ঙসি নিউ দিল্লিগী বিজ্ঞান ভাবন্দা য়ুনিয়ন হোম মিনিস্তর অমসুং কোওপরেসন মিনিস্তর শ্রী অমিত সাহনা লুচিংদুনা রাজ্যশিং/য়ুনিয়ন তেরিতোরিশিংগী দিজাস্তর মেনেজমেন্তগী মিনিস্তরশিংগী মীফম অমা পাংথোকখ্রে। প্রধান মন্ত্রী শ্রী নরেন্দ্র মোদীগী ভিজন @2047 গী মখাদা, মীফম অসিগী মরুওইবা পান্দমদি ভারত অমাং-অতা মায়োক্নবা ঙম্নবা লৈবাক অসিদা দিজাস্তর রিক্স রিদক্সন সিস্তেম মখা তানা মপাঙ্গল কনখৎহনবা অমসং রাজ্যশিং অমসুং য়ু.তিশিংগী লৈঙাকশিংগা লোয়ন্না দিজাস্তর মেনেজমেন্তগা মরী লৈনবা তোঙান-তোঙানবা ৱাফমশিং খন্ন-নৈনবনি।

মহাক্কী ৱারোলদা, য়ুনিয়ন হোম মিনিস্তরনা লৈবাক অসিদা দিজাস্তর মেনেজমেন্তগীদমক লুপা করোর ৮০০০ হেনবগী অচৌবা স্কিম ৩ লাউথোক্লে :

১) রাজ্যশিংদা ফাইয়ার সর্বিস পাকথোক-চাউথোক্নবা অমসুং মতমগা চুনবা মওংদা শেমগৎনবা লুপা করোর ৫,০০০গী প্রোজেক

২) মীশিং খ্বাইদগী য়াম্বা মেত্রো ৭- মুম্বাই, চেন্নাই, কোলকাতা, বেঙ্গালুরু, হায়দ্রবাদ, অহমেদবাদ অমসুং পুনেদা সহরদা ঈশিং চাউবগী খুদোংথিবা হন্থহন্নবা লুপা করোর ২,৫০০গী প্রোজেক

৩) রাজ্যশিং/য়ু.তিশিং ১৭দা লৈবাক নিংখায়বা থিংনবা নেসনেল লেন্দস্লাইদ রিক্স মিতিগেসন প্রোজেক্কী লুপা করোর ৮২৫
মহাক্না হায়খি অমাং-অতা থোকপদগী মীওই অমা ফাওবগী পুন্সি মাঙহন্দবা হায়বসি ঐখোয়গী পান্দম ওইগদবনি, প্রধান মন্ত্রী মোদীগী লমজিং মখাদা, মসিগী পান্দম অসি ফংনবা হৌখিবা চহি ৫ দা রাজ্য খুদিংমক্না থবক পায়খৎলে।

য়ুনিয়ন হোম মিনিস্তরনা হায়খি জাতি থাক্তা থৌশিলশিং শেম্নবা অমসুং হন্না য়েংশিন্নবা মীফম মনুংদা খন্ন-নৈনবা অসি তঙাইফদে। হৌখিবা চহি ৯ দা কেন্দ্র অমসুং রাজ্যশিং থবক কয়া মাইপাক্না পাংথোক্লে, অদুবু ঐখোয় পেন্থোক্লোইদবনি। অমাং-অতাশিংগী মওং হোংলে, মখোয় তোইনা থোকপগী চাং অমসুং অকনবসু হেনগৎলে, মরম অদুনা ঐখোয়না ঐখোয়গী শেম-শাবা পাকথোক-চাউথোকহনগদবনি অমসুং ফগৎহনগদবনি। অনৌবা মফম কয়াদা অনৌবা অমাং-অতা কয়া হৌজিক থোক্লে, মসিগীসু ঐখোয় ইশামক শেম-শাগদবনি।

শ্রী অমি সাহনা হায়খি ২০০৪ মতুংদা, জাতিগী থাক্তা দিজাস্তর মেনেজমেন্তগী নিংথিনা খন্নরবা মতুংদা,  কেন্দ্র অমসুং রাজ্যগী থাক্তা অপুনবা ওইনা থৌদাং লৌমিন্ননবা অমসুং থবক পায়খৎনবা থৌরাং অমা পুথোক্লে।  কোবিদ-১৯ লাইচৎ মনুংদা, প্রধান মন্ত্রী শ্রী নরেন্দ্র মোদীগী লমজিং মখাদা, চহিচা অসিগী খ্বাইদগী শাথিরবা লাইচৎ মাইপাক্না লাকশিনখি। খুদোংথিবা মতম অদুদা, হিরম খুদিংমক্তা পুন্না লান্থেংমিন্নবগী অফবা খুদম অমা কেন্দ্র সরকার, রাজ্যশিং অমসুং মীয়াম্না মালেমদা উৎখি। সরকার অসিনা কোরোনাগী তিকা করোর ২২০ হেন্না লেম্না পীখি, লায়রবা মীওইশিংগী চীঞ্জাক ফংহনখি, শিন্মী লাখ কয়া মখোয়গী য়ুমশিংদা পুরকখি অমসুং দি.বি.তিগী খুৎথাংদা মখোয়গী খুদোংচাদবশিং কোকহন্নবা থৌরাং তৌখি।

য়ুনিয়ন হোম মিনিস্তরনা হায়খি চহি খরগী মমাঙদা, অমাং-অতা থোকপদা ঐখোয়না পায়খৎলিবা অসি মতেং পাংবা অমসুং অৱাবা ফোঙদোকপা অসি খক্তনি, হৌখিবা চহি ৯ দা প্রধান মন্ত্রী শ্রী নরেন্দ্র মোদীগী লমজিং মখাদা, কৎথোকপগা লোয়ন্না কন্না হোৎনবদগী, ঐখোয়না ঙল্লিঙৈদা চেকশিনৱা পীনবা থবক, মাঙজৌন্না ঙাকথোকপা, মতেং পাংবা অমসুং হান্না থৌরাং তৌদুনা অমাং-অতা থেংন্নবা থবকশিং পায়খৎলে। অমাং-অতা থোকপগী চাং য়াম্না ৱাংবা জিলা ৩৫০দা নহারোল ভোলুন্তিয়ার লাখ ১ রোম শেমগৎনবা মোদী সরকারনা পান্দম অমা থম্লে, অমাং-অতা মনুংদা ঐখোয়না কান্নবা য়াম্না ফংলে। শুপ্নগী নুমিৎ ১০গী মনুংদা আই.এম.সি.তি তিমশিং ৭৩ রক থাদুনা হৌখিবা চহি ৪দা রাজ্যশিং মতেং পাংনবা কেন্দ্রনা থবক পায়খৎখি।

মহাক্না হায়খি ২০০৫-০৬ তগী ২০১৩-১৪ ফাওবা লোয়ন্না ২০১৪-১৫ দগী ২০২২-২৩ ফাওবগী চহি ৯গী মতম অসি চাংদম্নবদা,  এস.দি.আর.এফতা লুপা করোর ৩৫,৮৫৮গী ফন্দ পীখিবা অদু হৌজিক শরুক অহুম হেনগৎতুনা লুপা করোর ১,০৪,৭০৪ য়ৌরে। মসিগী মথক্তা, এন.দি.আর.এফতগী ফন্দ থাদোকপা শরুক অহুমদা হেনগৎতুনা লুপা করোর ২৫,০০০দগী হৌজিক লুপা করোর ৭৭.০০০ য়ৌরে। অমাং-অতা থোকপা হন্থহন্নবা অমসুং অমাং-অতা থোকখ্রবা মতুংদা তেংবাং পীবা অমসুং অমুক হন্না খুন্দা-লৈতানবা কেন্দ্র সরকার অমসুং রাজ্যশিংনা বজেতকী শেনফমশিং হেনগৎহল্লে। কেন্দ্র সরকারনা লুপা করোর ১৬,৭০০ পুথোক্তুনা, ২০২১দা নেসনেল দিজাস্তর মিতিগেসন ফন্দ শেম্লে অমসুং মতেং পাংবগী থবকশিংগীদমক এস.দি.এম.এফকী মখাদা লুপা করোর ৩২,০০০ থম্লে।

শ্রী অমিত সাহনা হায়খি ইন্দিয়া দিজাস্তর রিছোর্স নেতৱার্কনা লৈবাক শীনবা থুংনা রেকোর্দশিং খোমজিল্লে অমসুং মসিদা অনৌবা রেকোর্দ লাখ ১ হেন্না হাপচিল্লে। লুপা করোর ৩৪৫ শেনফম অমগা লোয়ন্না এম.এম.এসগী খুৎথাংদা কম্মন অলার্তিং প্রোতোগোল থবক ওইনা পায়খৎনবা থৌরাং অমসু লৈরে। দিজাস্তর মেনেজমেন্ত ইনফোর্মেসন সিস্তেম পোর্তেল, ১১২ ইমর্জেন্সি রেসপোন্স সপোর্ত সিস্তেমগুম্বা থবকশিং কান্নরে অমসুং মাইকৈ কয়াগী থবকশিং পায়খৎলে। দিজাস্তর মেনেজমেন্তগী লমদা থবক তৌবা লনাই মীওইশিং অমসুং লুপশিংদা সুভাস চন্দ্র বোস আপদা প্রবন্ধন পুরুস্কার পীবগী চৎনবগী প্রধান মন্ত্রী মোদীনা হৌদোক্লে, মসিনা হিরম অসিদা থবক তৌরিবা লনাই মীওইশিং অমসুং লুপশিং তশেংনা পুক্নিং থৌগৎলে।

য়ুনিয়ন হোম মিনিস্তরনা হায়খি লৈবাক অসিদা ঈশিং ইচাউ লাকশিন্নবা ইসরোনা অৱাং-নোংপোক্তা ঈশিং লৈবা মফম ২৭১ মশক খঙদোক্লে। মমাঙদা, আই.এম.দিনা নোং চুবা অমসুং মসিনা ইচাউ থোকহনবগী মতাংদা নুমিৎ ৩ গী মমাঙদা মাঙজৌন্না লাউথোক্লম্মী, মসি হৌজিক নুমিৎ ৫ গী মমাঙদা লাউথোক্লে, মসিনা মী কনবগী থবকশিংগী অহেনবা মতম পীরে, মথং চহিদগী মসি নুমিৎ ৭গী মমাঙদা লাউথোক্নবা পাউতাকশিং পীখ্রে। ইচাউ থোক্কনবা অচৌবা তুরেল ১৩গী তোর্বানশিংদা ইনভাইরোনমেন্ত, ফোরেস্ত অমসুং ক্লাইমেত চেঞ্জ মিনিস্ত্রিনা উ চারাশিং থাদুনা ঈশিং ইচাউ লাকশিল্লে।

শ্রী অমিত সাহনা হায়খি নিউক্লিয়ার পৱার প্লান্তশিং  শেমগৎলিবা রাজ্যশিং শীনবা থুংনা লৈরিবা পৱার প্লান্ত ৭ এন.দি.এম.এনা য়েংশিনখ্রে অমসুং করিগুম্বা খুদোংথিবা থোকপা মতমদা মী কন্নবা রাজ্যশিংদা অকনবা চৎন-কাংলোনশিং থাখ্রে। রাজ্যশিংগী মিনিস্তরশিংনা থবক অসি মরুওইনা লৌগদবনি অমসুং নিউক্লিয়ার পৱার প্লান্তশিং থবক হৌদ্রিঙৈদা দিজাস্তর মেনেজমেন্তগা মরী লৈনবা দরকার ওইবা থৌরাংশিং মপুংফানা পায়খৎকদবনি। অকনবা নুংশাগী মৈশাগী মতাংদা রাজ্য ২৩দা ৱার্কশোপশিং পাংথোকখ্রে। লৌমীশিংদা ক্ষেতিপুরোন পীনবা  রাজ্য খরনা পাউতাকশিং পীরক্লে, ৱাফম অসি সরকারনা শোইদনা য়েংশিনগনি। মসিগীদমক রাজ্যশিংনসু মখোয়গী বজেতকী শেনফম হেনগৎহনগদবনি। মোদেল ফাইয়র বিল চৎন্নবা অমসুং রাজ্যশিং শীনবা থুংনা চপ মান্নবা লো চৎন্নবা য়ুনিয়ন হোম মিনিস্তরনা রাজ্যশিংদা খঙহনখ্রে।  

শ্রী সাহনা হায়খি মীয়ামদা চেকশিনৱা পীনবা চৎন-কাংলোনশিংগী ঐখোয়না ৱারেপ লৌবা লোইরে। রাজ্য ৮গী জিলা ৮৭ দা দিস্ত্রিক দিজাস্তর মেনেজমেন্ত প্লান্তশিংগী শেম-শাবা হৌজিক ফাওবা লোইদ্রি, মখোয় অথুবা মতমদা লোইশিল্লগনি। অখাক-অরাও অমসুং ব্রজ তাবগী মতাংদা রাজ্য থাক্কী এক্সন প্লান কেন্দ্রনা পীখ্রে অমসুং রাজ্য/য়ু.তি ২৫ হেনবনা মসি কেন্দ্রগা লোয়ন্না থবক তৌমিন্নদ্রি। ব্রজ তাবদগী মীওই অমতা শিহন্দনবা ঐখোয়না থবক পায়খৎকদবনি অমসুং মরম অদুনা হায়রিবা রাজ্য/য়ু.তি ২৫ অসিনা মাইকৈ অসিদা থবক তৌগদবনি।  অইংবা নুংশিৎ অমসুং লৈচিলগী মতাংদা কেন্দ্রনা রাজ্যশিং অমসুং য়ু.তিশিংদা রাজ্য থাক্কী এক্সন প্লান থাখ্রে অমসুং মসিগীদমক রাজ্যশিং অমসুং য়ু.তিশিংনা থৌরাং তৌদ্রি। মরী লৈনবা খুদিংমক্না মসি অথুবা মতমদা থবক ওইনা পাংথোক্নবা হোৎনগদবনি। রাজ্য অমসুং য়ু.তি ২০দা ইন্সিদেন্ত রেসপোন্স সিস্তেম থবক ওইনা পায়খৎলে অমসুং রাজ্য ১৬ তা মসি থবক ওইনা পায়খৎত্রি।

দিজাস্তরগী থৌরাং তৌবা, থেংনবা, নিউক্লিয়ার পৱার প্লান্তশিং, মাঙজৌন্না চেকশিনৱা পীবা, মতেং পাংনবা ফন্দশিং শীজিন্নবা, স্তেৎ দিজাস্তর রেসপোন্স ফোর্সশিং(এস দি আর এফ), স্তেৎ দিজাস্তর মেনেজমেন্ত ওথোরিতিশিং(এস দি এম এ), দিস্ত্রিক দিজাস্তর মেনেজমেন্ত ওথোরিতিশিং লিংখৎপা অমসুং মপাঙ্গল কনখৎহন্নবা অমসুং মীয়াম্না মশানা য়ানা থবক তৌবা পুক্নিং থৌগৎনবা হায়রিবা হিরমশিং অসিদা মীফম মনুংদা খন্নখি।

মীফম অদুদা রাজ্য সরকারশিং অমসুং য়ুনিয়ন তেরিতোরিশিংগী মিনিস্তরশিং অমসুং মীহুৎশিংনা মখোয়গী ওইবা মরুওইবা ৱাফমশিং পুখৎলকখি। মখোয় মখোয়গী রাজ্যশিংদা পায়খৎলিবা খ্বাইদগী ফবা থবকশিং মখোয়না উৎখি অমসুং দিজাস্তর মেনেজমেন্তগী লমদা তুংদা থেংনরক্কদবা শিংনবশিংগী মতাংদা মখোয়গী ওইবা ৱাফমশিং ফোঙদোকখি।

মীফম মনুংদা, হৌখিবা চহি ৯দা কেন্দ্র অমসুং রাজ্যশিংনা মাইপাক্না পাংথোকপা ঙমখিবা থবকশিং শকখঙবা উৎখি। পুন্না থবক তৌমিন্নবা অসিনা পুন্সি মাঙবা, লন-থুম মাঙবা অমসুং হিংনবগী লম্বী মাঙবা হন্থহনবা ঙমগনি হায়না মীফম অদুদা অমুক হন্না ৱারেপ লৌখি।

রাজ্যশিংগী চীফ মিনিস্তরশিং/মিনিস্তরশিংগা লোয়ন্না, য়ুনিয়ন তেরিতোরিশিংগী লেপ্তনেন্ত গভর্নরশিং/এদমিনিস্ত্রেতরশিং, রাজ্য সরকার/য়ু.তিগী দিজাস্তর মেনেজমেন্ত দিপার্তমেন্তগী সেনিয়র ওফিসারশিং, মেম্বর (এন দি এম এ), দিরেক্তর জেনেরেল(এন দি আর এফ), দিরেক্তর জেনেরেল(এফ.এস, সি.দি অমসুং ঐচ.জি), ইজিকিউতিপ দিরেক্তর(এন আই দি এম) অমসুং হোম এফেয়ার্সকী সেনিয়র ওফিসিএলশিং মীফম অদুদা শরুক য়াখি।

***