প্রধানমন্ত্রীগী লোইশঙ
প্রধান মন্ত্রীনা রাজস্থানগী বিকানেরদা লুপা করোর ২৪,৩০০ হেনবগী চাওখৎ থৌরাংগী প্রোজেক্তশিং উরেপ উয়ুং তমখ্রে অমদি লৈবাক্কী মফমদা কত্থোকখ্রে
অমৃৎসর – জামনগর ইকনমিক কোরিদোরগী লেন তরুক্কী গ্রীনফীল্দ এক্সপ্রেসৱে সেক্সন কত্থোকখ্রে
গ্রীন ইনর্জী কোরিদোরগী ইন্তর-স্তেত ত্রান্সমিসন লাইনগী ফেজ-১ কত্থোকখ্রে
বিকানেরদগী ভিৱাদি ফাওবগী ত্রান্সমিসন লাইন কত্থোকখ্রে
বিকানেরদা ফমুং ৩০ লৈবা ইমপ্লোয়ীজ’ স্তেত ইন্স্যুরেন্স কোর্পোরেসন (ই.এস.আই.সি.) হোস্পিতাল কত্থোকখ্রে
বিকানের রেলৱে স্তেসন নৌনা শেমগৎ শাগৎপগী উরেপ উয়ুং তমখ্রে
কিলোমিতর ৪৩ শাংবা চুরু – রতনগর সেক্সন রেলৱে লাইন দব্লিং তৌবগী উরেপ উয়ুং তমখ্রে
“নেস্নেল হায়ৱেগী মতাঙদা রাজস্থান্না দবল সেঞ্চুরী য়ৈরে”
“রাজস্থান অসি মতিং য়াম্না লৈবা অমদি ওইথোকপা য়াবা য়াম্না লৈবা মফম্নি”
“গ্রীনফীল্দ এক্সপ্রেসৱেনা নোংচুপ ভারত পুম্বদা শেন্মিৎলোনগী থবক থৌরমশিং মপাঙ্গল কনখৎহনগনি”
“ঐখোয়না চিদাইদা লৈরিবা খুঙ্গংশিংবু লৈবাকসিগী ‘অহানবা খুঙ্গংশিং’ হায়না লাউথোকখ্রে”
Posted On:
08 JUL 2023 6:03PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি রাজসস্থানগী বিকানেরদা লুপা করোর ২৪,৩০০ হেনবগী চাওখৎ থৌরাংগী প্রোজেক্তশিং উরেপ উয়ুং তমখ্রে অমদি লৈবাক্কী মফমদা কত্থোকখ্রে। প্রোজেক্তশিং অসিদা লুপা করোর ১১,১২৫ রোম চঙনা শেমগৎখিবা অমৃৎসর – জামনগর ইকনমিক কোরিদোরগী লেন তরুক্কী গ্রীনফীল্দ এক্সপ্রেসৱে সেক্সন, লুপা করোর ১০ও৯৫০ রোম চঙনা শেমগৎখিবা গ্রীন ইনর্জী কোওরিদোরগী ইন্তর-স্তেত ত্রান্সমিসন লাইনগী ফেজ-১ লৈবাক্কী মফমদা কত্থোকখিবা, লুপা করোর ১,৩৪০ রোম চঙনা পৱার গ্রিদনা শেমগৎকদবা বিকানেরদগী ভিৱাদি ফাওবগী ত্রান্সমিসন লাইন, অমদি বিকানেরদা লিংখৎকদবা ফমুং ৩০ লৈবা ইমপ্লোয়ীজ’ স্তেত ইন্স্যুরেন্স কোর্পোরেসন (ই.এস.আই.সি.) হোস্পিতাল য়াওরি। প্রধান মন্ত্রীনা লুপা করোর ৪৫০ রোম চঙনা নৌনা শেমগৎকদবা বিকানের রেলৱে স্তেসন অমদি কিলোমিতর ৪৩ শাংবা চুরু – রতনগর সেক্সন রেলৱে লাইন দব্লিং তৌবগী থবকসু উরেপ উয়ুং তমখি।
তিল্লিবা মীয়ামগী মফমদা ৱা ঙাঙলদুনা, প্রধান মন্ত্রীনা লান্মীশিংগী পোক্নফম লমদমদুদা ইকায়খুম্নবা উৎখি অমদি স্তেতকী চাওখৎপগীদমক কত্থোক্লবা মীওইশিংনা চাওখৎ থৌরাংগী প্রোজেক্তশিং লৈবাক মীয়ামগী মফমদা কত্থোকপদা মশামক শরুক য়াননবা তাঞ্জা অদুমক লাকই হায়খি। ঙসিগী লুপা কর,র ২৪,০০০ হেনবগী প্রোজেক্তশিংগী মরমদা হায়রদুনা, শুপ্নতগী থা খরগী মনুংদা রাজস্থান্না মতমগা চুনবা লেন তরুক্কী এক্সপ্রেসৱে অনি ফংবা ঙম্লে হায়না প্রধান মন্ত্রীনা ফোঙদোকখি। ফেব্রুৱারী থাদা দিল্লী – মুম্বাই এক্সপ্রেস কোরিদোরগী দিল্লী – দৌসা – লালসোৎ সেক্সন শঙ্গাখিববু নীংশিংলদুনা, প্রধান মন্ত্রীনা ঙসি অমৃৎসর – জানমগর এক্সপ্রেসৱেগী কিলোমিতর ৫০০ শাংবা লেন তরুক্কী এক্সপ্রেসৱে সেক্সন শঙ্গানবগী তাঞ্জা ফংবদা নুংঙাইবা ফোঙদোকখি। “অমরোমদা হায়রগদি, নেস্নেল হায়ৱেগী মতাঙদদি রাজস্থান্না দবল সেঞ্চুরী য়ৈরে”, হায়না মহাক্না মখা তাখি। প্রধান মন্ত্রীনা গ্রীন ইনর্জী কোরিদোর অমদি ইমপ্লোয়ীজ’ স্তেত ইন্স্যুরেন্স কোর্পোরেসন (ই.এস.আই.সি.) হোস্পিতালগীদমক বিকানের অমদি রাজস্থানগী মীয়ামগী মফমদা নুংঙাইবা ফোঙদোকখি।
প্রধান মন্ত্রীনা রাজস্থান অসি মতম পুম্বদা মতিং অমদি মতিক মপুং ফানা লৈবা লমদম অমা ওইদুনা লাক্লি। অসিগুম্বা খুমাঙ চাওশিনবগী মতিং লৈবসিননি স্তেত অসিদা রেকোর্দ ওইবা চাংদা ইনভেস্তমেন্ত তৌরিবা, হায়না প্রধান মন্ত্রীনা হায়খি। ইন্দস্ত্রিএল দিভেলপমেন্তকী লোইনাইদ্রবা ওইথোকপা য়াবশিং লৈবা মরম্না কন্নেক্তিবিতী অসি হায়-তেক ওইহল্লি। খোঙজেল য়াঙবা এক্সপ্রেসৱে অমদি রেলৱেনা তুরিজমগী খুদোংচাবা হেনগৎহন্দুনা স্তেত অসিগী নহাশিংদা কান্নহনগনি, হায়না মহাক্না হায়খি।
ঙসি শঙ্গাখিবা গ্রীন ফীল্দ এক্সপ্রেসৱেগী মতাঙদা পল্লদুনা, মসিনা রাজস্থানবু হরিয়ানা, পঞ্জাব, গুজরাত অমদি জম্মু অমসুং কাস্মিরগা শম্নহনবগা লোয়ননা জামনগর অমদি কানদ্লানচিংবা মরুওইবা কম্মর্সিএল সীপোর্তশিংবু বিকানের অমদি রাজস্থান্দগী চৎপা য়াহল্লগনি হায়না প্রধান মন্ত্রীনা হায়খি। জোধপুর অমদি গুজরাতকী মরক্তা লৈরিবা অরাপ্পা হন্থহনবগা লোয়ননা বিকানের অমদি অমৃৎসর অমদি জোধপুরগী মরক্তা লৈরম্বা অরাপ্পসু হন্থহন্দুনা লমদমসিগী লৌমী অমদি বিজিনেসশিংদা চাউনা কান্নহল্লগনি হায়না মহাক্না ফোঙদোকখি। “হায়রিবা গ্রীনফীল্দ এক্সপ্রেসৱে অসিনা নোংচুপ ভারত পুম্বদা শেন্মিৎলোনগী থবক থৌরমশিং হেন্না মপাঙ্গল কনখৎহল্লগনি”, হায়না প্রধান মন্ত্রীনা হায়খি অমদি ওইল ফীল্দ রিফাইনরিশিংগা কন্নেক্তিবিতী হেনগৎহনবনা সপ্লাই মপাঙ্গল কনখৎহন্দুনা লৈবাকসিগী শেন্মিৎলোন চাওখৎহনবদা খোঙজেল হাপকনি হায়না মখা তাখি।
রেলৱে লাইন দব্লিং তৌবগী মতাঙদা হায়রদুনা, প্রধান মন্ত্রীনা রাজস্থান্দা রেলৱেজ খুমাঙ চাওশিলহন্নবগী লমদা পীরিবা প্রাইওরিতীশিং পুথোক্তুনা থমখি। ইং ২০০৪-২০১৪গী মরক্তা রাজস্থান্না রেলৱেজকী মতাঙদা চাংচত্তা চহিদা লুপা করোর ১০০০দগী তানা ফংলম্মি, অদুগা ইং ২০১৪গী মতুংদগী স্তেত অসিনা চহিদা চাংচত্তা লুপা করোর ১০,০০০গী চাংদা ফংদুনা লাক্লি হায়বা ৱাফমসু মহাক্না থমখি।
প্রধান মন্ত্রীনা ইনফ্রাস্ত্রমচর পুস অসিনা খ্বায়দগী চাউনা কান্নহল্লিবা অসি অপীকপা বিজিনেসমেনশিং অমদি অপীকপা ইন্দস্ত্রীশিংনি হায়খি। বিকানেরগী অচার, পাফোর, নমকীনবু পল্লদুনা কন্নেক্তিবিতী ফগৎলবদি হায়রিবা অপীকপা বিজিনেসশিং অসিসু মখোয়গী পোত্থোকশিং লৈবাকসিগী কাচিন কোয়া থুংনা পুবা ঙম্লগনি হায়খনা মহাক্না হায়খি।
রাজস্থানগী চাওখৎ থৌরাংগী মতাঙদা মখা তারদুনা, প্রধান মন্ত্রীনা মতম কুইনা মীরায়বিদুনা লৈরুরবা ঙমখৈগী খুঙ্গংশিংগীদমক পায়খৎখিবা ভাইব্রেন্ত ভিলেজ স্কীমগী মতাঙদা পনখি। “ঐখোয়না ঙমখৈগী খুঙ্গংশিংবু লৈবাকসিগী ‘অহানবা খুঙ্গংশিং’ হায়না লাউথোক্তুনা, লমদমশিংসিদা চাওখৎপা পুরকপা ঙম্লি অমদি লৈবাক মীয়ামগী মফমদা হায়রিবা মফমশিং অসিদা চৎনিংবগী অনৌবা অপাম্বা অমা পোকহল্লি”, হায়না মহাক্না হায়খি।
প্রধান মন্ত্রীনা রাজস্থান্দা কর্নি মাতা অমদি সলাসর বলাজীগী থৌজাল ফংলি হায়খি অমদি স্তেত অসিনা হৌজিক চাওখৎপগী মতোল লোম্না লৈগদবা মতম্নি হায়খি। মরম অসিননি ভারত লৈঙাক্না অঙম্বা মততক ফুদোক্তুনা রাজস্থান খুমাঙ চাওশিলহন্নবা থবক পায়খৎলিবসি। পুম্নমক্না পুন্না হোৎনমিন্নবনা রাজস্থানগী চাওখৎপগী পান্দম মঙফাওনহনবা ঙমগনি হায়বগী থাজবা ফোঙদোক্তুনা মহাক্কী ৱারোল লোইশিনখি।
রাজস্থানগী গভর্নর, শ্রী কলরাজ মিস্রা, রোদ, ত্রান্সপোর্ত অমদি হায়ৱেজকী কেন্দ্র মন্ত্রী, শ্রী নিতিন গারকরী, লো অমসুং জস্তিসকী কেন্দ্র মন্ত্রী, শ্রী অর্জুন রাম মেঘৱাল, জল শক্তীগী কেন্দ্র মন্ত্রী, শ্রী গজেন্দ্র সিং সেখাৱত, অমদি লৌউ-শিংউ অমসুং লৌমীশিংগী য়াইফ-থৌরাংগী কেন্দ্রগী রাজ্য মন্ত্রী শ্রী কাইলাস চৌধরী অমদি অতৈ মীওই কয়াসু থৌরমদুদা শরুক য়াখি।
বেকগ্রাউন্দ
প্রধান মন্ত্রীনা অমৃৎসর – জামনগর ইকনমিক কোরিদোরগী লেন তরুক্কী গ্রীনফীল্দ এক্সপ্রেসৱে সেক্সন লৈবাক্কী মফমদা কত্থোকখি। রাজস্থান্দা কিলোমিতর ৫০০ হেন্না শাংনা লৈরিবা, হনুমানগর দিস্ত্রিক্তকী জখ্রাৱালী খউলদগী জলোর দিস্ত্রিক্তকী খেত্লাৱাস খুল ফাওবা থুংলিবা সেক্সন অসি লুপা করোর ১১,১২৫ রোম চঙনা শেমগৎপনি। এক্সপ্রেসৱে অসিনা অচৌবা ময়োল্লম, অমদি ইন্দস্ত্রিএল কোরিদোরশিংগী মরক্তা চৎপদা চঙবা মতম মশক থোক্না হন্থহনগনি অমদি কন্নেক্তিবিতী ফগৎহনগনি। এক্সপ্রেসৱে অসিনা পোৎচৈ অপনবা লৈতনা পুথোক পুশিন তৌবদা মতেঙ ওইহনবতা নত্তনা লম্বী পরিংসিদা তুরিজম অমদি ইকনমিক দিভেলপমেন্তকী ফীভমসু ফগৎহনগনি।
লমদমসিগী পৱার সেক্তরদা ইনোৎ অমা হাপ্লদুনা, প্রধান মন্ত্রীনা লুপা করোর ১০,৯৫০ রোম চঙনা শেমগৎখিবা গ্রীন ইনর্জী কোরিদোরগী ইন্তর-স্তেত ত্রান্সমিসন লাইনগী ফেজ-১ কত্থোকখি। গ্রীন ইনর্জী কোরিদোর অসিনা রিনিউএবল পৱার গিগাৱাৎ ৬ লোম ইন্তিগ্রেত তৌগনি অমদি নোংচুপ লমদমদা রিনিউএবল পৱার অমদি থর্মেল জেনেরেসনগী গ্রিদ বেলেন্সিং তৌবদা, অমদি অৱাং লমদমদা হায়দ্রো জেনেরেসন্দা মতেঙ পাংদুনা অৱাং অমদি নোংচুপ লমদমগী মরক্তা ত্রান্সমিসন কেপাসিতী মপাঙ্গল কনখৎহনগনি। প্রধান মন্ত্রীনা লুপা করোর ১,৩৪০ রোম চঙনা পৱার গ্রিদনা শেমগৎকদবা বিকানেরদগী ভিৱাদি ফাওবগী ত্রান্সমিসন লাইনসু কত্থোকখি। বিকানেরদগী ভিৱাদি ফাওবগী ত্রান্সমিসন লাইন অসিনা রাজস্থান্তা সোলার পৱার গিগাৱাত ৮.১ পুবদা মতেং ওইগনি।
প্রধান মন্ত্রীনা বিকানেরদা ফমুং ৩০ লৈবা নৌনা শাবা ইমপ্লোয়ীজ’ স্তেত ইন্স্যুরেন্স কোর্পোরেসন (ই.এস.আই.সি.) হোস্পিতাল লৈবাক্কী মফমদা কত্থোকখি। হোস্পিতাল অসি ফমুং ১০০ ফাওবগী কেপাসিতীদা অপগ্রেদ তৌবা য়াগনি অমদি লমদমদুগী মীয়ামগী মেদিকেলগী মথৌ তাবশিং ফংহন্দুনা অমদি এসেসিবল অমসুং ক্বালিতী লৈবা হকশেলগী সর্ভিসশিং ফংহন্দুনা মরুওইবা হেল্থকেয়র ফেসিলিতী অমা ওইগনি।
মখা তানা, প্রধান মন্ত্রীনা বিকানের রেলৱে স্তেসন নৌনা শেমগৎপগী উরেপ উয়ুং তমখি। লুপা করোর ৪৫০ রোম চঙনা নৌনা শেমগৎকদৌরিবা অসিদা হৌজিক লৈরিবা রেলৱে স্তেসন অদুগী স্ত্রকচরশিংগী হেরিতেজ স্তেতস ঙাক্না ফ্লোরিং অমসুং সীলিং য়াওনা প্লেতফোর্ম পুম্নমক নৌনা শেমগৎকদবনি।
কিলোমিতর ৪৩ শাংবা চুরু – রতনগর সেক্সন দব্লিং তৌবগী উরেপ উয়ুংসু প্রধান মন্ত্রীনা তমখি। রেল লাইন অসি দব্লিং তৌবনা কন্নেক্তিবিতী ফগৎহনগনি, অমদি জীপসন, শুনু নুং, ফৌ-চেঙ অমদি হারগী পোত্থোকশিং বিকানেরদগী লৈবাক্কী অতৈ মফমশিংদা পুথোক পুশিন তৌবদা লায়হল্লগনি।
*****
(Release ID: 1938399)
Visitor Counter : 102
Read this release in:
Malayalam
,
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada