U Myntri Sorkar Pdeng ba dei khmih ia ki tnat Kam Pohiing bad Cooperation, u Amit Shah u la pyniaid ia ka Regional Conference halor ka 'Drug Trafficking and National Security' ba la pynlong ha New Delhi mynta ka sngi. Ha ka jingiadon lang u myntri ka tnat Kam Pohiing, ka Narcotics Control Bureau (NCB) ha ka jingiatreilang bad ka Anti Narcotics Task Force (ANTF) jong baroh ki jylla ki la pynduh palat 1.40 lak kilo ki jingdih pynbuaid kiba shongdor haduh T. 2,378 klur ha ki bynta bapher bapher jong ka ri kaba long ka rekod ha ka shi sngi.

Ki Myntri Rangbah jong ki jylla Punjab, Uttar Pradesh, Himachal Pradesh, Haryana bad Uttarakhand, Lat ka jylla Punjab bad Administrator ka Chandigarh, ki Lieutenant Governor jong ka Jammu bad Kashmir, Ladakh bad Delhi ki la iashim bynta ha kane ka jingialang. U Myntri Khynnah ka tnat Kam Poh Iing, Odisha ruh u la iashim bynta ha kane ka jingialang. U Secretary ka tnat Kam Poh Iing ka Sorkar Pdeng, Director General ka NCB bad ki ophisar jong ki kynhun pahara bapher bapher bad ki tnat jong ka Sorkar India kiba iadei bad kane ka kam ruh ki la iashim bynta ha kane ka jingialang.

Ha ka jingai jingkren jong u, u Amit Shah u la ong ba ha ka ri kum ka India, ka jingkhaii drok bad ka jingpyndonkam ia ki ka ktah ia ka lawei jong ki pateng ban wan bad ruh ia ka jingshngain jong ka ri. U la ong ba ka tnat Kam Poh Iing ka dang bteng ia ki kam pyrshah ia ki drok lyngba ki jingialang Regional Conference bad u la ong ba la pynlong ia kine ki jingialang ban peit ia ki kam bad wanrah ia ki jingpynkylla ha ki rukom treikam katkum ka jingioh jingtip.

U Myntri ka tnat Kam Poh Iing u la ong ba u Myntri Rangbah Duh, u Narendra Modi u la buh ia ka thong ba ha ka Azadi ka Amrit Mahotsav ka India bad ki khun samla jong ka ki dei ban lait na ki drok shuwa ba ka ri kan rakhe ia ka jingdap shispah snem ka jingioh jinglaitluid. U la ong ba ka thong jong ka Sorkar Modi ka dei ban tei ia ka India ha kaba ym don uno uno u khynnah samla uba ngop ha ki drok bad ban pynurlong ia kane, ki jylla bad ka Sorkar Pdeng ki dei ban iatrei lang. U Shah u la ong ba mynta ka sngi ka dei ka lyngkhuh sngi kha jong u nongjop Paramveer Chakra, u Nirmaljit Singh Sekhon. Ha kane ka sngi, u la pynkup burom ia u nongjop Paramveer Chakra, u Nirmaljit Singh Sekhon na ka liang jong ka ri baroh kawei bad ka Sorkar India.

U Amit Shah u la ong ba ka jingtei ia ka Amritsar Zonal Office kaba thymmai jong ka NCB ha ka jinglut kaba kot sha ka T. 12 klur, ka jingplie paidbah ia ka ophis ha Bhubaneshwar bad ka Bhoomi Pujan jong ka ophis ba thymmai ha Delhi ki dei kiba la pyndep mynta ka sngi. U la ai jingsngewnguh ia ka Sorkar Odisha bad ka Sorkar Punjam kiba la iatreilang bad ka NCB bad ka Sorkar India da kaba ai jaka na ka bynta ki ophis NCB. U Shah u la ong ba lyngba kine ki ophis, ka NCB kan pynkhlain shuh shuh ia ka jingialeh pyrshah ia ki drok ha kine ki jylla. U la ong ruh ba la pyllait ia ka compendium jong ka India kaba lait na ki drok mynta ka sngi. Lada ngi ai jingtip shuh shuh shaphang ki drok sha ki bor pyniaid distrik, ki skul bad ki NGO, ka jingiakhun pyrshah ki drok kan kham khlain shuh shuh. U Shah u la ong ba kane kam dei tang ka jingialeh ban pynduh ia ki drok bad ka jingioh ia ka jingjop kaba pura hynrei ka jingjop kaba heh tam ha kane ka dei ka jingai jingtip. U Shah u la ong ba ngin ym lah ban ioh ia ka jingjop lada kam don ka jingai jingtip ia ki samla bad ki kmie ki kpa jong ka ri shaphang ki drok.

U Myntri ki tnat Kam Poh Iing bad Cooperation u la ong ba mynta, la pynduh palat 1,40,288 kilo ki jingdih pynbuaid bad ba baroh ki jylla, khamtam ka NCB ki dei ban ioh jingiaroh na ka bynta kane. U la ong ba hapoh kane ka prokram, la dep pynduh ia ki drok kiba shongdor haduh T 2,378 klur mynta ka sngi kaba long ka rekod jong ka jingbun tam ki drok kiba la pynduh ha ka shi sngi. U Shah u la ong ba hapoh ka jingialam jong u Myntri Rangbah Duh, u Narendra Modi, 10 lak kilo ki jingdih pynbuaid kiba shongdor haduh T 12,000 klur ki dei kiba la pynduh ha une u snem jong ka Amrit Mahotsav bad ba kane ruh ka dei ka rekod.

U Amit Shah u la ong ba na ka bynta ka jingiada na ka jingdih drok, ngi hap ban iaid shaphrang da ka jingphaikhmat ba ryntih halor ka jinglap ia u drok, ka jingpynpulom ia ka kam khaii drok, ka jingkem ia ki briew ba donkti bad ka jingai jingsumar ia kito kiba la kyrni. U la ong ba ngi la leh ka kam kaba khraw ha kaba iadei bad ka Jinglap, ka Jingpynpulom bad ka jingkem ia ki briew ba donkti, hynrei ka jingiakhun jong ngi kan nym lah ban long kaba jop lada ngim phaikhmat sha ka jingai jingsumar. U Shah u la ong ba ka ‘rukom treikam kaba kynthup lang baroh kawei ka sorkar’, ka tnat ka koit ka khiah, Social Welfare, Tnat Chemical and Drug, ka Tnat Pule Puthi, ka Tnat Panchayati Raj bad ki Tnat Kam Pohiing jong ki Sorkar Jylla kidei ban mih ban iatreilang ha kawei ka rynsan, bad dei hangta ngin lah ban kot sha ka jingangnud ia ka India kaba lait na u drok bad ngin lah ban pynurlong ia kane. U la ong ba na ka bynta kane, ryngkat ka jingiatreilang baroh ki tnat ngin hap ban iaid shakhmat bad ka rukom treikam ‘ba kynthup lang ia baroh kawei ka sorkar’.

U Myntri Sorkar Pdeng ba dei khmih ia ka Tnat Kam Pohiing u la ong ba ki don 1,250 tylli ki case ba la rejister hapdeng u snem 2006 bad 2013, katba 3,700 tylli ki case kidei kiba la rejister ha ki khyndai snem naduh u snem 2014 haduh 2023, kaba pyni ka jingkiew kaba 200 percent. Kham hashuwa ka la don ka jingshah kem baroh 1,360 ngut ki briew, bad kane ka la kiew sha ka 5,650, kaba pyni ka jingkiew kaba 300 per cent. Ka jingdon u drok ba la ioh kurup kham mynshuwa kalong 1.52 lak kilo, kaba la kiew mynta da 160 per cent haduh 3.94 lak kilo. U la ong ba la lah ban pynduh ia ki drok ba shongdor T. 5,900 klur hapdeng u snem 2006 bad 2013, katba ki drok ba shongdor T. 18,100 klur la ioh kurup bad pynduh hapdeng u snem 2014 bad 2023, kane ka pyni ia ka jingjop jong ka campaign jong ngi.

U Shah u la ong ba mynta, hapoh ka ri bad shabar ri ruh, ngi lah ban pynkylla ia ka kyntien “Golden Triangle" bad "Golden Crescent" sha ka kyntien "Death Triangle" bad "Death Crescent." U la ong ba ka kyrteng "Golden Triangle" ka lah ban treikam ha ki nongkhaii drok, hynrei ha kito kiba kwah ban tehlakam ia ka jingpyndonkam ia u drok, ki kyntien kiba biang kilong "Death Triangle" bad "Death Crescent.” U Shah u la bynrap ba kane ka rukom treikam kam dei tang ka dak, ka pyni ia ka bor bad ka lynti jong ka jingiakhun jong ngi pyrshah ia u drok. U la ong ba kalong kaba donkam ban don ka jingiai peitngor ban rat dyngkhong ia u drok. U la kyrpad ia baroh ban shimkhia halor ka jingbteng ia ki jingialang NCORD ban long ha ki Jylla bad ki Union Territory na ka bynta ka jingiatreilang ba kham bha.

U Myntri Sorkar Pdeng ba dei khmih ia ka Tnat Kam Pohiing u la ong ba ka Sorkar hapoh ka jingialam jong u Myntri Rangbah duh, u Narendra Modi, ka la plie ia ka Narco Coordination Centre (NCORD) ha u snem 2019, kaba pynlong ia ki jingialang ha saw tylli ki kyrdan bapher bapher. U la ong ki jingialang NCORD ha ki distrik ki la long kiba jop. U la ban jur ba ki jylla kidei ban iatreilang bad ka Enforcement Directorate (ED) halor ki jingtohkit ba iadei bad ki kam pisa bad phah ia ki case sha ka ED. U Shah u la ong tad ynda ngi pynlong ki jingtohkit ba iadei bad ki kam pisa jong ki nongkhaii drok bad pynduh ia ki lad treikam jong ki, ka campaign jong ngi kan nym lah ban long kaba jop. U la ong ba ka rukom treikam jong ngi kadei ban long ba ngin shim ia kito kiba pyndonkam ia ki drok kum ki lanot, katba ia kito kiba donkti ha ka kam ban khaii ia u drok dei ban khein kum ki riew sniew. U la ong ba kito kiba pyndonkam ia ki drok kidei ki lanot, bad ki rukom treikam jong ngi kilong ban shim ki sienjam ban wanrah pat ia ki sha ka lynti kaba dei ym ban shu ieh ia ki ban long kiba kyrni drok shirta.

U Amit Shah u la ong ba ngi la sdang ruh ia ka rynsan Seizure Information Management System (SIMS) e-portal, bad dei ban pyndonkam ia ka. Dei ban sam bad ki thanat ia ki jingtip  kiba don ha ka rynsan NCORD.  U la ong ba ka don ka unified database ba la tip kum ka National Integrated Database on Arrested Narco Offenders (NIDAAN) bad sa kawei ka database na ka bynta ki fingerprint ba la tip kum ka National Automated Fingerprint Identification System (NAFIS) ba dei ban pyndonkam pura. U Shah u la ong ba 35 tylli ki Jylla/ UT ki la sdang ia ka Anti-Narcotics Task Forces (ANTF), bad dei ban ai jingiaroh ia kane. U la ong ba ngi la sdang ruh ia ka National Narcotics K9 Pool, bad lada ki jylla ki rah ia kane ka sienjam shakhmat, ka Narcotics Control Bureau kan iarap ban ai jinghikai pyntbit ia ki.

U Myntri Sorkar Pdeng ba dei khmih ia ka Tnat kam Pohiing, u la ong ba ki jylla kidei ban sdang ia ki iingbishar ba kyrpang na ka bynta ki kam ba iadei bad u drok bad pyndep ia ka jingbishar ha ka rukom kaba sted. U la ong ba ka jingpynshitom kaba tyngeh kan long kum ka jingmaham kaba jur namar kane ka ai ia ka khubor kaba khlain bha. U Shah u la bynrap ba dei ban pynbun ia ka jingknieh ia ki jingdon jingem jong kito ki briew ba donkti ha ki kam khaii drok. U la ban jur ba ka jingpynlehrain paidbah bad ka jingkyntait ia kine ki jait briew kan pynduh mynsiem ia kiwei ba kin leh ia kum kane ka kam. U Shah u la ong ba ngi donkam ban iaid shaphang sha ka jingknieh ia ki jingdon jingem. U la bynrap ba tad lada ngi pynkhlain ia ki Forensic Science Labs (FSL), ka jingbiashar kan nym lah ban iaid shaphrang. Kumjuh ruh, na ka bynta ka jingrat dyngkhong ia ka jingthung beain, khamtam ha ki thain phang shatei, ki Myntri rangbah jong kito ki jylla kidei ban kham phaikhmat kyrpang. U Myntri sorkar pdeng ba dei khmih ia ka tnat kam pohiing u la ong ba ka campaign jong ngi pyrshah ia ka jingpyndonkam drok kadei ka mission kaba kyntang ban iada ia ki pateng ban wan jong ka ri, ban pynlong ia ka ri kaba shngain bad kadei ban long ka jingphaikhmat ba kyrpang tam jong ngi.

U Lieutenant Governor jong ka Delhi, u Vinay Kumar Saxena, ruh u la iadonlang ha kane ka jingialang. Ki Lat jong ka Punjab bad Administrator jong ka Chandigarh, ki Lieutenant Governor jong ka Jammu and Kashmir bad Ladakh, ki Myntri Rangbah jong ka Haryana, Himachal Pradesh, Punjab, Uttarakhand, bad Uttar Pradesh ki la iashim bynta lang ha kane ka jingialang. U Myntri Khynnah ba dei khmih ia ka Tnat kam pohiing, Odisha ruh u la iashim bynta ha ka jingialang. Ka Tnat kam pohiing jong ka Sorkar pdeng, Director General ka NCB, bad ki heh ophisar na ki kynhun pahara bapher bapher bad ki tnat ba dei khmih jong ka Sorkar India ki la iadonlang ha kane ka jingialang.

*****