হকশেলগী কেন্দ্র মন্ত্রী, দাঃ মনশুখ মন্দাবিয়ানা ঙরাং পাংথোকপা নেস্নেল বোর্দ ওফ একজামিনেসন ইন মেদিকেল সাইন্স (NBEMS)কী 42শুবা ফাউন্দেসন দেগী থৌরম মপু ওইদুনা রাজ্য মন্ত্রী প্রোফঃ এস.পি. সিংহ ভগেল, নিতি আয়োগকী হেল্থকী মেম্বর, দা” ভি.কে. পাউল য়াওবা থৌরম অমদা মরু ওইবা ৱারোল থমখ্রে।

কেন্দ্রগী হকশেল মন্ত্রীনা ইন্সতিত্যুত অমসুং মসিগী গবর্নিং বোদীশিংবু মখোয়না লৌখৎখিবা খোঙথাং অমসুং মখোয়না হৌদোকখিবা কোর্স কয়াগীদমক্তা থাগৎপা ফোংদোক্লদুনা মমাংগী চহি অনিদা, কোর্স 25 হৌদোকখি হায়না ফোংদোকখি। মসিগী গ্রোথ অসিনা মেদিকেল মহৈরোইশিংদা হেন্না চাউবা খুদোংচাবা পীনবা তেংবাংগনি অমসুং হকশেল ফবা খুন্নাই অমসুং লৈবাক অমা ওইহন্নবা লৈবাক্কী তঙাই ফদবশিং পীবা ঙমহন্দুনা ভারতনা খ্বাইদগী ফবা হেল্থ সর্ভিস অমসুং হৈ-শিংলবা দাক্তর কয়া শেম্বা ঙমগনি হায়না মহাক্না হায়খি। লৈবাক্কী চাউখৎ থৌরাংদা মেদিকেল সেক্তরনা য়াম্না মরু ওইবা থৌদাং লৌই হায়না মহাক্না ফোংদোক্লদুনা লাক্কদৌরিবা চহিশিং অসিদা ভারতপু চাউখৎপা লৈবাক অমা ওইহন্নবা মহৈরোইশিংনা মশাগী থৌদাং য়াদুনা খোঙফম চেৎকদবনি হায়না মহাক্না ফোংদোকখি।

কেন্দ্রগী হকশেল মন্ত্রীনা মখাগী খোঙথাং 9 অসি হৌদোকখিঃ

1. মেদিসিনগী লমদা NBEMSকী অনৌবা ফেলোশিপ কোর্স 11
2. ইমর্জেন্সী মেদিসিনগী লমদা NBEMS দিপ্লোমা
3. NBEMS একজাম কম্মান্দ সেন্তর
4. NBEMS সেন্তর ফোর কম্প্যুতর বেজ তেস্ত
5. NBEMS গুদ ক্লিনিকেল প্রেক্তিস গাইদলাইন (2^শুবা ইদিসন)
6. জোইন্ত এক্রেদিতেসন প্রোগ্রাম অমসুং এক্রেদিতেসন ওফ স্তেন্দ এলোন লেব অমসুং দাইগ্নোস্তিক সেন্তর
7. NBEMS স্কিল অমসুং ভর্চুএল ত্রেনিং প্রোগ্রাম
8. NBEMS ওজাশিংগী ফেকলতী তাইতল হৌদোকপা
9. NBEMS মেদিকেল লাইব্রেরী

দাঃ মন্দাবিয়ানা প্রোফঃ এস.পি. ভগেলগা লোয়ননা মখাগী কেতগরীশিংদা হেল্থকেয়র এক্সপর্তশিংদা মনা পীখিঃ

1. নারি শক্তি এৱার্দ
2. হকশেল অমসুং য়াইফ য়ুম্বালগী এৱার্দ ওফ এক্সেলেন্স
3. একজেক্যুতিব দাইরেক্তর সর্তিফিকেত ওফ এপ্রেসিএসন এৱার্দ
4. প্রসিদেন্ত NBEMS এৱার্দ ওফ এক্সেলেন্স

দাঃ ভি.কে. পাউলগী মফমদা প্রসিদেন্ত NBEMS এৱার্দ ওফ এক্সেলেন্স পীখি।

হেল্থকেয়র ৱর্করশিং, মরু ওইনা ইরাং কয়াবু হকথেংননা থেংনবা পেরা-মেদিকেল স্তাফশিংগী মথৌনাবু রাজ্য মন্ত্রীনা থাগৎলদুনা, মখোয়গী থৌদাংশিংনা ভারতপু পাৱর হাউস অমা ওইবগী শক্তাকপু মপাঙ্গল হেন্না লৈহনবদা অচৌবা থৌদাং লৌই হায়না ফোংদোকখি। বাসুদৈবা কুতুম্বাকম, ৱান আর্থ, ৱান ফেমিলী, ৱান ফ্যুচরগী মঙলান অসিগীদমক্তা প্রধান মন্ত্রীবু থাগৎলদুনা, মহাক্না অসুম্না হায়খি, “মসিনা ঐখোয়গী ইফমদা হকশেল ফবা ভারত অমখক্কী নত্তনা হকশেল ফবা মালেম অমা পুরক্নবা ইথিল পীরি” অমসুং ‘ৱান আর্থ, ৱান হেল্থ’কী মোত্তোগসু অমত্তা ওইহল্লি”।

প্রোফঃ এস.পি. সিংহ ভগেলনা ভারতকী দাক্তরশিংগী মপাঙ্গল অমসুং ভেল্যুনা মরম ওইরগা মালেমগী শরুক অমা হেক্তদা ভারত মচা দাক্তর অমা অদুম ফংগনি হায়না মখা তানা ফোংদোকখি। মহাক্না ABHA কার্দ অসিবু ভারতনা নিংতম্বা মতুংদগী ফংখিবা খাইদগী চাউবা মায় পাকপগী মনুংদা অমা ওইরি অমসুং মসিনা মরম ওইরগা হেল্থকেয়র সর্ভিসপু খ্বাইদগী মনুং হঞ্জিনবা মফমদা পীবা ঙমদুনা শোত্থরবা খুন্নাইশিংদা তেংবাংবা ঙমহল্লিবনি। মেদিকেল এজুকেসন্না সনাগী য়ুগতা হৌজিক লৈরি হায়না ফোংদোক্লদুনা, মহাক্না ঙসিগী ভাবোক মরক্তা য়াওরিবা তোপ্পরশিংনা মখোয়গী এক্সপেরিএন্স অমসুং ইথিলশিংবু অপীকপা শহর অমসুং খুঙ্গংদা লৈবা কোলেজ অমসুং স্কুলশিংদা শেয়র তৌদুনা মখয়না ঙসি লৈরিবা থাক অসিদা মখোয়সু য়ৌবা ঙমহন্নবা ইথিল পীনবা হায়খি।

ঙসিগী মীয়ামদা ৱা ঙাঙবদা, দা” ভি.কে. পাউলনা মেদিকেল এজুকেসন অমসুং মরী লৈনবা ইন্সতিত্যুসনশিংনা ঙসি লৈরিবা চাউখৎপগী থাক অসিবু থাগৎখি অমসুং মমাংগী চহি মাপন্দা লাকখিবা অহোংবশিংদা মীয়ামগী পুক্নিং চীংশিনখি। সেক্তর অসিগী মায় পাকপশিংগী মতাংদা পল্লদুনা, মহাক্না হায়খি, “পথাপ অসিদা হৌদোকখিবা খোঙথাংশিংনা মরম ওইরগা হৌজিক্কী মতম অসিনা মেদিকেল এজুকেসন্দা অহোংবা অমসুং অওনবা পুরকপা মতম অমা ওইরি”। নেস্নেল বোর্দ ওফ একজামিনেসনগী পোস্ত গ্রেজুএত সিত মশিংনা 4000দগী 13000 হেন্না হেনগৎখ্রে হায়না মহাক্না মখা তাখি। পথাপ অসিগী থবক তৌবগী মতৌদা অহোংবা লাকপশিংদা মিৎয়েং চঙলদুনা, মহাক্না নেস্নেল মেদিকেল কম্মিসনবু অনৌবা রেগ্যুলেতর ওইনা হাপচিনবা, কম্পিতেন্সীদা য়ুম্ফম ওইবা করিকলম মনুং চনবা NEET হৌদোকপা, পোস্ত গ্রেজুএতকী অনিশুবা চহিদা তম্লিবা মহৈরোইশিংনা দিস্ত্রিক্ত হোস্পিতালশিংদা থা 3গী ওইনা মখোয়গী সর্ভিস শোইদনা পীহনবগী চৎনবী অমসুং মসিনা কনা লৈজদ্রবশিংবু তেংবাংবা ঙমহনবগী মতাংদা মহাক্না পনখি।

হীরম অসিদা লাক্লিবা চাউখৎ থৌরাংশিংবু মহাক্না পল্লদুনা, হন্দক্কী চহিমক্তদা অনৌবা কোলেজ 52 হাপচিনবগী রেকোর্দ ওইবা থৌওংগা লোয়ননা মেদিকেল কোলেজ মশিংনা 387দগী 704দা হেনগৎখ্রে অমসুং অন্দরগ্রেজুএতকী মেদিকেল মহৈরোইগী সিতনা 52000দগী 107,000দা অমসুং পোস্ত গ্রেজুএতকী ওইনা 32,000দগী 67,000দা হেনগৎখ্রে হায়না মহাক্না পনখি। দাঃ পাউলনা মসিদি সনাগী য়ুগনি, দাক্তর ওইরক্কদৌরিবা মহৈরোই অমসুং হীরম অসিগী এক্সপর্তশিংনা মশাগী খ্বাইদগী ঙমজবা খুদিংমক পুথোক্তুনা থৌদাং য়াগদবনি হায়খি।

নেস্নেল বোর্দ ওফ একজামিনেসন ইন মেদিকেল সাইন্স (NBEMS) অসিদি ভারত সরকারগী হকশেল অমসুং য়াইফ য়ুম্বাল মন্ত্রালয়গী ওতোনোমস বোদী অমনি অমসুং ভারত শিনবা থুংবগী মোদর্ন মেদিসিনগী লমদা পরিক্ষা পাংথোকপগী থৌদাংসু মখোয়গী মফমদা শিন্নৈ। NBEMSনা মেদিকেল এজুকেসনগী লমদা মমাংগী দিকেদ 4দগী থবক তৌদুনা লাক্লি অমসুং পোস্ত গ্রেজুএত অমসুং পোস্ত দোক্তোরেল ত্রেনিং পীনবা তোঙান-তোঙানবা হোস্পিতালশিংগী ইনফ্রাস্ত্রকচরশিং শিজিন্নদুনা লাক্লি। NBEMSনা NEET-PG, NEET-SS অমসুং NEET-MDS পরিক্ষাশিং চহি খুদিংগী মায় পাক্না পাংথোক্তুনা লাক্লি। NBEMSনা স্পেসিএলিতী মখল কয়াগী PG সিত 12,000 হেনবগা লোয়ননা হোস্পিতাল 1100 হেনববু এক্রেদিতেত তৌখ্রে।

হকশেল অমসুং য়াইফ য়ুম্বাল মন্ত্রালয়গী ওফিসিএল, NBEMSকী প্রসিদেন্ত অভিজিত সেথ, NBEMSকী হোনোরেরী একজেক্যুতিব দাইরেক্তর দাঃ মিনু বাজপাই, NBEMSকী গবর্নিং বোদীগী মেম্বরশিংসু থৌরম অসিদা শরুক য়াখি।

****