প্রধানমন্ত্রীগী লোইশঙ
azadi ka amrit mahotsav g20-india-2023

মহারাস্ত্রগী পুনেদা পি.এম.গী মফমদা লোকমান্যা তিলক নেস্নেল এৱার্দ পীখ্রে


এৱার্দ অসিবু মীওই করোর 140বু থাগৎখ্রে

শেলগী মনাবু নমামী গঙ্গে প্রোজেক্ততা কত্থোকখ্রে

“লোকমান্যা তিলক অসি ভারতকী নিংতম ইহৌগী ‘তিলক’নি”

“লোকমান্যা তিলক অসিদি ইন্সতিত্যুসন শেম-শাবা অমসুং চৎনবীবু য়োকখৎপা অথোইবা মীওইনি” অমনি

“তিলক্না ভারতমচাশিংগী মরক্তা মশানা অশোনবনি খঞ্জবগী ৱাখল্লোনবু লৌথোকখি অমসুং মশাগী তৌবা ঙম্বগী মতিক্তা থাজবা পুরকহনখি”

“ভারতনা ত্রস্ত দেফিসিত্তগী ত্রস্ত সর্প্লসতা লৈরে”

“মীয়ামগী থাজবা হেনগৎলক্লিবা অসিনা ভারত মীয়ামগী চাউখৎ থৌরাংগী পাম্বৈ ওইরে”

Posted On: 01 AUG 2023 2:01PM by PIB Imphal

প্রধান মন্ত্রী, শ্রী নরেন্দ্র মোদীগী মফমদা ঙসি মহারাস্ত্রগী পুনেদা লোকমান্যা তিলক নেস্নেল এৱার্দ পীখ্রে। এৱার্দ অসি লোকমান্যা তিলক্কী পুন্সিবু ইকায় খুম্ননবগীদমক্তা তিলক স্মারক মন্দিরনা ইং 1983দা শেমখিবনি। প্রধান মন্ত্রীনা শেলগী মনাবু নমামী গঙ্গে প্রোজেক্ততা কত্থোকখ্রে।

প্রধান মন্ত্রীনা থৌরম মফম য়ৌবা মতমদা মহাক্না লোকমান্যা তিলক্কী মীতমদা হৈ-লৈ কত্তুনা ইকায় খুম্নবা উৎখি। ঙসিগী তিনখিবা মীয়ামদা ৱা ঙাঙবদা, প্রধান মন্ত্রীনা লোকমান্যা তিলক্কী পুন্য তিথীদা মহাক্কী মফমদা ইকায় খুম্নবা উৎখি অমসুং ঙসিগী নুমিৎ অসিগী মহাক্কীদমক্তা য়াম্না অখন্নবা নুইৎনি হায়খি। থৌরম অসিদা মহাক্না খল্লিবা ৱাখল্লোন ফোংদোক্লদুনা, প্রধান মন্ত্রীনা ঙসি অসিদি লোকমান্যা তিলক্কী পুন্য তিথী ওইবগা লোয়ননা অন্না ভাউ সাথেগী মপোক কুমওন্সু ওই হায়না ফোংদোকখি। “লোকমান্যা তিলকজী অসিদি ভারতকী নিংতম ইহৌগী ‘তিলক’নি”, প্রধান মন্ত্রীনা হায়খি। অন্না ভাউ সাথেনা খুন্নাইবু হেন্না ফহন্নবগীদমক্তা লৌরমখিবা চাংদম্ননীংঙাই লৈত্রবা অমসুং খ্বাইদগী অথোইবা থৌওং কয়াদা মহাক্না মীয়ামগী পুক্নিং চিংশিনখি। প্রধান মন্ত্রীনা ছত্রপতি শিবাজী, চাপকের মচিল মনাও, জ্যোতিবা ফুলে অমসুং সাবিত্রিবাই ফুলেগী লমদম অসিদসু ইকায় খুম্নবা উৎখি। ঙসিগী অঙনবদা, প্রধান মন্ত্রীনা দগদুসেথ লাইশঙদগী থৌজালসু নিজখি।

প্রধান মন্ত্রীনা লোকমান্যগা হকথেংননা মরী লৈনবা মফম অমসুং ইস্তিত্যুসন অসিনা ঙসি মহাক্কী মফমদা উৎলিবা ইকায় খুম্নবগী মতৌ অসিদি “কাওবা নাইররোইদবা” থৌওংনি হায়খি। কাশী অমসুং পুনে অনিমক্না স্কোলরশিংগী ময়োল ওইদুনা মান্নবা মতৌ চেল্লিবা অসিবু প্রধান মন্ত্রীনা পনখি। মীওই অমনা করিগুম্বা এৱার্দ অমা ফংবা মতমদা, এৱার্দ অসিগী মমিংমক্না অখন্নবা ওইনা লোকমান্যা তিলক হায়না পল্লিবা অসিনা, থৌদাং অমসু লোইনরকই হায়না প্রধান মন্ত্রীনা হায়খি। প্রধান মন্ত্রীনা লোকমান্যা তিলক নেস্নেল এৱার্দ অসিগীদমক্তা লৈবাক মীয়াম করোর 140বু থাগৎখি। মখোয়গী মঙলান অমসুং অপাম্বা ফংহন্নবগীদমক্তা সরকারনা থবক অমত্তা চিত্থদনা পাংথোক্কনি হায়বগী মহাক্না মীয়ামদা থাজবা পীখি। প্রধান মন্ত্রীনা শেলগী মনা অসিবু নমামী গঙ্গে প্রোজেক্ততা কত্থোক্নবা মহাক্না লৌরিবা ৱারেপ অসিবুসু মীয়ামদা পাউদমখি।

লোকমান্যা তিলক্না নিংতম্বা ভারত্তা তম্লিবা শরুক অসিদি ৱাহৈ খরা নত্ত্রগা থৌরম খরদা অকক্নবা থম্বা ওইথোক্লোই, মসিগী মরমদি মহাক্কী ইথিল অসিদি নিংতম ইহৌগী লুচিংবা অমসুং থৌদোক খুদিংদা ফংই হায়না প্রধান মন্ত্রীনা হায়খি। “ব্রিতিশশিং ফাওবনা মহাকপু ‘ফাদর ওফ দি ইন্দিয়ন অনরেস্ত’ হায়না কৌবা তারম্মি”, প্রধান মন্ত্রীনা পাউদমখি। লোকমান্যা তিলক্না ‘স্বরাজ হায়বসিদি ঐহাক্কী পোকপগী ফংফম থোকপা হক্নি’ হায়বা মহাক্কী খোল্লাওনা নিংতম ইহৌগী মাইকৈ হোংহনখি হায়না শ্রী মোদীনা ফংদোকখি। ব্রিতিশশিংনা ভারতকী চৎনবীবু শোত্থবা মতৌনি হায়ববু অরানবনি হায়না তিলক্না উৎখি। মহাত্মা গান্ধী মশামক্না মহাকপু মোদর্ন ইন্দিয়াগী আর্কিতেক্তনি হায়না কৌখিবনি, প্রধান মন্ত্রীনা নীংশিংখি।

প্রধান মন্ত্রীনা লোকমান্যা তিলক্কী ইন্সতিত্যুসন-শেম্বা ঙম্বগী মতিক-মগুন্দা ইকায় খুম্নবা উৎখি। মহাক্না লালা লাজপত রাই অমসুং বিপিন চন্দ্র পালগা খুৎশম্নখিবা অসিদি ভারতকী নিংতম ইহৌগী সনাগী য়ুগ অমনি। তিলক্না পাউ-চে অমসুং পাউ-খোম্বগী থৌওং শিজিন্নখিববুসু প্রধান মন্ত্রীনা নীংশিংখি। মহাক্কী পাউ-চে কেসরী অসি মহারাস্ত্রদা হৌজিকসু ফোঙলি অমসুং মীয়াম্না পানরি। “পুম্নমক অসিনা লোকমান্যা তিলক্কী ইন্সতিত্যুসন শেম-শাবগী মপাঙ্গল লৈরবা মতিক্কী খুদম অমা ওইরি”, প্রধান মন্ত্রীনা মখা তাখি।

ইন্সতিত্যুসন শেম্বদগী মিৎয়েং হোংদোক্লদুনা, প্রধান মন্ত্রীনা তিলক্না চৎনবীবু য়োকখৎপগী ৱাফমদা মিৎয়েং অমুক চঙলদুনা, ছত্রপতি শিবাজীগী ৱাখল্লোনবু শীংথানবগীদমক্তা গনপতী মহোৎসব অমসুং শিব জয়ন্তী হৌদোকখিববু পনখি। “থৌদোকশিং অসিদি ভারতপু নাৎকী চৎনবীগী শরুক অমা ওইহনবগা লোয়ননা পুর্না স্বরাজ মপুং ফানা শেমগৎপগী কেম্পেন অমনি। মসিদি লুচিংবশিংনা নিংতম্বগুম্বা পান্দমগীদমক্তা লান্থেংনবা অমসুং খুন্নাইবু শেমদোকপগী কেম্পেনসু চত্থখিবা ভারতকী অখন্নবা থৌওং ওইখি”, মহাক্না হায়খি।

লোকমান্যা তিলক্না লৈবাক্কী নহাশিংদা থম্বা থাজবগী মতাংদা পল্লদুনা, প্রধান মন্ত্রীনা মহাক্না বীর সাবর্করবু লমজিং লমতাকপীখিবা অমসুং ছত্রপতি শিবাজী স্কোলার্শিপ অমসুং মহারানা প্রতাপ স্কোলার্শিপ হায়রিবা স্কোলার্শিপ অনি অসিবু লন্দন্দা চলায়রিবা শ্যামজী কৃষ্ণ ভর্মাগী মফমদা মহাকপু শক্তাকখিবগী থৌওংবু নীংশিংখি। ন্যু ইংলিশ স্কুল, ফর্গ্যুসন কোলেজ অমসুং দেক্কন এজুকেসন সোসাইতীবু পুনেদা লিংখৎখিবা অসি মহাক্কী পান্দম অদুগী শরুক অমনি। “পথাপ শেম্বদগী ইন্সতিত্যুসন শেম্বা ফাওবা, ইন্সতিত্যুসন শেম্বদগী মীওই শেম্বা ফাওবা, অমসুং মীওই শেম্বদগী লৈবাক শেম্বফাওবগী পান্দম অসিদি লৈবাক্কী তুংগী মতমগী থৌরাং অমনি অমসুং লৈবাক অসিনা থৌরাং অসিবু য়াম্না নীংথিজনা তুং ইল্লি”, প্রধান মন্ত্রীনা হায়খি।

মহারাস্ত্রা মীয়াম অমসুং লোকমান্যা তিলক্কী মরক্তা লৈনরিবা অখন্নবা মরী অসিদা মিৎয়েং চঙলদুনা, প্রধান মন্ত্রীনা গুজরাতকী মীয়ামগসু মহাক্কা মান্নবা মরী অমা লৈনৈ হায়না ফোংদোকখি। লোকমান্যা তিলক্না অহমেদবাদকী সাবর্মতী জেলদা চাউরাক্না থা অমগা মখায় লৈরমখিবা মতমবু মহাক্না নীংশিংলদুনা ইং 1916দা মীওই 40,000 হেনবনা মহাকপু তরাম্না ওক্নবা অমসুং মহাক্কী ৱারোল তানবা লাকখি অমসুং মখোয়গী মরক্তা সর্দার বল্লবভাই পতেলসু য়াওখি হায়না মহাক্না পাউদমখি। ৱারোল অদুগী ইথিলনা মরম ওইরগা সর্দার পতেলনা অহমেদবাদ ম্যুনিসিপালিতী লুচিংলিঙৈ মতমদা, মহাক্না অহমেদবাদতা লোকমান্যা তিলক্কী মীতম অমা খিনখিবনি হায়না প্রধান মন্ত্রীনা হায়খি। “লোকমান্যা তিলক্কী আইরন ফিস্তকী শক্তাক অসিমক সর্দার বল্লব ভাই পতেলগী মফমদা কনাগুম্বা অমনা উবা ফংগনি”, প্রধান মন্ত্রীনা হায়খি। প্রধান মন্ত্রীনা মীতম অসি খিল্লিবা ভিক্তোরিয়া গার্দেনগী মফমদুগী মতাংদা পল্লদুনা, লম্পাক অসি মহারানী ভিক্তোরিয়াগী দাইমন্দ জুবিলীগী হরাও নুংঙাইবা ফোংদোক্নবগীদমক্তা ব্রিতিশশিংনা ইং 1897দা শেমগৎখিবনি হায়না পাউদম্বগা লোয়ননা লোকমান্যা তিলক্কী মীতম খিন্দুনা সর্দার পতেলনা পাংথোকখিবা য়াওল্লোইগী থৌওং অদুদা প্রধান মন্ত্রীনা মীয়ামগী পুক্নিং চীংশিনখি। ব্রিতিশকী মাইকৈদগী অয়েৎপা থেংনরবসু, মহাত্মা গান্ধীনা ইং 1929দা মীতম অসিগী মাইখুম হাংদোকখি হায়না প্রধান মন্ত্রীনা হায়খি। প্রধান মন্ত্রীনা মীতম অসিগী মতাংদা হায়রদুনা, মসিদি নিংতম্বা ভারতকী মশেক মঙালনা থল্লবা তুংগী মতম্বু উজদুনা তিলকজীনা ফমদুনা পোত্থাবগী মতৌ উবা ফংবা নীংথিরবা মীতম অমনি হায়না ফোংদোকখি। শোরোক অমগী মমিংবু মীরম লৈবাক্কী লান্দাবা মীওই অমগী মহুত্তা ভারতকী শক্নাইরবা মীওই অমগী মমিংদা হোংদোক্নবা সরকারনা হোৎনবদা মীওই খরনা ৱা য়াম্না চাউথোকহল্লিবা অসিদা পেন্দবা ফংদোক্লদুনা প্রধান মন্ত্রীনা অসুম্না ফোংদোকখি, “মীখা পোল্লিঙৈগী মতমদা ফাওবা, সর্দার সাহেবনা ভারতকী মচানুপাবু ইকায় খুম্ননবগীদমক্তা ব্রিতিশ লৈঙাক অপুনবগা মুক্নখিবনি”।

লোকমান্যা তিলক্না গীতাদা অচেৎপা থম্লম্বা অদুগী মতাংদা প্রধান মন্ত্রীনা ৱাফম থমখি। লোকমান্যনা থাপ্লবা মন্দলেদা কৈশুম শঙদা লৈরিঙৈদা ফাওবা, মহাক্না গীতা নৈনবা লেপখিদে অমসুং গীতা রহসয়গী মওংদা মমল নাইদ্রবা খুদোল অমা ঐখোয়দা পীবিরমখি।

প্রধান মন্ত্রীনা মীওই খুদিংবু মশাদা থাজহনবা ঙম্বগী লোকমান্যগী মতিক-মগুনগী মতাংদা পাউদমখি। তিলক্না মীয়াম্বু নিংতম্বা, পুৱারী অমসুং চৎনবীগীদমক্তা লান্থেংনরিবা অসিদা অমুক্কা হন্না থাজবা থমহনখি। মহাক্না মীয়াম, শিন্মী অমসুং ওন্তোপ্রিনরশিংগী মফমদসু থাজবা থমখি। “তিলক্না ভারতমচাশিংগী মরক্তা মশানা অশোনবনি খঞ্জবগী ৱাখল্লোনবু লৌথোকখি অমসুং মশাগী তৌবা ঙম্বগী মতিক্তা থাজবা পুরকহনখি”, মহাক্না হায়খি।

প্রধান মন্ত্রীনা থাজদবগী ৱাখল্লোন চেনবা মফমদা লৈবাক্না চাউখৎপা হায়বসি ওইথোক্লোই হায়না ফোংদোকখি। মহাক্কী মমিং পল্লদুনা, মহাক্কী চহি 10 মমাংগী পুনে খোঙচৎপু নীংশিংহল্লকখিবা পুনেদগী মীওই, শ্রী মনোজ পোচাতজীগী ত্বীত অবু নীংশিংখি। তিলকজীনা লিংখৎলম্বা ফর্গ্যুসন কোলেজতা মহাক্না মতমদুদা ভারতকী ত্রস্ত দেফিসিৎকী মতাংদা থমখিবা ৱারোলবু নৌহৌননা নীংশিংখি। ত্রস্ত দেফিসিৎকী হীরম হৌদোক্লকপগীদমক্তা প্রধান মন্ত্রীনা থাগৎলদুনা লৈবাক অসিনা হৌজিক্তি ত্রস্ত দেফিসিত্তগী ত্রস্ত সর্প্লসতা লৈরে হায়না ফোংদোকখি।

প্রধান মন্ত্রীনা মসিগুম্বা ত্রস্ত সর্প্লস অসিগী খুদম ওইনা মমাংগী চহি 9দা লাকখিবা অচৌবা অহোংবশিংগী মতাংদা হায়খি। ভারতনা মালেমগী খ্বাইদগী 5শুবা চাউবা শেন্মিৎলোন ওইরক্লিবা অসি মসিগী মহৈনি হায়না মহাক্না হায়খি। মহাক্না লৈবাক অসিনা মশাদা থম্লিবা থাজবগী মতাংদা ফোংদোক্লদুনা, পুনেনা থৌদাং চাউনা য়াখিবা থৌওং, মেদ ইন ইন্দিয়া কোরোনা ভেক্সিনগুম্বা মায় পাকপা খোঙথাং কয়াগী মতাংদা পাউদমখি। ভারত মচাশিংগী শুবা-নোম্বা কনবা অমসুং অমত্তা ওইবগী মতৌদা থাজবা উৎপা ওইনা মুদ্রা য়োজনাগী মখাদা কোলেতরেল য়াওদনা লোন পীরিবা অসিগী মতাংদসু মহাক্না পাউদমখি। মান্নবা অমা ওইনা, সর্ভীস অয়াম্বা হৌজিক মোবাইলদা ফংলে অমসুং মীয়াম মশাগী দোক্যুমেন্তশিং মশামক্না এতেস্ত তৌবা য়ারে। মসিগুম্বা ত্রস্ত সর্প্লস অসিনা মরম ওইরগা, স্বচ্ছতা কেম্পেন অমসুং বেতি বচাও-বেতি পরাও স্কিম্না মীয়ামগী ইহৌ ওইরিবা অসিদসু মহাক্না মিৎয়েং চঙখি। পুম্নমক অসিনা লৈবাক অসিদা থাজবগী অমসুং চাউখৎপগী ৱাখল্লোন অমা চেলহল্লে, মহাক্না মখা তাখি।

অঙম্বশিংনা গ্যাসকী সবসিদী লৌবা তোক্নবা প্রধান মন্ত্রীনা লাল কিলাগী ফম্বাক্তগী থমখিবা ৱারোলগী মখা পোন্না, মীওই লাক্ষ কয়ানা মশাগী গ্যাস সবসিদী হন্দোরকখিবগী থৌওং অমুক্কা হন্না নীংশিংলদুনা, লৈবাক কয়াগী মরক্তা পাংথোকখিবা সর্ভে অমদা ভারতনা মশাগী সরকারদা খ্বাইদগী হেন্না থাজবা থম্মি হায়বা খঙবা ঙমখি হায়না মহাক্না পাউদমখি। শ্রী মোদীনা হায়খিবদা, “মীয়ামগী থাজবা হেনগৎলক্লিবা অসিনা ভারত মীয়ামগী চাউখৎ থৌরাংগী পাম্বৈ ওইরে”।

প্রধান মন্ত্রীনা মহাক্কী ৱারোল লোইশিল্লদুনা, নিংতম্বা ফংলবা চহি 75কী মতুংদা, লৈবাক অসিনা অমৃত কাল অসিবু লৈবাক্কী পান্দম অমসুং অপাম্বা খঙদুনা মীওই খুদিংনা মশাগী মথৌদাং পাংথোক্নবা  কর্তব্য কাল হায়না উরি হায়না মহাক্না ফোংদোকখি। ঐখোয়না হোৎনরিবা খুদিংনা মীওইবা খুন্নাইদা থাজবা পোকহনবনা মরম ওইরগা, ঙসিগী মালেম্না তুংগী মতম্বু ভারত্তা উরিবনি হায়না প্রধান মন্ত্রীনা হায়খি। লোকমান্য তিলক্কী ৱাখল্লোন অমসুং থৌজালগী মপাঙ্গলগা লোয়ননা, চাউখৎপা অমসুং মপাঙ্গল কনবা ভারত অমগী মঙলানবু মীয়াম্না শোইদনা মঙফাওনহনবা ঙমগনি হায়না প্রধান মন্ত্রীনা হায়খি। লোকমান্যা তিলক্কী ৱাখল্লোনগা মীয়ামগা অচেৎপা মরী লৈনহনবদা হিন্দ স্বরাজ্য সংঘনা মরু ওইবা থৌদাং য়াগনি হায়বগী থাজবা লৈ হায়না মহাক্না মখা তাখি।

মহারাস্ত্রগী রাজ্যপাল, শ্রী রমেশ বাইস; মুখ্য মন্ত্রী, শ্রী একনাথ শিন্দে; উপ-মুখ্য মন্ত্রী, শ্রী দেবেন্দ্র ফদনাবিস অমসুং শ্রী অজিত পাৱার; মেম্বর ওফ পার্লিয়ামেন্ত, শ্রী সরদচন্দ্র পাৱার; তিলক স্মারক ত্রস্তকী প্রসিদেন্ত, দাঃ দীপক তিলক; তিলক স্মারক ত্রস্তকী ভাইস প্রসিদেন্ত, দাঃ রোহিত তিলক, অমসুং তিলক স্মারক ত্রস্তকী ত্রস্তী, শ্রী শুশিলকুমার শিন্দেসু অতোপ্পা মীয়ামগা লোয়ননা শরুক য়াখি।

বেকগ্রাউন্দ   

তিলক স্মারক মন্দির ত্রস্তনা লোকমান্যা তিলক্কী পুন্সিবু ইকায় খুম্ননবগীদমক্তা ইং 1983দা এৱার্দ অসি হৌদোকখিবনি। লৈবাক্কী চাউখৎ থৌরাংগীদমক্তা মশক থোকপা অমসুং তোপ-তোপ্পা মওংদা থবক তৌবা মীওইশিংদা এৱার্দ অসি পীবনি। এৱার্দ অসি লোকমান্যা তিলক্কী লৈখিদবগী কুমওন, ওগস্ত 1দা চহি খুদিংগী পীবনি।

প্রধান মন্ত্রীনা মনা অসি ফংবা 41শুবা মীওই ওইরে। মসি দাঃ শঙ্কর দয়াল শর্মা, শ্রী প্রনব মুখর্জী, শ্রী অতল বিহারী ভাজপায়, শ্রীমতি ইন্দিরা গান্ধী, দাঃ মনমোহন সিংহ, শ্রী এন.আর. নরায়ন মুর্থী, দাঃ ই. শ্রীধরনগুম্বা লুমিনরী কয়াদা মমাংদা পীখ্রবনি।

***



(Release ID: 1944927) Visitor Counter : 48