিংচৎ পুরক্লে। বাইচুং ভুতিয়া অমসুং সিবা থাপানা শানবগী লমদা লৌখিবা থৌদাং মহাক্না থাগৎখি।

মখা তানা য়ুনিয়ন মিনিস্তরনা হায়খি তার্গেত ওলেম্পিক পোদিয়ম স্কিমগী মখাদা শান্নরোয়শিং মপান লৈবাক্কী ত্রেনিং কেম্পশিংদা শরুক য়ানবা চৎথোক-চৎশিন অমসুং লৈফম-চাফমগী খরচশিং পুথোক্তুনা নেসনেল স্পোর্তস দিবলপমেন্ত ফন্দ( এন এস দি এফ)গী মখাদা সরকারনা শান্নরোয়শিং শৌগৎলি।

মহাক্না হায়খি খেলো ইন্দিয়া স্কিমগী মখাদা, হান্নগী চেম্পিয়ন শান্নরোয়শিং খেলো ইন্দিয়া সেন্তরশিংদা শান্নবা চাউখৎহন্নবা শীজিন্নরি। নাগালেন্দ রাজ্যদা শান্নবা চাউখৎহন্নবা ভাইএবিলিতি গেপ ফন্দিংগী মখাদা রাজ্যগী দরকার ওইবশিং মতেং পাংনবা কেন্দ্র সরকারনা মতেং পাংলি।

মহাক্না হায়খি অৱাং-নোংপোক রাজ্যশিং মতেং পাংনবা তঙাইফদবা থবকশিং পায়খৎলে অমসুং নাগালেন্দ য়াওনা অৱাং-নোংপোক রাজ্যশিংদগী লাকপা প্রোপোজেলশিং সরকারনা মখা তানা সেঙ্কসন তৌরি। খেলো ইন্দিয়া স্কিমগী মখাদা গুৱাহাতিদা অনিশুবা খেলো ইন্দিয়া গেম পাংথোকখ্রে।

হকচাংগী ফিবমদা মীমান্নদ্রবা শান্নরোয়শিংগী মতাংদা হংলকপা ৱাহংগী পাউখুম পীবদা মহাক্না হায়খি প্রধান মন্ত্রী শ্রী নরেন্দ্র মোদীগী লমজিং মখাদা, হকচাংগী ফিবমদা মীমান্নদ্রবা শান্নরোয়শিংদা মীয়াম্না উরিবা অমসুং লোয়নবগী মওংদা অহোংবা লাক্লে। ‘ভিক্লাং’দগী ‘দিবয়াং’দা মমিং হোংলকপা অসি মাইকৈ অসিদা থাংজিনবা মরুওইবা খোঙথাং অমনি।

মহাক্না হায়খি শান্নরোয়শিং, পেরা-এথলেতশিং, দেফ এথলেতশিংদা চপ মান্নবা খুদোংচাবাশিং পীরে। লৈবাক অসিগী চাউথোকচবা ওইরিবা অমসুং থৌনা পীরিবা শান্নরোয়শিংগীদমক ঐখোয়না চাউথোকচরি অমসুং মখোয় মতেং পাংনবা সরকারনা পায়খৎপা য়াবা থবকশিং পায়খৎলি।

****