কেন্দ্রগী হকশেল অমসুং য়াইফ-য়ুম্বাল মন্ত্রী, দা. মন্সুখ মান্দৱিয়ানা ঙসি কচতা সাইক্লোন ‘বিপর্জোয়’গী মতাংদা লৌখৎখিবা চাকসিন-থোরাংশিং অদুবু য়েংশিনখ্রে। “য়াম্না কনবা সাইক্লোনিক স্তোর্ম” অমা ওইনা খঙনরিবা সাইক্লোন বিপর্জোয় অসি হয়েং জুন ১৫দা গুজরাতকী সমুদ্র খোংবানদা থুংলবা য়াই।

কেন্দ্রগী হকশেল মন্ত্রীনা ঙসি ইন্দিয়ন এবর ফোর্সকী ‘গরুদা’ ইমর্জেন্সী রেসপোন্স তীমনা লৌখৎলিবা চেকশিন-থৌরাংশিং অদুবু য়েংশিন্নবা ভুজ এবর ফোর্স স্তেশনদা চৎখি। য়েংশিল্লবা মতুংদা , মহাক্না হায়খি মদুদি “ঐখোয়গী জৱানশিংনা সাইক্লোন অসিদগী পুন্সি কন্নবা অমসুং পোৎচৈ, মাল-চাংশিং নিংথিনা ঙাক শেন্নবা মপুং ফানা শেম-শাদুনা লৈরে”।

দা. মান্দৱিয়ানা মতুংদা ইমর্জেন্সীগীদমক্তা শেম-শারিবা থৌরাংশিং অদুবু য়েংশিন্নবা ভুজকী কে.কে. পতেল সুপর স্পেসিয়েলিতী হোসপিতালদা চৎখি। মহাক্না কচ দিস্ত্রিক্ত গোব্রনমেন্ত হোসপিতালশিং, ত্রস্ত-রন হোসপিতালশিং অমসুং লমদম অদুদা লেরিবা অতোপ্পা হোসপিতালশিংদা ওক্সিজেন, ভেন্তিলেতরশিং অমসুং ক্রিতিকেল কিয়র বেদশিং মরাং কাইনা লৈব্রা নত্রগা লৈতব্রা হায়বগী মতাংদা য়েংশিনখ্রে।

কেন্দ্রগী হকশেল মন্ত্রীনা সাইক্লোনগী মতুংদা করিগুম্বা তঙাইফদনা মথৌ তারবদি খুদক্তা ফংহন্নবগীদমক্তা হকশেলগী ফেসিলিতীশিংগী শেম-শারিবা থৌরাংশিং অদুবুশু য়েংশিনখ্রে।

দা. মান্দৱিয়ানা মখাতারকপদা কচতা লৈরিবা ১০৮ ইমর্জেন্সী এম্বুলেন্স সর্বিসকী দ্রাইভরশিং অদুগা ৱারি-ৱাতাই শানখি অমসুং “মখোয়গী থৱাই য়াওবা অমসুং সপোর্ত অদুনা থাজবা হেনগৎহল্লি” হায়না হায়খি।

কেন্দ্রগী হকশেল মন্ত্রীনা থাজবা পীরকখি মদুদি “ইকাইখুম্নরবা প্রধান মন্ত্রীগী লমজিং-লমতাক মখাদা, সাইক্লোন বিপর্জোয় অসিগা মায়োক্ননবা কেন্দ্র অমসুং রাজ্য সরকারসিংনা তৌবা ঙম্বা এরেঞ্জমেন্ত খুদিংমক তৌরি”।

****