ਸੁਸ਼੍ਰੀ ਮਾਮੀ ਮਿਜ਼ੂਟੋਰੀ, ਸੰਯੁਕਤ ਰਾਸ਼ਟਰ ਦੇ ਸਕੱਤਰ ਜਨਰਲ ਦੀ ਵਿਸ਼ੇਸ਼ ਪ੍ਰਤੀਨਿਧੀ; ਸ਼੍ਰੀ ਅਮਿਤਾਭ ਕਾਂਤ, ਭਾਰਤ ਦੇ ਜੀ20 ਸ਼ੇਰਪਾ; ਜੀ20 ਮੈਂਬਰਾਂ ਦੇ ਨਾਲ-ਨਾਲ ਮਹਿਮਾਨ ਦੇਸ਼ਾਂ ਦੇ ਸਹਿਯੋਗੀ; ਅੰਤਰਰਾਸ਼ਟਰੀ ਸੰਸਥਾਵਾਂ ਦੇ ਅਧਿਕਾਰੀ; ਸ਼੍ਰੀ ਕਮਲ ਕਿਸ਼ੋਰ, ਵਰਕਿੰਗ ਗਰੁੱਪ ਦੇ ਚੇਅਰਮੈਨ; ਭਾਰਤ ਦੀ ਰਾਸ਼ਟਰੀ ਆਪਦਾ ਪ੍ਰਬੰਧਨ ਅਥਾਰਿਟੀ, ਰਾਸ਼ਟਰੀ ਆਪਦਾ ਪ੍ਰਬੰਧਨ ਸੰਸਥਾਨ, ਅਤੇ ਗ੍ਰਹਿ ਮੰਤਰਾਲੇ ਦੇ ਸਹਿਯੋਗੀ, ਦੇਵੀਓ ਅਤੇ ਸੱਜਣੋ,

ਡਿਜ਼ਾਸਟਰ ਰਿਸਕ ਰਿਡਕਸ਼ਨ ਵਰਕਿੰਗ ਗਰੁੱਪ ਦੀ ਤੀਸਰੀ ਬੈਠਕ ਵਿੱਚ ਤੁਹਾਡੇ ਨਾਲ ਇੱਥੇ ਆ ਕੇ ਮੈਨੂੰ ਖੁਸ਼ੀ ਹੋ ਰਹੀ ਹੈ। ਅਸੀਂ ਇਸ ਸਾਲ ਮਾਰਚ ਵਿੱਚ ਗਾਂਧੀਨਗਰ ਵਿੱਚ ਪਹਿਲੀ ਵਾਰ ਮਿਲੇ ਸੀ। ਉਦੋਂ ਤੋਂ ਦੁਨੀਆ ਨੇ ਕੁਝ ਬੇਮਿਸਾਲ ਤਬਾਹੀਆਂ ਦੇਖੀਆਂ ਹਨ। ਲਗਭਗ ਪੂਰੇ ਉੱਤਰੀ ਹੈਮੀਸਫੀਅਰ ਦੇ ਸ਼ਹਿਰ ਭਾਰੀ ਗਰਮੀ ਦੀਆਂ ਲਹਿਰਾਂ ਦੀ ਲਪੇਟ ਵਿੱਚ ਹਨ। ਕੈਨੇਡਾ ਵਿੱਚ ਜੰਗਲਾਂ ਵਿੱਚ ਲਗੀ ਅੱਗ ਅਤੇ ਧੁੰਦ ਨੇ ਉੱਤਰੀ ਅਮਰੀਕਾ ਦੇ ਕਈ ਹਿੱਸਿਆਂ ਵਿੱਚ ਸ਼ਹਿਰਾਂ ਨੂੰ ਪ੍ਰਭਾਵਿਤ ਕੀਤਾ। ਇੱਥੇ ਭਾਰਤ ਵਿੱਚ, ਅਸੀਂ ਆਪਣੇ ਪੂਰਬੀ ਅਤੇ ਪੱਛਮੀ ਤਟਾਂ 'ਤੇ ਬੜੀ ਚੱਕਰਵਾਤੀ ਗਤੀਵਿਧੀ ਦੇਖੀ ਹੈ। ਦਿੱਲੀ ਵਿੱਚ 45 ਵਰ੍ਹਿਆਂ ਵਿੱਚ ਆਇਆ ਸਭ ਤੋਂ ਭਿਆਨਕ ਹੜ੍ਹ! ਅਤੇ ਅਸੀਂ ਹਾਲੇ ਮੌਨਸੂਨ ਸੀਜ਼ਨ ਦੇ ਅੱਧੇ ਰਸਤੇ ਵੀ ਨਹੀਂ ਪਹੁੰਚੇ ਹਾਂ!

ਮਿੱਤਰੋ,

ਜਲਵਾਯੂ ਪਰਿਵਰਤਨ ਨਾਲ ਸਬੰਧਿਤ ਆਪਦਾ ਦੇ ਪ੍ਰਭਾਵ ਹੁਣ ਦੂਰ ਦੇ ਭਵਿੱਖ ਵਿੱਚ ਨਹੀਂ ਹਨ। ਉਹ ਪਹਿਲਾਂ ਹੀ ਇੱਥੇ ਹਨ। ਉਹ ਵਿਸ਼ਾਲ ਹਨ। ਉਹ ਆਪਸ ਵਿਚ ਜੁੜੇ ਹੋਏ ਹਨ। ਅਤੇ ਉਹ ਸਾਰੇ ਗ੍ਰਹਿ ਨੂੰ ਪ੍ਰਭਾਵਿਤ ਕਰਦੇ ਹਨ। ਅੱਜ ਦੁਨੀਆ ਨੂੰ ਜਿਹੜੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ, ਉਹ ਇਸ ਵਰਕਿੰਗ ਗਰੁੱਪ ਦੀ ਮਹੱਤਤਾ ਨੂੰ ਰੇਖਾਂਕਿਤ ਕਰਦੀਆਂ ਹਨ। ਚਾਰ ਮਹੀਨਿਆਂ ਦੇ ਥੋੜ੍ਹੇ ਸਮੇਂ ਵਿੱਚ, ਵਰਕਿੰਗ ਗਰੁੱਪ ਨੇ ਬਹੁਤ ਤਰੱਕੀ ਕੀਤੀ ਹੈ ਅਤੇ ਚੰਗੀ ਗਤੀ ਪੈਦਾ ਕੀਤੀ ਹੈ। ਹਾਲਾਂਕਿ, ਸਾਨੂੰ ਹੋਰ ਕਰਨ ਦੀ ਜ਼ਰੂਰਤ ਹੈ। ਇਸ ਵਰਕਿੰਗ ਗਰੁੱਪ ਦੀ ਅਕਾਂਖਿਆ ਸਾਡੇ ਸਾਹਮਣੇ ਆਉਣ ਵਾਲੀਆਂ ਸਮੱਸਿਆਵਾਂ ਦੇ ਪੈਮਾਨੇ ਨਾਲ ਮੇਲ ਖਾਂਦੀ ਹੋਣੀ ਚਾਹੀਦੀ ਹੈ। ਵਾਧੇ ਵਾਲੀ ਤਬਦੀਲੀ ਦਾ ਸਮਾਂ ਲੰਘ ਗਿਆ ਹੈ। ਸਾਨੂੰ ਨਵੇਂ ਆਪਦਾ ਜੋਖਮਾਂ ਦੀ ਸਿਰਜਣਾ ਨੂੰ ਰੋਕਣ ਅਤੇ ਮੌਜੂਦਾ ਆਪਦਾ ਜੋਖਮਾਂ ਦਾ ਪ੍ਰਭਾਵੀ ਢੰਗ ਨਾਲ ਪ੍ਰਬੰਧਨ ਕਰਨ ਲਈ ਸਥਾਨਕ, ਰਾਸ਼ਟਰੀ ਅਤੇ ਗਲੋਬਲ ਪ੍ਰਣਾਲੀਆਂ ਦੇ ਪਰਿਵਰਤਨ ਦੀ ਜ਼ਰੂਰਤ ਹੈ। ਇਹ ਇੱਕ ਤੱਥ ਹੈ ਕਿ ਵਿਭਿੰਨ ਰਾਸ਼ਟਰੀ ਅਤੇ ਗਲੋਬਲ ਪ੍ਰਯਤਨ ਸਰਗਰਮੀ ਨਾਲ ਕਨਵਰਜੈਂਸ ਦੀ ਕੋਸ਼ਿਸ਼ ਕਰਦੇ ਹਨ ਤਾਂ ਜੋ ਉਨ੍ਹਾਂ ਦੇ ਸਮੂਹਿਕ ਪ੍ਰਭਾਵ ਨੂੰ ਵੱਧ ਤੋਂ ਵੱਧ ਕੀਤਾ ਜਾ ਸਕੇ। ਅਸੀਂ ਖੰਡਿਤ ਪ੍ਰਯਤਨਾਂ ਨੂੰ ਬਰਦਾਸ਼ਤ ਨਹੀਂ ਕਰ ਸਕਦੇ ਜੋ ਤੰਗ ਸੰਸਥਾਗਤ ਦ੍ਰਿਸ਼ਟੀਕੋਣਾਂ ਦੁਆਰਾ ਸੰਚਾਲਿਤ ਹੁੰਦੇ ਹਨ। ਸਾਨੂੰ ਸਮੱਸਿਆ ਹੱਲ ਕਰਨ ਦੀ ਪਹੁੰਚ ਤੋਂ ਪ੍ਰੇਰਿਤ ਹੋਣਾ ਚਾਹੀਦਾ ਹੈ। ਸਾਨੂੰ ਇੱਕ ਸਮੱਸਿਆ ਹੱਲ ਕਰਨ ਦੀ ਪਹੁੰਚ ਦੁਆਰਾ ਚਲਾਇਆ ਜਾਣਾ ਚਾਹੀਦਾ ਹੈ।

ਸੰਯੁਕਤ ਰਾਸ਼ਟਰ ਦੇ ਸਕੱਤਰ ਜਨਰਲ ਦੀ "ਸਾਰਿਆਂ ਲਈ ਸ਼ੁਰੂਆਤੀ ਚੇਤਾਵਨੀ" ਪਹਿਲ ਇਸ ਪਹੁੰਚ ਦੀ ਇੱਕ ਉਦਾਹਰਣ ਹੈ। ਇਹ ਨੋਟ ਕਰਨਾ ਚੰਗਾ ਹੈ ਕਿ ਜੀ20 ਨੇ "ਸ਼ੁਰੂਆਤੀ ਚੇਤਾਵਨੀ ਅਤੇ ਸ਼ੁਰੂਆਤੀ ਕਾਰਵਾਈ" ਨੂੰ ਪੰਜ ਪ੍ਰਾਥਮਿਕਤਾਵਾਂ ਵਿੱਚੋਂ ਇੱਕ ਵਜੋਂ ਪਹਿਚਾਣਿਆ ਹੈ ਅਤੇ ਇਸ ‘ਤੇ ਆਪਣਾ ਪੂਰਾ ਜ਼ੋਰ ਦਿੱਤਾ ਹੈ। ਆਪਦਾ ਜੋਖਮ ਘਟਾਉਣ ਦੇ ਵਿੱਤ ਦੇ ਖੇਤਰ ਵਿੱਚ, ਇਹ ਮਹੱਤਵਪੂਰਨ ਹੈ ਕਿ ਅਸੀਂ ਆਪਦਾ ਜੋਖਮ ਘਟਾਉਣ ਦੇ ਸਾਰੇ ਪਹਿਲੂਆਂ ਲਈ ਵਿੱਤ ਪ੍ਰਦਾਨ ਕਰਨ ਲਈ ਸਾਰੇ ਪੱਧਰਾਂ 'ਤੇ ਢਾਂਚਾਗਤ ਵਿਧੀਆਂ ਦਾ ਪਿੱਛਾ ਕਰੀਏ। ਪਿਛਲੇ ਕੁਝ ਵਰ੍ਹਿਆਂ ਵਿੱਚ, ਭਾਰਤ ਵਿੱਚ ਅਸੀਂ ਆਪਦਾ ਜੋਖਮ ਨੂੰ ਘਟਾਉਣ ਲਈ ਵਿੱਤੀ ਸਹਾਇਤਾ ਦੇ ਤਰੀਕੇ ਨੂੰ ਪੂਰੀ ਤਰ੍ਹਾਂ ਬਦਲ ਦਿੱਤਾ ਹੈ। ਸਾਡੇ ਪਾਸ ਹੁਣ ਸਿਰਫ਼ ਆਪਦਾ ਪ੍ਰਤੀਕਿਰਿਆ ਹੀ ਨਹੀਂ, ਬਲਕਿ ਆਪਦਾ ਨੂੰ ਘਟਾਉਣ, ਤਿਆਰੀ ਅਤੇ ਰਿਕਵਰੀ ਲਈ ਵੀ ਵਿੱਤੀ ਸਹਾਇਤਾ ਲਈ ਇੱਕ ਅਨੁਮਾਨਯੋਗ ਵਿਧੀ ਹੈ। ਕੀ ਅਸੀਂ ਗਲੋਬਲ ਪੱਧਰ 'ਤੇ ਵੀ ਇਹੋ ਜਿਹਾ ਪ੍ਰਬੰਧ ਕਰ ਸਕਦੇ ਹਾਂ? ਸਾਨੂੰ ਆਪਦਾ ਦੇ ਜੋਖਮ ਨੂੰ ਘਟਾਉਣ ਲਈ ਉਪਲਬਧ ਵਿੱਤ ਦੀਆਂ ਵਿਭਿੰਨ ਧਾਰਾਵਾਂ ਦਰਮਿਆਨ ਵਧੇਰੇ ਕਨਵਰਜੈਂਸ ਨੂੰ ਅੱਗੇ ਵਧਾਉਣ ਦੀ ਜ਼ਰੂਰਤ ਹੈ। ਕਲਾਇਮੇਟ ਫਾਈਨੈਂਸ ਨੂੰ ਆਪਦਾ ਜੋਖਮ ਘਟਾਉਣ ਲਈ ਵਿੱਤ ਦਾ ਇੱਕ ਅਭਿੰਨ ਅੰਗ ਹੋਣਾ ਚਾਹੀਦਾ ਹੈ। ਆਪਦਾ ਜੋਖਮ ਘਟਾਉਣ ਲਈ ਪ੍ਰਾਈਵੇਟ ਫਾਈਨੈਂਸ ਨੂੰ ਜੁਟਾਉਣਾ ਇੱਕ ਚੁਣੌਤੀ ਰਿਹਾ ਹੈ, ਪਰ ਇਸ ਤੋਂ ਬਿਨਾਂ ਅਸੀਂ ਆਪਦਾ ਜੋਖਮ ਘਟਾਉਣ ਦੀਆਂ ਸਾਰੀਆਂ ਜ਼ਰੂਰਤਾਂ ਨੂੰ ਪੂਰਾ ਕਰਨ ਵਿੱਚ ਬਹੁਤ ਦੂਰ ਨਹੀਂ ਜਾ ਸਕਾਂਗੇ। ਪ੍ਰਾਈਵੇਟ ਫਾਈਨੈਂਸ ਨੂੰ ਆਪਦਾ ਜੋਖਮ ਨੂੰ ਘਟਾਉਣ ਲਈ ਆਕਰਸ਼ਿਤ ਕਰਨ ਲਈ ਸਰਕਾਰਾਂ ਨੂੰ ਕਿਸ ਤਰ੍ਹਾਂ ਦਾ ਸਮਰੱਥ ਮਾਹੌਲ ਬਣਾਉਣਾ ਚਾਹੀਦਾ ਹੈ? ਜੀ20 ਇਸ ਖੇਤਰ ਦੇ ਆਸਪਾਸ ਗਤੀ ਕਿਵੇਂ ਪੈਦਾ ਕਰ ਸਕਦਾ ਹੈ ਅਤੇ ਇਹ ਯਕੀਨੀ ਬਣਾ ਸਕਦਾ ਹੈ ਕਿ ਆਪਦਾ ਜੋਖਮ ਨੂੰ ਘਟਾਉਣ ਵਿੱਚ ਪ੍ਰਾਈਵੇਟ ਨਿਵੇਸ਼ ਨਾ ਸਿਰਫ਼ ਕਾਰਪੋਰੇਟ ਸਮਾਜਿਕ ਜ਼ਿੰਮੇਵਾਰੀ ਦਾ ਪ੍ਰਗਟਾਵਾ ਹੈ, ਬਲਕਿ ਫਰਮਾਂ ਦੇ ਮੁੱਖ ਕਾਰੋਬਾਰ ਦਾ ਹਿੱਸਾ ਹੈ?

ਆਪਦਾ ਲਚੀਲੇ ਬੁਨਿਆਦੀ ਢਾਂਚੇ ਦੇ ਖੇਤਰ ਵਿੱਚ, ਅਸੀਂ ਕੁਝ ਸਾਲ ਪਹਿਲਾਂ ਜੀ20 ਦੇਸ਼ਾਂ, ਸੰਯੁਕਤ ਰਾਸ਼ਟਰ ਅਤੇ ਹੋਰਨਾਂ ਦੇ ਨਾਲ ਸਾਂਝੇਦਾਰੀ ਵਿੱਚ ਸਥਾਪਿਤ ਕੀਤੇ ਗਏ ਆਪਦਾ ਲਚੀਲੇ ਬੁਨਿਆਦੀ ਢਾਂਚੇ ਲਈ ਗੱਠਜੋੜ ਦੇ ਲਾਭਾਂ ਨੂੰ ਪਹਿਲਾਂ ਹੀ ਦੇਖ ਰਹੇ ਹਾਂ। ਗੱਠਜੋੜ ਦਾ ਕੰਮ ਸੂਚਿਤ ਕਰ ਰਿਹਾ ਹੈ ਕਿ ਕਿਵੇਂ ਦੇਸ਼ - ਛੋਟੇ ਟਾਪੂ ਵਿਕਾਸਸ਼ੀਲ ਦੇਸ਼ਾਂ ਸਮੇਤ - ਆਪਣੇ ਮਿਆਰਾਂ ਨੂੰ ਅੱਪਗ੍ਰੇਡ ਕਰਨ ਅਤੇ ਬੁਨਿਆਦੀ ਢਾਂਚੇ ਦੇ ਵਿਕਾਸ ਵਿੱਚ ਵਧੇਰੇ ਜੋਖਮ-ਸੂਚਿਤ ਨਿਵੇਸ਼ ਕਰਨ ਲਈ ਬਿਹਤਰ ਜੋਖਮ ਮੁੱਲਾਂਕਣਾਂ ਅਤੇ ਮੈਟ੍ਰਿਕਸ ਦੀ ਵਰਤੋਂ ਕਰ ਸਕਦੇ ਹਨ। ਇਹ ਮਹੱਤਵਪੂਰਨ ਹੈ ਕਿ ਅਸੀਂ ਇਨ੍ਹਾਂ ਵਿਚਾਰਾਂ ਨੂੰ ਪੈਮਾਨੇ 'ਤੇ ਲਿਜਾਣ ਲਈ ਕੰਮ ਕਰੀਏ! ਸਾਨੂੰ ਪਾਇਲਟਾਂ ਤੋਂ ਪਰੇ ਸੋਚਣਾ ਹੋਵੇਗਾ ਅਤੇ ਪੈਮਾਨੇ ਲਈ ਆਪਣੀਆਂ ਪਹਿਲਾਂ ਨੂੰ ਡਿਜ਼ਾਈਨ ਕਰਨਾ ਹੋਵੇਗਾ। ਆਪਦਾਵਾਂ ਤੋਂ ਬਾਅਦ "ਬਿਲਡਿੰਗ ਬੈਕ ਬੈਟਰ" 'ਤੇ ਪਿਛਲੇ ਕੁਝ ਵਰ੍ਹਿਆਂ ਤੋਂ ਬਹੁਤ ਵਿਹਾਰਕ ਅਨੁਭਵ ਰਿਹਾ ਹੈ, ਪਰ ਸਾਨੂੰ ਕੁਝ ਚੰਗੇ ਵਿਵਹਾਰਾਂ ਨੂੰ ਸੰਸਥਾਗਤ ਬਣਾਉਣ ਦੇ ਤਰੀਕੇ ਲੱਭਣੇ ਪੈਣਗੇ। "ਰਿਸਪੌਂਸ ਲਈ ਤਿਆਰੀ" ਵਾਂਗ ਸਾਨੂੰ ਵਿੱਤੀ ਪ੍ਰਬੰਧਾਂ, ਸੰਸਥਾਗਤ ਵਿਧੀਆਂ ਅਤੇ ਸਮਰੱਥਾਵਾਂ ਦੁਆਰਾ ਅਧਾਰਿਤ "ਰਿਕਵਰੀ ਲਈ ਤਿਆਰੀ" 'ਤੇ ਜ਼ੋਰ ਦੇਣ ਦੀ ਜ਼ਰੂਰਤ ਹੈ।

ਮਿੱਤਰੋ,

ਮੈਨੂੰ ਇਹ ਨੋਟ ਕਰਦੇ ਹੋਏ ਖੁਸ਼ੀ ਹੋ ਰਹੀ ਹੈ ਕਿ ਵਰਕਿੰਗ ਗਰੁੱਪ ਦੁਆਰਾ ਅਪਣਾਈਆਂ ਗਈਆਂ ਸਾਰੀਆਂ ਪੰਜ ਪ੍ਰਾਥਮਿਕਤਾਵਾਂ ਵਿੱਚ, ਸਾਰੀਆਂ ਡਿਲਿਵਰੇਬਲਾਂ 'ਤੇ ਮਹੱਤਵਪੂਰਨ ਪ੍ਰਗਤੀ ਹੋਈ ਹੈ। ਮੈਂ ਕਮਿਊਨੀਕ ਦਾ ਜ਼ੀਰੋ ਡਰਾਫਟ ਦੇਖਿਆ ਹੈ ਜਿਸ ਬਾਰੇ ਤੁਸੀਂ ਅਗਲੇ ਕੁਝ ਦਿਨਾਂ ਵਿੱਚ ਚਰਚਾ ਕਰਨ ਜਾ ਰਹੇ ਹੋ। ਇਹ ਜੀ20 ਦੇਸ਼ਾਂ ਲਈ ਆਪਦਾ ਜੋਖਮ ਘਟਾਉਣ 'ਤੇ ਇੱਕ ਬਹੁਤ ਸਪਸ਼ਟ ਅਤੇ ਰਣਨੀਤਕ ਏਜੰਡਾ ਅੱਗੇ ਰੱਖਦਾ ਹੈ। ਮੈਂ ਆਸ ਕਰਦਾ ਹਾਂ ਕਿ ਪਿਛਲੇ ਚਾਰ ਮਹੀਨਿਆਂ ਤੋਂ ਇਸ ਵਰਕਿੰਗ ਗਰੁੱਪ ਦੇ ਵਿਚਾਰ-ਵਟਾਂਦਰੇ ਵਿੱਚ ਮੇਲ-ਮਿਲਾਪ, ਸਹਿਮਤੀ ਅਤੇ ਸਹਿ-ਰਚਨਾ ਦੀ ਭਾਵਨਾ ਅਗਲੇ ਤਿੰਨ ਦਿਨਾਂ ਵਿੱਚ ਅਤੇ ਇਸ ਤੋਂ ਬਾਅਦ ਵੀ ਕਾਇਮ ਰਹੇਗੀ।

ਅਸੀਂ ਇਸ ਪ੍ਰਯਤਨ ਵਿੱਚ ਆਪਣੇ ਗਿਆਨ ਭਾਗੀਦਾਰਾਂ (ਨੌਲੇਜ ਪਾਰਟਨਰਸ) ਤੋਂ ਮਿਲੇ ਨਿਰੰਤਰ ਸਮਰਥਨ ਲਈ ਧੰਨਵਾਦੀ ਹਾਂ। ਮੈਂ ਇਸ ਸਮੂਹ ਦੇ ਕੰਮ ਦਾ ਸਮਰਥਨ ਕਰਨ ਵਿੱਚ ਸੰਯੁਕਤ ਰਾਸ਼ਟਰ ਦੇ ਸਕੱਤਰ ਜਨਰਲ ਦੇ ਵਿਸ਼ੇਸ਼ ਪ੍ਰਤੀਨਿਧੀ ਸੁਸ਼੍ਰੀ ਮਾਮੀ ਮਿਜ਼ੂਟੋਰੀ ਦੇ ਵਿਅਕਤੀਗਤ ਰੁਝੇਵਿਆਂ ਦੀ ਵਿਸ਼ੇਸ਼ ਤੌਰ 'ਤੇ ਪ੍ਰਸ਼ੰਸਾ ਕਰਦਾ ਹਾਂ। ਅਸੀਂ ਇਸ ਵਰਕਿੰਗ ਗਰੁੱਪ ਦੇ ਏਜੰਡਾ ਨੂੰ ਰੂਪ ਦੇਣ ਵਿੱਚ ਟ੍ਰੌਇਕਾ ਦੀ ਸ਼ਮੂਲੀਅਤ ਤੋਂ ਵੀ ਬਹੁਤ ਖੁਸ਼ ਹਾਂ। ਅਸੀਂ ਇੰਡੋਨੇਸ਼ੀਆ, ਜਾਪਾਨ ਅਤੇ ਮੈਕਸੀਕੋ ਸਮੇਤ ਪਿਛਲੀਆਂ ਪ੍ਰੈਜ਼ੀਡੈਂਸੀਆਂ ਦੁਆਰਾ ਰੱਖੀ ਗਈ ਨੀਂਹ 'ਤੇ ਨਿਰਮਾਣ ਕੀਤਾ ਹੈ, ਅਤੇ ਸਾਨੂੰ ਖੁਸ਼ੀ ਹੈ ਕਿ ਬ੍ਰਾਜ਼ੀਲ ਇਸ ਨੂੰ ਅੱਗੇ ਵਧਾਏਗਾ। ਸਾਨੂੰ ਇਸ ਬੈਠਕ ਵਿੱਚ ਬ੍ਰਾਜ਼ੀਲ ਤੋਂ ਸਕੱਤਰ ਵੋਲਨੇਈ ਦਾ ਸੁਆਗਤ ਕਰਕੇ ਵਿਸ਼ੇਸ਼ ਤੌਰ 'ਤੇ ਖੁਸ਼ੀ ਹੋ ਰਹੀ ਹੈ। ਅਸੀਂ ਸਕੱਤਰ ਵੋਲਨੇਈ ਅਤੇ ਉਨ੍ਹਾਂ ਦੀ ਟੀਮ ਨੂੰ ਭਰੋਸਾ ਦਿਵਾਉਣਾ ਚਾਹੁੰਦੇ ਹਾਂ ਕਿ ਜਦੋਂ ਅਸੀਂ ਅੱਗੇ ਵਧਾਂਗੇ ਤਾਂ ਤੁਹਾਨੂੰ ਸਾਡਾ ਪੂਰਾ ਸਮਰਥਨ ਅਤੇ ਸਹਿਯੋਗ ਮਿਲੇਗਾ।

ਭਾਰਤ ਦੀ ਜੀ20 ਪ੍ਰੈਜ਼ੀਡੈਂਸੀ ਦੇ ਪਿਛਲੇ ਅੱਠ ਮਹੀਨਿਆਂ ਦੌਰਾਨ, ਪੂਰੇ ਦੇਸ਼ ਨੇ ਬਹੁਤ ਉਤਸ਼ਾਹ ਨਾਲ ਹਿੱਸਾ ਲਿਆ ਹੈ। ਹੁਣ ਤੱਕ ਦੇਸ਼ ਭਰ ਵਿੱਚ 56 ਥਾਵਾਂ 'ਤੇ 177 ਮੀਟਿੰਗਾਂ ਹੋ ਚੁੱਕੀਆਂ ਹਨ। ਵਿਭਿੰਨ ਦੇਸ਼ਾਂ ਦੇ ਡੈਲੀਗੇਟਾਂ ਨੇ ਵਿਚਾਰ-ਵਟਾਂਦਰੇ ਵਿੱਚ ਸਰਗਰਮੀ ਨਾਲ ਹਿੱਸਾ ਲਿਆ। ਉਨ੍ਹਾਂ ਨੇ ਭਾਰਤ ਦੀ ਸਮਾਜਿਕ, ਸੱਭਿਆਚਾਰਕ ਅਤੇ ਕੁਦਰਤੀ ਵਿਵਿਧਤਾ ਦੀ ਵੀ ਝਲਕ ਪਾਈ ਹੈ। ਜੀ20 ਏਜੰਡਾ ਦੇ ਸਾਰਥਕ ਪਹਿਲੂਆਂ ਵਿੱਚ ਬਹੁਤ ਤਰੱਕੀ ਕੀਤੀ ਗਈ ਹੈ। ਮੈਨੂੰ ਯਕੀਨ ਹੈ ਕਿ ਡੇਢ ਮਹੀਨੇ ਵਿੱਚ ਹੋਣ ਵਾਲੀ ਸਿਖਰ ਬੈਠਕ ਇੱਕ ਇਤਿਹਾਸਕ ਘਟਨਾ ਹੋਵੇਗੀ। ਇਸ ਨਤੀਜੇ ਵਿੱਚ ਤੁਹਾਡਾ ਸਾਰਿਆਂ ਦਾ ਯੋਗਦਾਨ ਮਹੱਤਵਪੂਰਨ ਰਹੇਗਾ।

ਮੈਂ ਤੁਹਾਨੂੰ ਆਉਣ ਵਾਲੇ ਦਿਨਾਂ ਵਿੱਚ ਤੁਹਾਡੇ ਵਿਚਾਰ-ਵਟਾਂਦਰੇ ਲਈ ਸ਼ੁੱਭਕਾਮਨਾਵਾਂ ਦਿੰਦਾ ਹਾਂ, ਇਹ ਸੁਨਿਸ਼ਚਿਤ ਕਰਨ ਦੇ ਲਈ ਕਿ ਜੀ20 ਦੁਨੀਆ ਲਈ ਆਪਦਾ ਜੋਖਮ ਨੂੰ ਘਟਾਉਣ ਲਈ ਸਾਰਥਕ ਨਤੀਜੇ ਪ੍ਰਦਾਨ ਕਰੇ।

 *********

ਡੀਐੱਸ/ਟੀਐੱਸ